Insambu sha Balwele Shacindikwa
‘Te kuti mombele pali uku kulepula ukwabulo kubomfya umulopa. Nga ca kuti ulefwaya ukubombelwa, lyene ufwile ukunakila ku nshila yandi iya kundapilamo. Nga te ifyo, ninshi uli no kuya kuli dokota umbi.’
AYA mashiwi ya kwa dokota tayanenwine icitetekelo ca kwa Cheng Sae Joo, umo uwa Nte sha kwa Yehova uwikala mu Thailand. Pa numa ya kumupima asangilwe na meningioma, umusango wa cimumena ca kuli bongobongo, Cheng aalekabila nga nshi ukulepulwa. Lelo aali uwamupampamina ukumfwila ikambisho lya mu Baibolo ilitila: ‘Mutalukeko ku mulopa.’—Imilimo 15:28, 29.
Cheng aile ku fipatala fimbi fibili, ukusalapo ukundapilwa mu calo cakwe cine nga cingacitika. Ku ca bulanda, badokota na kulya kwine balikeene ukumubombela ukwabula ukubomfya umulopa. Mu kupelako, Cheng aumfwene na kabungwe ka Neurological Institute of the Tokyo Women’s Medical College ukupitila muli ba Hospital Information Services (HIS) mu Thailand. Ici cipatala cali nacundapa abalwele bakwete fimumena kuli bongobongo ukucila pali 200 ukubomfya imyengelele ya gamma, inshila imo iyasangilwe fye nomba line mu kundapa kwa kubomfya imyengelele ya malaiti.
Balitantike ukuti Cheng ekale ne Nte ishina Japan abekala mupepi ne cipatala. Ibumba lyalimupokelele pa cibansa ca ndeke, ukusanshako Inte sha kwa Yehova shibili abalanda iciThai pamo pene no mwiminishi ukufuma ku HIS. Pa numa ya kubebetwa ukwasendele mupepi no mulungu umo, Cheng alitekelwe mu cipatala umo aundepwe ukubomfya imyengelele ya gamma. Uku kundapa kwasendele fye iawala limo. Ilyo afumine mu cipatala ubushiku bwakonkelepo, Cheng alimine ubulendo ukubwelela ku Thailand.
“Nshatontonkenye ifyo ukwaafwa kwafulishe fyo kuti kwapayanishiwa ukupitila muli iyi mitantikile,” e fyasosele Cheng. “Mu cine cine nalyebekeshiwe no kutemwa ukwalangilwe pamo pene no kubombela pamo ukwa babimbilwemo bonse.”
Pa kushimika ili lyashi, inyunshipepala ya ciJapanese Mainichi Shimbun yalandilepo ukuti: “Ukufika pali nomba, imilandu ya fya mipepele iya kukaanina ukubikwamo umulopa yalilondololwa bwino. Nangu cibe fyo, ukubikwamo umulopa kulafumamo ifyabipa pamo nga AIDS, ubusanso bwa kwambula amalwele yapishiwa no tushishi pamo nga hepatitis C, ne fintu fimbi ifyo umubili ukaana. Pali uyu mulandu kwalibako abalwele abashifwaya ukubikwamo umulopa te mulandu na kuntu bapepa.”
Inyunshipepala yalundilepo no kuti: “Abalwele abengi abalekaana ukubikwamo umulopa balipatikishiwa ukuya ku fipatala fimbi, lelo cili icakabilwa nomba ku fipatala ukuti balecindika ukuisalila kwa mulwele. Ukusuminisha ukwashimpwa pa kwishibila libela (pa numa umulwele alondolwelwa ifyebo fyakumanina pa lwa cibimbilwemo kabili lyene asuminisha uko kundapa) kulafwaikwa, na mu kundapa kwa kubikamo mulopa kwine. Cifwile ukwishibikwa ukuti uyu tauli mulandu uulebimbamo fye imipepele imo.”
Ukupala Cheng Sae Joo, abengi abafwaya ukundapwa ukwabulo kubomfya umulopa balabeba ukuya ku fipatala fimbi. Nangu ni fyo, balatasha nga nshi ukubombesha kwa badokota ababa abaitemenwa ukucindika insambu shabo isho bakwata nga balwele.
Hospital Information Services yapangilwe ne Nte sha kwa Yehova mu misambo ya Watch Tower Society ku kufwaya ukubombela pamo ukwa badokota abacindika ifisumino fyabo. Ukupulinkana icalo conse, HIS ilundulula ukumfwana kwa kubombela pamo ne fipatala, badokota, ababomfi ba mu fipatala, baloya, ba bakapingula.