“Nenguleni, Mwe Lesa”

“Nenguleni, mwe Lesa, no kwishibo mutima wandi; . . . no kuntungulula mu nshila ya muyayaya.”—ILUMBO 139:23, 24.

1. Ni shani fintu Yehova abomba na babomfi bakwe?

IFWE bonse twalitemwa ukubombelwa na umo uwakwato kumfwikisha, umo uubika mu kulanguluka imibele yesu, umo uwafwilisha lintu twapelebela, umo uushipinda ukucila pa cintu twingaba na maka ya kucita. Yehova Lesa abomba na babomfi bakwe muli iyo nshila. Ilumbo 103:14 litila: “Pantu wene aliishibe mibumbilwe yesu, aibukisho kuti tuli lukungu.” Kabili Yesu Kristu, uyo mu kupwililika abelebesha Wishi, atambulula ubwite bwabamo icikabilila ubwa kuti: “Iseni kuli ine, bonse mwe bacucutika kabili abafinwa, na ine nalamupeelo kutusha. Sendeni ikoli lyandi [nelyo, “Ingileni pe samba lye koli lyandi pamo na ine,” NW, utulembo twa mwi samba] no kusambilila kuli ine, pa kuti ndi wafuuka kabili uwapetama umutima; e lyo mwalasango kutusha ku mitima yenu; pantu ikoli lyandi lyalyanguka, ne cisendo candi calipepuka.”—Mateo 11:28-30.

2. Cilanya imimwene ya kwa Yehova ne ya bantunse ukukuma kuli (a) Yesu Kristu, na (b) bakonshi ba kwa kwa Kristu.

² Imimwene ya kwa Lesa iya babomfi bakwe ilingi line yalibe yapusanako nga nshi ku ya bantunse. Alolesha pa mulandu ukufuma ku mimwene yapusanako kabili alalanguluka imbali shintu bambi te kuti pambi beshibepo nangu kamo. Lintu Yesu Kristu aendele pe sonde, ali “uwasuulwa kabili uwakankambwa ku bantu.” Abo abashabikile icitetekelo muli wene nga Mesia ‘tabamulingile wa kwangwa.’ (Esaya 53:3; Luka 23:18-21) Lelo, mu menso ya kwa Lesa, ali “mwana [wa kwa Lesa], Uwatemwikwa,” ku untu Wishi asosele ati: “Muli iwe e mo mbekelwa.” (Luka 3:22; 1 Petro 2:4) Pa kati ka bakonshi ba kwa Yesu Kristu paba abantu abasuulwa pantu lwa ku mubili baba abapiina kabili bapita mu bucushi ubwingi. Nalyo line, mu menso ya kwa Yehova no Mwana wakwe, aba musango yo kuti baba abakankaala. (Abena Roma 8:35-39; Ukusokolola 2:9) Mulandu nshi uwa kupusana mu mimwene?

3. (a) Mulandu nshi ukumona kwa kwa Yehova abantu ilingi line kwabela ukwapusanako nga nshi ku kumona kwa bantunse? (b) Mulandu nshi cabela ica bucindami bukalamba kuli ifwe ukulabula umusango wa muntu twaba lwa nkati?

³ Yeremia 11:20 alasuka: “Yehova . . . [alelabule] mfyo no mutima.” Alamona cintu twaba lwa nkati, nelyo fye ni shilya mbali sha buntu bwesu ishabelama ku menso ya bambi. Mu kulabula kwakwe, apeela ukukomailapo kukalamba ku mibele ne fipimo ifyakatama ku kwampana kusuma na wene, ifyacishapo kukwata ubunonshi bubelelela kuli ifwe. Ukwishiba kwesu ico caba ca kwebekesha; na kabili cileto mwenso. Apantu Yehova apeelo kusakamana ku cintu twaba lwa nkati, caliba icacindama kuli ifwe ukulabula cintu twaba lwa nkati nga tuli no kushininkisha ukuba umusango wa bantu abo afwaya mu calo cakwe cipya. Icebo Cakwe cilatwaafwa ukucita ukulabula kwa musango yo.—AbaHebere 4:12, 13.

