Ibungano lya Citungu Ilya “Bakalumbanya ba Buseko” Ilya Nte sha kwa Yehova
Inshiku shitatu isha kulambula isha kusambilisha kwa Baibolo shilekupembelela. Apo amabungano 45 nayatantikwa mu Zambia mweka, mu kupalishako kukabako ibungano mupepi na kuntu wikala. Ukasangweko lintu programu akatendeka mu kuba ne nyimbo pa 9:20 hrs. pa bushiku bwa kubalilapo.
Programu wa pa bushiku bwa kubalilapo ulucelo akabamo amashiwi ya kusengela pamo pene ne lyashi likalamba ilikalati, “Ukupaatulwako Nga Bakalumbanya ba Buseko mu Kusaalala kwa Calo.” Icungulo programu ikatonta ukusakamana pa misepela, abafyashi, na masomo. “Bushe Ninjipekanya Ukwingila mu Cupo?” likaba lyashi ilyo abacaice bashingafwaya ukupuswako. Abafyashi balingile ukukutika mu kusakamanishisha ku lyashi likalatila “Abafyashi Abacankilwa mu Bana Babo.” Programu wa cungulo akasondwelela ne lyashi pa mutwe wa kuti “Bomfya Amasomo ku Kulumbilako Yehova.” Icikalandwapo cili no kwaafwa imisepela ukutunguluka pa sukulu.
Programu wa pa bushiku bwalenga shibili ulucelo akalanda pa lubatisho, kabili kukabako ishuko lya kuti abakafikapo bakabatishiwe. Icungulo kukabako ukulandapo kwa kukanapita mu mbali pa fintu Satana ukutula fye ku nshita sha mu kubangilila abomfya ulunkumbwa lwa kwampana kwa bwamba ku kwingisha abantu mu citeyo. Na kabili kukabako ilyashi lya maka ilikalati “Sengaukeni Ifiteyo fya kwa Kaseebanya.” Programu wa pali bulya bushiku akasondwelela ne lyashi lyacindama “Umulandu Umutundu wa Muntu Ulekabila Ukwishiba Lesa.”
Pa bushiku bwalenga shitatu ulucelo, ukukonkana kukwete umutwe wa kuti “Bakalumbanya ba Buseko mu Kati ka Kusondwelela kwa ino Micitile” kukatonta ukusakamana pa fya kuponako fya kutenshe calo ifitulalilile. Aya malyashi yakebekesha ipamfya lya kubutukila ku cifulo cacingililwa ilyo “ubucushi bukalamba” ubo Yesu Kristu alandilepo, nga fintu bwalembwa pali Mateo 24:21 tabulatendeka.
Programu wa pa bushiku bwalenga shitatu ulucelo akasondwelela mu kuba ne cilangililo cacindama icikalati “Ukucindika Abawaminwa Ukucindikwa mu Myaka Yabo iya Bukalamba.” Lyene, icungulo, ilyashi lya cintubwingi, “Tooteleni Imfumu ya Ciyayaya!” likapeelwa. Likaba e lyashi lyakulisha ilye bungano.
Tendeka ukupekanya nomba ku kusangwako. Pa kusanga ukukabela ibungano mupepi na ku mobe, kepushe pa Ŋanda ya Bufumu iya Nte sha kwa Yehova iya kuli ico cifulo, nelyo kuti walembela bakasabankanya ba uno magazini.