Amapaalo Yafumba pa Mabungano ya Citungu aya “Bakasenda Ba Lubuuto”

IMYAKA imo 2,700 iyapitapo, kasesema Esaya alembele ukuti: “Mona, imfifi ikafimba pano isonde, ne kumbi ilyafitula pa bantu na bantu.” (Esaya 60:2) Fintu ayo mashiwi yashininkisha ukuba aya cine! Nangu cibe fyo, kuliko isubilo, pantu Yehova alilenga ulubuuto ukubalika. Umwaka wapwa, abo abatemwo lubuuto lwa kwa Lesa balilaalikwe mu kukaba ku kusangwa kwi Bungano lya Citungu ilya “Bakasenda ba Lubuuto.”

Programu ye bungano yapeelwe intanshi mu June mu North America. Mu kati ka myeshi yakonkelepo, yalipeelwe na kabili mu Europe wa ku Kabanga no wa ku Masamba, Central na South America, Africa, Asia, na mu fishi fya babemba. Abo abasangilweko bafika ku mpendwa ya mamilioni. Kabili we mutebeto wafumba uwa ku mupashi baipakisha!

“Mwaiseni, Imwe Bonse Bakasenda ba Lubuuto!”

Mu ncende ishingi ukulongana kwatendeke pali Cisano kabili kwasondwelele pa Mulungu icungulo kasuba. Ilyo fye aba kubungana baikele mu fipuna fyabo ulucelo pali Cisano, bakwete ubuseko bwa kukutika ku kusupawila ukwipi mu nshila ulubuuto lwa kwa Yehova lwabalikisha mu kati ka ishi nshiku sha kulekelesha. Lyene ceyamani we bungano aile pa cisebele. Akomailepo ukuti Abena Kristu ba cine balingile ukuba bakasenda ba lubuuto kabili mu kukaba atile: “Mwaiseni, imwe bonse bakasenda ba lubuuto!” Programu ye bungano yali no kwaafwa amakombe ukutwalilila ukubelebesha ulubuuto lwa kwa Yehova.

Ilyashi likalamba lyaimike icalelandwapo pe bungano lyonse. Uyu kalanda acinkwileko aba kubungana ukuti ulubuuto lwa mutundu wa muntu lwalishimine ukubwelela ku numa mwi bala lya Edene. Ukutula ilyo, Satana alipofwisha abantunse ku lubuuto lwa cine. (2 Abena Korinti 4:4) Nangu ni fyo, Yesu aishile ngo “lubuuto lwa nko.” (Esaya 42:1-6) Asansalike ubufi bwa butotelo, aishibishe imilimo yalubana iya mfifi, asumbwile bumulopwe bwa kwa Yehova, kabili ashimikile mbila nsuma iya Bufumu. Abakonshi ba kwa Yesu bacitile cimo cine—kabili bacili balecita! (Mateo 28:19, 20) Kalanda mu kukumbwamo atile: ‘Ifwe, ukupala Yesu, kuti twaba bakasenda ba lubuuto. Takwaba umulimo wacindamisha mu kasuba kesu. Kabili takwaba ishuko lyacilapo bukulu.’

Lintu fye iciputulwa ca kubalilapo ica kukumana ice bungano caleisa ku mpela, kwaliko ica kupapusha. Ceyamani we bungano abwelele pa cisebele no kubilisho kukakulwa kwa kukonkana kwa matrakiti ayapya yane. Ukutoota kwacincimuka kwasengele ici ca kucitika, kabili kope umo uwa trakiti imo imo yapeelwe ku nkombe yonse iyasangilwepo.

Pali Cisano icungulo kasuba, programu ye bungano yapeele ukusakamana ku kufunda kwa kutendekelako ukwa Bena Kristu basendo lubuuto. Amalyashi ya kubalilapo yabili yapayenye ukupanda amano kusuma pa fya kusengauko kuba abakoweshiwa ku mfifi ya calo. Apo Satana kuti amoneko kuba malaika wa lubuuto, calibe cakatama ukusungilile mimonekele ya ku mupashi pa kuti ifintu fyakowela ifya ku calo tafitubeleleke. (2 Abena Korinti 11:14) Paulo afundile ukuti: “Mwipalana no bwikashi buno; lelo musangulwe mu kulengwa kwa [muntontonkanya wenu upya, NW], ukuti mulinge icabo kufwaya kwa kwa Lesa, icisuma kabili ica kutemuna kabili icapwililila.” (Abena Roma 12:2) Amakombe ye bungano baumfwile ukuti ukulengwa cipya cipya kwa Mwina Kristu kwaba mibombele yatwalilila. Imintontonkanya yesu ilasangululwa no kumumungwa mu kutwalilila ilyo tulesambilile Cebo ca kwa Lesa no kubomfya fintu tulesambilila. Muli ifyo, tulacililako ukupala Yesu, uyo wali “uwaisulamo ukusenamina ne cine.”—Yohane 1:14.

