Yehova, Kacita wa Fipesha Amano

“Muli bakulu kabili mucite fipesha amano: ni mwe Lesa mweka.”—ILUMBO 86:10.

1, 2. (a) Ni shani fintu ifya kusanga fya muntu fyaambukila icalo? (b) Ni kwi twingasange subilo lya fintu fyawaminako?

UMUNTU wa muno nshiku kuti pambi aitakisha ukuti ifya kusanga fyakwe fili fya cipesha amano—ifipe fya malaiti, ifya kumfwaninamo fya malamya, video, motoka, ukwenda kwa mu ndeke ya jeti, ne fya kupangapanga fya ku makompyuta. Ifi fyasangule calo ukuba ubwina mupalamano bumo. Lelo we bwina mupalamano we! Mu cifulo ca mutende, ulubanda, no kupaka kuli bonse, umutundu wa muntu wapumwa ne nkondo sha bukomi, imisoka, ukululunkanya, ukukowesha, amalwele, no bupiina. Kabili ifyanso fya manyukiliya ifyasalangana ukushinguluke calo, nangu cingati fyalicefiwa mu mpendwa, kuti nalyo line fyalofya umushobo wa buntunse. Abasulwishi ba mfwa, bakapanga ba fyanso, batwalilila ukulama ubukwebo bukalamba pe sonde. Abakankaala balecililako bukankaala, kabili abapiina ukupiininako. Bushe uuli onse kuti asange nshila ya kupikulwilamo?

² Ee! Pantu kwalibako Umuntu umo uwebekesha ukulubuka, “uwasansabala pa muulu wa wasansabala munankwe,” Yehova Lesa. (Lukala Milandu 5:8) Apuutilemo ukulembwa kwa malumbo, ayapayanya ukusansamusha ukwingi no kufunda kwabamo amano mu nshita ya kumanama. Pa kati ka yako paba Ilumbo 86, ilyakwata utulembo twa pa muulu utwayanguka utwa kuti: “Ipepo lya kwa Davidi.” Lili lipepo lintu wingasangula ukuba lyobe.

Uwacushiwa Lelo uwa Bucishinka

3. Muli ishi nshita, ca kumwenako nshi ica kukoselesha Davidi atupayanishisha?

³ Davidi alembele ili lumbo lintu aali pe samba lya kucushiwa. Ifwe ilelo, abaleikala ukupula mu “nshiku sha kulekelesha” isha micitile ya kwa Satana, ishi “nshita ishayafya,” tulolenkene ne fya kwesha fyapalako. (2 Timote 3:1; moneni na kabili Mateo 24:9-13.) Ukupala ifwe, Davidi aculile ukusakamikwa no kupopomenwa pa mulandu wa mpika shamukumine. Lelo tabalile asuminisha ifi fya kwesha ukunasha ukucetekela kwakwe ukwa bucishinka muli Kabumba wakwe. Abilikishe ukuti: “Mwe Yehova, teyamikeni ukutwi kwenu, no kunjasuka; pantu ndi mulanda kabili umubusu. Bakeni umweo wandi, pantu ndi wa cishinka; pususheni umubomfi wenu uwamutetekela.”—Ilumbo 86:1, 2.

4. Ni shani fintu tulingile ukulanga ukucetekela kwesu?

⁴ Kuti twaba abacetekela, nge fyali Davidi, ukuti “Lesa wa cisansamushi conse,” Yehova, akalwila ukutwi kwakwe kuli ili sonde no kukutika ku mapepo yesu aya kuicefya. (2 Abena Korinti 1:3, 4) Ukucetekela mu kupwililila muli Lesa wesu, kuti twakonka ukupanda amano kwa kwa Davidi ukuti: “Poosa pali Yehova icisendo cobe icafina, wene alekulama; pe fye takasuminishe uwalungama ukutelententa.”—Ilumbo 55:22.

Isenge na Yehova

5. (a) Ni shani fintu amabupilibulo yamo ayasakamanishisha yafumyapo impuso sha bakalemba ba ciYuda? (b) Ni mu nshila nshi amalumbo yalenga 85 na 86 yakusha Yehova? (Moneni utulembo twa pe samba.)

