Bakabilisha ba Bufumu Bacita Lipoti

Umucinshi ku Kushila kwa Mulopa

BAIBOLO ilango kuti umulopa walyumo mutengo mu menso ya kwa Lesa no kuti alisenuka ukuubomfya bubi bubi. (Ubwina Lebi 17:14; Imilimo 15:19, 20, 28, 29) Pa mulandu wa aya makambisho ya Baibolo, Inte sha kwa Yehova tabapokelela ukukuushishamo kwa mulopa.

Ku kwaafwa badokota na babomba mu fipatala ukumfwikisha icifulo ca butotelo ica Nte sha kwa Yehova pali uyu mulandu no kutesekesha ukuti Inte bakapokelela ukundapa kwa kupyanikapo, Watch Tower Society yaliteyanya Bakomiti ba Cipatala aba Kumfwaninamo mu fyalo fyalekanalekana. Ifilundwa fya aya makomiti filatandalila ifipatala ukulanda na babomfi ba fipatala. Pali nomba line, mu misumba 12 iya mu Poland, ukucila pa kukumana 200 kwalicitilwe, ukubimbamo badokota ukucila pali 500, ukucilisha abakalamba ba makiliniki nelyo imiputule ya balwele iya mu fipatala. Icakonkapo cacitike mu kati ka kutandala kumo ukwa musango yo:

“Ukukumana pa Cardio-Surgical Clinic (Kiliniki Iilepula Imitima) mu Zabrze cali ca kupwishishisha catunguluka. Ukutula 1986 ibumba lya babomfi ba pa kiliniki balibombela bamunyinefwe ukwabulo mulopa. Ukufika pali ino nshita, ukulepula kwa musango yo 40 kwalicitwa. Kiliniki ili iyaiteyanya ukupokelela abalwele apapela Poland onse no kufuma ku nse ya calo na ko. Pa numa ya kulanshanya kwa maminiti 50, inkonkani mu muputule wa balwele alangishe ifilundwa fya Komiti wa Cipatala uwa Kumfwaninamo kwi bumba lya balwele no kutila: ‘Aba bantu ni Nte sha kwa Yehova. Babombela pamo na kiliniki wesu, kabili balatwaafwa. Te basumina banabo beka fye lelo na balwele bambi nabo bene balanonkelamo mu kwaafwa kwabo. Pa mulandu wa Nte sha kwa Yehova, natushininwa ukuti ukulepula kwapikana ukwa mutima kuti kwacitwa ukwabula umulopa.

“‘Ku ca kumwenako, twabombele uyu namayo [ukusonta kuli umo wa balwele bakwe] ukwabulo mulopa, kabili pali Cimo ali no kuya ku ŋanda. Kuti natemwo kulandapo kuti tubomfya umulopa limo limo fye ukucila kale pantu waba wa busanso. Walyampana na HIV [kashishi kaleta ubulwele bwa AIDS], ubulwele bwa ku libu, no kupepemuka kwashingilila.

“‘Ine ndi Katolika, lelo mu ŋanda yesu lyonse twaliba abasuminisha imimwene ya bambi. Inshita imo napitile mu cibansa ca mu Slaski pamo na bana bandi. Akale, ici cibansa calilekeleshiwe, lelo twamwene ukuti nomba calyalwike ica kuti te kuti usumine. Naipwishe umo uwa babomfi ifyo uku kwaluka kwaishile mu kubako. Atile abene ba cifulo bali mupepi no kulufye subilo lya kuwamya icibansa, lelo capeelwe ku kusonkela ku Nte sha kwa Yehova, kabili baliciwemye.

“‘E co aba ni bamo abo ifwe bonse twingasambililako ifingi. Ndemona muli uno muputule wa balwele tulingile ukusuminisha imimwene ya bambi.’ Lyene, ukusonta kuli Nte umo uwali no kubombelwa mu nshiku shinono, atile: ‘Uyu namayo ni umo uwa Nte sha kwa Yehova, kabili ali no kubombelwa ukwabulo mulopa.’”

Ilintu Inte sha kwa Yehova tabesha ukupatikisha ifisumino fyabo pali bambi, balakonka ica kumwenako ca batumwa no “kunakila Lesa ukucilo kunakila abantu.” (Imilimo 5:29) Ici cisanshamo ukukwata umucinshi ku mulopa. Balatasha lintu bambi bacindika ukushininwa kwabo ukwa butotelo pali uyu mulandu.