Amasomo mu Kuba ne Mifwaile

“Sambilisho mulungami, na o alelundapo ukusambilila.”—AMAPINDA 9:9.

1. Cinshi cintu Yehova enekela ulwa babomfi bakwe ukulosha ku kwishiba?

YEHOVA ni “Lesa uwaishiba.” (1 Samwele 2:3) Alafundisha ababomfi bakwe. Mose asobele ukuti abantu ba nkulo imo ine bali no kusosa ulwa bena Israele ukuti: “Cine cine uluko ulu ulukalamba bantu ba mano kabili ba mucetekanya.” (Amalango 4:6) Abena Kristu ba cine mu nshila imo ine balingile ukuba abalamuka. Balekabila ukuba abasambi bawamisha aba Cebo ca kwa Lesa. Ukulangilila imifwaile ya kusambilila kwa musango yo, umutumwa Paulo alembele ukuti: “Tatwaleka kumupepela, no kulombo kuti mwisulemo ukwishibo kufwaya kwakwe mu mano yonse no mucetekanya ifya bumupashi, ku kuleka mwende umwawamina [Yehova, NW] ku kutemuna konse. Mu mulimo onse usuma mube abatwale fisabo, kabili abalekula mu kwishiba Lesa.”—Abena Kolose 1:9, 10.

2. (a) Cinshi caba icakabilwa nga twinganonka ukwishiba kwalungikwa ukwa kwa Lesa? (b) Ni shani fintu Ibumba Litungulula ilya Nte sha kwa Yehova lyabomba no yu mulandu?

² Ukusambilila mu kuba ne cilolwa ca kunonka ukwishiba kwalungikwa ukwa kwa Lesa ne mifwaile yakwe kukabila mu kucefyako icipimo cinono ica masomo. Lelo abantu abengi abaisa ku kusambilila icine ca Cebo ca kwa Lesa bekala mu fyalo umo bakwete ishuko lya mu nshita ilinono nelyo ukukanakwata ilili lyonse ku kupokelela amasomo ya ku calo yalinga. Baali abapusulwa. Ku kucimfya iyi mpika, Ibumba Litungulula ilya Nte sha kwa Yehova pa myaka iingi nomba lyalikambisha ukuti, uko cilekabilwa, amakalasi ya shibukeni yalingile ukuteyanishiwa mu kati na nkati ka filonganino. Ukucila pa myaka 30 iyapitapo, inyunshipepala ya ku Brazil Diário de Mogi yasabankenye icipande cakwete umutwe wa kuti “Inte sha kwa Yehova Baimya Ubulwi Ukulwisha Ubutuutu.” Calondolwele ukuti: “Kasambilisha wafikapo . . . mu kutekanya alatendeka ukusambilisha bambi ukubelenga no kulemba. . . . Abasambi, pa mulandu wa mibele ine iibakunta pamo nga batumikishi ba kwa Lesa, bafwile ukulundulula ukwishiba kwabo ukwa lulimi nga bengapeela amalyashi.” Amakana ya bantu ukushinguluke calo conse muli iyo nshila balyafwilishiwa ukuba abasambi basuma aba Cebo ca kwa Lesa. Batendeke aya masomo ya kutendekelapo mu kuba ne mifwaile yasumbuka mu mintontonkanya yabo.

Ukulamuka Kulakabilwa pa Kuba Abatumikishi ba Kufumamo Cimo

3, 4. (a) Mulandu nshi Abena Kristu ba cine babela abasekelela mu masomo? (b) Cinshi cali imibele mu Israele, kabili masomo nshi aya kutendekelapo yali ayakatamisha mu kati ka filonganino fyesu ilelo?

