Abapwisha Isukulu lya Gileadi Bapokelela ica Bupe ca Mulimo wa Bumishonari
PA MARCH 1, 1992, ifilundwa 22 ifye kalasi lyalepwisha isukulu ilyalenga 92 ilya Watchtower Bible School of Gilead bapokelele ica bupe—ica bupe ca mulimo wa bumishonari. Lintu alelanda kwi kalasi, Lloyd Barry uwe Bumba Litungulula alondolwele ukuti: “Shi mwingapokelela ico ica bupe cawamisha mu kuba no buseko bukalamba, kabili shi mwingabomfya cene mu kuleta ubuseko kuli bambi.”
Abeni abalaalikwe bamo 4,662 ne filundwa fya lupwa lwa Bethel balibungene pa Ŋanda ya Kulonganinamo iya mu Jersey City, mu New Jersey, kuli programu ya kupwisha isukulu. Na bambi 970 pa fikuulwa fya mu New York ifya Watchtower Society mu Brooklyn, Wallkill, na Patterson balisuntinkanishiwe ku nsale sha lamya. Bonse bakutike mu kusakamanisha ilyo abapwisha isukulu balepeelwa ukufunda kwa kushalikapo uko kuli no kubaafwa ukukatamika nga nshi ica bupe ca mulimo wa bumishonari no kucibomfya mano mano.
Programu yaiswilwe mu kuba no kwimba kwacincimuka ukwa lwimbo namba 155, “‘Sekelelaneni’!” Pa numa, bonse baliseshiwe ilyo Frederick W. Franz, presidenti we Sukulu lya Gileadi uwa myaka ya bukulu 98, apepele ipepo lya kuyumfwa kwa ku mutima. Lyene, ceyamani, Carey Barber uwe Bumba Litungulula, asengeele bonse kuli programu ya kupwisha isukulu kabili asosele ukuti: “Takwatala akubako ukukabila kwakulisha kuli bamishonari ba ku Gileadi ukucila ilelo.” Ukukonka pa kulandapo kwakwe, alondolwele ukukonkana kwa malyashi ayepi, aya kwaafwa.
Curtis Johnson uwa Komiti ya Ŋanda ya Bethel e walandile mu kubalilapo, ukulundulula umutwe wa kuti “Sakamaneni Bwino Ibala Lyenu.” Munyina Johnson alandilepo ukuti lintu aba bamishonari abapya bafika ku kupeelwa kwabo ukwa mulimo, umo umo uwa bene ali no kukwata ibala lya ku mupashi ilya kulimamo. (1 Abena Korinti 3:9) Abantu ba kwa Yehova mu kusaalala kwa calo baba libala lya ku mupashi ilimesha ubulungami ne lumbo pa ntanshi ya nko shonse. (Esaya 61:11) ‘Fintu musakamana ibala lyenu ilya ku mupashi ku nshita ya ku ntanshi,’ e fyakomailepo kalanda, ‘fikambukila apakalamba ukutunguluka kwenu mu kupeelwa kwenu ukwa mulimo wa bumishonari.’ Cinshi cikabaafwa ukusakamana bwino ibala lyabo ilya ku mupashi? ‘Yehova kuti aba ilinga lya kucingilila ukushinguluka ibala lyenu ilya ku mupashi. Nga ca kuti muli abapampamina pa kukusha imilimo yalungama, twalilileni ukupalamina kuli wene mwi pepo, kabili lyene bombeni mu kumfwana na mapepo yenu.’
