Ukutetekela Lesa—Bushe kano mwamona icipesha amano?
ALBERT ali fye mu kubangilila kwa ba20 lintu atendeke ukufwaya Lesa. Aliile ku mipepele yalekanalekana lelo taikushiwe. Ilyo abelengele imbali shimo isha Baibolo, asambilile ifyo Lesa alebomba na bantu pamo nga Noa, Abrahamu, Sara, na Mose. Albert asangile fyo aishiletemwa Lesa wa mu Baibolo. Nangu cibe fyo, bushe kuti ashininkisha ukuti Lesa cine cine e ko aba?
Icungulo bushiku cimo Albert aile na motoka ku cifulo caba ceka uko apepele ati, “Mwe Lesa, napaapaata, mpeni icishibilo—icili fye conse ica kushinina ukuti e ko mwaba.” Albert alipembelele inshita yalepa. Atila lintu tapali icacitike, ukwenekela kwakwe “kwasangwike ukulengwe nsoni, umupu fye, no kukalifiwa.”
Ukupala Albert, abengi bayumfwe fyo balifwaya Lesa lelo babwelapo fye. Napamo ifipepesha bashimapepo filabapelenganya nelyo balafiitwa ku kulombelesha indalama kwa bashimapepo ba pa televishoni. Ilyo bamwensekesha ubumbimunda bwaba pa kati ka banabo abengi, bamo nomba tabaishiba ne ca kusuminamo. Lelo, Imfumu Davidi iya mu Israele wa pa kale yaebekeshe umwana wa iko Solomone ati: “Nga wafwaya [Lesa], kuti asangwa kuli iwe.”—1 Imilandu 28:9.
Ninshi, kanshi, ni shani fintu Lesa aisokolola umwine? Bushe mulingile ukwenekela icishibilo—ica kukumanya cimo icacila pa maka ya cifyalilwa icili no kumushinina ukuti Lesa e ko aba? Ukulingana no kufwailisha kwa nomba line ukwashimikwe muli magazini wa Time, abena America ukucila pa cakaniko ca muli fitatu balisumina mu fipesha amano. Icipande na kabili casosele ukuti “amacalici ayalekula lubilo lubilo mu America ya Charisma ne nkuta sha ba Pentecost ayo ukupepa kwa yako kwashimpwa pa ‘fishibilo ne fya maka.’”
Bushe cine cine kano twamona “ifishibilo ne fya maka” e pa kusumina muli Lesa? Alibomfyapo ifipesha amano mu nshita sha ku numa. Ukulangilila: Sauli wa ku Tarsi, uwalelamata abakonshi ba Mwana wa kwa Lesa, Yesu Kristu, alikumenepo ne cipesha amano pa bulendo bwa kuya ku Damaseke ukufuma ku Yerusalemu. Uku kukumana kwa cipesha amano na Yesu wabuushiwa kwalengele ukuti Sauli aaluke. (Imilimo 9:1-22) Muli fyo uwali kale kalamata asangwike umutumwa Paulo—umo uwa bandubulwila bene bene aba buKristu!
Lelo bushe ni lyonse ifipesha amano fifumamo ifintu fisuma ifya musango yo? Bushe ukutetekela Lesa ukwine kwine cashintilila pa kukumanyapo ifipesha amano?
[Icikope pe bula 3]
Mwana Lesa alandile na Sauli wa ku Tarsi mu cipesha amano. Bushe mulingile ukwenekela icipesha amano?