Ukupepela Lesa mu Cine

Imipepele pa kuti Lesa alemona ukuti isuma kano nailingana ne cine. (Yohane 4:23) Baibolo ishibisha icilonganino cintu Abena Kristu babamo ukuti caba “lukuta lwa kwa Lesa wa mweo, ulupanda kabili ishintililo ifya Cine.” (1 Timote 3:15) Ababa mu cilonganino ca kwa Lesa tabasumina fye mu cine caba mu Cebo ca kwa Lesa, lelo ne mikalile yabo ilalanga ukuti balakonka icine, tabaleka cileloba, pantu balashimikila cene pano nse ponse.—Mateo 24:14; Abena Roma 10:9-15.

INTE SHA KWA YEHOVA shalishibikwa ukuli konse pa mulimo shibomba uwa kusambilisha Baibolo, pali nomba balebomba mu fyalo ukucila pali 200. Balasambilila Baibolo no kusambilishako bambi icine cabamo, tabonaule cine ukulalundamo amano ya bantunse. Bushe mwalishiba ifyo basuminamo ifyalingana ne filanda Baibolo? Abengi balakaana ukumfwa ku Nte sha kwa Yehova pa mulandu wa kukonka ifyo babeba ku bantu ukuti Inte bantu ababi. Nomba tuletila bonse abafwaya ukuisangila ifishinka bafwile ukuipingwilapo abene nga ca kuti Inte bashimikila icine nelyo ubufi. Uyu mulandu ukankaala nga nshi, kanshi taulingile kuupingula ukukonka ifyo umuntu aumfwile fye. Abengi abaeshapo ukuisangila ifishinka abene pa lwa fisambilisha Inte sha kwa Yehova, balisanga ukuti ifyo baleumfwa bwali fye bufi.

Ukwishibe Cine Kulafumyapo Umwenso

Ku ca kumwenako, umfweni ifyo cali kuli Eugenia. Pa ng’anda pa mwabo, baali ni baKatolika abakamamo na menshi. Bawishi e balipo pa bantu bapekenye ulwendo lwa kwa papa ulo ailetandala ku Mexico mu 1979. Lintu aile aleendauka ku banankwe, Eugenia ailekumanyako Inte sha kwa Yehova. Lintu aumfwile ifyo balelanshanya nankwe, alipooseleko sana amano ukufwailisha ifishinka fyaba mu Baibolo. Ebukisha ukuti: “Icine cena nalicisangile! Nomba pa kubala naleumfwa umwenso. Pantu ninshi ifingi pa fyo naishibe kale fyali filubo. Abantu ubwingi, aba pa ng’anda, abanandi, abo natemwana na bo, ninshi bonse ifyo baishibe filubo. Naleumfwa umutima ukususuka, pantu naletontonkanyapo lyonse pa fyo aba pa ng’anda baali no kuncita nga bengeshiba ukuti nintendeka ukusambilila fimbi. Lintu inshiku shalepitapo, apo na Yehova alengafwa, umwenso waile ulecepanako. Ubushiku bumo, natile inkaama yandi nalaebako profesa wasoma ifya mipepele, uwali cibusa wesu bonse pa ng’anda. Namwebele ukuti ndefwaisha ukwishibe cine. Anjebele ati, ‘Ngo lefwaya ukwishibe cine ukaye ku Nte sha kwa Yehova.’”

Filya fiine fyo aletiina e fyo caishileba. Eugenia balimutamfishe pa ng’anda. Nangu bamutamfishe, Inte bakonkenyepo ukumukoselesha mu fya ku mupashi. Umfweni ifyo alandapo: “Balinkoseleshe ukwikatisha fye icine. Nalilwike ukuti nangu cibe shani cali cacindama nga nshi. Inte sha kwa Yehova balimpokelele na maboko yabili. Bonse mu cilonganino ca Bwina Kristu balintemenwe. Ukubombela pamo no kuteyanya kwa kwa Lesa kwalingafwile ukulaba na ku fyo bantamfishe pa ng’anda.”

Umbi uo twingasambililako ni Sabrina. Pa ng’anda pa mwakwe balibeleshe sana ukulanshanya libili libili pa fyaba mu Baibolo. Kuti twatila fye balipangile ‘imipepele ya pa ng’anda.’ Sabrina aleumfwa bwino sana ukwiisha na bapepa kumbi ukulabalengulula ifilubo bafunda. Lintu umo uwa Nte sha kwa Yehova amwebele ukuti balesambilila nankwe isambililo lya Baibolo, bwangu bwangu alisumiine, icali mu mano yakwe ca kutila e lyo akalengulula bwino ubufi bwa Nte. Ebukisho kuti: “Lintu nasambilileko pa mwaka uutuntulu, natendeke ukumone fyo ‘icine candi’ kuti cayaluka ifilubo. Abapepa ku macalici yambi abo naleisha na bo naleangalapo fye ukubalengulula, nomba uyu Nte ena apa kumulengulwila palyafishe.”

