Ifipusho Ukufuma ku Babelenga

Amalipoti ya myaka inono yalelango kuti impendwa ya balyako ifimpashanya fya pa Cibukisho naingilishiwako panono. Bushe ici cilelangililo kuti abapya abengi balesubwa no mupashi wa mushilo?

Kwalibako umulandu wa kusuminino kuti impendwa ya Bena Kristu basubwa aba muli ba 144,000 yalikumene amakumi ya myaka ayapitapo.

Pa Imilimo 2:1-4, tulabelengapo ulwa babalilepo muli lilye bumba lyapimwa ukuti: “Kabili ilyo bwafikile ubushiku bwa Pentekoste, bonse bali palya pene no mutima umo. E lyo kwafumine mu muulu no kupumikisha iciunda kwati cipupu cikali ca mwela, caiswilemo na mu ŋanda monse umo baikele. Kuli bene kwamoneke indimi ishabe misasatwe kwati sha mulilo, no kwikala pali bonse umo umo. E lyo bonse baiswilemo Umupashi wa mushilo, batendeke no kulandila mu ndimi shimbi ifyo Umupashi wabapeele ukulanda.”

Pa numa ya ico, Yehova alisoobwele bambi, no kubasuba no mupashi wakwe uwa mushilo. Amakana yalilundilweko mu myaka ya mu kubangilila kwine ukwa buKristu. Pa kusefye Cibukisho mu nshita yesu, kalanda ilingi alalosho kusakamana ku mashiwi ya mutumwa Paulo ayaba pa Abena Roma 8:15-17, ayalumbula ukuti abasubwa ‘balapokelela umupashi wa kupokelelwa nga bana.’ Paulo alundilepo kuti umupashi wa mushilo uo bapokelela ‘ulashimikilo bunte pamo ne mitima yabo, ukuti bali bana ba kwa Lesa impyani shinankwe sha kwa Kristu.’ Abo bakwata uku kusuba kwa mupashi baleshiba mu kushininkisha. Tacaba fye kufwaya ukuti basubwe nelyo ica kubulunga fye icifuma mu kuyumfwa kwa kukuntukilwa no kuibika abene apashibalingile.

Twalishiba ukuti ubu bwite bwa ku muulu bwalitwalilile ukupulinkana imyanda ya myaka, nangu cingatila mu nshita yaleitwa Inshita ya Mfifi, kwalebako inshita lintu impendwa ya basubwa yaleba iyacepa nga nshi.a Mu kuba no kwimikwa cipya cipya ukwa buKristu bwa cine mupepi na ku mpela ya mwanda wa myaka wafumako, na bambi balitwa no kusalwa. Lelo cilemoneke fyo pa kati ka myaka ya ba 1930, impendwa yonse iya 144,000 ukulanda fye mu cinkumbawile yalikumanine. Na muli fyo kwatendeke ukumoneka ibumba lya Bena Kristu ba bucishinka abe subilo lya pe sonde. Yesu ainike aba musango yo nga “impaanga shimbi,” abekatana mu kupepa na basubwa ngo mukuni umo.—Yohane 10:14-16.

Ifishinka mu makumi ya myaka filangilila fyonse fibili ukupwishishisha kwa kwita abasubwa ne paalo lya kwa Yehova pe “bumba likalamba” ililekulilako, abaleenekela ukupusunsuka “Ubucushi bukalamba.” (Ukusokolola 7:9, 14) Ku ca kumwenako, pa kusefya Icibukisho mu 1935, ukwasangilwe 63,146, abaalileko ifimpashanya mu kushininkisho kuitunga kwabo ukwa kuba abasubwa impendwa yabo yali 52,465. Imyaka 30 pa numa, nelyo mu 1965, abasangilweko baali 1,933,089, ilintu abaalileko balibwelele pa nshi kuli 11,550. Pa numa ya myaka 30, mu 1995 impendwa ya basangilweko yaliile pa muulu ukufika kuli 13,147,201, lelo ni 8,645 fye e baliileko umukate no kunwako waini. (1 Abena Korinti 11:23-26) Mu kumfwika, ilyo amakumi ya myaka yalepita, impendwa ya baitunga ukuba abashalapo yalebwelela pa nshi apakalamba—mupepi na 52,400 mu 1935; 11,500 mu 1965; 8,600 mu 1995. Nangu cibe fyo, abo abe subilo lya pe sonde balipaalwa, kabili impendwa yabo yalingilishiwako nga nshi.

Impendwa isabankanishiwe iya nomba line nga nshi ili ya mu 1995, kabili ilelanga 28 bambi abaalileko ukucila umwaka wabangilileko nangu cingatila icipimo ca baalileko calicepele nga nshi ukulinganya ku basangilweko. Lintu twalanguluka fyonse fi, icishinka ca kuti abanono abalundwapo basalilepo ukulyako ifimpashanya tauli mulandu wa kulengo kusakamikwa. Pa myaka iingi bamo, nangu fye abo ababatishiwe nomba line, mu kupumikisha balitendeka ukulyako. Muli bamo aba bene, mu nshita fye inono balishilesumina ukuti ici cali cilubo. Bamo balishiba ukuti baliileko fye pa kutuninkishiwa ne nkuntu nakalimo isha kukanshika kwa ku mubili nelyo ukwa ku muntontonkanya. Lelo baishileiluko kuti mu cine cine tabaitilwe ku bumi bwa ku muulu. Balombele ukuti Lesa mu nkumbu abalangulukileko. Kabili balitwalilila ukumubombela nga Bena Kristu basuma, aba bucishinka, ababa ne subilo lya bumi bwa muyayaya pe sonde.

Takuli umulandu wa kusakamikilwa ku uli onse uwa ifwe nga ca kuti umuntu atendeka ukulyako ifimpashanya nelyo nga aleko kulyako. Mu cine cine te cesu nampo nga umo mu cituntulu alisubwa no mupashi wa mushilo no kwitwa ku bumi bwa ku muulu nelyo iyo. Ibukisheni ukwebekesha kwakosa ukwa kwa Yesu ukwa kuti: “Ni ne mucemi musuma, naishibe shandi shiine.” Mu nshila iyo ine iya kwebekesha, e fyo na Yehova aishiba abo bantu aasala nga abana ba ku mupashi. Tatwingatwishiko kuti impendwa ya basubwa ikatwalilila ukucepa ilyo umushinku watantalila ne fya mankumanya filepwisha ubumi bwabo ubwa pano isonde. Lelo, pa nshita lintu ababa mu cituntulu abasubwa baleishininkisha aba busumino ukufika ku mfwa, mu kupembelela icilongwe ca mweo, impaanga shimbi, abasamba amalaya yabo mu mulopa wa mwana wa Mpaanga, kuti baenekela ukupusunsuka ubucushi bukalamba ubuleisa.—2 Timote 4:6-8; Ukusokolola 2:10.

[Futunoti]