³ Abena Kristu ba cine baliba abasekelela mu masomo, te mu kuti balaipakisha ukuba abasambilila, lelo pa kuti bengaba ababomfi ba kwa Yehova aba kufumamo cimo. Kristu apeele Abena Kristu bonse umulimo wa ‘kulenga aba nko shonse ukuba abasambi, . . . ukubasambilisha ukubaka fyonse ifyo namwebele.’ (Mateo 28:19, 20) Pa kusambilisha bambi, bena abene bafwile intanshi ukusambilila, kabili ici cikabila inshila sha misambililile ishisuma. Balingile ukukwata amaka ya kubebeta Amalembo mu kusakamanisha. (Imilimo 17:11) Ku kufikilisha ukutumwa kwabo, balekabila na kabili ukuba na maka ya kubelenga mu kulongoloka.—Moneni Habakuki 2:2; 1 Timote 4:13.

⁴ Nga fintu twamwene mu cipande cifumineko, kwalibako umulandu usuma uwa kucetekelo kuti, mu cinkumbawile, nelyo fye abana banono mu Israele wa pa kale balishibe ukubelenga no kulemba. (Abapingushi 8:14; Esaya 10:19) Abatumikishi ba Bwina Kristu ilelo balakabila ukulemba ifyebo ubusaka ilyo balecitilo bunte ukufuma ku ŋanda ne ŋanda. Balalemba amakalata, ukulembe fyebo pa kulongana, kabili balalembe fyebo mu fitabo fyabo ifya kusambililamo. Conse ici cikabila ilembo ilingabelengwa. Ukusunga ifyalembwa mu kati na nkati ka cilonganino ca Bwina Kristu kukabila mu kucefyako ubwishibilo bwa kutendekelako ubwa mapendo.

Ubusuma bwa Kusambilila Kwalinga

5. (a) Cinshi caba intulo ye shiwi “school”? (b) Lishuko nshi ilya mu nshita ilyo abacaice balingile ukufyambata?

⁵ Ku ca buseko, ishiwi “school” (isukulu) lyafuma kwi shiwi lya ciGreek skho·leʹ, ilyo mu kutendekelako lyapilibwile “ukukokoloka” nelyo ukubomfya kwa nshita ya kukokoloka ku mibombele imo iyakatama, pamo ngo kusambilila. Pa numa lyaishile mu kwishibisha icifulo uko ukusambilila kwa musango yo kwalecitilwa. Ici cilelangilila ukuti, pa nshita imo, libumba fye lya bantu bashuka—mu Greece ne fyalo fimbi ifyafulilako—e balekwata ubuntungwa bwa kusambilila. Ibumba lya babomba mu cinkumbawile baletwalilila ukuba abambuulu. Ilelo, mu fyalo fyafulilako abana na bacaice balapeelwa inshita ya kusambilila. Inte shacaice mu kushininkisha balingile ukulubule nshita ku kuba abalamuka kabili ababomfi bakampuka aba kwa Yehova.—Abena Efese 5:15, 16.

6, 7. (a) Busuma nshi bumo ubwa kusambilila kwalinga? (b) Ni mu nshila nshi umo ukusambilila ululimi lwa cilendo kwingaba kwa mulimo? (c) Cinshi caba imibele ilelo ku bacaice abengi lintu bapwisha isukulu?

⁶ Ubwishibilo bwa kutendekelako ubwa lyashi lya kale, ukusambilila impanga, sayansi, na fimbipo kukalenga Inte shacaice ukuba abatumikishi abashikatala. Ukusambilila kwabo kukabasambilisha te masambililo fye lelo ne nshila ya kusambililamo. Abena Kristu ba cine tabaleka ukusambilila no kubelenga lintu bapwisha isukulu. Cintu banonka ukufuma mu kubelenga kwabo, nangu cibe fyo, cikashintilila apakalamba pa kwishiba kwabo inshila sha kubelengelamo. Ukusambilila konse kubili ukwa ku calo no kwa mu cilonganino kuti kwabaafwa ukulundulula ubupanda bwabo. (Amapinda 5:1, 2) Lintu babelenga bakaba mu cifulo cisuma ica kwiluka icili icakatama, icilekabilwa ukulembwa no kusungila ku mutwe.