⁵ Mwi Ilumbo lyalenga 86, Davidi abomfya inumbwilo “Mwe Yehova” (NW) imiku 11. Fintu ipepo lya kwa Davidi lili ilyafumaluka mu kushika kabili fintu isenge lyakwe na Yehova lili ilyapalamisha! Pa numa, ukubomfya kwa musango yo ukwabamo isenge ukwe shina lya kwa Lesa kwabele ukwa kuselausha kuli bakalemba ba ciYuda, mu kumonekesha abena Soferete. Balundulwile umwenso wa kutiine mipashi uwa kubomfya bubi bubi ili shina. Ukusuulako icishinka ca kuti umuntu abumbilwe mu cata ca kwa Lesa, balikeene ukupeela kuli Lesa imibele intu abantunse na bo bene balangisha. E co muli 7 ukufuma mu kumoneka 11 ukwe shina lya bulesa mwi lembo limo ilya ciHebere ilya ili lumbo limo, bapyanikishepo ilumbo ʼAdho-naiʹ (Shikulu) pe shina YHWH (Yehova). Kuti twaba aba kutasha pa kuti New World Translation of the Holy Scriptures, pamo pene ne mpendwa ya mabupilibulo yambi ayasakamanishisha, yalibweseshamo ishina lya bulesa mu cifulo ca liko icalungama mu Cebo ca kwa Lesa. Nge ca kufumamo, ukwampana kwesu na Yehova kwalikomailwapo nga fintu kulingile ukuba.a

6. Ni mu nshila nshi twingalango kuti ishina lya kwa Yehova lyalibe lyaumo mutengo kuli ifwe?

⁶ Ipepo lya kwa Davidi lyatwalilila ukuti: “Mumbelele uluse, mwe [Yehova, NW]; pantu kuli imwe ndililako akasuba konse. Lengeni umutima wa mubomfi wenu ukusamwa; pantu kuli imwe, mwe [Yehova, NW], e ko nalosho [mweo, NW] wandi.” (Ilumbo 86:3, 4) Mona ukuti Davidi atwalilile ukwita pali Yehova “akasuba konse.” Mu cine cine, ilingi line apepele ukupulinkana ubushiku bonse, pamo nga lintu aali imbutushi mu matololo. (Ilumbo 63:6, 7) Mu kupalako ilelo, Inte shimo lintu batiinishiwa no bucende bwa kwikatwa kama nelyo ukusansa kumbi ukwa fipondo balibilikisha mu kupongomoka kuli Yehova. Pa nshita shimo balipapushiwa pa ca kufumamo ca nsansa.b Ishina lya kwa Yehova lyalibe lyaumo mutengo kuli ifwe, nga fintu fye lyali kuli “Yesu Kristu, mwana Davidi,” lintu aali pe sonde. Yesu asambilishe abakonshi bakwe ukupepela ukushishiwa kwe shina lya kwa Yehova kabili alengele ukwishibikwa kuli bene cintu ishina limininako.—Mateo 1:1; 6:9; Yohane 17:6, 25, 26.

7. Fya kumwenako nshi twakwata ifya kusumbula kwa kwa Yehova umweo wa babomfi bakwe, kabili ni shani fintu tulingile ukwankulako?

⁷ Davidi aloseshe umweo wakwe, umwine wine apo apela, kuli Yehova. Alatukoselesha ukucita cimo cine, ukusosa pe Ilumbo 37:5 ukuti: “Konkomwena pali Yehova inshila yobe, kabili mutetekele, na o akacita.” Muli ifyo ukupaapaata kwesu kuli Yehova pa kuti wene alengele umweo wesu ukusamwa takwakapite ukwabulo kwasukwa. Ababomfi abengi abasunga bumpomfu aba kwa Yehova batwalilila ukusanga ubuseko bukalamba mu mulimo wakwe—te mulandu na mafya, ukupakasa, na malwele. Bamunyinefwe mu ncende shalepaulwa ku nkondo mu Africa, pamo nga mu Angola, Liberia, Mozambique, na Zaire, balitwalilila ukubika umulimo wa kwa Yehova pa ntanshi mu bumi bwabo.c Mu cine cine alibalenga ukusamwa mu kulobolola kwa ku mupashi ukwapaka. Nga fintu bashipikisha, e fyo na ifwe bene tufwile ukushipikisha. (Abena Roma 5:3-5) Kabili ilyo tuleshipikisha, tulebekeshiwa ukuti: “Icimonwa cicili cilelola ku nshita iyalingilwe, cilabutukisha ukulola ku mpela . . . tacakashimbe iyo.” (Habakuki 2:3) Mu kuba no kucetekela kwapwililila no kushintilila muli Yehova, shi na ifwe bene natutwalilile ‘ukubutukisha ukulola ku mpela.’