Apo talefwaya ukumwalula, Sabrina alilekele ukusambilila Baibolo ne Nte sha kwa Yehova. Nomba atendeke ukumono kuti ifyo aishibe tafyalepala sana ukube cine. Apingwilepo ukutendeka ukulasambilila na kabili, e lyo mu kuya kwa nshita ashininkishe ukuti ico asambilile nomba e cine. Alilundulwike bwino ica kuti alefwaya ukutendeka ukushimikilako bambi ifyo alesambilila. Aebele fye ne Nte ifyo alefwaya ukulaya na bo mu butumikishi bwa ku ng’anda ne ng’anda. Sabrina atushimikila ati: “Ilyo tabalansuminisha ukuya na bo mu kushimikila, banjipwishe abati: ‘Bushe cine cine ulefwaya ukuba umo uwa Nte sha kwa Yehova?’ Naumfwile umwenso na kabili no kubasuko kuti ‘Awe mukwai!’” Sabrina alitwalilile ukulasangwa ku kulongana no kulolekesha fintu abantu ba kwa Lesa bakonka ifyo Baibolo ilanda. Alisukile ashininkisha ukuti cintu alesambilila cali e cine. Alibatishiwe kabili nomba ni kabila wa mbila nsuma uwa nshita yonse.

Umulandu Inte Shapusaninako Nga Nshi

Bamo balepusha abati, ‘Mulandu nshi Inte sha kwa Yehova shena ifyo shifunda fyapusanina sana ne fisambilisha bonse abapepa ku macalici yambi?’ Nga mwabelenga pano fimo fimo fintu Inte shasumina kuti mwaumfwikisha ukuti baba fye Bena Kristu bafumaluka, abapoosako sana amano ku kukonka fintu Baibolo isambilisha. Tulemukoselesha ukuti mubelenge muli Baibolo wenu amalembo yalelanda pali fimo fimo ifikankaala ifyo Inte sha kwa Yehova shasumina ifilangililwe pa muulu.

Ukufwailisha bwino bwino pa fyo Inte sha kwa Yehova shasuminamo ne fyo bakonka ifyaba mu Baibolo, kuti mwashukila ukulubuka pa mulandu wa kusambilila icine. (Yohane 17:17) Tapali icingalenga ukuti muletiina icine. Ibukisheni filya Yesu atulaile ukuti: “Mukeshibe cine, ne cine cikamulenga abantungwa.”—Yohane 8:32.

[Akabokoshi pe bula 6]

FIMO FIMO IFYO INTE SHA KWA YEHOVA SHASUMINA

◯ Yehova e Lesa wa maka yonse. Ili shina lyakwe limoneka imiku ukucila pali 7,000 mu fyalembwa fya Baibolo ifya kale na kale.—Ilumbo 83:18.

◯ Yesu Kristu Mwana wa kwa Lesa, uwaishilefwila abantunse pano calo. (Yohane 3:16, 17) Inte sha kwa Yehova bakonka ifyalesambilisha Yesu Kristu filya fiine fyaba mu Malandwe.

◯ Apo bafumya ishina lya kutila Inte sha kwa Yehova ni pali Esaya 43:10, apalanda ati: “Muli nte shandi, cisemo ca kwa Yehova.”

◯ Ubufumu bulya abantu bapepela mwi pepo lya kuti “We Shifwe” bwaba buteko bwa ku muulu ubo nomba line bukafumyapo ubucushi no kulwala pano calo, no kuletapo Paradise untu Baibolo yatulaya.—Esaya 9:6, 7; Daniele 2:44; Mateo 6:9, 10; Ukusokolola 21:3, 4.

◯ Umuntu onse uucita ifyo Lesa afwaya akaipakisha ukwikala mu mapaalo ya Bufumu ku ciyayaya.—Yohane 17:3; 1 Yohane 2:17.

◯ Fyonse ifyo Abena Kristu bacita fifwile ukulingana ne fyo Baibolo isosa. Mu mikalile yabo balingile ukulalwisha ukuti nangu cibe shani, baleba abafumacumi, ababula akabi, abalungami kabili bafwile ukutemwa abantu banabo bonse.—Mateo 22:39; Yohane 13:35; 1 Abena Korinti 6:9, 10.

[Icikope pe bula 5]

Inte sha kwa Yehova shibilisha icine caba mu Baibolo ku bantu mu fyalo ukucila 200