Abapwisha Isukulu lya Gileadi Basanga “Insansa Shafulilako mu Kupeela”
PA MULUNGU, March 6, 1994, ulupwa lwa Bethel ulwa pa cishinte cikalamba ica calo conse ica Nte sha kwa Yehova na batandashi balibungene ku kashita ka mutebeto—ukupwishe sukulu ukwe kalasi lyalenga 96 ilya Watchtower Bible School of Gilead. Mu kulandapo kwakwe ukwa kwiswila, ceyamani wa programu Karl F. Klein, uwabomba mwi Bumba Litungulula ilya Nte sha kwa Yehova mupepi ne myaka amakumi yabili, aebele abasambi 46 ukuti: “Yesu atile mwalibamo insansa ishafulilako mu kupeela ukucila mu kupokelela. E fyo cikaba na mu mulimo wenu uwa bumishonari—ilyo mwacililako kupeela, e lyo mukacililako kuba aba nsansa.”—Imilimo 20:35, NW.
Amashiwi ya Kushalikapo aya Kukonkomesha
Ukukonkana kwa malyashi ku basambi kwalikonkelepo. Leon Weaver, icilundwa ca Komiti wa Dipartmenti ya Mulimo, alundulwile umutwe wa kuti “Ukushipikisha Kulakatamika Yehova.” Ifwe bonse tulalolenkana ne fya kwesha. (2 Abena Korinti 6:3-5) “Lintu tuli pe samba lya kutitikisha,” e fyalandile Munyina Weaver, “caliba icayanguka nga nshi ukushintilila pali fwe bene.” Nangu cibe fyo, acinkwileko abasambi ukuti: “Icili conse mwalolenkana na co mu nshila ya fya kwesha fya buntunse, Yehova alikwatamo buseko muli cene. Takabale amusuminisha ukweshiwa ukucila muli ico mwinganasha.”—1 Abena Korinti 10:13.
“Lyonse Teeseni Umulimo Wenu” wali e mutwe we lyashi lyakonkelepo, ilyapeelwe na Lyman Swingle uwa mwi Bumba Litungulula. Abena Israele lyonse tabasalile uko baali no kwikala ne co baali no kucita. Uluko lumo na lumo lwalipeelwe iciputulwa ca mpanga, kabili abena Lebi balipeelwe imilimo ya kulungatika iya kucita. Mu kupalako, abengi mu mulimo wa nshita yonse uwaibela ilelo—pamo nga bamishonari ne filundwa fya lupwa lwa Bethel—tabaisalila abene uko bali no kwikala no mulimo bali no kubomba. Ni shani nga ca kuti umo akumanya ukuyumfwa kwa kutwishika pa lwa mulimo wakwe uwapeelwa? “Nga ca kuti mwatonta amenso yenu kuli Kelenganya wa citetekelo cesu, Yesu, no kulanguluka ica kumwenako cakwe mu kupalamisha, tamwakanenuke,” e fyasosele Munyina Swingle.—AbaHebere 12:2, 3.
Leonard Pearson, uwa mu Komiti ya ku Watchtower Farms, alikonkelepo no mutwe wa kuti “Twalilileni Ukuba Abatontomeshiwa.” Atile: “Kuti wakwata kamera wawamisha, ica kukopa cayembesha, ukwimika kwalinga, kabili nalyo line ukukwata ifya kufumamo fyabipa—nga ca kuti kamera obe tatontomeshiwe bwino.” Ukupala igalasi lya kumwenamo ilya kamera ilyasaalala, imimwene yesu ifwile ukusanshamo ukushimikila kwa mu kusaalala kwa calo ukulecitwa. Tatulingile ukulaba icikope cikalamba. “Abo abatontomesha pa bene beka tabakabe ne nsansa mu mulimo wabo,” e fyasosele Munyina Pearson. “Abo abatontomesha pali Yehova no mulimo abapeela ukucita bakatunguluka.”