Ubusuma bwa kwa Yehova

8. Lisenge nshi pambi twingakwata na Yehova, kabili ni shani fintu alangisha ubusuma bwakwe?

⁸ Davidi acita ukupaapaata kwalundwako ukwa kwipukisha ku nkuntu ukuti: “Pantu imwe, mwe [Yehova], muli basuma, mulekelela abamufwaya, kabili mwafulo luse kuli bonse abalilila kuli imwe. Mwe Yehova, kutikeni kwi pepo lyandi, peepekeni na kwi shiwi lya kupaapaata kwandi. Mu bushiku bwa kumanama kwandi, ndilila kuli imwe; pantu mulanjasuka.” (Ilumbo 86:5-7) “Mwe Yehova”—mu kubwekeshabwekeshapo tulacincimuka kwi senge lya iyi numbwilo! Lili lisenge ilyo pambi ilingakushiwa mu kutwalilila ukupitila mwi pepo. Davidi apepele pa kashita kambi ukuti: “Imembu sha bulumendo bwandi, ne fya bupulumushi fyandi mwilafiibukisha; ibukisheni ine umwabelo luse lwenu, pa mulandu wa busuma bwenu, [mwe Yehova, NW].” (Ilumbo 25:7) Yehova e mibele ine ine iya busuma—mu kupayanya icilubula ca kwa Yesu, mu kulanga inkumbu ku babembu balapila, na mu kufumfumwina icikuuku ca kutemwa pa Nte shakwe isha bucishinka kabili ishakwata ukutasha.—Ilumbo 100:3-5; Malaki 3:10.

9. Kwebekesha nshi ababembu balapila balingile ukulanguluka mu kukatama?

⁹ Bushe tulingile ukusakamikwa pa filubo fya nshita yapita? Nga ca kuti pali nomba tuletambalika inshila sha kwendamo amakasa yesu, tulacincimushiwa lintu twaibukisha ukwebekesha kwa mutumwa Petro ku balapila ukuti “inshita sha kupuupuutula” shikesa ukufuma kuli Yehova. (Imilimo 3:19) Lekeni tupalame kuli Yehova mwi pepo ukupitila mu Cilubula, Yesu, uwasosele mu kutemwa ukuti: “Iseni kuli ine, bonse mwe bacucutika kabili abafinwa, na ine nalamupeelo kutusha. Sendeni ikoli lyandi no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku [myeo, NW] yenu.” Ilyo Inte sha bucishinka shapepa kuli Yehova ilelo mwi shina lyaumo mutengo ilya kwa Yesu, balasanga mu cine cine ukupembesula.—Mateo 11:28, 29; Yohane 15:16.

10. Kulumbuka nshi ibuku lya Amalumbo lipeela ku luse lwa kwa Yehova?

¹⁰ Ibuku lya Amalumbo lilosha ku “luse” lwa kwa Yehova ukucila pa miku umwanda. Uluse lwa musango yo mu kushininkisha lwalibo lwapaka! Mu fikomo fya liko ifya kubalilapo fine, Ilumbo lyalenga 118 lipukisha ku babomfi ba kwa Lesa ukutootela Yehova, ukubwekeshapo imiku ine “pantu lwa muyayaya uluse lwakwe.” Ilumbo lyalenga 136 likomaila pa mibele ya mutengo iya “luse lwakwe” imiku 26. Mu nshila iili yonse intu twalufyanishishamo—kabili nga fintu Yakobo 3:2 asosa, “ifwe bonse tuipununa apengi”—shi natube abaipekanya ukufwaya ukulekelela kwa kwa Yehova, abacetekela ulwa nkumbu shakwe no luse. Uluse lwakwe ni numbwilo ya kutemwa kwakwe ukwa bucishinka ukulola kuli ifwe. Nga ca kuti muli bucishinka twatwalilila ukucita ukufwaya kwa kwa Lesa, akalanga ukutemwa kwakwe ukwa bucishinka mu kutukosha ukubomba ne ca kwesha icili conse.—1 Abena Korinti 10:13.

