Bushe Lesa Alapokelela Ukupepa kwa Musango fye Onse?
LESA abumbile umuntu no kukabila kwa ku mupashi—ukukabila kwa kupepa. Tacali cintu icaishileitampila fye. Cali lubali lwa muntu ukufuma fye pa kutendeka.
Ku ca bulanda, nangu cibe fyo, umutundu wa muntu walilundulula inshila shalekanalekana isha kupepelamo, kabili ilingi line, ishi nshila tashaletako ulupwa lwa buntunse ulwa nsansa, ulwaikatana. Mu cifulo ca ico, inkondo sha kusumyo mulopa shicili shilelwikwa mwi shina lya fya mapepo. Ici cimyako icipusho cacindama ica kuti: Bushe caliba mulandu na fintu umuntu apepa Lesa?
Imipepele Yatwishikwa iya pa Kale
Inko sha pa kale ishaikele mu Middle East shilapeela ica kumwenako ca mu fyalecitika kale icitwaafwa ukwasuka ico cipusho. Abengi balepepa umulungu uwaleitwa Baali. Na kabili balepepa ifibusa fya kwa Baali ifya canakashi, pamo nga Ashera. Ukupepa Ashera kwasanshishemo ukubomfya umulando washila uo casuminwo kuti wali cishibilo ca kwampana kwa bwamba. Abasambilile fya kale ababombela muli cilya citungu balishulako ifipasho ifingi ifya banakashi ababa fye ubusokwa. Ifi fipasho, Encyclopedia of Religion ilondololo kuti, “filangisha lesa mwanakashi mu kuba ne filundwa fya bwanakashi ifyamonekesha, ninshi nafukatila amabele,” kabili “nalimo emininako . . . Ashera.” Icintu cimo cili icashininkishiwa, ukuti ukupepa Baali ilingi line kwaleba ukwa bucisenene.
Te ca kupapa, kanshi, ukuti ukupepa Baali kwasanshishemo iciwowo cacishamo ica cisenena. (Impendwa 25:1-3) Shekemu, umwina Kanaani, acendele nacisungu wacaice Dina mu kumwikata kama. Te mulandu ne co, alemonwa ngo mwaume wa bukata ukucila pali bonse mu lupwa lwakwe. (Ukutendeka 34:1, 2, 19) Ukulaalana kwa pa lupwa, ukulaalana kwa ba bwamba bumo bwine, no kulaala ne finama fyali ifyaseeka. (Ubwina Lebi 18:6, 22-24, 27) Ishiwi fye line ilya ciNgeleshi “sodomy,” ilyaba cibelesho ca balaalana na ba bwamba bumo bwine, lyafuma kwi shina lya musumba uwaliko inshita imo muli lulya lubali lwa calo. (Ukutendeka 19:4, 5, 28) Ukupepa Baali kwabimbilemo no kusumyo mulopa. Iye, bakapepa ba kwa Baali baalepoosa abana babo abatuntulu mu mulilo walebilima pamo nge lambo ku milungu yabo! (Yeremia 19:5) Ifi fibelesho fyonse fyalyampene ku fisambilisho fya mipepele. Mu nshila nshi?
“Ubukatu, ulunkumbwa no kuilekelesha ifya mu nshimi sha bena Kanaani fyalibipishapo ukucila ukuli konse mu Near East pali ilya nshita. Kabili ukwishibikwa kwa kupapusha ukwa milungu ya bena Kanaani, ukwa kuti tabakweteko imibele isuma iili yonse, kufwile kwalengele abalepepa iyo milungu ukuba ne misango ishaibipila kabili casanshishemo ifibelesho ifingi ifyabotelela ifya pali ilya nshita, pamo nga bucilende bwashila, [no] kupeela abana nga malambo,” e filondolola Dr. Merrill Unger mu citabo cakwe icitila Archaeology and the Old Testament.
Bushe Lesa alipokelele ukupepa kwa bena Kanaani? Kwena iyo. Asambilishe abena Israele ifya kupepa wene mu nshila yasanguluka. Ukulosha ku fibelesho twalumbula pa muulu apo, asokele ati: “Mwilaikowesha muli ifi fyonse, pantu muli ifi fyonse e mwakoweshiwe nko isho ndetamfya ku cinso cenu, casuke calo calikowela; e ico nacipempwila amampuulu ya ciko, kabili icalo caluka abekashi ba ciko.”—Ubwina Lebi 18:24, 25.
Ukupepa Kwasanguluka Kwakoweshiwa
Abena Israele abengi tabapokelele inshila Lesa alemwenamo ukupepa kwasanguluka. Mu cifulo ca ico, basuminishe ukupepa Baali ukutwalilila mu calo cabo. Mu kwangufyanya abena Israele balibelelekwe ukwingila mu kutumbinkanya ukupepa Yehova no kupepa Baali. Bushe Lesa alipokelele uyu musango watumbinkanishiwa uwa mipepele? Langulukeni icacitike mu kati ka kuteka kwa Mfumu Manase. Aimikiile Baali ifipailo, ukoca umwana wakwe wine nge lambo, no kucite cimpa. “Kabili icimpashanya icabaswa ica kwa Astarte [ʼashe·rahʹ mu ciHebere] ico acitile, abikile mu ŋanda iyo Yehova asosele . . . ati, Mu ŋanda ino . . . e mo ndebike shina lyandi umuyayaya.”—2 Ishamfumu 21:3-7.
Abatekwa ba kwa Manase bakonkele ica kumwenako ca mfumu yabo. Na kuba, “abalubanshishe ku kucito bubi, ukucile nko isho Yehova afitile ku cinso ca bana ba kwa Israele.” (2 Ishamfumu 21:9) Mu cifulo ca kumfwila ukusoka kwabwekeshiwabwekeshiwapo ukwalefuma kuli bakasesema ba kwa Lesa, Manase acitile ubukomi ukufika ku kwisusha Yerusalemu no mulopa wa kaele. Nangu cingatila Manase mu kupelako alyalwike, umwana wakwe umwaume kabili impyani, Imfumu Amone, abukulwile ukupepa Baali.—2 Ishamfumu 21:16, 19, 20.
Mu kupita kwa nshita, bacilende baume batendeke ukubombela pe tempele. Ni shani fintu Lesa amwene iyi mibele ya kupepa Baali? Ukupitila muli Mose, aali nasoka ukuti: “Mwikengisha cilambu ca mwanakashi cilende nangu mutengo wa mbwa ya muntu [mu kumonekesha uucito kulaalana kwa ku musula] mu ŋanda ya kwa Yehova Lesa wenu ku kufisho mulapo nangu umo: pantu ba muselu kuli Yehova Lesa wenu bonse babili.”—Amalango 23:17, 18, NW utulembo twa mwi samba.
Umwishikulu wa kwa Manase, Imfumu Yoshia, asangulwile itempele ukufumyamo ukupepa Baali. (2 Ishamfumu 23:6, 7) Lelo ifintu fyali naficilamo kubipa. Tapalepele sana pa numa ya mfwa ya Mfumu Yoshia, ukupepe filubi kwalecitika na kabili mwi tempele lya kwa Yehova. (Esekiele 8:3, 5-17) E co Yehova alengele ukuti imfumu ya ku Babele yonaule Yerusalemu ne tempele lya uko. Ici cishinka ca kulengo bulanda ica mu lyashi lya kale cili bushininkisho bwa kuti imisango imo iya kupepelamo tayapokelelwa kuli Lesa. Ni shani muli kano kasuba kesu?