“Tatulanshanya!”

MICHAEL, loya, ali no kuba uwa kumfwana nankwe uwa maka. Incito yakwe yalicifwaile. Lelo pa numa ya myaka 16 iya cupo, Michael apatikishiwe ukwishiba ukuti lintu alebwela ku ŋanda ku mukashi wakwe, Adrian, ukulamuka kwakwe ukwa kumfwana kwalepwa. “Ukufwailisha, ukusange milandu, ukulanda kumo ukwa manshoko,” e fibukisha Michael, “Adrian na ine lyonse twaleisokoosha, kabili natontonkenye ukuti cali no kututendusha. Naletwishika nampo nga cilya cali cupo, ukukonkana kwatwalilila ukwa kufulwisha no kukalifya. Nge yo yali no kuba e mibele yesu ubumi bwesu bonse ubwa kuba capamo, nalefwaya ukufumamo—nshilebepa. Nshali fye na maka ya kulolenkana ne myaka 20, 30, 40 iya uyo musango wa kukalifya kwa lyonse no kukanshika.”

Ukuyumfwa kwapalo ku takwaba fye kuli Michael na Adrian kweka. E fyo ciba ku baupana abengi abo ukwampana kwabo kupungushima pa kati ka kulwa no mutende. Ukulanshanya kwayangukisha kulapuulika ukusanguka inkondo ya mu kanwa. “Bomfwa” ifintu ifishisoselwe. Basose fintu ifishili mu muntontonkanya. Balasansa no kupeele milandu, lyene baleko kusoshanya mu mutalalila wabamo kukalifiwa. Tabapaatukana, lelo na kabili tababa mu cine cine “umubili umo.” (Ukutendeka 2:24) Ukwampana kulacilikilwa. Ukuselela ku numa kuti kwapilibula ukupaatukana; ukuselela ku ntanshi kuti kwapilibula ukulolenkana no kupusana mu kupunkane mitwe. Pa kusengauka ukukalipwa kwa kusalapo pali ifi, aba baupana baitwala abene ku kwikala pa ntamfu yacingililwa mu nkuntu ukufuma kuli umo no munankwe.

Abaupana ba musango yo balekabila ‘ukunonka ubutungulushi bwalamuka’ mu cupo cabo. (Amapinda 1:5, NW) Ubu butungulushi bwalibako mu Cebo ca kwa Lesa, Baibolo. Kalata wa cibili uwa kwa Paulo kuli Timote ashimikisha ukuti Baibolo “ya mulimo ku kusambilisha, ku kwebaula, ku kulungika.” (2 Timote 3:16) Ici e fintu ciba mu kundapa ukubongoloka mu kumfwana kwa mu cupo, nga fintu twalamona.