“Kwalibako Ifingi Ifya Kubelapo aba Kutasha” wali e mutwe wa lyashi lyakonkelepo, ilyapeelwe na John E. Barr, icilundwa na cimbi ice Bumba Litungulula. “Mwikatala amulufya ukuyumfwa kwenu ukwa kutasha kuli Yehova,” e fyo Munyina Barr akonkomeshe abasambi. “Ni kumo ukwa ntulo shakulisha isha kwikusha, te mulandu kupeelwa kwa mulimo nshi mukwete.” Imibele ya mutima iya kutasha yacincishe Davidi ukulembo kuti: “Imyando yamponena umwawama; awe, icikwatwa canyembela.” (Ilumbo 16:6) “Mwalikwata icikwatwa cateeswa nga nshi ica musango yo mu kuyumfwa abapalamisha kuli Yehova mu bumi bwenu ubwa cila bushiku,” e fyasosele Munyina Barr. “Yehova takabale amupokolola uko kwampana kulila fye mwatwalilila ukulolesha pali kwene nge cintu cimo icayemba nga nshi ico mwabelapo aba kutasha.”
Kafundisha wa Gileadi Jack Redford e wakonkelepo ukulanda, pa mutwe wa kuti “Ni Shani Fintu Mukabomfya Ululimi Lwenu?” Mwandi bonaushi ubo imilandile yabulo kutontonkanya ingalenga! (Amapinda 18:21) Ni shani fintu ululimi lwingalamwa? “Mufwile intanshi ukukansha umuntontonkanya wenu,” e fyayaswike Munyina Redford, “pa mulandu wa kuti ululimi lubelebesha umuntontonkanya no mutima.” (Mateo 12:34-37) Yesu apayenye ica kumwenako cawamisha; abomfeshe ululimi lwakwe ku kukusha ishina lya kwa Yehova. “Ilelo kuli icipowe ca kumfwa ifyebo fya kwa Yehova,” e fyo Munyina Redford aebele ikalasi. “Mwalishiba ifyo fyebo. Mwalikwata ‘ululimi lwa basambilila.’ E co lyonse lekeni ululimi lwenu lutungululwe ku muntontonkanya no mutima ifyapeelwa mu kukumanina kuli Yehova.”—Esaya 50:4.
Ubucindami bwe pepo bwalyebekeshiwe mu lyashi lyaleti “Bushe Muleenda nga mu Kubapo kwa kwa Yehova?” Ulysses Glass, kalemba we sukulu, alandile ukuti: “Nga ca kuti wishi alebombesha ku kwafwilisha ulupwa lwakwe lelo tabalile alanda kuli bene kabili tabalile acitapo inumbwilo sha citemwishi, ulupwa lwakwe kuti lwasondwelela fye ukuti inkuntu yakwe yali ni imo iya ncito ishawama ukucila iya kutemwa. E fyo caba na kuli ifwe. Kuti pambi twaba abapamfiwa mu mulimo wa kwa Lesa. Lelo nga ca kuti tatulepepa, lyene twaipeela fye ku mulimo ukucila kuli Shifwe wakwato kutemwa uwa mu muulu.”
Theodore Jaracz, uwa mwi Bumba Litungulula, alandile pa mutwe wa kuti “Umulandu Amabumba Yakalamba Balebishanishisha na Bantu ba kwa Lesa.” Cila mwaka imyanda ya makana balakonkomokela ku kuteyanya kwa kwa Yehova. (Sekaria 8:23) Cinshi cishibisha Inte sha kwa Yehova nga bantu ba kwa Lesa? Ica kubalilapo, balapokelela Baibolo yonse nge Cebo ca kwa Lesa. (2 Timote 3:16) Ica cibili, tababuulamo lubali mu mapolitiki. (Yohane 17:16) Ica citatu, bacitilo bunte kwi shina lya kwa Lesa. (Yohane 17:26) Ica cine, balalangisha ukutemwa kwa kuipeela bulilambo. (Yohane 13:35; 15:13) Mu kuba ne fi ifya kwishibikilwako, mu bukose kuti ‘twalondolole fya bulumba fya watwitile ukuti tufume mu mfifi twingile mu lubuuto lwakwe ulwapesha amano.’—1 Petro 2:9.
Pa numa ya aya malyashi ya kukumbamo, abasambi bonse 46 bapokelele amadiploma. Batuminwe ku fyalo 16 ukushinguluke cibulungwa.