Bakasenda ba Lubuuto Abacaice

Citika walenga bubili uwa pali Cisano icungulo kasuba alungatikwe ku misepela. Ilyashi lya kubalilapo (“Mwe Misepela—Cinshi Cintu Mulesupila?”) lyatashishe Abena Kristu bacaice abo baba ica kumwenako cisuma ca musango yo ica busumino. Lelo lyacinkwileko bene ukuti baba ca kulasapo caibela ica kwa Satana. Nelyo fye ni kangala wa mangalo uwakanshiwa bwino alakabila uwa kumucincisha. Mu nshila imo ine, abacaice bakabila ukwaafwa kwa bafyashi babo no kwa cilonganino pa kuti bengatwalililo kwenda mu lubuuto.

Ici cakomailwepo ne cilangililo cawamisha Ukucite Calungama mu Menso ya kwa Yehova, ico icasondwelele programu wa pali Cisano. Icapulilemo cali ca kumwenako ca Mfumu Yoshia. Nelyo fye lintu aali kalume wacaice, aali uwapampamina ukubombela Yehova. Kwaliko ukusonga kwabipa ukwamushingulwike, lelo mu kuba no kutungulula kwa kwa shimapepo mukalamba Hilkia kabili pa mulandu wa kutemwa kwakwe umwine Amalango ya kwa Lesa, Yoshia acitile icali icalungama mu menso ya kwa Yehova. Shi Abena Kristu bacaice ilelo nabo nabacite mu nshila yapalako.

Lengeni Ulubuuto Lubalike

Pa numa ya kutuusha kwa bushiku, amakombe yaishile kwi bungano pa Cibelushi ulucelo abaipekanya ku kufunda kwalundwako kwa kukuulilila ukwa mu Malembo. Tabalengelwe insoni. Ukukonka pa kulanshanya kwe lembo lya bushiku, programu yalitwalilile mu kuba no kukonkana kwa malyashi ukulondolole nshila shalekanalekana isho Umwina Kristu engalenga ulubuuto lwakwe ukubalika. (Mateo 5:14-16) Ukushimikila ni nshila imo iyakatama, ne myendele isuma nayo ine ilabomba ulubali lwacindama. Nga fintu kalanda asosele, “ukushimikila kweba bambi pa cintu twasuminamo, lelo ukubelesha ukutemwa kulangisha cene.”

Ica kwafwilisha ukushimikila icakatama caletelwe ku kusakamana kwa ba kubungana—amatrakiti. Mu kuba no kubilisha kwa bushiku bwafumineko ukuba ukupya mu muntontonkanya, amakombe baumfwile ifya kukumanya fyaleshininkishe fyo ifi fibombelo finono fyakwata amaka. Amakombe bakoseleshiwe ukukwata amatrakiti yafulilako pa nshita shonse, abaipekanya pa kashita akali konse.

Ukusakamana mu kukonkapo kwaletelwe kuli bapainiya, abo bakabilisha ba Bufumu aba nshita yonse ababombesha mu kusendo lubuuto. Ifyo tutasha bapainiya besu ababombesha! Kabili impendwa yabo ileingilishiwako. Nelyo fye ni mu fyalo umo ubuntungwa bwa kupepa bwapeelwe fye ndakai line, imitande ya bapainiya ilekulilako. Bapainiya bakoseleshiwe ukukatamike shuko lyabo. Abo abashilati batendeke bupainiya, bacincishiwe ukulanguluke mibele yabo. Nakalimo kuti nabo bene batantike milandu yabo mu kulenga ulubuuto lwabo ukubalika mu mulimo wa nshita yonse.

