Bushe Uleibukisha?
Bushe walitesekesha ukubelenga ishafuma isha nomba line isha Ulupungu lwa kwa Kalinda? Cisuma, mona nga wingasuka ifipusho fyakonkapo:
▫ Cinshi cingacitilwako icikope bwino ku mashuko yalundwako aya mulimo ayapeelwe ku bena Netinimu na bana baume ba babomfi ba kwa Solomone pa kubwela kwabo ukufuma muli bunkole mu Babiloni?
Ilelo, ilyo abashalapo ba kwa Israele wa ku mupashi pe sonde balatwalilila ukucepelako, impaanga shimbi balatwalilila ukwingilishiwako. Bamo aba aba bapale mpaanga, ukupala abena Netinimu na bana baume ba babomfi ba kwa Solomone, nomba balipeelwa ifishingamo fyafina pe samba lya bwangalishi bwa bashalapo. (Esaya 61:5)—4/15, amabula 16-17.
▫ Cinshi ico kasesema Sefania apilibwile lintu asosele ukuti: “Napamo kuti mwabelama mu bushiku bwa bukali bwa kwa Yehova”? (Sefania 2:2, 3)
Pa kuti onse acingililwe mu kati ka “bucushi bukalamba,” ubuleisa tauli mulandu wa kuti ukupusuka limo, e kupusukilila. (Mateo 24:13, 21) Ukubelama kwesu muli bulya bushiku kwashintilila pa kutwalilila kwa muntu ukucita ifintu fitatu: Afwile ukufwaya Yehova, ukufwayo bulungami, no kufwayo bufuuke.—5/1, amabula 15-16.
▫ Ni mu mano nshi Mikaele ‘ema’ mu “nshita ya ku mpela”? (Daniele 12:1, 4)
Ukutula lintu aimikwe nge Mfumu mu 1914, Mikaele ‘alimininina’ abantu ba kwa Yehova. Lelo mu kwangufyanya Mikaele “akema” mu mano yaibela nga nshi—nge Cibombelo ca kwa Yehova ku kufumyapo ububifi bonse ukufuma pe sonde kabili nga Kalubula wa bantu ba kwa Lesa.—5/1, ibula 17.
▫ Ni pali cinshi insansa sha cine shashintilila?
Insansa sha cine shashintilila pa kwampana kwesu kwauma umutengo na Yehova, ukusuminisha kwakwe, ne paalo lyakwe. (Amapinda 10:22) E ico, insansa sha cine te kuti shinonkwe ukwabula icumfwila kuli Yehova no kunakila kwabamo ubuseko ku kufwaya kwakwe. (Luka 11:28)—5/15, amabula 16, 19.
▫ Lintu Yesu acitile ifipesha amano fyakwe ifya kuposha, bushe icitetekelo calekabilwa pa lubali lwa uleposhiwa?
Icipimo cinono ica citetekelo calekabilwa pa lubali lwa bengi pa kuti bengesa kuli Yesu ku kuposhiwa. (Mateo 8:13) Nangu cibe ifyo, takwali ukulumbulula kwa citetekelo ukwakabilwe kuli Yesu ukucita ifipesha amano fyakwe, pamo nga lintu aposeshe umwaume walemana uushaishibe untu Yesu aali. (Yohane 5:5-13) Yesu aundepe fye no kutwi kwaputwilwe ukwa mubomfi wa kwa shimapapo mukalamba, uwali pa kati ke bumba lya balwani ba kwa Yesu. (Luka 22:50, 51) Ifi fipesha amano fyacitilwe mu kuba na maka ya mupashi wa mushilo uwa kwa Lesa, te pa mulandu wa citetekelo ca muntu walwala.—6/1, ibula 3.
▫ Cinshi caimininwako ne “sumbu” ilyalandilwepo mu mulumbe wa kwa Yesu pali Mateo 13:47-50?