11. Ni shani fintu pambi incitilo ya baeluda ingaafwa ukufumyapo ukuyumfwa kwa kukwato mulandu?

¹¹ Kuti kwabako pambi utushita lintu twapunushiwa na bambi. Ukucendwa kwa nkuntu nelyo ukwa ku mubili mu kati ka bwaice kwalisha bamo no kuyumfwa kwa kukwato mulandu nelyo ukwa kuba fye icinangwa. Icinakabupalu ca musango yo kuti alilila kuli Yehova, uwacetekela ukuti akasuka. (Ilumbo 55:16, 17) Eluda wa cikuuku kuti pambi akwata ubuseko mu kwaafwa uwa musango yo ukupokelela icishinka ca kuti tacali cilubo ca cinakabupalu. Pa numa ya ico, ukutuma lamya kwa bucibusa ukwa mu nshita mu nshita ukwa kwa eluda kuti kwaafwa uyo ukufikila wene aba na maka mu kupelako aya ‘kusende cipe cakwe.’—Abena Galatia 6:2, 5.

12. Ni shani fintu ukumanama kwafula, lelo ni shani fintu pambi twingabomba na kwene mu kutunguluka?

¹² Kwalibako imibele imbi iya kulengo kumanama iingi intu abantu ba kwa Yehova bali no kushomboka na yo ilelo. Ukutampa ne Nkondo ya Calo iya I mu 1914, utuyofi tukalamba twalitendeke ukucululusha ili sonde. Nga fintu casobelwe na Yesu, twali “e citendekelo ca kushikitika kwa kupaapa.” Ukumanama kwalifula ilyo twalundulukila mu kushikilako ukwingila mu “kusondwelela kwa micitile ya fintu,” (NW). (Mateo 24:3, 8) “Inshita inono” iya kwa Ciwa ilekunkuluka ukulola ku mpela ya iko iya kufika pa kalume. (Ukusokolola 12:12) “Nge nkalamo iilelila” mu kusapika ica kutakanya, cilya Cibambe cikalamba cilebomfya umucenjelo onse uulipo ku kutupaatulula ukufuma ku mukuni wa kwa Lesa no kutonaula. (1 Petro 5:8) Lelo takatunguluke! Pantu, ukupala Davidi, twapampamika ukutetekela kwesu umupwilapo muli Lesa wesu umo, Yehova.

13. Ni shani abafyashi na bana babo pambi bengapokelela ubusuma bwa kwa Yehova?

¹³ Ukwabulo kutwishika, Davidi alimbile mu mutima wa mwana wakwe Solomone ukukabila kwa kushintilila pa busuma bwa kwa Yehova. Muli ifyo, Solomone aali na maka ya kufundisha umwana mwaume wakwe ukuti: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe. Wiba uwa mano mu menso yobe we mwine, tiina Yehova, no kufuma ku bubi.” (Amapinda 3:5-7) Abafyashi ilelo balingile mu musango umo wine ukusambilisha abanono babo ifya kupepa mu kutetekela kuli Yehova ne fya kubomba no kusansa kwa calo cakaluka—pamo ngo kutitikisha kwa banabo pa sukulu na matunko ku kucita bucisenene. Ukubeleshe cine na bana bobe akasuba kamo kamo kuti kwaebekesha pa mitima yabo iyacaice ukutemwa kutuntulu ukwa kuli Yehova no kushintilila kwabamo ipepo pali wene.—Amalango 6:4-9; 11:18, 19.

Imilimo ya kwa Yehova Iishingalinganishiwako

14, 15. Ni ili kwi imo iya milimo ya kwa Yehova iishingalinganishiwako?