Ukuba kasenda wa lubuuto ilingi line cibimbamo amalambo, kabili ici calyebekeshiwe mu lyashi lyakonkelepo, “Ukubombela Yehova mu Kuba no Mupashi wa Kuipeela Bulilambo.” Paulo apaapeto kuti: “Tuuleni imibili yenu bulilambo bwa mweo, ubwa mushilo, ubwa kutemuna Lesa.” (Abena Roma 12:1) Umupashi wa kuipeela bulilambo ulalangishiwa na abo abashipikisha ukupakasa. Bapainiya balapeela amalambo cila bushiku pa kuti bengekalilila mu mulimo wa nshita yonse. Mu cine cine, bonse Abena Kristu ba cine balapeela amalambo, ukuipamfya abene beka mu mulimo wa kwa Yehova ukucila ifikonkelelo fya kaso, ifya kutemwe fimoneka ifya ici calo. Inshila ya musango yo ifumamo amapaalo yafumba ukufuma kuli Yehova.

Lilya lyashi lyabombele nge ntendekelo yalinga ku cakonkelepo—ilyashi lya lubatisho. Abo ababatishiwe pe Bungano lya Citungu ilya “Bakasenda ba Lubuuto” mu kushininkisha tabakalabe ili lyashi. Ulubatisho lwabo lyonse lukalaaba icapulamo mu bumi bwabo. Bacinkwilweko ukuti balekonke ca kumwenako ca kwa Yesu Kristu, uwabatishiwe pa myaka ya bukulu 30. Ukulunda pali ico, abaleya ku lubatisho baali aba nsansa ukwibukisho kuti ‘balifuulile imilimo ya mfifi’ kabili bapingwilepo ‘ukupyungila [Yehova, NW].’ (Abena Roma 12:11; 13:12) Mu buseko baiminine pa ntanshi ye bumba lye bungamo no kucita ukubilisha kwa pa cintubwingi ukwaumfwika ilyo tabalafumapo ukuya ku lubatisho. (Abena Roma 10:10) Tulepepele paalo lya kwa Yehova ukuba pali abo bonse abalangilile ukuipeela kuli wene pa kupita mu lubatisho lwa mu menshi mu kati ka Mabungano ya Citungu aya “Bakasenda ba Lubuuto.”

Icibelushi icungulo kasuba yali ni nshita ya kusoka kumo ukwa kukanalaba. Uku kwaishile mu musango wa malyashi yakwete imitwe ya kuti “Sengaukeni Ifiteyo fya Bufunushi,” “Bushe Umuntu Umo Aleonaula Ifibelesho Fyobe Ifyawama?” na “Ibake ku Kupepo Tulubi Ukwa Musango Onse.” Aya malyashi yatatu yasobwelemo imicenjelo imo iibomfiwa na Satana ku kunasha Umwina Kristu. Yuda Iskariote aali mutumwa, lelo alifutwike Yesu ku ndalama. Samwele wacaice akulile pa cifulo cine ica pa kati ica luko ica kupepa kwa kwa Yehova, lelo mu kukanafyukako asansalikwe ku kubishanya kumo ukwabipa nga nshi. (1 Samwele 2:12, 18-20) Ukupepo tulubi kuti kwasanshamo ifintu fyapala bucisenene bwa bwamba no lunkumbwa. (Abena Efese 5:5; Abena Kolose 3:5) Ee, ukufunuka, ukubishanya kubi, no kupepo tulubi fyalibamo ubusanso kabili fifwile ukusengaukwa.

Programu ye bungano lyene yalipilibwike nga fintu cali. Ilyashi lyakonkelepo lyaimishe impendwa ya fipusho ifya Baibolo ifya kusekesha kabili lyayaswike fyene. Ku ca kumwenako, bushe kuti walondolola nampo nga abantu abashipokelele icine kabili bafwa pa ntanshi ya bucushi bukalamba bakabuushiwa? Cinshi Umwina Kristu engacita lintu wene tali na maka ya kusanga umunankwe wa mu cupo uwalinga? Pa kukusha ukwishiba kwabo ukwa Baibolo, amakombe bakoseleshiwe ukubomfya mu kukumanina Watch Tower Publications Index, ukucilisha pe samba lya mutwe “Questions From Readers” (Ifipusho Ukufuma ku Babelenga).