“Isumbu” limininako icibombelo ca pe sonde iciitunga ukuba icilonganino ca kwa Lesa kabili ico cilonganikamo “isabi.” Casanshamo fyonse fibili Kristendomu ne cilonganino ca Bena Kristu basubwa, Aba kulekeleshako abatwalilila ukusala ‘isabi lisuma,’ pe samba lya kutungulula kwa bamalaika, mu kumfwana na Mateo 13:49.—6/15, ibula 20.
▫ Fishinte nshi fimo ifyo abapingushi mu Israele bali no kubomfya mu kubomba ukupeelwa kwabo ukwa mulimo?
Ubulungi bwa mulinganya ku bakankaala na babusu, ukukanapaatulula kwakosa, kabili ukukanapokelela amafisakanwa. (Ubwina Lebi 19:15; Amalango 16:19)—7/1, ibula 13.
▫ Cinshi cintu baeluda balingile ukwesha ukupwishishisha ukupitila mu kumfwa umulandu?
Ubuyo bumo kufwailisha ifishinka fya mulandu, ukucita ici mu kuba no kutemwa. Ilyo lyonse ifi fyaishibikwa, baeluda bafwile ukucita icili conse icilekabilwa ku kucingilila icilonganino kabili ukusungilila mu kati na nkati ka ciko ifipimo fyasumbuka ifya kwa Yehova no kukonkoloka kwakakuka ukwa mupashi wa kwa Lesa. Ukumfwa na kabili kwaba kwa kupususha, nga cingacitika, umubembu uuli mu busanso. (Linganyeniko Luka 15:8-10.)—7/1, amabula 18-19.
▫ Mulandu nshi ifya kwelenganya ifyaampana no kwampana kwa bwamba ukushili kwa mwi funde fyabela ifya kucena nga nshi?
Mu cilolwa ca mashiwi ya kwa Yesu pali Mateo 5:27, 28, bonse abo batwalilila ukuyobeka mu fya kwelenganya fya kwampana kwa bwamba ukushili kwa mwi funde balikwata umulandu wa kucita ubucende mu mitima yabo. Kabili kwalibako ubusanso bwine bwine ubwa kuti ifya kwelenganya fya musango uyo kuti pambi fyatungulula kuli bucisenene.—7/15, ibula 15.
▫ Ni mu nshila nshi Yehova pambi engatwafwilamo ukumona ifya kwesha fyesu mu kulinga na muli ifyo ukushipikisha fyene?
Amalembo limbi kuti yaletwa ku kusakamana kwesu na basumina banensu nelyo mu kati ke sambililo lya Baibolo. Ifya kucitika fyaseshiwe mu kulamuka ukupitila mu butungulushi bwa kwa Lesa kuti pambi fyatwafwa ukumona ifyo twingacita. Bamalaika kuti pambi baakanamo mu kututungulula, nelyo kuti pambi twapokelela ubutungulushi ukupitila mu mupashi wa mushilo. (AbaHebere 1:14)—7/15, ibula 21.
▫ Bushe icilye ca Nicaea mu 325 C.E. calimike nelyo ukupampamika icifundisho ca Bulesa Butatu?
Iyo, icilye ca Nicaea cilinganya fye Umwana na Wishi mu kuba “uwa musango umo.” Imfundo ya kuti Wishi, Umwana, no mupashi wa mushilo umo umo baba Lesa wa cine—batatu muli Lesa umo—tayaimikwe na cilya cilye atemwa kuli Bashibo be Calici aba mu kubangilila. 8/1, ibula 20.
▫ Bushe Yobo aali e muntunse e ka fye uwa busumino kuli Yehova mu kati ka ciputulwa ca nshita ico aikelemo? (Yobo 1:8)
Iyo, ibuku lya kwa Yobo line lilangilila ukuti Elihu alipokelelwe na Lesa. Na kabili, mu kati ka nshita ya kwa Yobo iyo aikelemo, kwaliko abena Israele abengi abaleikala mu Egupti, kabili takuli umulandu wa kutontonkanishisha ukuti bonse baali ababulwa ubusumino kabili abashapokelelwe kuli Lesa.—8/1, ibula 31.