Isubilo Lilacimfya Ukupelelwa!

MULI Webster’s Ninth New Collegiate Dictionary, ukupelelwa kwalondololwa nga “ukulufya kwe subilo umupwilapo.” Mu kumfwika, lyene, pa kucimfya ukupelelwa, tukabila isubilo!

Umuntu washama uwapatikishiwa ukwikala mu mbali ya musebo te kuti apelelwe umupwilapo nga ca kuti nakwata isubilo. Isubilo kuti lyapeela fye na abo abalecula ku kushikitika kwa kupopomenwa no bulwele ubukose no lupikwe ku kushipikisha. Lelo isubilo lifwile ukuba ilyashintililwapo! Cinshi ici cipilibula?

Ishinte lye Subilo

Languluka icacitike kuli Sara, umukashi wa cikolwe Abrahamu. Ilyo alepalamina ku myaka ya bukulu 90, aali acili iŋumba kabili ali uwapelelwa pa nshita ntali ku kubala afyalapo umwana. Nalyo line, lintu umulume wakwe aali ne myaka ya bukulu 99, Yehova abwekeshepo ubulayo ubo acitile imyaka yafulilako ku numa—Abrahamu mu cine cine aali no kukwata “ulubuto,” nelyo impyani. Abrahamu alishibe ukuti ubu bwali bulayo bwashintililwapo. Elengenya fintu Sara afwile aali uwa nsansa lintu, mu cipesha amano, ica kuponako ca nsansa cacitike, kabili afyele Isaki! (Ukutendeka 12:2, 3; 17:1-4, 19; 21:2) Ukucetekela kwa kwa Abrahamu muli Lesa takwabikilwe bubi bubi, nga fintu fye no mutumwa Paulo alondolwele ukuti: “Pa kulosha amenso ku cilayo ca kwa Lesa, ukukanatetekela [takwanenwine Abrahamu]; lelo akoselele mu kutetekela, no kutasha Lesa.”—Abena Roma 4:20.

Ukulembela abaYuda ababele Abena Kristu mu kasuba kakwe, Paulo apelulwile ukuti bali no kushintilila pa bulayo bwa kwa Lesa ubwe pusukilo ukupitila muli Yesu pa milandu ibili iikalamba. Ukulosha ku bulayo bwa kwa Lesa kuli Abrahamu no Mulapo Wakwe uwa bulesa uwakonkelepo, umutumwa apaashishe ukuti: “Abantu balapo wacilamo ku bukalamba; na ku fikansa fyabo fyonse umulapo e mpela ku kukoshe cebo. E umo mwine Lesa, pa kufwayo kulangisha ku mpyani sha Cilayo ukubulwo kwaluka kwa mapange yakwe, abikilemo umulapo; ukuti mu fintu ifi fibili ifishingaaluka umo Lesa ashingabepa, tube no kusansamuka ukwakosa, fwe babutukile ku kwikatako ku ca kucetekelako icatubikilwapo.” (AbaHebere 6:16-18) Ee, amalayo ya kwa Lesa yaliba aya cine kabili ayengashintililwapo. Yehova aliba uwa maka yonse kabili mu kuibela uwaba na maka ya kwebekesha ukufikilisha kwa cebo cakwe.

Isubilo—‘Ilyashininkishiwa Kabili Ilyaikata’

Paulo alembele ukuti isubilo lya Bwina Kristu lyaliba ‘ilyashininkishiwa kabili ilyaikata.’ (AbaHebere 6:19) Paulo alishibe apo isubilo lyakwe lyashimpile imishila. Alondolola ukuti: ‘Isubilo lingila mu kati ka cipembe.’ Cinshi cintu ici cipilibula? Paulo mu kumonekesha alelosha kwi tempele lya pa kale mu Yerusalemu. Muno mwali umuputule Umwashilisha, uwapaatulwa ne cipembe ukufuma ku cimpangilile conse icashala. (Ukufuma 26:31, 33; Mateo 27:51) Kwena, itempele lya cine cine mu Yerusalemu lyalyonaulwa apalepa. E co, ilelo, cinshi cilingana na umu Umwashilisha?

