Tamwakafwaye Ukupuswako!

UKUPUSWA kuli cinshi? Ibungano lya Citungu ilya Nte sha kwa Yehova ilya “Inkombe sha Mutende wa Bukapepa” ililepalamina lubilo lubilo! Mu ncende ishingi ibungano likatendeka pa 9:30 hrs pali Cisano mu kuba na programu wa nyimbo. Pa numa ya kukutika ku kulanshanya kwa kwipusha ukwa kukosha icitetekelo mu lubali lukalati “Ukumfwa Kuli Bakabilisha Bapimpa aba Mutende,” muli no kuipakisha ilyashi lya kukoselesha ilya mutwe wa kuti “Cinshi Cintu Lesa Afwaya Kuli Ifwe?”

Icikalamba pali Cisano icungulo kasuba cikaba lyashi likalamba ilya kukumbamo ilikalati “Ulubali Lwesu nge Nkombe sha Mutende wa Bukapepa.” Lyene ulubali lwa kuti “Ukwaafwa Bambi Ukwishiba Ififwaikwa fya kwa Lesa” lukapayanya imitubululo pa fya kusambilisha abapya. Pa numa ya ulu lubali kukaba ukukonkana kwa pa nshita yalinga ukukalati “Ibakeni ku Fiteyo Fyabelama mu fya Kusekesha.” Programu wa pali Cisano akasondwelela na malyashi “Kaanya Kaseebanya—Wisuminisha uwa Kulwishanya na O” na “Ukwikatilila Kuli Bucine bwa Cebo ca kwa Lesa Muli Bucishinka.”

Programu wa pa Cibelushi ulucelo akakomaila pa bucindami bwa mulimo wa kupanga abasambi mu kukonkana kwa mbali shitatu ukukalati “Inkombe Ishileta Imbila Nsuma iya Mutende.” Iciputulwa cikasondwelela na malyashi “Ukupeela kwa Nsansa mu Kuteyanya kwa kwa Yehova” na “Ubumi no Mutende Ukupitila mu Kuipeela no Lubatisho,” e lyo pa numa kukabako ishuko lya basambi bapya ukubatishiwa.

Ilyashi lya pa Cibelushi icungulo “Languluka Amatontonkanyo ya kwa Yehova pa Milandu Imo” lili no kwasuke fipusho pamo nga ‘Bushe Abena Kristu balebomba umulimo wa kupaatukanya ilelo?’ na ‘Cinshi caba e mimwene ya Baibolo ukukuma ku kukanda kwa kwipaya?’ Na kabili muli no kuipakisha ukukonkana kwa mbali shibili ukwa kukafyo mutima ukwa mutwe wa kuti “Lesa wa Mutende Alakusakamana” no kucilisha ilyashi lya kusondwelela “Konkeleleni Umutende wa Bukapepa mu Bumi bwa Lupwa.”

Programu wa pa Mulungu ulucelo akasanshamo ukukonkana kwa mbali shitatu ukukalati “Ukwishiba Inkombe sha Cine Cine” e lyo ne lyashi lya kuti “Kutikeni no Kumfwila Icebo ca kwa Lesa.” Programu wa lucelo akasondwelela ne cilangililo ca mingila ico cili no kukolobonda mu masambililo yasangwa mu lyashi lyalembwa mu Baibolo ilya Mupingushi Gideone.

Iciputulwa ca kulekelesha ice bungano pa Mulungu icungulo kasuba cikakwata ilyashi lya cintubwingi, ilikaba no mutwe wa kuti “Umutende wa Cine Wasuka Waisa—Ni Kwi Ukafuma?” Mu kupelako, ilyashi lya kucincimusha “Ukutwalilila Ukuba Inkombe sha Mutende wa Bukapepa” lili no kwisalila ibungano.

Pekanyeni nomba ukusangwako. Pa kusanga ukukabela ibungano mupepi na ku mwenu, kabiyeni ku Ŋanda ya Bufumu iya Nte sha kwa Yehova nelyo lembeleni bakasabankanya ba uno magazini.