¹⁴ Mu kuba no kushininwa kwashika Davidi asoso kuti: “Tapali uwaba nga imwe mu milungu, mwe [Yehova], kabili tapali iyaba nge milimo yenu.” (Ilumbo 86:8) Imilimo ya kwa Yehova yalicilapo bukulu, iyakulisha, iyacilapo bukatebebe, ukucila pa fintu umuntunse uuli onse nelyo fye engelenganya. Nga fintu kwacebwamo kuli sayansi wa muno nshiku, ukubumbwa konse ukwabumbwa—ukupabuka kwa kuko, ukwikatana kwa kuko, ululumbi lwa kuko—fyalishininkisha ukukulisha ukucila icili conse cintu Davidi ailwike. Nalyo line, nelyo fye ni o aseshiwe ku kusoso kuti: “Imyulu ilelondololo bukata bwa kwa Lesa, ne ulu lilelongolo mulimo wa minwe yakwe.”—Ilumbo 19:1.

¹⁵ Imilimo ya kwa Yehova yalilangililwa mu kupapusha, na kabili, mu nshila intu ashimpilemo no kupekanye sonde, ukupayanya akasuba no bushiku, ifiputulwa fya nshita fya mwaka, inshita ya kubyala no kulobolola, na cinkupiti wa fya kubekelwamo ku kuipakisha kwa buntunse ukwa nshita ya ku ntanshi. Kabili fintu ifwe bene twapangwa mu kupapusha no kupangashiwa, ica kuti twaliba na maka ya kuipakisha imilimo ya kwa Yehova iyatushinguluka!—Ukutendeka 2:7-9; 8:22; Ilumbo 139:14.

16. Ni numbwilo nshi iyacilishapo bukulu iya busuma bwa kwa Yehova, ukutungulula ku milimo nshi iyalundwako iishingalinganishiwako?

¹⁶ Pa numa abafyashi besu aba kubalilapo babe nabakana ukumfwila Lesa, ukubalamuna ukumanama uko ukupuma isonde ukufika na kuli buno bushiku, Yehova ukufuma ku kutemwa kwakwe acitile icipesha amano mu kutuma Umwana wakwe kwi sonde ku kubilisha Ubufumu bwa kwa Lesa no kufwa nge cilubula ku mutundu wa muntu. Kabili icipapwa ca fipapwa! Yehova lyene abuushishe Kristu ku kuba uwa kubishanya nankwe Imfumu yasalwa. (Mateo 20:28; Imilimo 2:32, 34) Ukufuma mu bantunse ba bucishinka Lesa na kabili alisala “icibumbwa cipya” abakateka na Kristu ngo “muulu upya” uwa kushukisha pali sosaite ya “calo cipya” iikasanshamo amabilioni ya bantunse babuushiwa. (2 Abena Korinti 5:17; Ukusokolola 21:1, 5-7; 1 Abena Korinti 15:22-26) Imilimo ya kwa Yehova muli ifyo ikaya ku ntanshi ukufika ku kalume ka bukata! Mu cine cine, kuti twapunda ukuti: “Mwe Yehova . . . ifyo bwafulo busuma bwenu, ubo mwabikila abamutiina!”—Ilumbo 31:17-19.

17. Ukulosha ku milimo ya kwa Yehova, ni shani fintu Ilumbo 86:9 lilefikilishiwa pali nomba?

¹⁷ Imilimo ya kwa Yehova iya kasuba ka lelo isanshamo cintu Davidi alondolola pa Ilumbo 86:9 ukuti: “Inko shonse isho mwacita shikesa, shikashinshimuna ku cinso cenu, mwe [Yehova], no kucindike shina lyenu.” Pa numa ya kwita ukufuma pa kati ka mutundu wa muntu abashalapo aba cibumbwa cipya cakwe, “umukuni unono” uwa mpyani sha Bufumu, Yehova alitwalilila ukulonganika ukufuma pa kati ka “nko shonse” “ibumba likalamba” ilya “mpaanga shimbi,” amamilioni abo ababelesha na bo bene icitetekelo mu mulopa wasumiwa uwa kwa Yesu. Muli aba alikuulamo ukuteyanya kwa bulamba, sosaite yeka iya mu cibulungwa conse iya bakatemwa ba mutende pe sonde ilelo. Pa kumona ici, imilalo ya mu muulu ilakunkula ku cinso ca kwa Yehova, ukubilisho kuti: “Ipaalo, no mucinshi, na mano, no kutoota, no bukata na maka, no kukosa, fibe kuli Lesa wesu umuyayaya umuyayaya.” Ibumba likalamba nalyo line likatamika ishina lya kwa Yehova, ukumubombela “akasuba no bushiku,” mu kuba ne subilo lya kupusunsuka impela ya ici calo no kwikala kuli pe na pe pe sonde lya paradise.—Luka 12:32; Ukusokolola 7:9-17; Yohane 10:16.