Mu kukonkapo, Lloyd Barry alandile pa mutwe wa kuti “Sekeleleni pe muli Shikulu.” (Abena Filipi 4:4) Mu kuba ne myaka ya kubelesha ukucila pali 25 iya bumishonari mu Japan nge ntulo ya fyebo, alikwete imitubululo ibomba ku kwaafwa abapwisha isukulu ukuipakisha ica bupe ca mulimo wa bumishonari. Alandilepo ukuti: ‘Mukasanga ukuti ubuseko mukakwata mu mulimo wa kwa Yehova bukamwaafwa ukucimfya ukukanshika ukwingi kabili nakalimo impika shimo isha ku mubili isho mukumanya.’ (Amapinda 17:22) Acinkwileko abalepwisha isukulu ukuti kuti pambi bakumanya injikalo ne mibele iyapusanako apakalamba kuli iyo babelesha. Kuti pambi bafwaikwa ukusambilila ululimi ulupya. ‘Mukakabila ukubombesha ku kusambilila ululimi. Lelo lintu mwaba na maka ya kumfwana mu kukakuka na bantu mu lulimi lwabo lwine, ici na co cikalunda ku buseko bwenu.’
Ukulundulula umutwe wa kuti “Tonteni Amenso Yenu pa Cilambu,” Eldor Timm uwa Komiti ya Fakitare e walandile mu kukonkapo. Cinshi caba icilambu? Bumi bwa muyayaya! Pa kunonka bwene tulingile ukusunga amenso yesu ayatontwa pali bwene. Kalanda alandile pa kupalana kumo no kupusana pa kati ka Bena Kristu muli nakatango wa bumi na babutuka ulubilo mu kucimfyanya aba mu mwanda wa myaka uwa kubalilapo. Ukupala ababutuka ulubilo, Abena Kristu bafwile ukuikansha mu kukosa, ukubaka amafunde, no kufuula ifya kuikobaika fyafina. Lelo ukupusanako na babutuka ulubilo aba cine cine, Abena Kristu baba muli nakatango wa nshita ya bumi bonse kabili bafwaya icilambu icaba ica muyayaya. Mu cifulo ca kubako uwa kucimfya umo, bonse ababutuka muli nakatango wa ku bumi ukufika ku mpela bakapokelela icilambu. Munyina Timm asondwelele ukuti: ‘Pa kunonka icilambu ca bumi, tufwile ukuba pa mutende na Yehova, Umupe wa cilambu. Kabili pa kuba pa mutende na Yehova, tulingile ukuba pa mutende na bamunyinefwe.’
Milton Henschel uwe Bumba Litungulula e walandile mu kukonkapo pa mutwe wa kuti “Mu Kutukoselesha kwa Malembo E mo Tube no Kucetekela.” (Abena Roma 15:4) ‘Pa myeshi isano iyapitapo,’ e fyatendeke kalanda, ‘mwali abapamfiwa na Baibolo. Ukupalamisha kukalamba nakukuulwa. Mwalikwata isubilo lyakosa. Ilyo muleya ku kupeelwa kwenu ukwa mulimo, twapaapaata ibukisheni umulandu isubilo lyenu lyabela ilyakosa. Caba ni pa mulandu wa kuti mwalikala mu kupalamisha ku Malembo.’ Ku kulanga ica kumwenako ca bulondoloshi bwalembwa mu Baibolo ubo bupuutamo isubilo, kalanda aloseshe ku Abapingushi ifipandwa 6 ukufika ku 8, ifyo fishimika fintu Gideone atuminwe ku kulubula Israele ukufuma ku lumanimani lwa bena Midiani. Pa numa ya kulanshanya ubulondoloshi bwalembwa no bucindami bwa buko ku kasuba kesu, alandilepo ukuti: ‘Lintu mwakwata ishuko lya mu nshita ku kupalamina ku Malembo no kutontonkanya pa lwa ifi fintu, cilamupembula. Mulakwata ubukose.’
