Ifipusho Ukufuma ku Babelenga

Apantu Yesu atuntwike ukufuma kuli bonse babili Yese na Davidi, mulandu nshi etilwa “umushila” wa fikolwe fyakwe Yese na Davidi?

Ilingi line utontonkanya ulwa mushila wa cimuti nelyo icilimwa pamo ngo wisako ilyo icitimbatimba nelyo imisambo tafilaisako. E co kuti camoneka ukuti Yese (nelyo umwana mwaume wakwe Davidi) kuti alandwa ngo mushila uko Yesu mu kupelako atuntwike. Nalyo line, Esaya 11:10 asobele ukuti Mesia waleisa aali no kuba “umushila wa kwa Yese,” na Abena Roma 15:12 babomfeshe ubu busesemo kuli Yesu Kristu. Pa numa Ukusokolola 5:5 kwaitile wene “Inkalamo ya mukowa wa kwa Yuda, Umushila wa kwa Davidi.” Kwalibako imilandu kuli ishi numbwilo.

Baibolo ilingi line ibomfya icilimwa, pamo nge cimuti, mu nshila ya mampalanya. Inshita shimo shimo ici cifuma ku cishinka ca kuti ulubuto lulalemuka no kukula, imishila ilakula pa ntanshi ya misambo ikalamba, imisambo imbi iinono, nelyo ifisabo pa kutungililwa ne mishila. Ku ca kumwenako, Esaya 37:31 abelengwo kuti: “Abapusuka aba ŋanda ya kwa Yuda, abashalako, bakabwekeshapo ukulenge mishila iye pa nshi no kutwale fisabo pa muulu.”—Yobo 14:8, 9; Esaya 14:29.

Nga ca kuti umushila wacenwa, icimuti conse icashala cilambukilwako. (Linganyako Mateo 3:10; 13:6.) Mu nshila imo ine, Malaki alembele ukuti: “Ubushiku ubuleisa bukababilimya (e fyo Yehova wa milalo asosa), pa kuti tabwakabashiile umushila nangu musambo.” (Malaki 4:1) Ubupilibulo buli ubwaumfwika—ukuputulwako umupwilapo. Abafyashi (imishila) bakaputulwako, capamo no bufyashi bwabo (imisambo).a Ici cileebekesha icishingamo abafyashi bakwata ukulola ku bana babo abanono; inshita ya ku ntanshi iibelelela iya bana banono kuti yapiminwa ku kwiminina kwa bafyashi babo pa ntanshi ya kwa Lesa.—1 Abena Korinti 7:14.

Ululimi lwa pali Esaya 37:31 na Malaki 4:1 lwashimpwa pa cishinka ca kuti imisambo ikalamba (ne fisabo fya ku misambo inono) fifumya ubumi bwa fiko ku mushila. Ici cili e lufungulo ku kumfwikisha fintu Yesu abela “umushila wa kwa Yese” kabili “umushila wa kwa Davidi.”

Mu nshila ya ku mubili, Yese na Davidi baali fikolwe fya kwa Yesu; baali mishila, wene aali musonga nelyo umusambo. Esaya 11:1 asosele ulwa kwa Mesia aaleisa ukuti: “Kukapuuko mukonso ku cishiki ca kwa Yese, kabili umusambo ukamena mu mishila yakwe.” Mu kupalako, pa Ukusokolola 22:16, Yesu aita umwine “ubufyashi bwa kwa Davidi.” Lelo na kabili aita umwine “umushila wa kwa Davidi.” Mulandu nshi?

Inshila imo umo Yesu abela “umushila” wa kwa Yese na Davidi ya kuti ukupitila muli wene umutande wabo uwa bufyashi walitwalilila ukubako. Takwaba umuntunse ilelo uwingashinina ukuti wa mu mukowa wa kwa Lebi, Dani, nelyo fye Yuda, lelo kuti twaba abashininkisha ukuti umutande wa kwa Yese na Davidi e ko ucili pa mulandu wa kuti Yesu nomba aba uwa mweo mu muulu.—Mateo 1:1-16; Abena Roma 6:9.

Yesu na kabili apokelele icifulo ca Mfumu ya mu muulu. (Luka 1:32, 33; 19:12, 15; 1 Abena Korinti 15:25) Ici calilundana no kwampana kwakwe na ku fikolwe fyakwe fine. Mu busesemo, Davidi aitile Yesu Wishikulu.—Ilumbo 110:1; Imilimo 2:34-36.

Mu kupelako, Yesu Kristu alipeelwa amaka nga Kapingula. Mu kati ka Myaka Ikana Limo iileisa, ubunonshi bwa cilubula ca kwa Yesu bukatanukila fye na kuli Yese na Davidi. Ubumi bwabo ubwa pe sonde lyene bukashintilila pali Yesu, uukabomba nga ‘Shibo wa nshita pe.’—Esaya 9:6.

Muli fyo, nangu cingati Yesu atuntwike mu mutande wa kwa Yese na Davidi, cintu aisa mu kuba na cintu acili no kucita cimulenga ukuba uwafikapo ukwitwa “umushila wa kwa Yese” kabili “umushila wa kwa Davidi.”

[Futunoti]

[Abatusuminishe Ukubomfya Icikope pe bula 31]

Pictorial Archive (Near Eastern History) Est.