Ifipusho Ukufuma ku Babelenga

Lintu ifita fya kwa Shauli fyalile inama pamo no mulopa, mulandu nshi bashaputunkanishiwilwe, apantu uko kwali e kukanda kwatantikwe mwi Funde lya kwa Lesa?

Aba baume balitobele ifunde lya kwa Lesa ilya pa mulopa, lelo pambi balangilwe inkumbu pantu balikwete umucinshi ku mulopa, nangu cingati balingile ukuba aba mukoosha mu kucilapo pa lwa kulangisha umucinshi wa musango yo.

Languluka imibele. Abena Israele pe samba lya Mfumu Shauli no mwana wakwe umwaume Yonatani baali pa bulwi na baPelishiti. Pa kashita kamo lintu “abena Israele bacikilishiwe” mu bulwi, Shauli mu kususwa acitile umulapo wa kuti abaume bakwe tabalingile ukulya ukufikila abalwani bacimfiwa. (1 Samwele 14:24) Mu kwangufyanya umulapo wakwe walengele impika.

Abaume bakwe balecimfya mu bulwi bwakosa, lelo ukubombesha kwabamo kupilikita kwalebambukila icabipisha. Bali ne nsala kabili abafunshika. Cinshi bacitile muli ilya mibele yayafisha? “Abantu baondomokele icitapwa, babuulile impaanga ne ŋombe, no kushiipaila pa nshi; abantu baliile inama pamo no mulopa.”—1 Samwele 14:32.

Ico cali kutoba ifunde lya kwa Lesa ukukuma ku mulopa, nga fintu bamo mu bantu ba kwa Shauli bamwebele, abati: “Moneni, abantu balebembuka kuli Yehova mu kulye nama pamo no mulopa.” (1 Samwele 14:33) Ee, Ifunde lyasosele ukuti lintu inama shaipaiwa, umulopa wali no kupongololwa pa ntanshi inama tailaliwa. Lesa tafwaile ukubuula incitilo sha bumpelwa mano pa kupongololamo umulopa. Pa kubuula intampulo shabamo kupelulula isha kupongolola, ababomfi bakwe kuti balanga umucinshi ku bucindami bwa mulopa. (Amalango 12:15, 16, 21-25) Umulopa wa nama wali no kubomfiwa mu nshila ye lambo pa cipailo, lelo tawali na kuliwa. Ukutoba kwa ku mufulo kwalefumamo kukandwa ku mfwa, pantu abantu ba kwa Lesa baebelwe ukuti: “Umulopa wa ca mubili conse mwilalya, pantu umweo wa ca mubili conse mulopa wa ciko; onse uwaulya asukulwe.”—Ubwina Lebi 17:10-14.

Bushe ifita fya kwa Shauli baletoba Ifunde ku mufulo? Bushe balelanga umusaalula wa kulungatika kwi funde lya bulesa pa mulopa?—Linganyako Impendwa 15:30.

Tatulekabila ukusondwelele fyo. Icalembwa citila ‘baleipaila inama pa nshi no kuliila pamo no mulopa.’ E co bafwile balecita ukwesha kumo ukwa kupongololamo umulopa. (Amalango 15:23) Lelo, mu mibele yabo iyafunshika, iya nsala, tabakobeke ku fimuti inama shaipaiwe no kusuminisha inshita yakumanina ku kupongoloka kwa lyonse ukwa mulopa. Baipaile impaanga ne ŋombe “pa nshi,” icali no kushingilisha ukupongoloka. Kabili bwangu bwangu balisunineko umunofu ku nama iyo pambi yaleele mu mulopa. Muli fyo, nangu cingati bakwete mu muntontonkanya ukumfwila ifunde lya kwa Lesa, tabakonkeshe mu nshila shalinga nelyo ku cipimo calinga.

Ica kufumamo cali ca kuti “abantu baliile inama pamo no mulopa,” icali lubembu. Shauli alishibe ici kabili akambishe ukuti ilibwe likalamba likunkulushiwe kuli wene. Akambishe ifita ukuti: “Palamikeni kuli ine umuntu no muntu iŋombe yakwe ilume, no muntu no muntu impaanga yakwe, muleipaila pano, no kulya; kabili bebembuka kuli Yehova mu kulye nama pamo no mulopa.” (1 Samwele 14:33, 34) Ifita fya mulandu fyalyumfwilile, kabili “Shauli akuulile iciipailo kuli Yehova.”—1 Samwele 14:35.

Ukwipaila inama pa libwe nakalimo kwalengele ukupongoloka kwakumanina ukwa mulopa. Umunofu ukufuma ku nama kuti waliwa ukutaluka ukufuma apo ukwipaya kwacitilwe. Shauli kuti pambi abomfeshe umulopa umo uwapongolwelwe pa cipailo mu kufwaya inkumbu sha kwa Lesa ukulola kuli abo ababembwike. Yehova alitambulwile inkumbu, mu kumonekesha pa mulandu wa kuti alishibe ukwesha ifita fyali naficita nangu cingatila bali abanaka nga nshi kabili ne nsala. Lesa kuti pambi na kabili acilangulwike ukuti umulapo wa mu kususwa uwa kwa Shauli watitikishe abantu bakwe ukwingila muli ilya mibele yabamo kupelelwa.

Ubu bulondoloshi bulanga ukuti imibele ya mu kampampa tayaba bwelelo bwa kusuulilapo ifunde lya bulesa. Bulingile na kabili ukutwaafwa ukumona ukukabila kwe tontonkanyo lyasakamana pa ntanshi ya kucito mulapo, pantu umulapo wa mu kususwa kuti walenga impika kuli ifwe pa lwesu na kuli bambi.—Lukala Milandu 5:4-6.