Batunguluka Ukupwisha Isukulu Kabili Baya Kuli Bumishonari Bwatunguluka

“NCILI nshasumina ukuti twalisa kuli lino isukulu!” e fyasosele Munyina Will, ukulosha ku kukansha uko wene no mukashi wakwe, Patsy, bapwishishe fye pamo nga basambi be kalasi lyalenga 103 ilya Isukulu lya Baibolo Ilya Gileadi Ilya Watchtower. Zahid na Jeni na bo balisumine. Basosele ukuti: “Lishuko nga nshi ukuba kuno.” Abasambi bonse balibombeshe nga nshi mu masambililo. Nomba balefwaisha ukutendekako umulimo wabo uwa bumishonari. Lelo intanshi, muli programu wa kupwisha isukulu pa September 6, 1997, bapokelele ukufunda kwabamo kutemwa ukuli no kubaafwa ukutunguluka mu mulimo wabo uwa bumishonari.

Ceyamani wa programu aali ni Munyina Theodore Jaracz, uwa mwi Bumba Litungulula. Alondolwele ukuti—pa mbali ya lupwa lwa Bethel na beminishi ba maofesi yanono 48 aya Watch Tower Society—abaalipo bambi fibusa na balupwa ukufuma ku Canada, ku Bulaya, Puerto Rico, na United States bonse baishile ku kulangisha abasambi ukuti balabatungilila kabili balibatemwa. Munyina Jaracz atile bamishonari batumwa na macalici ya Kristendomu ilingi line balapumbulwa muli bumishonari bwabo no kutendeka ukusupila amasomo nelyo fye ukuipoosa mu mashiwi ya fikansa fya calo. Mu kupusanako, abapwisha isukulu lya Gileadi bacita cintu bakanshiwa ukucita. Basambilisha abantu Baibolo.

Pa numa ya ici Robert Butler uwa ku maofesi ya Sosaite aya ku Brooklyn alandile pa mutwe wa kuti “Lengeni Umulimo Wenu Ukutunguluka.” Alondolwele ukuti ilintu abantu bamona umuntu ukuti natunguluka ukupitila mu ndalama akwete nelyo ifyuma fimbi, icacindama caba ni fintu Lesa amona ukutunguluka. Ubutumikishi bwa kwa Yesu bwali ubwatunguluka, te mu kuti alicitile nsangu ishingi, lelo cali pa mulandu wa kuti aali uwa busumino mu mulimo wakwe. Yesu acindike Yehova, kabili atwalilile ukuba uushakoweshiwa ne calo. (Yohane 16:33; 17:4) Ifi fyonse Umwina Kristu uuli onse kuti aficita.

Uwali kale mishonari ku fyalo fya ku Kabanga, Robert Pevy, apandile amano ati, “Mube Abasha Kuli Bonse.” Umutumwa Paulo aali mishonari watunguluka. Cinshi cali inkama yakwe? Aicitile umusha kuli bonse. (1 Abena Korinti 9:19-23) Kalanda alondolwele ukuti: “Uwapwisha isukulu lya Gileadi uuli nga Paulo takamone bumishonari ngo kusumbulwa mu fya ncito, apa kutanukila ku kuba ne fifulo fyacindama mu kuteyanya. Mishonari engila mu mulimo wakwe mu kuba ne cintu fye cimo mu mutima—ukupyunga, pantu na kuba uyo e mulimo wa basha.”

Ukushimpa ukufunda kwakwe maka maka pali 2 Abena Korinti ifipandwa 3 na 4, Gerrit Lösch uwa mwi Bumba Litungulula akonkomeshe abasambi “Ukulasanika Ubukata bwa kwa Yehova Ukupala Ifilola.” Abacinkwileko ukuti ukwishiba ukufuma kuli Lesa kwapala ulubuuto ulusanikila Umwina Kristu lintu aisula umutima wakwe ku kupokelela lwene. Tulasanika ulo lubuuto ukupitila mu kushimikila imbila nsuma na mu kuba ne myendele isuma. Atile: “Inshita shimo mukalayumfwa abapelebela. Nga mwatendeka ukuyumfwa muli iyo nshila, shintilileni pali Yehova, ‘ukuti ukucishamo kwa maka kube kwa kwa Lesa.’” (2 Abena Korinti 4:7) Ukubwekeshapo amashiwi ya kwa Paulo ayalembwa pali 2 Abena Korinti 4:1, Munyina Lösch akonkomeshe abasambi ukuti: “Mwinenuka muli bumishonari bwenu. Lekeni lyonse ifilola fyenu filebeeka!”