Ukubapo kwa kwa Kristu no Kusokololwa

Iciputulwa ca kusondwelela ica programu ya pa Cibelushi cayalukile ku busesemo mu kuba no kukonkana kwa malyashi ukwa mutwe wa kuti “Ukusanika Ulubuuto pa Kubapo kwa kwa Kristu no Kusokololwa.” Imbali sha “ciishibilo” ukushininkisha ukubapo kwa kwa Yesu Kristu shalipitulwikwemo. (Mateo 24:3) Mu lubali lwa bubili, imibombele ya muno nshiku iya “musha wa cishinka kabili uwashilimuka” yalilanshiwepo. (Mateo 24:45-47) Calilondolwelwe ukuti ukutula mu 1919 ibumba lya musha lyaliluminisha mu busumino umulimo wa kushimikile mbila nsuma iya Bufumu. Lyene ibumba likalamba lyalilonganikwa ukufuma mu nko shonse ku kwakana na Bena Kristu basubwa mu kubelebesha ulubuuto lwa kwa Yehova. Kalanda asondwelele ukuti: “Lekeni bonse batwalilile mu kupimpa ukwafwilisha umusha wa cishinka kabili uwashilimuka. Pantu ni ku kucite ci kweka e kuntu kasuba kamo mu kwangufyanya nga nshi bonse abapale mpaanga bakaba na maka ya kumfwa amashiwi ya nsansa aya kuti: “Iseni, mwe bapaalwa ba kwa Tata, kwateni ubufumu ubwateyanishiwe imwe ukufuma pa kulengwa kwa pano isonde.”—Mateo 25:34.

Kalanda wa kupelako alandile pa bupilibulo no mwalola ukusokololwa kwa kwa Yesu Kristu. (1 Abena Korinti 1:7) We ca kukumanya kulya kusokololwa kukaba! Babiloni Mukalamba akonaulwa. Ubulwi bukalamba pa kati ka calo ca kwa Satana na Yesu na bamalaika bakwe bukapwila mu bonaushi bwa ino micitile. Mu kupelako, Satana umwine wine akapooswa mu cilindi ca ku Mbo no kufumishiwa mu kubomba. Lelo kukabako ukwilulukwa ku bantu ba kwa Lesa, mu kuba ne cupo ca Mwana wa mpaanga mu muulu no kuletwako kwe sonde lipya. Kalanda acincimwishe ibumba lyakwe pa kukakula broshuwa ipya Bushe Lesa mu Cituntulu Alatusakamana? Mwandi cikabe ca kwaafwa cisuma ku bantu umo umo abaicefya abakabila ukwishiba pa lwa kwa Kabumba wesu uusakamana ne mifwaile yakwe kuli ifwe!

Ifinshingwa-Ŋanda fya Bwina Kristu

Pa Mulungu, ubushiku bwa kupelako ubwe bungano, bwali nomba nabufika. Nangu cibe fyo, ifingi nalyo line fyali no kupeelwa. Pa numa ya kulanshanya kwe lembo lya bushiku, ukusakamana kwalipeelwe ku lupwa lwa Bwina Kristu mu kuba no kukonkana kwa malyashi “Ukusakamana Umo no Munankwe mu Cinshingwa-Ŋanda ca Bwina Kristu.” Ulubali lwa kubalilapo lwaafwile aba kubungana ukumwensekesha inkama ya kukwata ulupwa lwa Bwina Kristu ulwatunguluka: ukubike fintu fya ku mupashi intanshi. Ulubali lwa bubili lwakoseleshe indupwa ukucite fintu capamo, nampo nga ico cibimbamo ukusangwa ku kulongana, umulimo wa mwi bala, isambililo lya lupwa, nelyo ukukokoloka. Kabili ulubali lwa butatu ulwa kukonkana kwa malyashi lwacinkwileko amakombe ulwe shuko lyabo ne cishingamo ca kusakamana abacikoloci. “Bamunyinefwe abacikalamba ne nkashi baba cikwatwa ku cilonganino,” e fyasosele kalanda. Lekeni tukatamike ukubelesha kwabo no kubapashanya muli bumpomfu bwabo.

Ubupilibulo bwe shiwi ‘ukutekanya’ bwalibebetelwe mu kukonkapo. (1 Petro 4:7) Umuntu watekanya alishikatala, uwa mano, uupelulula, uwaicefya kabili uulingulula. Kuti alekanya pa kati ka calungama ne calubana, icine no bufi. Mu kulundapo, alaibikilishako ukusungilila ubutuntulu busuma ubwa ku mupashi.

