Bushe Baibolo mu Cine Cine ca Bupe Ukufuma Kuli Lesa?
“NALISUMINA ukuti Baibolo e ca bupe cawamisha ico Lesa abala apeela ku muntu.” Uko kulandapo kwacitilwe na Abraham Lincoln, presidenti walenga 16 uwa United States.a Taali eka mu kutesekesha kwakwe ukwa ici citabo cakokwesha.
Shicalo wa mu mwanda wa myaka walenga 19 umwina Britain William E. Gladstone alondolwele ukuti: “Baibolo yaishibikilwa ku Kuibela kwa Ntulo, kabili icipimo cishingalinganishiwako capaatukanya yene ukufuma ku fitabo ifili fyonse fimbi.” Mwi tontonkanyo limo line, shicalo wa mu mwanda wa myaka walenga 18 umwina America Patrick Henry atile: “Baibolo yalikatama ukucila ifitabo fyonse ifyabala afipulintwa.” Mu kushininkisha uwaebekeshiwa na Malembo, kateka umwina France Napoléon Bonaparte alandilepo ukuti: “Baibolo te citabo yaweyawe, lelo Cibumbwa ca Mweo, mu kuba na maka ya kucimfya abo bonse abakaanya yene.”
Kuli bamo, Baibolo yaba ni ntulo ya kwaafwa ne ya cisansamushi. Mushika Kampanya wa fitungu umwina America Robert E. Lee alondolwele ukuti: “Mu kupelenganishiwa kwandi konse no kumanama, Baibolo tayabala aifilwa ukumpeela ulubuuto no bukose.” Kabili pa mulandu wa kutesekesha kwakwe ukwa ici citabo, presidenti wa United States John Quincy Adams asosele ukuti: “Pa myaka iingi nalicipanga ukube cibelesho ukubelenga ukupulinkana Baibolo umuku umo cila mwaka.”
Nga ca kuti Uwapulishamo alipeela Baibolo ku mutundu wa muntu, kulingile ukubako ubushinino bwa kuti yalipuutwamo na bulesa. Ilingile ukukula ukucila icitabo icili conse cimbi. Kabili pa kuti Baibolo ibe intulo ya cine iya maka ne kambisho, ifwile ukuba iyashintililwapo umupwilapo. E co, lyene, icipusho cilashala, Bushe Baibolo mu cine cine ca bupe ukufuma kuli Lesa? Mu kukonkapo natufwaye icasuko kuli ico cipusho.
[Futunoti]
a Kwena, kwalibako ica bupe cacilapo ubukulu—Yesu Kristu.—Yohane 3:16.
[Ifikope pe bula 3]
William. E. Gladstone
[Abatusuminishe]
Icikope ca U.S. National Archives
Abraham Lincoln
[Abatusuminishe]
Icikope ca U.S. National Archives
Patrick Henry
[Abatusuminishe]
Harper’s U.S. History
Napoléon Bonaparte
[Abatusuminishe]
Ukulengwa na E. Ronjat
John Quincy Adams
[Abatusuminishe]
Harper’s U.S. History
Robert E. Lee
[Abatusuminishe]
Icikope ca U.S. National Archives