Ifyo Yafinisha Amatontonkanyo ya kwa Lesa!

4. (a) Cinshi cakuntile kemba wa malumbo ukubilisha ukuti amatontonkanyo ya kwa Lesa yali ayafinisha kuli wene? (b) Mulandu nshi yalingile ukubela ayafinisha kuli ifwe?

⁴ Pa numa abe naetetula pa kusaalala no kushika kwa kwishiba kwa kwa Lesa ukwa babomfi bakwe, na pa maka ya kwa Lesa ayapulamo aya kupayanya ukwaafwa ukuli konse uko pambi bengakabila, kemba wa malumbo Davidi alembele ati: “Ifyo yafinisha kuli ine amatontonkanyo yenu!” (Ilumbo 139:17a) Ayo matontonkanyo, ayasokololwa mu Cebo cakwe icalembwa, yalisumbuka nga nshi ukucila icili conse icafuma ku bantunse, te mulandu na fintu imfundo shabo shingamoneko kupuulama. (Esaya 55:8, 9) Amatontonkanyo ya kwa Lesa yatwaafwa ukutontomesha pa fintu ifyo mu cituntulu ifyacindama mu bumi no kuba abapimpa mu mulimo wakwe. (Abena Filipi 1:9-11) Yatulanga ifya kumone milandu inshila Lesa aimwenamo. Yatwaafwa ukuba abafumacumi kuli fwe bene, ukulolenkana no musango wa muntu untu twaba ku mutima. Bushe uli uwaitemenwa ukucite co?

5. (a) Cinshi cintu Icebo ca kwa Lesa citucincisha ukubaka “ukucishamo ku kubaka konse”? (b) Ni shani fintu icalembwa ca mu Baibolo ukukuma kuli Kaini cingatunonsha? (c) Nangu cingati tatwaba pe samba lye Funde lya kwa Mose, ni shani fintu litwaafwa ukumfwikisha icisekesha Yehova?

⁵ Abantunse bakongamina ku kubika ukukomaila kwacishamo pa fya ku nse, lelo Amalembo yatufunda ukuti: “Ukucishamo ku kubaka konse, lindo mutima obe.” (Amapinda 4:23) Mu nshila shonse shibili ku fifundisho na ku fya kumwenapo, Baibolo ilatwaafwa ukucite co. Itwebo kuti Kaini alebomba mu kabepekesho ukupeela amalambo kuli Lesa ilintu mu mutima wakwe alecululuka ne cikonko, lyene ulupato, ukulola kuli munyina Abele. Kabili itucincisha ukukanapala wene. (Ukutendeka 4:3-5; 1 Yohane 3:11, 12) Ipeela icalembwa ca cifwaikwa ce Funde lya kwa Mose ica cumfwila. Lelo na kabili ikomaila pa kuti icifwaikwa cikalamba ice Funde cali ca kuti abo balepepa Yehova bafwile ukumutemwa no mutima wabo onse, umuntontonkanya, umweo, no bukose; kabili ilondololo kuti icakonkapo ukucindama lyali lifunde lya kuti baletemwa umunabo nga abene.—Amalango 5:32, 33; Marko 12:28-31.

6. Mu kubomfya Amapinda 3:1, fipusho nshi tulingile ukuipusha fwe bene?

⁶ Pa Amapinda 3:1, twalicincishiwa te kusunga fye amafunde ya kwa Lesa lelo ukushininkisha ukuti icumfwila cili kulumbulula kwa cintu mu cine cine cili mu mutima wesu. Ngo muntu umo umo tulekabila ukuipusha fwe bene ukuti, ‘Bushe ifyo e fyo caba ku cumfwila candi ku fifwaikwa fya kwa Lesa?’ Nga twailuko kuti mu milandu imo ukukuntwa kwesu nelyo ukutontonkanya nakupelebela—kabili takwaba nangu umo uwa ifwe uwingasoso kuti tatwaba na kalema—lyene tulekabila ukwipusha ukuti, ‘Cinshi ndecita ku kuwamyako imibele?’—Amapinda 20:9; 1 Yohane 1:8.