Karl Adams, uwaba mu ciputulwa cipekanya amasambililo ya Gileadi, alandile pa mutwe ushaiwamina uwa kuti “Ni Kwi Kwaba Yehova?” Icipusho tacilelosha ukwikala Lesa mu myulu, lelo ukukabila kwa kulanguluka imimwene ya kwa Yehova ne fishibilo fya butungulushi bwakwe. Atile: “Lintu kwabako ukukanshika, nangu fye muntu uwabombela Yehova pa myaka iingi kuti alabe co.” (Yobo 35:10) Ni shani pali lelo? Mu 1942, abantu ba kwa Lesa baalekabila nga nshi ubutungulushi. Bushe umulimo wa kushimikila waleisa ku mpela, nelyo bushe kwaliko umulimo na umbi uwa kubomba? Cinshi cali ukufwaya kwa kwa Yehova ku bantu bakwe? Ilyo balesambilila Icebo ca kwa Lesa, icasuko calishile. Munyina Adams alondolwele ukuti: “Ilyo ulya mwaka ushilapwa, kwaliko amapekanyo ya kuti kubeko Isukulu lya Baibolo Ilya Gileadi Ilya Watchtower.” Mu kushininkisha Yehova alipaala umulimo wa bamishonari abatumwa ne li sukulu.

Kafundisha wa cibili ukulanda aali ni Mark Noumair. Mu lyashi lyakwe, ilyaletila “Mukabomfya Shani Italanti Lyenu?,” akoseleshe abasambi ukubomfya ukukansha kuntu bapokelele mu Gileadi ilyo fye bafika ku fifulo fipya uko bali no kulabombela. Atile, “Yangusheni ku bantu. Beshibeni. Fwaisheni ukusambilila imyata yabo, uko batula, ifisekesha abantu ba muli ico calo. Nga mwasambilila bwangu ululimi, awe mukwai ninshi ifintu fikamwangukila sana.”

Abasambi Bapimpa Basango Buseko mu Butumikishi

Ukulunda pa kubombesha mu masambililo yabo ilyo bacili pa Gileadi, abasambi babikilwe mu filonganino 11 ifya kuli iyi ncende. Pa mpela sha milungu, baleshimikilako mu kupimpa. Wallace Liverance uwaba mu ciputulwa cipekanya amasambililo ya Gileadi aitile abafulilako pali bene ukushimikilako ibumba ifya kukumanya fimo ifyo basangile. Balemoneka aba buseko nga nshi ilyo balelondolola ifyo baleshimikila mu matuuka, umwa kwimika bamotoka, mu fifulo fya makwebo, mu misebo, na ku ng’anda ne ng’anda. Bamo pali bene bafwailisheko inshila sha kumonaninamo na bantu abalelanda indimi sha cilendo abaleikala no kubombela mu cifulo ca cilonganino bamishonari baleyako. Amasambililo ya Baibolo aya mu ng’anda mupepi na 10 yalitampilwe no kutungululwa ku baali mwi kalasi lyalenga 103 mu myeshi isano ilyo balekanshiwa.

Bamishonari Baabomba pa Nshita Ntali Basokolola Icaba Inkama pa Kutunguluka

Pa numa ya ili lyashi lishaiwamina, Patrick Lafranca na William Van de Wall baitile aba mu Makomiti ya Misambo 7 ku kulondololako ifyo basambilile mu mulimo wabo uwa bumishonari pa kuti abasambi bengamwenamo. Bakonkomeshe abalepwisha isukulu ukumona umulimo wabo uwa bumishonari ukuti walefuma kuli Yehova kabili ukuba no mupampamina wa kukanaleka uyo mulimo. Balandile ulwa mibombele ishaiwamina iyo bamishonari ba ku Gileadi babomba mu fyalo fimbi.