Ku mulu kwine, uko Lesa umwine abe mfumu! Paulo alondolwele ici lintu asosele ukuti Yesu pa numa ya kunina kwakwe “taingile umwashila umwacitilwe ku minwe ya buntu [mwi tempele mu Yerusalemu] (umwapala fye umwine mwine); lelo aingile mu mulu mwine, ku kumonekela nomba ku cinso ca kwa Lesa pa mulandu wa ifwe.” (AbaHebere 9:24) E co isubilo lya Bwina Kristu, ilitwafwa ukulwisha ukupelelwa, lyashintilila te pali bapolitishani ba buntunse lelo pa mitantikile ya mu mulu. Lyashintilila pali Umo uo Lesa asontele, Yesu Kristu, uwapeele ubumi bwakwe nge cilubula ca pa membu shesu kabili uumonekela nomba ku cinso ca kwa Lesa pa mulandu wa ifwe. (1 Yohane 2:1, 2) Mu kulundapo, nga fintu calangwa libili libili mu mikululo ya uyu magazini, uyu Yesu umo wine e wasontwa na bulesa ukuteka nga Imfumu ya Bufumu bwa mu mulu ubwa kwa Lesa kabili alacite fyo ukutula mu 1914. Ubu Bufumu bwa mu mulu mu kwangufyanya bukafumyapo ifintu fipatikisha abengi ukuba abapelelwa.

Isubilo—“Inanga ya Mutima”

Pa kushinina bakabelenga bakwe ukuti isubilo lyabo ilya kupusuka ukupitila muli Yesu lyashimpilwe pa cishinka, Paulo abomfeshe ukulinganya. “Ili subilo,” (NW) e fyo alondolwele, ‘twakwata nge nanga ya mutima.’—AbaHebere 6:19.

Inanga shalishibikwe ku bayendo ukupala Paulo. Inanga sha pa kale shali ishapalana nga nshi ku sha muno nshiku, ilingi line ishipangwa ne fyela pa mpela konse kubili ukupala ameno ku kwikasha pa mulimba wa bemba. Mu nshila ukuya ku Roma mupepi no mwaka wa 58 C.E., ingalaba ya kwa Paulo yali mu busanso bwa kubunda. Lelo lintu ubwato bwaselele umushashika, aba mu ngalaba “bapoosele inanga shine.” Ca kutootela kuli isho nanga, ingalaba yalipusunswike ku nkuuka ukwabula ubusanso.—Imilimo 27:29, 39, 40, 44.

Cinshi, lyene, ufwile ukucita ku kulenga isubilo lyobe ukuba ilyacingililwa ukupala inanga pa kuti wingapusunsuka amafya ya fya bunonshi, ubulwele bwa ku mubili nelyo ubwa mu nkuntu, nelyo “inkuuka” ishili shonse shimbi isho pambi shingakwishila? Ica ntanshi, uyebekeshe we mwine ukuti amalayo ya Baibolo yaba ayengacetekelwa. ‘Shininkisheni ifintu fyonse.’ (1 Abena Tesalonika 5:21) Ku ca kumwenako, lintu Inte sha kwa Yehova bakalanda na iwe inshita ikakonkapo, ukakutike ku cintu basosa. Nga ca kuti batandala fye limo limo uko wikala, basapike pa Ŋanda ya Bufumu iyabela mupepi. Tawakapatikishiwe ukuilunda kuli bene, lelo ukalaalikwa ukupokelela kosi wa pa fye uwe sambililo lya Baibolo, ukupekanishiwa ukutungululwa ukuli konse kabili inshita iili yonse cili calinga kuli iwe.

Isambililo lya musango uyo likakwebekesha ukuti Lesa “aba kalambula wa bamufwayafwaya.” (AbaHebere 11:6) Ukasambilila ukuti mu kwangufyanya Ubufumu bwa kwa Lesa pe samba lya Mfumu, Kristu Yesu, bukafumyapo ukubola no lufyengo ifilenga abengi ukuba abapelelwa ilelo. Pe samba lya ubo Bufumu, ili sonde likabweshiwa kuli paradise, kabili Lesa akapeela ubumi bwa muyayaya kuli abo abamutemwa. (Ilumbo 37:29; Ukusokolola 21:4) Mwandi lisubilo lya bukata!

Belenga Baibolo mu kusakamanisha ku kumona ukuti ili subilo lya cine. Lyene bombela pa kulundulula ukwampana kwa pa lobe ukwapalamisha na Lesa, ukuba cibusa wakwe nga fintu fye Abrahamu aali. (Yakobo 2:23) Apantu Yehova aba “Komfwa we pepo,” mwebe ulwa kusakamikwa kobe. Lintu ukutununuka kobe kuli ukwafumaluka, ipepo lyobe likakwafwa ukwangushako ifisendo fyobe no kucimfya ukupelelwa kobe. Umupashi wa kwa Lesa kuti waisula fye ne nshila ku kwalula imibele iyo ilekulenga ubulanda.—Ilumbo 55:22; 65:2, NW; 1 Yohane 5:14, 15.

