Ilyashi lya Bakabilisha ba Bufumu
‘Umwinshi Ukalamba uwa Kubombeshamo Nawisuka’ mu Cuba
UMUTUMWA Paulo aali ni kashimikila wapulamo uwa mbila nsuma iya Bufumu bwa kwa Lesa. Abomfeshe ishuko lya mu nshita ilili lyonse ku kwebako bambi amalayo ya kwa Kabumba aya kupeela ubumi bwa muyayaya ku mutundu wa muntu uwa cumfwila. Ilintu aaletandalila Efese wa ku kale, Paulo asangile imibele ipya iyo yali no kumusuminisha ukwaafwa abantu bafulilako. Atile: “Ndeikala muno Efese . . . ; pantu kuli ine nakwisukilo mwinshi ukalamba kabili uwa kubombeshamo.”—1 Abena Korinti 16:8, 9.
Inte sha kwa Yehova mu Cuba na bo bene nabasanga imibele ipya nga nshi. Nangu cingati tabalati balembeshiwe ku balashi, Inte nomba baleebako abekala calo banabo isubilo lya mu Baibolo apabuuta. Nomba line ubuteko bwa mu Cuba bwalefwaisha sana ukusuminisha amabumba ya mipepele ayalekanalekana ukulapepa mu kukakuka. Presidenti Castro alilumbulula pa cintubwingi ukuti Inte sha kwa Yehova libumba lya mipepele ilyo ubuteko bwa mu Cuba buipakisha ukubomba na lyo.
Iyi mibele ipya naisula “umwinshi ukalamba kabili uwa kubombeshamo” ku Nte. Ku ca kumwenako, Inte sha kwa Yehova nomba line baiswile iofesi mu Cuba, ilibaafwa ukwampanya umulimo wabo uwa kushimikila muli cilya calo. Inte ukucila pali 65,000 baleafwa abantu ukusambilila no kumfwikisha Baibolo. Babomfya impapulo sha Baibolo, pamo nga bamagazini ba Ulupungu lwa kwa Kalinda na Loleni! Abena Cuba abengi abakongamina ku bulungami balenonkelamo mu kusambilila Baibolo ne Nte sha kwa Yehova.
Inte na kabili balelongana lyonse mu mabumba ayanono ukupulinkana ici cishi conse. Inshita shimo shimo balaipakisha fye ne shuko lya kubungana ku kulongana kukalamba ukufika ku mpendwa ya 150. Mu cine cine baletasha nga nshi pali ulu lusa bapeelwe ku balashi ba mu Cuba, ululebapeela ishuko lya mu nshita ilya kubungana na bamunyinabo aba ku mupashi ne nkashi, ukwimbila Lesa amalumbo, no kupepela capamo.
Nomba line Ibungano lya Citungu ilya “Akatiina ka Bukapepa” lyalicitilwe ku mabumba yalekanalekana 1,000 pa mpela fye ya milungu itatu. Lipoti umo alelondolola ukuti “umuyano, umutembo, no mutende” fyalimonekeshe pe bungano ilili lyonse. Abalashi batashishe Inte pali ici cintu.
Mu kusaalala kwa calo, Abena Kristu bene bene balatukuta ukufikilisha umulimo untu Lesa abapeela uwa kushimikila imbila nsuma ya Bufumu bwa kwa Lesa. Pa nshita imo ine, balatukuta ukusungilila ukwampana kwa mutende na bakateka. (Tito 3:1) Inte sha kwa Yehova bakonka ukufunda kwa mutumwa Paulo, uwalembele ukuti: “E ico ica ntanshi pali fyonse ndetubulula, ukuti ifya kupaapaata, amapepo, ifya kulomba, na matootelo, ficitilwe abantu bonse, ishamfumu na bonse abasansabala, ukuti twikale ubwikashi bwa kutekanya kabili ubwa mutelelwe muli bukapepa bonse, no mucinshi.”—1 Timote 2:1, 2.