Ilyashi lya kupelako pali programu ya pa Mulungu ulucelo lyalandile pa kunakila kwesu kuli Lesa na kuli Kristu. “Ukukatama kwa kuba abanakila mu cishinka kuli Yehova Lesa na ku Mwana wakwe, Yesu Kristu, te kuti kukomailwepo mu kucishamo,” e fyasosele kalanda. Atwalilile ukulangisha ifyo ici cambukila ulubali lonse ulwa bumi bwesu. Cinshi cikatwaafwa ukutwalilila ukunakila? Imibele ine: ukutemwa, akatiina ka bukapepa, icitetekelo, no kuicefya.

Pa Mulungu Icungulo Kasuba

Mu kupumikisha, cali ni pa Mulungu icungulo kasuba kabili inshita ya kukumana kwa kupelako ukwe bungano. Ku bengi, camoneke ukuti e lintu fye ibungano lyatampile, kabili kale kale lyalepalamina ukusondwelela kwa liko.

Ilyashi lya cintubwingi lyakwete umutwe wa kuti “Konka Ulubuuto lwa Calo.” Abo abalipo balisendelwe no bulondoloshi bwa kucebusha ubwa lubali luntu ulubuuto lwa ku mubili lubomba mu kusungililo bumi. Lyene kalanda alangile ubucindami bwakulilako ubwa lubuuto lwa ku mupashi. Ulubuuto lwa ku mubili lutusunga aba mweo pa makumi ya myaka yanono, lelo ulubuuto lwa ku mupashi kuti lwatusunga aba mweo ku ciyayaya conse. Icishinka cikalamba ica lyashi cali kulanshanya kwa cikomo ne cikomo ukwa kwa Yohane 1:1-16, apo Yesu aishibikwe ngo lubuuto lwa calo. Ilelo, mu myaka ya kupelako iya iyi micitile ibifi, cili icacilapo kupamfya ukucila lyonse ukukonka Yesu muli ulu lubali.

Pa numa ya kusupawila kwe Sambililo lya Ulupungu lwa kwa Kalinda ilyatantikwe ulya mulungu, yali ni nshita ye lyashi lya kusondwelela. Mu nsansa, kalanda alangishe ukuti kwaliko ifintu ifingi ifya kwenekela mu nshiku sha ku ntanshi. Ku ca kumwenako, abilishe kaseti ya cilangililo iipya Doing God’s Will With Zeal (Ukucito Kufwaya kwa kwa Lesa mu Kuba no Kupimpa). Kabili tacapelele apo pene. Kwali no kubako ukukonkana kupya ukwa makaseti ya video ayakwete umutwe uleti The Bible—A Book of Fact and Prophecy, iya kubalilapo pa mutwe wa lyashi uwa kuti The Bible—Accurate History, Reliable Prophecy.

Mu kupelako, kalanda abilishe ukuti mu 1993 kukabako amabungano ya citungu aya nshiku shine, ukusanshako na mabungano yaibela aya pa kati ka nko mu Africa, Asia, Europe, na South America. Nangu cingati Ibungano lya Citungu ilya “Bakasenda ba Lubuuto” lyaleisa ku mpela, amakombe kuti yatendeka ukupanga amapekanyo ya mwaka ukonkelepo.

Lyene yali ni nshita ya kuti amakombe ye bungano yaleya ku sha myabo. Mu kushininkisha, baali abacilapo mu mupampamina ukucila lyonse ukubelebesha ulubuuto muli ici calo ca mfifi. Pa numa ya nshiku shitatu ishaisulamo ne fintu fisuma ifya ku mupashi, amashiwi ye lembo lya kulekelesha ilyaambwilwe mu lyashi lya kupelako nayakwata ubupilibulo bukalamba: “Lesa wesu ni Yehova uwabuutusha kuli ifwe. . . . Tooteleni Yehova, pantu musuma, pantu lwa muyayaya uluse lwakwe.”—Ilumbo 118:27, 29.

[Icikope pe bula 15]

Programu ye bungano mu ciRussia

[Ifikope pe bula 16, 17]

Ifilundwa fye Bumba Litungulula balilandilepo pa mabungano ayengi

Amakombe abena Japan baali pa kati ka abo balongene mu St. Petersburg, Russia

Icilangililo ca Baibolo ica kukumbamo cakomaile pa kukabila kwa kucite calungama mu menso ya kwa Yehova

Bakasenda ba lubuuto abapya balangilile ukuipeela kwabo kuli Yehova pa kubatishiwa

Aba kubungana nabasendwa na programu mu St. Petersburg

[Icikope pe bula 18]

Amakombe yalicankilwe pali broshuwa mupya “Bushe Lesa mu Cituntulu Alatusakamana?”