7. (a) Ni shani pambi ukusenuka kwa kwa Yesu abaFarise pali Mateo 15:3-9 kwingatwaafwa mu kubaka umutima wesu? (b) Mibele nshi pambi ingafwaya ifwe ukubuula ifipimo fyakosa ku kusalapula umuntontonkanya wesu no mutima?

⁷ Lintu abaFarise ba ciYuda bacitile ukubepekesha kwa kucindika Lesa ilintu mu bucenjeshi balesumbula icibelesho icasongelwe no buseko bwa pa lwabo, Yesu abasenwike nga aba bumbimunda no kulango kuti ukupepa kwabo kwali kwa fye. (Mateo 15:3-9) Yesu na kabili asokele ukuti pa kusekesha Lesa, uumona mu mutima, tacakumanina ukutungulula ubumi ubumoneka ku nse ngo bwa mibele isuma ilintu, mu kuba ne cilolwa ca kukwata ubuseko bwa lunkumbwa, mu mukoosha tuleibimba mu matontonkanyo ya bucisenene. Kuti pambi twakabila ukubuula ifipimo fyakosa ku kusalapula umuntontonkanya wesu no mutima. (Amapinda 23:12; Mateo 5:27-29) Ukusalapula kwa musango yo kulakabilwa na kabili nga ca kuti pamo nge ca kufumamo mu ncito yesu iya ku mubili, amabuyo yesu mu masomo, nelyo ukusala kwesu ukwa fya kusekesha, tulesanguka abapashanya icalo, ukucileka ukutumumunga ukulingana ne fipimo fya ciko. Shi twikatala atulaba ukuti umusambi Yakobo eta abo abaitunga ukuba aba kwa Lesa lelo abafwaya ukuba bacibusa ba calo nga “banakashi bacende.” Mulandu nshi? Pantu “pano isonde ponse palaala mu maka ya Mubifi.”—Yakobo 4:4; 1 Yohane 2:15-17; 5:19.

8. Pa kunonkelamo mu kukumanina mu matontonkanyo yafinisha aya kwa Lesa, cinshi tulekabila ukucita?

⁸ Pa kunonkelamo mu kukumanina mu matontonkanya ya kwa Lesa pali iyi ne milandu imbi, tulekabila ukubikako pa mbali inshita ya kubelenga yene nelyo ukumfwa yene. Icacila pali ico, tulekabila ukusambilila yene, ukulanda pa lwa yene, no kwetetula pali yene. Bakabelenga abengi aba Ulupungu lwa kwa Kalinda lyonse balasangwa ku kulongana kwa Nte sha kwa Yehova, kuntu Baibolo ilandwapo. Balalubule nshita ukufuma ku fikonkelelo fimbi pa kuti bengacita cene. (Abena Efese 5:15-17) Kabili ico bapokelela mu kukonkapo calicindama apakalamba ukucila pa cuma ca ku mubili. Bushe ifyo te fyo uyumfwa?

