Naliicefeshe Kabili Nasangile Insansa
MU 1970, nali ne myaka ya bukulu 23 kabili uwaibililika. Ku cifulo candi ica ncito pa kalabu ka myotoka mu Ivrea, Italy, nasalilwe ukuba kalaliki mukalamba. Nali uwapampamina ukuba kanabesa. Kabili nalyo line nali uwapopomenwa kabili uwa cintefwila. Mulandu nshi?
Umulume wandi alepoosa ubwingi bwa nshita yakwe mu fikuulwa fya bwalwa ukuteye njuka ne fibusa fyakwe, kabili anshiliile ukusunsa ifishingamo fya lupwa ifingi. Ukwampana kwesu kwatampile ukubotelela. Twaleumana pa tuntu utunono. Pamo nge ca kufumamo, umuntontonkanya wandi waiswilemo amatontonkanyo yabipa.
‘Tapali nangu umo uwaba uwasekelela muli iwe,’ e fyo nasosele. ‘Balefwaya fye ukushukila icifulo cobe.’ Naleisosha ukuti: ‘Lesa tabako pantu nga eko aba, te kuti asuminishe ukucula kwafule fi no bubifi. Ubumi bwaba fye ni nakatango ukulola ku mfwa.’ Nshaleumfwikisha umulandu ici cabelele ifyo.
Ukutendeka Ukwaluka
Bushiku bumo mu 1977, Inte sha kwa Yehova babili bakonkoseshe pa ciibi cesu. Umulume wandi, Giancarlo, alibalaalike ukwingila, kabili baile mu muputule wa kutushishamo ku kulanshanya. Ipange lyakwe lyali lya kuti babe abasumina mu kusanguka ukupala wene, lelo ni bene e baalwile ukutontonkanya kwakwe!
Mu kwangufyanya Giancarlo na o wine atendeke ukupanga ukwaluka mu bumi bwakwe. Abele uwacilapo ukutekanya, ukupeelesha inshita yakulilako no kusakamana kuli ine no mwana mwanakashi wesu. Aeseshe ukulanda kuli ine pa lwa fintu alesambilila, lelo lyonse naleputula ukulanshanya mu kuba no kulandapo kwa kukalifya.
Lyene bushiku bumo lintu Inte batandele, nalikele kabili nalikutike mu cituntulu. Balandile pa lwa mpela ya ino micitile ya fintu na pa lwa Bufumu bwa kwa Lesa, isonde lya Paradise, no kubuuka kwa bafwa. Nalisungwike! Nshasendeme inshiku shitatu ishakonkelepo! Nalefwaya ukwishiba ifyafulilako, lelo icilumba calencilikila ukufuma ku kwipusha umulume wandi ifipusho. Lyene bushiku bumo mu kukosa anjebele ukuti: “Lelo walakutika. Ninkwata ifyasuko ku fipusho fyobe fyonse.” Lyene apongolwele icine ca Baibolo kuli ine.
Giancarlo anjebele ukuti Yehova e shina lya kwa Kabumba, ukuti imibele yakwe ikalamba yaba kutemwa, ukuti Atumine Umwana Wakwe nge cilubula pa kuti twingakwata ubumi bwa muyayaya, no kuti pa numa ya bonaushi bwa babifi pa Armagedone, Yesu Kristu akabuusha abafwa mu kati ka Kuteka kwakwe ukwa Myaka Ikana. Asosele ukuti ababuushiwa bakakula ukufika ku kupwililika mu muntontonkanya no kwa ku mubili no kuti bakakwata ishuko lya kwikala kuli pe na pe muli Paradise pe sonde.
Ubushiku bwakonkelepo, nakonkele umulume wandi ku Ŋanda ya Bufumu pa muku wa kubalilapo. Pa numa namwebele ukuti: “Aba bantu balitemwana. Ndefwaya ukutwalilila ukulaisa kuno pantu baliba aba nsansa mu cine cine.” Natendeke ukusangwa ku kulongana lyonse, kabili isambililo lya Baibolo lyaletungululwa kuli ine. Nalitontonkenye nga nshi pa fintu nalesambilila kabili mu kwangufyanya nalishininwe ukuti nalisangile abantu ba kwa Lesa aba cine. Mu 1979 umulume wandi na ine twalangishe ukuipeela kwesu kuli Yehova ukupitila mu kubatishiwa.