Programu wa mu Cungulo Kasuba Uwapusanako
Mu cungulo kasuba Isambililo lya Ulupungu lwa kwa Kalinda ilyaipifiwa lyalitungulwilwe na Donald Krebs uwa mu Komiti wa Bethel. Lyene abapwishe sukulu babikilepo programu uwakwete umutwe wa kuti “Amano Yaulo Tupundu mu Misebo.” (Amapinda 1:20) Bashimike ifya kukumanya fya kulambula ifyo bakwete mu kucitilo bunte mu misebo na mu fifulo fya makwebo. Cine cine, Yehova apaala abo abakwata ubukose bwa kushimikila mu bunte bwa mu lyashi. “Natemwa ukutontonkanya ulwa ifwe ukuba nge fikwakwa mu maboko ya bakaseepa ba bumalaika,” e fyasosele uwapwishe sukulu umo. “Lintu ukulamuka kwesu kwacililako kuba ukwatwa, e lintu abo bamalaika bengatubomfya mu kucilapo.” (Linganyako Ukusokolola 14:6.) Programu wa basambi na kabili asanshishemo ukutamba kwa maslaidi ayo yatwele ibumba pa lwendo lwabamo kufunda ulwa ku Bolivia, Malta, na Taiwan—ifyalo fitatu ukufuma pa fyo abapwishe sukulu muli ili kalasi batuminweko.
Mu kukonkapo, Wallace na Jane Liverance—bamishonari pa myaka 17—balipushiwe. Mu October 1993 balilaalikwe ku Watchtower Farms, uko Munyina Liverance nomba alebomba nga umo uwa bakafundisha ba Gileadi.
Imipeelele yakwete ukumoneka kune yalikonkelepo, iyakwete umutwe wa kuti “Ukucindika Abawaminwa Cene mu Myaka Yabo iya Bukalamba.” Ilyo abantu balekota, umwenso wa kuba ifinangwa no kulekeleshiwa kuti pambi wafumyapo ukuicetekela kwabo. (Ilumbo 71:9) Iyi mipeelele ya kwikato mutima yalangile ifyo bonse mu cilonganino bengatungilila abakalamba ba citetekelo aba musango yo.
Pa numa ya lwimbo lwa kwisalila ne pepo, abasangilweko bonse 6,220 pa Jersey City Assembly Hall ne fikuulwa fyalundanishiwe kuli setilaiti bayumfwile abapembesulwa. Amapepo yesu yali na bapwishe sukulu mu kupeelwa kwabo ukwa mulimo. Shi bengatwalilila ukukumanya insansa shakulilako isho shisako ukupitila mu kupeela.
[Akabokoshi pe bula 26]
Ifipendo fye Kalasi
Impendwa ya fyalo fimininweko: 9
Impendwa ya fyalo batuminweko: 16
Impendwa ya Basambi: 46
Avareji wa myaka ya bukulu: 33.85
Avareji wa myaka mu cine: 16.6
Avareji wa myaka mu butumikishi bwa nshita yonse: 12.2
[Akabokoshi pe bula 27]
Ukusanikila Pali Malta
KRISTENDOMU akakilile icine ca Baibolo mu Malta pa myaka iingi. Bamishonari ba ku Gileadi aba kulekelesha ukutumwa kulya, Frederick Smedley na Peter Bridle, bapwishishe isukulu mwi kalasi lyalenga cinekonsekonse ku numa mu 1947. Nangu cibe fyo, baliketwe no kutamfiwa ukufuma mu Malta mu kwipipa pa numa bafikile. Muli 1948 Yearbook of Jehovah’s Witnesses cacitilwe lipoti ukuti: “Aba bamishonari babili balipoosa inshita imo ine mu filye na mu kuba pamo na balashi ba calo nga ilya bapoosa mu kubomba imilimo yabo iya butumikishi, pa mulandu fye wa kukaanya kwe Bumba lya Bashikofu be Calici lya ciKatolika. Bashimapepo basoso kuti Malta ya baKatolika kabili uuli onse umbi afwile ukufumamo.” Nomba, pa numa ya myaka mupepi na 45, bamishonari bane ukufuma mwi kalasi lyalenga 96 ilya Gileadi nabatumwa ku Malta.
[Icikope pe bula 26]
Ikalasi Lyalenga 96 Ilyapwishishe Isukulu lya Watchtower Bible School of Gilead
Mu mutande uli pe samba, imitande ikwete amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.
(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.