9. Mulandu nshi bamo abasangwa ku kulongana kwa Bwina Kristu balundulukila mu kucilapo kwangufyanya ukucila pali bambi?

⁹ Nangu cibe fyo, bamo abasangwa kuli uku kulongana balacita ukulunduluka kwa ku mupashi kwacilapo kwangufyanya ukucila pa fyo bambi bacita. Babomfya icine mu kukumanina kwacilapo mu bumi bwabo. Cinshi cilenga ici? Ilingi line, ica kusangwilako cikalamba mukoosha wabo mwi sambililo lya pa lwabo. Balatesekesho kuti tatwikalila aba mweo ku cilyo kweka; ica kulya ca ku mupashi cila bushiku cacindama mu nshila imo ine nga ukulya ica kulya ca ku mubili lyonse. (Mateo 4:4; AbaHebere 5:14) E co balatukuta ukupoosa mu kucefyako inshita imo cila bushiku ukubelenga Baibolo nelyo impapulo ishilondolola yene. Balapekanishisho kulongana kwa cilonganino, ukusambilila ifiputulwa fili no kusambililwa mu kubangilila no kubelenga amalembo. Balacita ifyacila pa kubelenga ifyebo; baletetula pali fyene. Icipasho cabo ice sambililo cisanshamo ukutontonkanya mu kusakamanisha pa lwa kwambukila kuntu ico balesambilila cilingile ukukwata pa bumi bwabo. Ilintu bumupashi bwabo bulekula, besa ku kuyumfwa nge fyayumfwile kemba wa malumbo uwalembele ati: “Ifyo natemwa amalango yenu! . . . Fyapesha amano ifishimiko fyenu.”—Ilumbo 1:1-3; 119:97, 129.

10. (a) Butali bwaba shani cabe ca kumwenamo ukutwalilila ukusambilila Icebo ca kwa Lesa? (b) Ni shani fintu Amalembo yalange ci?

¹⁰ Nampo nga twalisambilila Icebo ca kwa Lesa pa mwaka umo, imyaka 5, nelyo imyaka 50, tacingasanguka ica kutendusha—te kuti cibe fyo nga ca kuti amatontonkanyo ya kwa Lesa yalifinisha kuli ifwe. Te mulandu no bwingi bwa fintu uuli onse uwesu asambilila ukufuma mu Malembo, kwabe fyafulisha ifyo tushaishiba. “Impendwa sha yako ubwingi!” e fyasosele Davidi. “Nga naesho kuyapenda, yafulo kucilo musensenga.” Amatontonkanyo ya kwa Lesa yalicila pa maka yesu aya kupenda. Nga twali no kutantawila amatontonkanyo ya kwa Lesa akasuba konse kabili twaponene mu tulo lintu tulecite fyo, lintu twingashibuka ulucelo, kuti nalyo line kwaba na fimbi ifyafula ifya kutontonkanyapo. Muli fyo, Davidi alembele ati: “Nashibuka, na nomba ncili kuli imwe.” (Ilumbo 139:17, 18) Ku ciyayaya conse kukaba ifyacilapo kuli ifwe ukusambilila pa lwa kwa Yehova ne nshila shakwe. Tatwakatale atwisa ku cipimo kuntu tukeshiba fyonse.—Abena Roma 11:33.

Ukupata Cintu Yehova Apata

11. Mulandu nshi cabele cacindama te kwishiba fye amatontonkanyo ya kwa Lesa lelo ukwakana ukuyumfwa kwakwe?

¹¹ Ukusambilila kwesu ukwa Cebo ca kwa Lesa takuba fye ne cilolwa ca kwisusha umutwe wesu ne fishinka. Ilintu twayasuminisha ukupeka mu mutima wesu, tutendeka na kabili ukwakana ukuyumfwa kwa kwa Lesa. Fintu ico caba icacindama! Nga tatulundulwile ukuyumfwa kwa musango yo, cinshi cingafumamo? Nangu cingati pambi kuti twalanda pa cintu Baibolo isosa, kuti pambi, nangu ni fyo, twakumbwa ifintu fyabindwa, nelyo pambi kuti twayumfwa ukuti icilefwaikwa cili cisendo. Cabe ca cine ukuti nangu fye twalipata icalubana, kuti pambi twakwata ukushomboka pa mulandu wa kukanapwililika kwa buntunse. (Abena Roma 7:15) Lelo nga ca kuti tatubikileko ukubombesha kwacincila ukuleta cintu twaba mu kati mu kumfwana ne caba icalungama, bushe kuti twaenekela ukusekesha Yehova, “uulabule mitima”?—Amapinda 17:3.