Bonse balelolela ukumfwa ukufunda kwa kushalikapo kuntu bakafundisha bakalamba babili baali no kupeela abasambi. Jack Redford e walandile mu kubalilapo pa mutwe wa kuti “Citeni Icalungama.” Acinkwileko abalepwisha isukulu ukuti: ‘Pa Gileadi mwalikanshiwe mu kukumanina mu calungama ukulingana na Malembo. Nomba muleya ku kupeelwa kwa mulimo ukwa bumishonari ukwa kusonsomba. Kabili natwishiba ukuti nakalimo mukasanga impika shayafya mu nshila. Te mulandu ne ci, kabili te mulandu no kuyumfwa kwenu, natwishiba ukuti kuti mwacita icalungama.’ Cinshi cikaafwa? Ica kubalilapo, ukukwata imimwene yalungama iya bambi. Kalanda asosele ukuti: ‘Mwilaenekela ukupwililika ukufuma mu kukanapwililika.’ Ukukwata imimwene yalungama iya mibele ya kwesha na ko kwine kuti kwayafwa. ‘Bonse twalikwata inshita shisuma ne nshita shabipa mu bumi,’ e fintu asosele. ‘Uuli onse kuti abomba no kutunguluka. Ni fintu mubomba ne nshita shabipa e cikapima nampo nga mukashipikisha mu mulimo wa bumishonari.’—Yakobo 1:2-4.
Kalemba we sukulu, Ulysses Glass, asobwele umutwe wa kuti “Lisubilo Nshi ku Nshita ya ku Ntanshi?” Mwi shiwi lya buwishi, akoseleshe abapwisha isukulu ukusungilila isubilo lyabo ilyabilima. (Amapinda 13:12) ‘Ukutampa kwa kulufya isubilo te kuti pambi kwishibikwe,’ e fintu alondolwele. ‘Imibele kuti pambi yatulenga ukuba abapamfiwa mu kuba na mabuseko yesu mu cifulo ca kwampana kwesu na Lesa. Kuti pambi twalwala nelyo ukuyumfwa abasungwa bubi bubi kuli bambi. Bambi kuti pambi bakwata ifipe fya ku mubili ifyafulilako ukucila fintu tukwete nelyo kuti pambi bakwata ifya kufumamo fyawaminako mu butumikishi, kabili kuti pambi twaba aba kalumwa. Nga ca kuti twasuminisha ifintu fya musango yo panono panono ukuba e fyapulamo mu kutontonkanya kwesu, mu kwangufyanya bucine bwe subilo lya Bufumu bukashibantukila mu mutima wesu no muntontonkanya, kabili kuti pambi twaleka fye no kushipikisha muli nakatango wa bumi.’ Cinshi cingacitwa? ‘Imibombele yashininkishiwa ifwile ukubuulwa nga tuli no buukulula isubilo lyesu. Tufwile ukwisusha imintontonkanya yesu ne mitima mu kuba na masubilo yashininkishiwa aya kwa Lesa no kwalwila ukusakamana kwesu kwakumanina kuli bucine bwa Bufumu bwa kwa Lesa. Kabili tufwile ukupuuputula ukumfwana kwesu na Yehova, pantu ici mu kushininkisha cikatungulula ku buseko.’
Karl Klein uwe Bumba Litungulula apeele ilyashi lya kupwisha isukulu. Umutwe we lyashi lyakwe wali wa kuti “Mulandu Nshi uwa Kubeela Uwaicefya?” Kabili cinshi cili icasuko kuli ico cipusho? ‘Mulandu wa kuti cili e cintu calungama kabili icalinga ukucita, icintu ca mano kabili icabamo ukutemwa ukucita,’ e fintu alondolwele mu mashiwi yakwe aya kwiswila. Ibumba lyalicincimushiwe ilyo alelanda pa fya kumwenako fine ifya kuicefya fintu tucita bwino ukupashanya: (1) Yehova Lesa, uyo mu kushininkisha uwali uwaicefya lintu alebomba na Abrahamu na Mose (Ukutendeka 18:22-33; Impendwa 14:11-21; Abena Efese 5:1); (2) Yesu Kristu, ‘uwaicefeshe no kubo wa kunakila ukufika na ku mfwa pa [cimuti ca kucushiwilwapo]’ (Abena Filipi 2:5-8; 1 Petro 2:21); (3) umutumwa Paulo, ‘uwapyungile Shikulu ngo musha no bupete bonse’ (Imilimo 20:18, 19; 1 Abena Korinti 11:1); na (4) ‘abaletungulula pa kati kesu,’ ukupala presidenti wa kubalilapo uwa Sosaite, Munyina Russel, uwalembele inshita imo ukuti: “Umulimo uyo Shikulu abekelwa mu kubomfya ukulamuka kwesu ukwaicefya waba mulimo ushili wa kutendeka lelo uwa kukuula cipya cipya, ukuteulula, no kuleta mu kumfwana.” (AbaHebere 13:7, NW) Munyina Klein apeele ifishinka fya maka mu kulundapo ifya kubela abaicefya. Mu kushininkisha, ukumfwila ukufunda kwa kuba abaicefya kukaafwa abapwisha isukulu ukucita ukupingulapo kwa mano ku kubomfya ica bupe ca mulimo wa bumishonari!