⁷ Ukusambilila ululimi lwa cilendo, ku ca kumwenako, takwakalundulule fye amaka ya muntontonkanya aya bacaice lelo na kabili kukabalenga ukuba aba mulimo mu kucilapo ku kuteyanya kwa kwa Yehova. Mu misambo imo iya Watch Tower Society, bamunyina bacaice abafulilako balicisanga ukuba icisuma ukuba na maka ya kulanda nelyo ukubelenga iciNgeleshi mu kulongoloka. Mu kulundapo, abatumikishi ba Bwina Kristu bonse balingile ukutukuta ukuba abalumbulula mu kumfwika mu lulimi lwabo. Imbila nsuma iya Bufumu yawaminwa ukulumbululwa mu mibele iyalengama, mu nsoselo shalungikwa. Ifishinka filangilila ukuti mu calo ilelo, abacaice abengi pa numa ya kupwisha isukulu bacili balikwata ubwafya mu kulemba no kulanda mu kulungika na mu kupikulula nelyo fye mapendo yaangukisha; kabili bakwata fye ubwishibilo bwacepesha ubwa lyashi lya kale na masambililo ya fya mpanga.

Amasomo Yakumanina

8. Malembo nshi yabomba pa lyashi lya masomo ya ku calo na pa maka ya muntu aya kuyafwilisha umwine?

⁸ Muli ifyo, ino ilemoneka ukuba inshita yalinga ku kulanguluka imibele ya Bwina Kristu ukulola ku masomo ya ku calo. Fishinte nshi ifya Baibolo ifibomba pali ili lyashi? Ica kubalilapo, mu fyalo ifingi ukunakilako kwalinga kuli “Kaisare” kukabila abafyashi ba Bwina Kristu ukutuma abana babo ku sukulu. (Marko 12:17; Tito 3:1) Kumfwa ku Nte shacaice, mu mulimo wabo uwa ku sukulu balingile ukwibukisha Abena Kolose 3:23, apalondolola ukuti: “Conse ico mulecita, bombeni no mutima onse, nga kuli [Yehova, NW], te ku bantu iyo.” Icishinte ca bubili icabimbwamo cili ca kuti Abena Kristu balingile ukuba na maka ya kuyafwilisha abene, nelyo fye nga bali batumikishi bapainiya ba nshita yonse. (2 Abena Tesalonika 3:10-12) Nga ca kuti alyupa, umwaume alingile ukuba na maka ya kupayanishisha bwino umukashi wakwe na bana abali bonse abo pambi abengafyalwa, mu kuba ne shalundwapo shinono ku kupeela kuli abo abali mu kukabila no kwafwilisha umulimo wa pa mwabo no wa mu kusaalala kwa calo uwa kushimikila.—Abena Efese 4:28; 1 Timote 5:8.

9, 10. (a) Cinshi cilemoneka ukuba e cibelesho mu fyalo ifingi? (b) Cinshi cintu umutumikishi painiya engalanguluka ukuba amalipilo yakumanina?

⁹ Bwingi bwaba shani ubwa masomo ubo Umwina Kristu wacaice alekabila nga engacindika ifi fishinte fya Baibolo no kukumanya ukukakililwako kwakwe ukwa Bwina Kristu? Ici calilekanalekana ukufuma ku calo ne calo. Ilingi line, nangu cibe fyo, cimoneka ukuti icibelesho icaseeka mu fyalo ifingi caba ca kuti icipimo ca kusambilila icikabilwa ku kufola amalipilo yalinga nomba cili icasumbuka ukucila fintu cali imyaka inono iyapitapo. Amalipoti yapokelelwa ukufuma ku misambo ya Watch Tower Society mu ncende shapusanapusana isha calo yalangilila ukuti mu fyalo ifingi caliba icaafya ukusanga incito sha malipilo yalinga pa numa ya kupwisha fye icipimo cinono ice sukulu icikabilwa ne funde nelyo mu fyalo fimo nangu fye pa numa ya kupwisha isukulu lya ku sekondari.