12. Fyacindama shani ukutemwa kwa bukapepa no lupato lwa bukapepa?

¹² Ulupato lwa bukapepa ca kucingilila ca maka ukucincintila ukulufyanya, pamo fye nga fintu ukutemwa kwa bukapepa kulenga ukucite calungama ukwa buseko. (1 Yohane 5:3) Mu kubwekeshabwekeshapo Amalembo yatucincisha ukulundulula fyonse fibili ukutemwa no lupato. “Mwe batemwa Yehova, pateni ububi.” (Ilumbo 97:10) “Mube abapato bubifi, abalambatila ku busuma.” (Abena Roma 12:9) Bushe tulecite co?

13. (a) Lipepo nshi ilya kwa Davidi ukukuma ku konaulwa kwa babifi tuli abasuminishanya nalyo mu kukumanina? (b) Nga fintu calangililwa mwi pepo lya kwa Davidi, ni bani bali ababifi bantu apepeele ukuti Lesa onaule?

¹³ Yehova alilondolola mu kumfwika imifwaile yakwe iya kunukulamo ababifi mwi sonde no kuletako isonde lipya umukekalo bulungami. (Ilumbo 37:10, 11; 2 Petro 3:13) Bakatemwa ba bulungami bafuluka iyo nshita ukwisa. Baba mu kumfwana kwakumanina na kemba wa malumbo Davidi, uwapepele ati: “Iye, mwe Lesa, nga mwaipaya ababifi, no kutalusha kuli ine abantu ba mulopa!—abantu abamweba ku mapange yabi, abalumbule shina lyenu apa fye, abalwani benu.” (Ilumbo 139:19, 20) Davidi talefuluka pa lwakwe ukwipaya ababifi ba musango yo. Apepele ukuti icilandushi cingesa ukufuma kuli Yehova. (Amalango 32:35; AbaHebere 10:30) Aba tabaali bantu abo mu nshila imo bali nabakalifya Davidi pa lwakwe. Baiminineko Lesa bubi bubi, ukusende shina lyakwe apa fye. (Ukufuma 20:7) Mu kubulo bufumacumi, baitungile ukumubombela, lelo balebomfya ishina lyakwe ku kulundulula amapange yabo yene. Davidi takwete ukutemwa kuli abo abasalilepo ukuba abalwani ba kwa Lesa.

14. Bushe kuliko ababifi abengafwiwa? Nga ni fyo, ni shani?

¹⁴ Kwalibako amakana ya mamilioni ya bantu abashaishiba Yehova. Abengi aba bene mu bumbuulu babelesha ifintu ifyo Icebo ca kwa Lesa cilanga ukuba ifya bubifi. Nga ca kuti batwalilila muli yi nshila, bakaba pa kati ka abo bakaloba mu kati ka bucushi bukalamba. Lelo, Yehova tabekelwa mu mfwa ya mubifi, ne fwe tatulingile kubekelwamo. (Esekiele 33:11) Ilintu inshita ilesuminisha, twesha ukwaafwa abantu ba musango yo ukusambilila no kubomfya inshila sha kwa Yehova. Lelo ni shani nga ca kuti abantu bamo balanga ulupato lwakosa kuli Yehova?

15. (a) Ni bani abo bantu kemba wa malumbo amwene nga “abalwani”? (b) Ni shani ilelo twingalanga ukuti ‘twalipata’ abo bapondokela Yehova?

