Inte sha kwa Yehova Ukushinguluka Icalo—Colombia

COLOMBIA calo caibela ica mu South America. Babemba bonse babili Atlantic na Pacific bapanga ululamba lwa ici calo cafimbilikishiwa ku mpili shipuuko mulilo. Icikabilila ca mu lulamba lwakaba na mu malungu calukila ku kuba ukutalala kwa mu ncende shasumbuka, insonshi sha mpili sha Andes ishakupwa ne mfula yabuuta.a

Nangu cingati Colombia yalishibikwa pa mulandu wa golde na barekete, abantu baba e fikwatwa fya iko ifyacilishapo kumo mutengo. Ilelo, Yehova aleisusha iŋanda yakwe iya ku mupashi no bukata. Bakapepa bayemba, abasuma balekonkomokela kuli yene mu ncende shonse ishe sonde, ukusanshako Colombia.—Hagai 2:7.

Abakalamba ba mu Twampani Baebekeshiwa

Pa Mulungu, November 1, 1992, e lyo kwabele ukupeela kwe ofesi lya musambo upya uwa Watch Tower Society ne fibombelo fya kupulintila mu Facatativá, amakilomita 42 pa kati ka kapinda ka ku kuso na masamba aka Bogotá. Ukutandalila umusambo kwalikwata ukwebekesha kukalamba pa batandashi. Atile ashibwelulukila fye ku fakitare uko abombela, umutandashi umo mu kucankwa acincishe bamaneja bakwe ukuya no kutamba ukuteyanya uko kwaba ‘cipesha amano ca kufumamo cimo, umuyano, no kucincimuka kwa babomfi.’ Mu kati ka kutandala kwabo ukwakonkelepo, abakalamba ba mu twampani balangile ubuseko bwabilima no kwipusha ifipusho ifingi.

Aba bakalamba ba mu twampani bafwaile ukutuma abalashi babo, aba kwangalila imilimo, na bakapitao—na kuba, ababomfi babo bonse—ku kutandala. Cila mulungu, baletantika ukufuma pa babomfi 15 ukufika ku 25 ukuya mu kutandala ukufikila cinkupiti wa babomfi onse uwa bantu 1,300 amwene ukufumamo cimo kwa kuteyanya ukwa musango yo.

Imyanda ya babomfi babo balitandalila ifibombelo fya musambo kabili balitamba video wa Jehovah’s Witnesses—The Organization Behind the Name. Abaebekeshiwa ku bukulu bwa kuteyanya ne cipimo ca mu kusaalala kwa calo ica mulimo wa kushimikilo Bufumu, balasunguka pa lwa kulunduluka kwakulisha ukwa bamashini babomfiwa mu mibombele ya Sosaite. Pa kuya, abengi balomfwika ukusoso kuti baleyumfwa nga ‘balesha Paradise ukubwelela mu calo ca cimfulumfulu.’

Icine Cafika ku ba Misango Yonse

Abantu ba misango yonse balefikwako ne mbila nsuma. (1 Timote 2:3, 4) Ku ca kumwenako, uwali kale kashika wa nyimbo kabili intungulushi ye bumba lya bakemba ba nyimbo sha ciunda cabesha pa muulu kabili isha cipalakata alipokelele icine ca Baibolo, acitile ukwaluka mu bumi bwakwe, kabili mu kwangufyanya abele painiya wa nshita yonse. Pa numa alisontelwe ngo mubomfi utumikila. Abantu bafulilako abali filundwa fya mabumba yafwayo kupinuna ubuteko balisambilila ukucetekela no kusubila mu Bufumu bwa kwa Yehova. Pali nomba bali ababimbwa mu kucincila mu kushimikila ubukombe bwa calo cipya ica mutende.

Abakunkwime ku miti ikola na baleshitisha yene na bo bene balyalukila ku cine. Umulumendo umo uyo nomba ni Nte alikwete icilime ca miti ikola no mwa kupangila cocaine mu mpanga pa myaka isano pa ntanshi talaputuka kuli ulya musango wa bumi. Alisanga insansa mu kusambilila no kubelesha ifishinte fya Baibolo. Mu kalyati ka kulindikwa abasangwa no mulandu wa kusalipa abantu pa kuseshiwa ne sambililo lyafumaluka ilya Baibolo mu mukoosha balepepa ukuti Yehova abalekelele imembu shabo no kubapokelela nga babomfi bakwe.

E fyo abantu ba misango yonse baleankula ku bukombe bwa Bufumu. Mu Colombia, pamo fye ngo kuli konse kumbi, Yehova muli fyo aleisusha iŋanda yakwe no bukata.

[Amafutunoti]

[Akabokoshi pe bula 8]

UKULONDOLOLA IMIBOMBELE YA CALO

Umwaka wa Mulimo uwa 1993

IMPENDWA YA PA MUULU ABALECITILO BUNTE: 60,854

ICIPIMO: Nte Umo kuli 558

ABASANGILWE KU CIBUKISHO: 249,271

AVAREJI WA BAKASABANKANYA BAPAINIYA: 8,487

AVAREJI WA MASAMBILILO YA BAIBOLO: 100,927

IMPENDWA YA BABATISHIWE: 5,183

IMPENDWA YA FILONGANINO: 751

IOFESI LYA MUSAMBO: FACATATIVÁ

[Icikope pe bula 9]

Ababomfi ba pe ofesi lya musambo na bamishonari mu 1956

[Icikope pe bula 9]

Imimwene ya pa muulu iye ofesi lya musambo