Ubutumikishi bwa Nshita Yonse
Pa kulongana kwa muputule pa numa ulya mwaka, ilyashi lyalipeelwe ukukoselesha imibombele ya kushimikila kwa nshita yonse. Naliseshiwe ukutendeka ulya mulimo, kabili naile kuli Yehova mwi pepo pa lwa mulandu. Lelo nalimite, kabili amapange yandi yalipumfyanishiwe. Pa myaka yakonkelepo ine, twakwete abana batatu. Babili aba bene, pa tushita twapusana, bakwete ubulema bwa kutiinya ubumi. Ku ca kutootela, mu mulandu umo umo, balipolelele.
Nomba nayumfwile ukuti nshali na kuteulula na kabili amapange yandi ku butumikishi bwa nshita yonse. Nalilekele incito yandi iya ku calo no kutontomesha bwino pa fishingamo fyandi pamo ngo mukashi na nyina. Umulume wandi na ine twapangene ukwikalila ku malipilo yakwe, icapilibwile ukusuulako ku fili fyonse ifishikabilwa sana. Nalyo line, Yehova alitupaalile mu kufumba, ukukanabala atulekelesesha ku bupiina no kukabila.
Mu 1984 umwana mwanakashi wandi, uwali ne myaka 15 pali iyo nshita kabili uwabatishiwe mupepi na ilya ine nshita, atendeke ubutumikishi bwa nshita yonse pamo nga painiya. Pa nshita imo ine, umulume wandi alisontelwe nga eluda. Kabili ine? Ukuyumfwa ukuti ncili te kuti ncite bupainiya, naimike ubuyo bwa kufisha amaawala 30 cila mweshi mu mulimo wa kushimikila. Nalifikilepo kabili naisoseshe ukuti: ‘Mwabombeni! Ulecita ifingi.’
Na kabili, nangu ni fyo, icilumba cabele impika yandi. (Amapinda 16:18) Natwalilile ukutontonkanya pa fintu nalebomba bwino no kuti nshalekabila ukulunduluka kwa ku mupashi ukwalundwapo ukuli konse. Bumupashi bwandi bwatendeke ukubotelela, kabili natendeke fye no kulufya imibele yandi iisuma intu nanonkele. Lyene napokelele ukusalapulwa nalekabila.
Mu 1985 bakangalila benda babili na bakashi babo baali abeni mu ŋanda yesu ilyo balecita ukutandala kwabo ukwa mu nshita mu nshita ku cilonganino cesu. Ukubebeta aba Bena Kristu baicefya, abaipeela bulilambo mu cituntulu kwanengele ukwetetula pa milandu. Nalisapike pa mutwe wa kuicefya, ukubomfya impapulo sha Watch Tower Society. Natontonkenye pa kuicefya kukalamba uko Yehova alanga mu mibombele yakwe na ifwe fwe bantunse ababembu. (Ilumbo 18:35) Nalishibe ukuti nali no kwalula ukutontonkanya kwandi.
Napaapatile Yehova ku kungafwilisha ukulundulula ukuicefya pa kuti ningamubombela mu nshila alefwaya ukumubombelamo na ku kuntungulula ukubomfya ifya bupe nakwata ku bukata bwakwe. Naipwishe umulimo wa bupainiya, kabili natendeke ukumubombela mu butumikishi bwa nshita yonse mu March 1989.
Kuti nasosa ukuti ndi uwa nsansa mu cine cine no kuti ukuicefya e casangwilako ku nsansa shandi. Nalisanga umulandu wa cine cine uwa kubela uwa mweo—uwa kwaafwa abali mu kukabila ukwishiba ukuti Yehova, Lesa wa cine, taba kutali kuli abo abamufwayafwaya.—Nga fintu cashimikwa na Vera Brandolini.