¹⁵ Ukukuma kuli bene, kemba wa malumbo atile: “Bushe abamupata nshabapata, mwe Yehova? bushe abamwimina nshabafiitilwa? Nabapato lupato lutuntulu; balingwa abalwani bandi.” (Ilumbo 139:21, 22) Cali ni pa kuti bapatile Yehova mu kukosa e co Davidi abamwenene no bunani. Abasangu balisanshiwa pa kati ka abo abalanga ulupato kuli Yehova pa kumusangukila. Ubusangu bwaba, mu cituntulu, kupondokela Yehova. Abasangu bamo baitunga ukwishiba no kubombela Lesa, lelo balakaana ifisambilisho nelyo ififwaikwa fyakwe ifyatantikwa mu Cebo cakwe. Bambi batunga ukusumina muli Baibolo, lelo balakaana ukuteyanya kwa kwa Yehova kabili mu kucincila besha ukucilima umulimo wa kuko. Lintu ku mufulo basalapo ububi bwa musango yo pa numa ya kwishiba icalungama, lintu ububi bwaikalisha ica kuti mu kukanapaatukako bwaba lubali lwa buntu bwabo, lyene Umwina Kristu afwile ukupata (mu mano ya Baibolo aye shiwi) abo mu kukanapaatukako baikakatika ku bubi. Abena Kristu ba cine bakanako ukuyumfwa kwa kwa Yehova ukulola ku basangu ba musango yo; tabafwaisho kwishiba pa lwa mfundo sha busangu. Mu kupusanako, ‘bayumfwa abafiitwa’ ukulola kuli abo abaipanga abene ifibambe fya kwa Lesa, lelo balekela Yehova ukuputunkanya icilandushi.—Yobo 13:16; Abena Roma 12:19; 2 Yohane 9, 10.

Lintu Lesa Atulengula

16. (a) Mulandu nshi Davidi afwaile Yehova ukumulengula? (b) Cinshi cabako pa lwa mutima wesu cintu tulingile ukwipusha Lesa ukutwaafwa ukwiluka?

¹⁶ Davidi tafwaile ukuba nga babifi mu nshila iili yonse. Abantu abengi besha ukufisa cintu baba lwa nkati, lelo Davidi mu kuicefya apepele ati: “Nenguleni, mwe Lesa, no kwishibo mutima wandi; njesheni, no kwishiba amatontonkanyo yandi [ayalete sakamika, NW]: moneni nga mwabe mibele ya bubi muli ine, no kuntungulula mu nshila ya muyayaya.” (Ilumbo 139:23, 24) Lintu alelosha ku mutima wakwe, Davidi taloseshe ku cilundwa ca mubili. Mu kumfwana no bupilibulo bwa mampalanya ubwa ilya numbwilo, aloseshe ku cintu ali lwa nkati, umuntu wa mu kati. Ne fwe bene tulingile ukufwaya Lesa ukuti alengule umutima wesu no kumona nampo nga twalikwato kufwaisha, icitemwishi, inkuntu, imifwaile, amatontonkanyo, nelyo ukukuntwa ifishalinga. (Ilumbo 26:2) Yehova alatulaalika ukuti: “We mwana wandi, peelo mutima obe kuli ine, na menso yobe leka yabake imibele yandi.”—Amapinda 23:26.

17. (a) Mu cifulo ca kufimba pa matontonkanyo yalete sakamika, cinshi tulingile ukucita? (b) Bushe cilingile ukutupapusha ukusanga ukukongama kwalubana mu mutima wesu, kabili cinshi tulingile ukucita pa lwa kwene?