¹⁰ Cinshi capilibulwa ku “malipilo yalinga”? Tacilelangilila incito shakwata amalipilo ya pa mulu. Webster’s Dictionary ilondolola “ukulinga” muli aya mashiwi yashingulukako pamo nga “ukukumanina, ica kwikusha.” Ku ca kumwenako, cinshi cingamonwa nge ‘cakumamina’ kuli abo abalefwaya ukuba abatumikishi bapainiya aba mbila nsuma? Aba musango yo mu cinkumbawile balakabila incito ya nshita lubali ku kusengauka ‘ukufinininapo’ pali bamunyinabo nelyo ulupwa lwabo. (1 Abena Tesalonika 2:9) Amalipilo yabo kuti pambi yamonwa “ayalinga,” nelyo ‘aya kwikusha,’ nga ca kuti shintu balefola shabasuminisha ukwikala mu kulinga ilintu shilebashiila inshita yafulilako na maka ku kupwishishisha ubutumikishi bwabo ubwa Bwina Kristu.

11. Mulandu nshi abacaice bamo balekela umulimo wa bupainiya, kabili cipusho nshi cimishiwa?

¹¹ Cinshi caba imibele ilingi line ilelo? Calicitwa lipoti ukuti mu fyalo fimo abacaice bamo aba mapange yasuma balisha isukulu pa numa fye ya kupwisha icipimo cinono ica kusambilila icikabilwa pa kuti bengaba bapainiya. Tabakwetepo ukulamuka mu ncito nelyo ukufikapo ukuli konse ukwa ku calo. Nga ca kuti tabaafwilishiwe mu fya ndalama ku bafyashi babo, baali no kufwaya incito ya nshita lubali. Bamo basumine incito isho shabapindile ukubomba amaawala ayengi ku kukwata indalama shakumanina. Pa kuba abafunshika lwa ku mubili, balilekele ubutumikishi bwa bupainiya. Cinshi cintu aba musango yo bengacita ku kuyafwilisha no kubwelela mu mulimo wa bupainiya?

Imimwene Yashikatala iya Masomo

12. (a) Ukulosha ku masomo, mimwene nshi ibili iyacishamo intu Umwina Kristu akasengauka? (b) Ku babomfi ba kwa Yehova abaipeela na bana babo, mifwaile nshi iyo amasomo yalingile ukubomba?

¹² Imimwene yashikatala iya masomo kuti yaafwa. Ku bacaice abengi mu calo, amasomo yaba cishibilo ca mucinshi, icintu cimo ica kubaafwa ukufika pa cifulo casumbukisha mu bwikashi, ulufungulo ku mibele ya bumi iya lubanda, iya kutemwe fimoneka. Kuli bambi, ukusambilila kamulimo akakupwisha mu kwangufyanya nga nshi. Imimwene iyi yonse tayalinga ku Bena Kristu ba cine. Cinshi, lyene, icingetwa “imimwene yashikatala”? Abena Kristu balingile ukulanguluka amasomo pamo nge nshila ibomfiwa ukufika ku fya kufumamo fikabilwa. Muli ishi nshiku sha kulekelesha, imifwaile yabo ili kubombela Yehova apakalamba kabili mu kufumamo cimo nga nshi. Nga ca kuti, mu calo umo bekala, icipimo cinono ica masambililo nelyo fye amasambililo ya ku sekondari fikabasuminisha fye ukusanga incito shipayanya amalipilo yashakumanina ku kuyafwilisha abene pamo nga bapainiya, lyene amasambililo yalundwapo nelyo kosi kuti pambi fyalangulukwa. Ici cili no kuba no buyo bwa kulungatika ubwa mulimo wa nshita yonse.

13. (a) Ni shani fintu nkashi umo mu Philippines aba na maka ya kutwalilila umulimo wakwe uwa bupainiya ilintu alefikilisha ukukakililwako kwakwe ukwa lupwa? (b) Kusoka nshi kulingene ne nshita?