Ubukulu bwa kwa Yehova

18. Ni shani fintu Yehova alangilila ukuti wene ni ‘Lesa eka’?

¹⁸ Davidi mu kukonkapo aito kusakamana kuli Bulesa bwa kwa Yehova, ukusoso kuti: “Muli bakulu kabili mucite fipesha amano: ni mwe Lesa mweka.” (Ilumbo 86:10) Ukufuma ku kale, Yehova alelangilila ukuti wene, mu cine cine, ni ‘Lesa eka.’ Cali ni Farao wa culukusu uwa Egupti uwasonsombele Mose mu misuula ukuti: “Ni ani Yehova, uo ŋumfwe ishiwi lyakwe ku kuleka Israele aye? Yehova nshimwishibe.” Lelo mu kwangufyanya aishibe ifyo Yehova akula! Lesa Wa maka yonse asebenye imilungu ya Egupti ne ŋanga pa kutuma ifinkunka fya kayofi, ukwipayaulula amabeli ya Egupti abaume, no kulofya Farao no mulalo wakwe uwa ba pa muulu muli Bemba Wakashika. Mu cine cine, takuli nangu umo uwaba nga Yehova pa kati ka milungu!—Ukufuma 5:2; 15:11, 12.

19, 20. (a) Ni lilali ulwimbo lwa mu Ukusokolola 15:3, 4 lukakwata inumbwilo ya luko iyakulisha? (b) Ni shani fintu pambi nelyo fye ni nomba line fye twingakana mu mulimo wa kwa Yehova?

¹⁹ Pamo nga Lesa eka, Yehova alitwalilila ne fintu fyapesha amano mu kupekanishisha ukulubulwa kwa bakapepa bakwe aba cumfwila ukufuma kuli Egupti wa muno nshiku—icalo ca kwa Satana. Alilenga amapingushi yakwe aya bulesa ukubilishiwa mwi sonde lyonse ngo bunte ukupitila muli kampeini ya kushimikila yacilishapo kutanunuka mu lyashi lya kale lyonse, muli ifyo ukufikilisha ubusesemo bwa kwa Yesu pali Mateo 24:14. Mu kwipipa, “impela” ifwile ukwisa, lintu Yehova akalangilila ubukulu bwakwe pa cipimo cishatala acibako pa kupyanga ububifi bonse pe sonde. (Ilumbo 145:20) Lyene ulwimbo lwa kwa Mose no lwimbo lwa Mwana wa mpaanga lukafika pa kalume: “Ikalamba kabili yapesha amano imilimo yenu, mwe [Yehova, NW] Lesa wa maka yonse. Yalilungama kabili ya cine imibele yenu, mwe Mfumu ya muyayaya. Ni ani uushakatiine ishina lyenu, mwe [Yehova], no kulicindika, ico ni mwe mweka uwa [bucishinka, NW]?”—Ukusokolola 15:3, 4.

²⁰ Shi ifwe ku lubali lwesu natube abapimpa mu kulanda kuli bambi pa lwa iyi mifwaile ikalamba iya kwa Lesa. (Linganyeniko Imilimo 2:11.) Yehova akatwalilila ukucita ifintu fikalamba kabili ifyapesha amano mu kasuba kesu no kutwalilila ukwingila mu nshita ya ku ntanshi, nga fintu icipande cesu icikonkelepo cikalondolola.

[Amafutunoti]

Bushe Uleibukisha?

◻ Mulandu nshi tulingile ukupanga ipepo lya Ilumbo 86 ukuba ilya pa lwesu?

◻ Ni shani fintu pambi twingasanga isenge na Yehova?

◻ Ni shani fintu Yehova alumbulula ubusuma bwakwe ukulola kuli ifwe?

◻ Ni ili kwi imo iya milimo ya kwa Yehova iishingalinganishiwako?

◻ Ni shani fintu Yehova aba ‘Lesa eka’ ukukuma ku bukulu?

[Icikope pe bula 10]

Mu “calo cipya” icileisa, imilimo ya cipesha amano iya kwa Yehova ikatwalilila ukucitilo bunte ku bukata bwakwe no busuma