¹⁷ Nga ca kuti mwalibamo muli ifwe amatontonkanyo ya bubi, ayalete sakamika pa mulandu wa kufwaisha kwalubana nelyo inkuntu shalubana nelyo pa mulandu wa myendele imo iyalubana pa lubali lwesu, lyene mu cine cine tulefwaya Yehova ukuti atwaafwe ukubombela pali cene. Mu cifulo ca mashiwi “imibele ya bubi,” ubupilibulo bwa kwa Moffatt bubomfya inumbwilo “inshila yalubana”; The New English Bible itila: “Inshila iili yonse iilenga wene ubulanda [uko e kuti, Lesa].” Ifwe fwe bene te kuti pambi mu kulengama tumfwikishe amatontonkanyo yesu ayalete sakamika na muli fyo tatwishiba ifya kulumbulula impika yesu kuli Lesa, lelo alomfwikisha imibele tulimo. (Abena Roma 8:26, 27) Tacilingile ukutupapusha nga ca kuti kwabako ukukongama kwabipa mu mutima wesu; nalyo line, tatulingile ukupeela kwene umwa kulesesha. (Ukutendeka 8:21) Tulingile ukufwaya ukwaafwa kwa kwa Lesa ukufumyamo kwene. Nga mu cine cine twalitemwa Yehova ne nshila shakwe, kuti twamutununuka ku kwaafwa kwa musango yo mu kuba no kucetekela kwa kuti “Lesa alikula acile mitima yesu, kabili aishiba fyonse.”—1 Yohane 3:19-21.

18. (a) Ni shani fintu Yehova atutungulula mu nshila ya muyayaya? (b) Nga twatwalilila ukukonka ubutungulushi bwa kwa Yehova, kutashiwa nshi kwabamo icikabilila twingenekela ukupokelela?

¹⁸ Mu kumfwana ne pepo lya kwa kemba wa malumbo ukuti Yehova engamutungulula mu nshila ya muyayaya, Yehova, mu cituntulu, alatungulula ababomfi bakwe abaicefya, aba cumfwila. Alabatungulula te mu nshila fye iingapilibula ubumi bwalepa pa kuti fye tabapununkishe ubumi bwabo pa mulandu wa kucito bubifi lelo ni mu nshila iyo itungulula ku bumi bwa ciyayaya. Ebekesha pali ifwe ukukabila kwesu ukwa mutengo wa kukonsolwela imembu uwe lambo lya kwa Yesu. Ukupitila mu Cebo cakwe no kuteyanya kwakwe, atupayanishisha ukufunda kwakatama pa kuti twingaba na maka ya kucito kufwaya kwakwe. Akomailapo kuli ifwe pa bucindami bwa kwankula ku kwaafwa kwakwe pa kuti twingaba lwa nkati umusango wa muntu tuitunga ukuba lwa ku nse. (Ilumbo 86:11) Kabili atukoselesha ne cilolelo ca butuntulu bwapwililika mu calo cipya ica bulungami, pamo no bumi bwa ciyayaya ubwa kubomfya mu kubombela wene, Lesa wa cine eka fye. Nga twatwalilila ukwankulako muli bucishinka ku kutungulula kwakwe, wene, mu cishinka, akasosa kuli ifwe, nga fintu asosele ku Mwana wakwe ukuti: “Muli iwe e mo mbekelwa.”—Luka 3:22; Yohane 6:27; Yakobo 1:12.

Cinshi Cili Ukulandapo Kobe?

◻ Mulandu nshi ukumona kwa kwa Yehova ababomfi bakwe ilingi line kwabela ukwapusanako nga nshi ku kumona kwa bantunse?

◻ Cinshi cingatwaafwa ukwiluka cintu Lesa amona lintu abebeta umutima wesu?

◻ Musango nshi uwe sambililo utwafwilisha ukusambilila ifishinka no kubaka umutima wesu?

◻ Mulandu nshi cabele cacindama te kwishiba fye cintu Lesa asosa lelo ukwakana imimwene yakwe?

◻ Mulandu nshi tulingile ukupepela pa lwesu ukuti: “Nenguleni, mwe Lesa, no kwishibo mutima wandi”?

[Icikope pe bula 16]

Lintu ulesambilila, tukuta ukulenga amatontonkanyo ya kwa Lesa no kuyumfwa fibe fyobe

[Icikope pe bula 18]

Amatontonkanyo ya kwa Yehova “yafulo kucilo musensenga”

[Abatusuminishe]

Pictorial Archive (Near Eastern History) Est.