¹³ Bamo balitendeka amakosi ya kukansha ayo yaisula inshila ku mashuko ya ncito ayabalenga ukuibimba nelyo ukutendeka cipya cipya umulimo wa nshita yonse. Nkashi umo uwa mu Philippines e waleafwilisha ulupwa lwakwe mu fya ndalama, lelo alefwaya ukucita bupainiya. Umusambo wacita lipoti ukuti: “Aliba na maka ya kucite ci pa mulandu wa kuti alipokelela amasomo yalundwapo ku kufikapo ku kubomba ngo mubomfi wa ndalama pa kampani.” Lipoti imo ine iya musambo yalondolwele ukuti: “Twalikwata abafulilako abalepokelela amasomo kabili pa nshita imo ine baliteyanya bwino ukutantika kwabo ku kucita bupainiya. Mu cinkumbawile balaba bakasabankanya bawaminako apantu baliba abatemwa ukubelenga, kulila fye tabali abaibililika mu kucishapo mu fikonkelelo fya ku calo.” Ukulandapo kwa kulekelesha kulingile ukutupeela umulandu wa kubelebeshapo. Imifwaile ya kusambilila kwalundwapo, uko ici cilemoneka icakabilwa, taifwile ukulufiwa nelyo ukwalukila mu buyo bwa kutemwe fimoneka.

14, 15. (a) Mulandu nshi amafunde yakosesha yashilingile ukupangilwa ukulosha ku masomo? (b) Masomo nshi aya ku calo ayo bamunyina bashingamwa bapokelele, lelo cinshi cafuuta aya?

¹⁴ Mu fyalo ifinono, amasukulu ya ku sekondari yalapayanya ukukansha mu ncito uko kwingapekanishisha Umwina Kristu wacaice ku kulamuka nelyo incito pa nshita ya kupwisha isukulu. Nelyo fye ni lintu ici tacili ifyo, mu fyalo fimo abacaice ba bunyinu mu kuba fye na masambililo ya kutendekelako balasanga incito ya nshita lubali iyo ibapeela amaka ya kufola ishalinga ku kucita bupainiya. E co takuli amafunde yakosesha ayalingile ukupangwa atemwa ukwafwilisha nelyo ukufuupula amasomo yalundwapo.

¹⁵ Abengi abo nomba abalebomba mu fifulo fyashingamwa pamo nga bakangalila benda, pa cishinte cikalamba ica Sosaite, nelyo muli imo iya misambo bakwete fye amasomo ya kutendekelako. Baali bapainiya ba busumino, tababalile abaleka ukusambilila, bapokelele ukukanshiwa, kabili baliseekeshiwa ifishingamo fyakulilako. Tababa aba bulanda pa kusalapo bacitile. Pa lubali lumbi, bamo aba nkulo yabo basalilepo ukupokelela amasomo ya pa universiti kabili balitompweke, ukunashiwa ku mano ya buntunse ayonaula icitetekelo na “mano ya ba pano isonde.”—1 Abena Korinti 1:19-21; 3:19, 20; Abena Kolose 2:8.

Ukupenda Ifipooswa

16. (a) Ni ani apingula nga ca kuti amasomo yalundwapo yalefwaikwa, kabili cinshi cilingile ukusungwa intanshi mu muntontonkanya? (b) Cinshi cilingile ukulangulukwapo?

¹⁶ Ni ani apingula nampo nga Umwina Kristu wacaice alingile ukutendeka amasambililo yalundwapo nelyo kosi? Icishinte ca Baibolo ica bumutwe cilabomba pano. (1 Abena Korinti 11:3; Abena Efese 6:1) Pali ici citendekelo abafyashi mu kushininkisha bakafwaya ukutungulula abana babo mu kusala kwa butukushi nelyo incito na muli ifyo ubwingi bwa masomo ayali no kukabilwa. Mu fyalo ifingi ukusalapo kwa fya masomo ne ncito filingile ukucitwa mu kubangilila mu kati ka masomo ya ku sekondari. Iyi ili e nshita abafyashi ba Bwina Kristu ne misepela balekabila ukufwaya ukutungulula kwa kwa Yehova mu kupanga ukusala kwa mano, mu kuba na mabuseko ya Bufumu intanshi mu muntontonkanya. Abacaice bakwata ukukongama no kulamuka kwa cifyalilwa ifyapusanapusana. Abafyashi ba mano bakalanguluka ifi. Incito shonse isha bufumacumi shaliba isha mucinshi, nampo nga intu isanshamo ukutukusho mubili nelyo iya mu ofesi. Ilintu icalo kuti pambi casumbulapo incito ya mu ofesi no kusuula ukubombesha na maboko ya umo, Baibolo mu kushininkisha taicite fyo. (Imilimo 18:3) E co lintu abafyashi na Bena Kristu bacaice ilelo, pa numa ya kupimununa ubusuma no bubi mu kusakamanishisha kabili mu kubamo ipepo, bapingulapo ukufwaya nelyo ukukanafwaya amasambililo ya pa numa ye sukulu lya ku sekondari, bambi mu cilonganino tabalingile ukubalengulula.

