Bakabilisha ba Bufumu Bacita Lipoti

Icebo ca kwa Lesa Caliluma

“ICEBO ca kwa Lesa ca mweo, kabili caliluma.” (AbaHebere 4:12) Aya mashiwi yalishinina ukuba aya cine inshita ishingi nga nshi lintu abantu ababepwa ku butotelo bwa bufi basansalikwa ku cine ca Baibolo. Nga fintu cilelangililwa mu ca kukumanya cakonkapo ukufuma ku Dominican Republic, amaka ya Baibolo kuti yayalula ubumi bwa bantu no kupeele subilo.

Inte sha kwa Yehova batandalile umwanakashi umo Katolika wakamamo na menshi uyo uwali nalufya abana bakwe babili mu mfwa. Aali uwa bulanda nga nshi kabili mu kulilishika alelanda pa busanso bwakwe cila bushiku. Inte bamulangile cintu Baibolo isosa pali Yohane 5:28, 29 pa lwe subilo lya kubuuka. Pa numa ya kulanshanya kwalundwapo ne Nte, tasangile fye icisansamushi mwi subilo lya kubuuka lelo alimwensekeshe ukuti intungulushi sha butotelo isha ciKatolika shalemubepa.

Ukwabulo kwikata na ku cani alifuutishe ishina ukufuma mu Calici lya ciKatolika, kabili alisumine ukukwata isambililo lya Baibolo ilya lyonse ne Nte sha kwa Yehova. Umulume wakwe, nangu cibe fyo, tasuminishe imimwene yakwe. Apantu na o wine aali Katolika wakamamo na menshi, atantike ukuti ifibusa fyakwe bapolitishani balumbuka ne fibusa fya ku calici batandalile umukashi wakwe no kwesha ukumunashanasha ukufuma ku nshila yakwe no kumubwesesha muli buKatolika. Pa numa amutiinishe ukuti aali no kumutamfya, pa kashita kamo ukwishibisha fye na balupwa bakwe ne filundwa finankwe ifye calici ukuti balelekana.

Lelo umungalato wakwe tawabombele. Mu kupusanako, umukashi alicililenamo ukupampamina pa kutwalilila amasambililo yakwe aya Baibolo. Pa mulandu wa kukula kwakwe ukwa ku mupashi no kulundulula kwakwe imibele ya Bwina Kristu, umulume apingwilepo ukutwalilila ukwikala na wene ukucila ukulekana. Ubushiku bushilile kantu alisumine fye no kubebeta impapulo sha Baibolo isho alesambililamo—lelo pa cipangano cimo mpo. Alefwaya ukubomfya ubupilibulo bwa Baibolo yakwe iya ciKatolika.

Ku ca kupapusha, mu kuba no kwaafwa kwa mpapulo ukufuma ku Nte sha kwa Yehova, atendeke ukusambilila ifintu ifipya ukufuma muli Baibolo wakwe wine. Aishilemwensekesha ukuti umukashi wakwe asalilepo inshila yalungama, kabili mu kwangufyanya aali uwaipekanya ukukonka ica kumwenapo cakwe. Mu cituntulu, alimwene ukukabila kwa kucita ukwaluka mu bumi bwakwe bwine. Ukusonsomba kumo ukwakosa kwali kwa kuleka icibelesho ca mushanga. Pa numa ya kubelenga magazini wa Loleni! uwafumine uwa July 8, 1989, uwakwete umutwe wa pa nkupo uwa kuti “Ukushitisha Imfwa—Inshila Ikumi ku Kuleka Ukupeepa,” aali uwapampamina pa kuleka ici cibelesho cakwe icishili ca mu malembo. Mu cifulo ca cibelesho cakwe ica kusenda icipaketi ca fwaka lyonse mu tumba, apyanikepo uyo Loleni! Cila nshita lintu aumfwile icilaka ca kupeepa, abelengele ifipande pa lwa kupeepa. Iyi nshila yalibombele! Pa numa ya kubelenga ifipande inshita ishingi, aali na maka ya kuleka ukupeepa.

Ilelo bonse babili umulume no mukashi balebombela Yehova nga batumikishi babatishiwa. Lintu imibele yasuminisha, umulume alabombako ngo mutumikishi wa nshita yonse, ukupeelesha inshita yakwe ikalamba ku kushimikila kwa mbila nsuma ya Bufumu bwa kwa Lesa, kabili alebomba ngo mubomfi utumikila mu cilonganino ca pa mwabo ica Nte sha kwa Yehova. Wene no mukashi wakwe balolesha ku ntanshi ku kubuushiwa lintu bengasengela abana babo ku bumi mu calo cipya. Ee, Icebo ca kwa Lesa, Baibolo, ca mweo kabili caliluma!