Inte sha kwa Yehova Ukushinguluka Icalo—Puerto Rico

PA KATI ka Caribean Sea na Atlantic Ocean paba icishi cafunda ica mu ncende yakabisha ica Puerto Rico. Christopher Columbus acipeele ku Spain mu 1493 no kwinika cene San Juan Bautista kwi shina lya kwa Yohane Kabatisha. Umusumba wa ciko uwakulisha pa nshita yalepa waleitwa Puerto Rico, nelyo “Icabu Cikankaala.” Mu kupita kwa nshita, ili shina lyaishilebomfiwa ku cishi conse, ilintu umusumba waishileinikwa San Juan.

Puerto Rico ashininkisho kuba icabu cikankaala mu mbali ishingi. Golde uwingi aletumwa pa menshi ukufuma kuno mu myaka ya kubangilila iya kuteka kwa bena Spain. Icishi nomba cituma ku nse ya calo ifisaali, kofi, amaplantain, ne fitwalo fya macungwa, nangu cingati imilimo ya fya kupanga na maindastri ya kubombela abantu e fyapanga ulubali lukalamba ulwa fya bunonshi ilelo. Nangu cibe fyo, Puerto Rico ashininkisho kuba icabu cikankaala mu mano yacilishapo kucindama.

Imbila nsuma iya Bufumu bwa kwa Lesa yatendeke ukushimikilwa muno muli ba 1930. Ilelo, kwalibako ukucila pali bakasabankanya 25,000 aba mbila nsuma mu Puerto Rico. Mu 1993 bakabomba ba pali uyu musambo wa Watch Tower Society balingilishiweko ukufuma pali 23 ukufika kuli 100. Uku kwingilishiwako kwalekabilwa pa kuti umusambo wingalaangalila ukupilibulwa kwa mpapulo sha Baibolo mu ciSpanish, ukulenga impapulo sha musango yo ukusangwa ku bantu mupepi na 350,000,000 abalanda iciSpanish mu kusaalala kwa calo.

Ibala Ilipya

Iofesi lya musambo na kabili lyacita lipoti ukuti: “Ibala lipya nalisuka mu Puerto Rico pantu twalicito kubombesha ku kutwala ubukombe bwa Bufumu kuli bankomamatwi. Nkashi umo ashimika ica kukumanya cakonkapo: ‘Nalebombela muli bankomamatwi kabili natandalile umwanakashi uwakwete utwana tubili. Lintu aishibe ukuti ndi Nte, alinkeene apo pene fye pa mulandu wa kuti umulume wakwe, uwali na o ni nkomamatwi, tatemenwe Inte sha kwa Yehova.

“‘Imyeshi imo pa numa uyu mwanakashi umo wine atandalile cibusa uwalesambilila Baibolo ne Nte. Aliilundileko kabili aliipakishe isambililo apakalamba. Natandalile uyu mwanakashi na kabili, kabili alibwekeshepo ukuti umulume wakwe tatemwa baNte. Nangu cibe fyo, afwaile ukumfwikisha Baibolo kabili ali uwatendwa ne calici lyakwe pantu tapaali ico balesambilisha. Twatendeke ukusambilila, ukubomfya trakiti. Kasuba kamo anjebele ukuyako pa Cibelushi pantu umulume wakwe ali no kubapo. “Nomba tatutemwa, bushe te ifyo?” e fyo naipwishe. Ayaswike ati: “Alefwaya ukufwailisha pa lwa fintu caba.”

“‘Ubushiku bwakonkelepo bonse babili balekonkonsha pa mwinshi wandi! Apantu umulume alikwete ifipusho ifingi, nabalaalike ku kulongana kwesu ukwa bankomamatwi. Ilyo ine nshilafika wene alifikile kabili tapuswapo ukulongana nangu kumo ukutule lyo. Aleshimikila kuli bambi bankomamatwi, alisangwako ku kulongana kukalamba kumo, kabili alelolesha ku ntanshi ku kubatishiwa.’”

Lipoti wa musambo atwalilila ukuti: “Pe bungano lyesu ilya citungu uno mwaka, programu onse alipeelwe mu fishibilo fya kumfwaninamo na bankomamatwi, kanshi bankomamatwi abengi balisangilweko ne ndupwa shabo. Akashita ka kukumbamo nga nshi kaishile mu kati ka lyashi lya kupelako lintu kalanda alumbwile umulimo uulecitwa pa kati ka bankomamatwi no kusoso kuti mupepi na maperesenti 70 e po bali. Kwaliko ukutoota kukalamba, lelo, nga fintu kalanda amwene, bankomamatwi tabaumfwileko. E co ukwipusha bankomamatwi ukulolesha kwi bumba lyonse, kalanda abwekeshepo icipusho ukuti, ‘Bushe muli aba nsansa ukukwata bamunyinenwe bankomamatwi pamo na imwe pano?’ no kwipusha ibumba lyonse ukutoota pa kusunsha amaboko yonse yabili. Cali ca kutamba cishaiwamina ukumona bamunyina na bankashi 11,000 ukutoota pa kusunsha amaboko. Bamunyinefwe na bankashi bankomamatwi balisekelele no kuyumfwa ukuba ulubali lwa bumunyina bushaikulila. Abengi baliponeshe ifilamba fya kusekelela.”

Ilyo Inte sha kwa Yehova shileakana mu mulimo wa kulobolola mu Puerto Rico, ukwabulo kutwishika cikatwalilila ukuba icabu cikankaala. “Impaanga” sha kwa Lesa, isho eta “ifisuma fya nko shonse,” shikatwalilila ukwingila pa kuti iŋanda ya kwa Yehova ikesulemo ubukata.—Yohane 10:16; Hagai 2:7.

[Akabokoshi pe bula 9]

UKULONDOLOLA ICALO

Umwaka wa Mulimo uwa 1994

IMPENDWA YA PA MUULU IYA ABALECITILO BUNTE: 25,428

ICIPIMO: Nte umo kuli 139

ABASANGILWE KU CIBUKISHO: 60,252

AVAREJI WA BAPAINIYA BAKASABANKANYA: 2,329

AVAREJI WA MASAMBILILO YA BAIBOLO:

19,012

IMPENDWA YA BABATISHIWE: 919

IMPENDWA YA FILONGANINO: 312

IOFESI LYA MUSAMBO: GUAYNABO