Ukukonka pali uko kulandapo, ceyamani ayakene ukuposha kwapokelelwe ukufuma ku mbali shalekanalekana ishe sonde. Inshita nomba yalifikile ku bapwisha isukulu ukupoka amadiploma yabo. Bafumine ku fyalo cinelubali—Canada, Finland, France, Mauritius, Netherlands, Sweden, na United States. Lelo ukupeelwa kwabo ukwa mulimo ukwa bumishonari kulebatwala ku fyalo 11—Bolivia, Estonia, Grenada, Guatemala, Honduras, Hungary, Mauritius, Peru, Togo, Turkey, na Venezuela.
Pa numa ya kutuusha, programu ya cungulo kasuba yatendeke ne Sambililo lya Ulupungu lwa kwa Kalinda ilyaipifiwa ilyatungulwilwe na Joel Adams uwa Komiti ya Dipartimenti ya Mulimo. Pa numa ya ico, abapwisha isukulu bashimike ifya kukumanya fimo ifya mu mulimo wa mwi bala fintu baipakishe mu kati ka ciputulwa ce sukulu. Mu kupelako, icilangililo Mulandu Nshi Uwa Kucindikila Umuyano wa Teokratiki? calipeelwe ku kufundwa kwe bumba lyonse, ukusanshako abapwisha isukulu.
Mu cine cine, aba abapwisha isukulu baile ku kupeelwa kwabo umulimo ukwa cilendo mu kuba no kufunda no kukoselesha uko kukabaafwa ukubomfya ica bupe ca mulimo wa bumishonari ku kuleta ubuseko te ku bene beka lelo na kuli bambi.
[Charti pe bula 22]
Ukutantika kwe Kalasi
Impendwa ya fyalo fyaimininweko: 7
Impendwa ya fyalo fyapeelwe ukuyako: 11
Ubwingi bonse ubwa mpendwa ya basambi: 22
Avareji wa myaka ya bukulu: 33.4
Avareji wa myaka mu cine: 16.7
Avareji wa myaka mu butumikishi bwa nshita yonse: 11.8
[Icikope pe bula 23]
Ikalasi Lyalenga 92 Ilya Bapwishishe Sukulu lya Watchtower Bible School of Gilead
Mu mutande pe samba, imitande ipeelwe amanambala ukufuma pa ntanshi ukuya ku numa kabili amashina yatantikwe ukufuma ku kuso ukuya ku kulyo mu mutande umo umo.
(1) Chan Chin Wah, M.; Bouancheaux, N.; Chapman, B.; Östberg, A.; Cole, L.; Jackson, K.; Meerwijk, A. (2) Smith, J.; Wollin, K.; Chapman, R.; Gabour, N.; Chan Chin Wah, J.; Smith, C.; Edvik, L. (3) Bouancheaux, E.; Östberg, S.; Cole, K.; Jackson, R.; Gabour, S.; Edvik, V.; Meerwijk, R.; Wollin, G.