Cinshi cayafwile aba aba mu Makomiti ya Misambo ukubomba pa myaka iingi nga bamishonari ba nsansa, abasandulula? Babombele mu kupalamisha na bamunyina abakaaya no kusambilila kuli bene. Baliibikilisheko ukusambilila ululimi lintu fye bafikile uko bapeelwe umulimo. Balisambilile ukuba abateuluka kabili ukubelesha imyata ya kuli isho ncende. Charles Eisenhower, uwapwishishe isukulu mwi kalasi lya Gileadi ilya kubalilapo kabili uwabomba bumishonari pa myaka 54, asokolweleko “inkama” shisano isho bamishonari batunguluka basambilila: (1) Sambilileni Baibolo lyonse, (2) sambilileni ululimi, (3) beni abapimpa mu butumikishi, (4) mulebombela pa kukanalapusana mu ng’anda ya bamishonari, na (5) mulepepa lyonse kuli Yehova. Abasambi balitemenwe nga nshi ukupanda amano kubomba bapokelele ukusanshako no buseko bwaleimonekela fye ubo aba bamishonari abakokole baba na bo mu mulimo wa kwa Yehova. Armando na Lupe balondolwele ati, “balaba ne nsansa ilyo balelanda pa bumi bwabo.”

Pa numa ya kulanshanya kwa kwipusha, kwashele fye ilyashi limo. Albert Schroeder, uwa mwi Bumba Litungulula, asalile umutwe wa kuti “Umulashi wa Cishinka uwa Cebo ca kwa Lesa Asokolola Imbali Shakatama Isha Cine.” Apantu Baibolo e citabo ca kusambililamo icikalamba ice Sukulu lya Gileadi, abasambi balefwaisha nga nshi ukumfwa ico aali no kusosa. Munyina Schroeder alondolwele ukuti lintu umulimo wa kupilibula New World Translation of the Holy Scriptures watendeke imyaka 50 iyapitapo, abasubwa abaali muli New World Bible Translation Committee tabashintilile pa bantu lelo bashintilile pa butungulushi bwa mupashi wa mushilo. (Yeremia 17:5-8) Nangu cibe fyo, muli ba nomba line abasoma bamo balimona ubusuma bwine bwine ubwa New World Translation. Muli kalata aalembele ku Sosaite, uwasoma umo atile: “Ndeshiba ukuti ibuuku lisuma lintu nalimona fye, kabili ndemweba nati ‘New World Bible Translation Committee’ wenu alibomba bwino sana umulimo wakwe.”

Pa numa ya ili lyashi, abasambi bapokelele amadiploma yabo, kabili kwaliko ukubilisha kwi bumba uko baleya ku kubombela. Kali kashita ka filamba ku baali muli ili kalasi. Ilyo uwaiminineko ikalasi alebelenga kalata wa kutasha, abengi balelukusha ifilamba. Abasambi bamo balipekanishishe umulimo wa bumishonari pa myaka iingi. Pa kwishiba ukuti isukulu lya Gileadi lyali no kutungululwa mu ciNgeleshi, abafulilako bakuukile ku filonganino fya ciNgeleshi pa kuti bengeshibisha ulu lulimi. Bambi bakuukile uko bapainiya balefwaikwe cibi, mu calo cabo nelyo ku nse ya calo. Bambi na bo baliipekanishishe ukupitila mu kubelenga ifya kukumanya, ukusapika, nelyo ukutamba vidio wa Sosaite uwa mutwe wa kuti To the Ends of the Earth imiku iingi.

Will na Patsy, abo twacilumbula pa kutendeka, balipeshiwe amano pa fyo bonse baali abasekelela mu basambi. “Abantu abashatwishibe no kutwishiba baletukumbata no kutukopa ifikope. Uwa mwi Bumba Litungulula atuposeshe mu minwe no kusoso kuti, ‘Tuleyumfwa sana aba cilumba pali imwe!’” Ukwabulo kutwishika, abasambi be kalasi lyalenga 103 balitemwikwa icine cine. Balikanshiwa bwino. Ifyo basambilile ku Gileadi fikabalenga ukutunguluka muli bumishonari filya fine fintu batungulwike ukufikila bapwisha isukulu.

[Akabokoshi pe bula 22]

Ukulondolola Ikalasi

Ifyalo bafumineko: 9

Ifyalo baleyako: 18

Abasambi bonse: 48

Abaupana: 24

Avareji wa myaka ya bukulu: 33

Avareji wa myaka mu cine: 16

Avareji wa myaka mu butumikishi bwa nshita yonse: 12

[Icikope pe bula 23]

Ikalasi Lyalenga 103 Ilya Bapwisha Isukulu lya Baibolo Ilya Gileadi Ilya Watchtower

Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Icikope pe bula 24]

Ni kwi batutuma?