“Ikatisheni”!

Pa numa ya kutasha ukuti abasambi banankwe ‘bashininkishe ifintu fyonse,’ Paulo alundilepo ukuti: “Ikatisheni icawama.” (1 Abena Tesalonika 5:21) Inshila imo iya kucitilamo ici yaba kubishanya na bantu abo nabo bekatisha kwi subilo lya Bwina Kristu. Imfumu ya mano Solomone yasokele ukuti: “Enda na ba mano e lyo ukabo wa mano, lelo uucito bunabo ku bawelewele akacula.” (Amapinda 13:20) Wisuminisha impatila nelyo ukuyumfwa kwa kubipilwa ukukucilikila ukufuma ku kufwaya ukubishanya kusuma. Ku ca kumwenako, pa kati ka Nte sha kwa Yehova paba abantu abo ku numa bashali ne subilo. Lelo ukusambilila kwabo ukwa Baibolo, capamo no kubishanya kwa nsansa ukwa basumina banabo, filakosha ukwampana kwabo na Yehova no kubapayanishisha isubilo lyashintililwapo, ilyapala inanga. Bushe ili mu cituntulu lilacimfya ukupelelwa? Mu cine cine lilacimfya.

Buula umulandu wa kwa Annmarie, uwapatikishiwe ukuba uwapelelwa pa mulandu wa kucula ukusungwa kwa bunkalwe ku mulume wakwe. “Napingwilepo ukuipaya,” e fyo alondolola, “lelo ku mulandu umo napingwilepo ukupepa kuli Lesa intanshi. Ndebukisha ukusosa ukuti, ‘Mulandu nshi te kuti mungafwile? Pa nshita ntali nalisubila muli imwe, lelo ukwabula ukutunguluka.’ Nasondwelele ipepo lyandi ukutontonkanya ukuti takwaliko imifwaile ku bumi, cimo cine no kufwa. Pali ako kashita kwaliko uwalekonkonsha ku ciibi. Napingwilepo ukusuulako, ukusubila ukuti uuli onse uwalekonkonsha aali no kuya mu kupelako.

“Ukukonkonsha kwalitwalilile, kabili nalikalifiwe. Nakumwine ifilamba no kuyamona uwali pa mwinshi, ukusubila ukuilubula mu kwangufyanya pa kuti ningacita ico nalefwaya. Lelo,” e fisosa Annmarie, “ca kutootela kuli Yehova, tacacitike muli iyo nshila, pantu lintu naiswile ku ciibi, nasangile abanakashi babili beminine pa mwinshi. Ca cine, nalifulunganishiwe apakalamba, kabili nshaumfwikishe mu cituntulu cintu balesosa. Lelo balintambike icitabo ico cali no kulondolola ukuti ubumi bwalikwata imifwaile. E co fye nalekabila ku kubuukulula ubuseko bwandi mu bumi.” Abatandashi bakwe batantike isambililo lya Baibolo ilya lyonse na wene. Annmarie asambilile ifya kuba cibusa na Lesa. Ici, mu kukonkapo, camupeele imifwaile mu bumi. Nomba alaafwa bambi ukulundulula ukucetekela muli Lesa.

Nakalimo walisubila ulwa mpela ya kupelelwa ukwabula ukwishiba conse icabimbilwemo. Lelo nga ca kuti walibala aupepa ukuti: “Ubufumu bwenu bwise. Ukufwaya kwenu kucitwe pano nse nga mu mulu,” lyene walipepela ulwa kwisa kwa Bufumu bwa kwa Lesa pe samba lya kwa Yesu Kristu, ubo bukapwisha ifintu ifyo fipatikisha abantu ba mitima yalungama ukuba abapelelwa. (Mateo 6:10) Isambililo lya pa lobe ilya Baibolo no kubishanya kwa lyonse na bambi abakwata uko kucetekela kumo kwine fikakosha ukwikata kobe kwi subilo lya Bufumu bwa kwa Yehova ukwisa no kuleta Paradise kwi sonde lyesu. (1 Timote 6:12, 19) Ili e subilo lya bukata ilyo uyu magazini abilisha mu wafuma onse. Pokelela isubilo mu kukosa ku kulwisha ukupelelwa. Mu cine cine, isubilo ‘talituseebanya.’—Abena Roma 5:5.

[Icikope pe bula 7]

Ukusambilila Baibolo kutupeela isubilo ilyo libomba nga “inanga ya mutima”