17. Kusalapo nshi uko abafyashi Inte bamo bapangila abana babo?

¹⁷ Nga ca kuti abafyashi ba Bwina Kristu mu kubamo ukushingamwa bapingulapo ukupayanishisha abana babo amasomo yalundwapo pa numa ye sukulu lya ku sekondari, ico cili kuli bene. Iciputulwa ca nshita ica aya masambililo kuti calekanalekana ukulingana no musango wa kosi nelyo incito isobwelwe. Pa mulandu wa fya ndalama na pa kulenga abana babo ukwingila mu mulimo wa nshita yonse bwangu nga nshi, abafyashi abengi aba Bwina Kristu balibasalila amaprogramu ya masomo aya pa kashita akepi mu masukulu ya kukansha mu mulimo umo nelyo aya fya kupangapanga. Mu milandu imo imisepela balikabila ukusambilishiwa incito ku wabengisha mu butukushi bumo lelo lyonse mu kuba no bumi bwakumanina ubwa mulimo kuli Yehova pamo ngo buyo.

18. Nga ca kuti amakosi yalundwapo yabuulwa, cinshi cilingile ukusungwa mu muntontonkanya?

¹⁸ Nga ca kuti amakosi yalundwapo yabuulwa, mu kushininkisha ubuyo tabulingile ukuba kucila bambi mu fya masambililo nelyo ukutukutila incito ya ku calo iyalumbuka. Amakosi yalingile ukusalwa mu kuba no kusakamana. Iyi magazini ibikile ukukomaila pa masanso ya masomo yasumbuka, kabili mu kulungamikwa ifyo, pantu amasomo ya pa mulu ayengi yalakaanya “isambilisho lituntulu” ilya Baibolo. (Tito 2:1; 1 Timote 6:20, 21) Mu kulundapo, ukutula muli ba 1960, amasukulu ayengi aya masambililo yalundwapo yalisanguka ififulo fya bupulumushi na bucisenene. “Umusha wa cishinka kabili uwashilimuka” alifuupula mu kukosa ukwingila mu mibele ya musango yo. (Mateo 24:12, 45) Cifwile ukusuminwa, nangu cibe fyo, ukuti muno nshiku abacaice balakumana na ya masanso yamo yene mu masukulu ya ku sekondari na makoleji ya kusambililamo ifya kupangapanga kabili nelyo fye mu fifulo fya ncito.—1 Yohane 5:19.a

19. (a) Mibele nshi iya kucingilila ilingile ukubuulwa na abo abapingulapo ukubuula amakosi yalundwapo? (b) Ni shani fintu bamo babomfya amasomo ku busuma?

¹⁹ Nga ca kuti amasomo yalundwapo yapingulwapo, Nte wacaice kuti acita bwino, nga cingacitika, ukucita aya masomo ilintu aleikala ku ŋanda, muli ifyo ukuba na maka ya kusungilila ifibelesho fya misambilishishe ifya Bwina Kristu ifya lyonse, ukusangwa ku kulongana, ne mibombele ya kushimikila. Pa kutendekelako ukwiminina kwalinga kulingile ukubuulwa pa fishinte fya Baibolo. Cilingile ukwibukishiwa ukuti Daniele na banankwe batatu abaHebere baali bankole mu kuululwa lintu bapatikishiwe ukutendeka amasambililo yalundwapo mu Babiloni, lelo mu kutwalilila basungilile bumpomfu bwabo. (Daniele, icipandwa 1) Ilintu babikile amabuseko ya ku mupashi intanshi, Inte shacaice mu fyalo fyafulilako balibuula amakosi ku kuipangasha abene ku ncito ya nshita lubali pamo nga ababomfi ba ndalama pa kampani, intukushi, bakafundisha, bakapilibula, bakelula, nelyo incito shimbi isho shabafwilishe mu kukumanina mu mulimo wabo ukalamba uwa bupainiya. (Mateo 6:33) Abengi aba iyi misepela pa numa baliba bakangalila benda nelyo bakabomba ba kuitemenwa aba pa Bethel.

Abantu Baikatana, Abasoma

20. Bupusano nshi ubwa ku calo bushakwata icifulo icili conse pa kati ka bantu ba kwa Yehova?

²⁰ Pa kati ka bantu ba kwa Yehova, nampo nge ncito ya muntu ya mu ofesi, nampo nga isanshamo ukutukusho mubili, bushimafarmu, nelyo ukubombela bambi, bonse bakabila ukuba abasambi basuma aba Baibolo kabili bakasambilisha bafikapo. Ukulamuka ukunonkwa na bonse mu kubelenga, ukusambilila, no kusambilisha kwakongamina ku kufumyapo ubupusano ubo icalo cipanga pa kati ka babomfi ba ncito isanshamo ukutukusho mubili na babomfi ba mu ofesi. Ici cifumamo ukwikatana no mucinshi kuli umo no munankwe uyo ukucilisha uumoneka pa kati ka bakabomba ba kuitemenwa mu mayanda ya Bethel na pa fifulo fya bukuule ifya Watch Tower Society, apo imibele ya ku mupashi e yakatama apakalamba kabili e ikabilwa kuli bonse. Kuno, bakabomba ba mu maofesi babomba mu buseko na bakabomba balamuka aba mulimo usanshamo ukutukusho mubili, bonse ukulangisha ukutemwa kwatesekeshiwa kuli umo no munankwe.—Yohane 13:34, 35; Abena Filipi 2:1-4.

21. Cinshi cilingile ukuba e buyo bwa Bena Kristu bacaice?

²¹ Mwe bafyashi, tungululeni abana benu ukulola ku buyo bwa kuba ifilundwa fya mulimo ifya sosaite ya calo cipya! Mwe Bena Kristu bacaice, bomfyeni amashuko ya mu nshita aya masomo nge nshila ya kuipangashishamo ku kwikata mu kukumanina ku mashuko yenu mu kubombela Yehova! Pamo nga basambilishiwa, shi bonse aba imwe namushininkishe ukuba ifilundwa fyaipangasha bwino ifya sosaite ya teokratiki ino nshita na ku ciyayaya mu “calo cipya” ca kwa Lesa icalaiwa.—2 Petro 3:13; Esaya 50:4; 54:13; 1 Abena Korinti 2:13.

[Futunoti]

Esha Ukwibukisha Kobe

◻ Mulandu nshi Abena Kristu ba cine babela abasekela mu masomo?

◻ Mimwene nshi iyacishamo iya masomo iyo Abena Kristu ba cine bakasengauka?

◻ Masanso nshi ya masomo yalundwapo yalingile ukulangulukwapo, kabili fya kucingilila nshi filingile ukubuulwa?

◻ Bupusano nshi ubwa ku calo bushakwata icifulo pa kati ka bantu ba kwa Yehova?

[Icikope pe bula 16]

Ukupitila mu kusambilila mu mukoosha, Abena Kristu bacaice kuti baba ifilundwa fyacilapo ukuba ifya mulimo ifya sosaite ya calo cipya

[Icikope pe bula 19]

Amasomo yalundwapo, nga ca kuti yasalwa, yalingile ukukuntwa ku kufwaisha kwa kubombela Yehova mu kuwaminako