Bushe Mwalikwata Malaika Uumulinda?

BUSHE mwalisumina ukuti mwalikwata malaika uumulinda? Abengi e fyo batontonkanya. Pali uyo mulandu, umwanakashi umo ku masamba ya Canada ashimikwa ukuti akwate ca bupe caibela ukulosha kuli bamalaika. Atunge fyo kuti alenga mwalanshanya na malaika obe uukulinda nga wamupeela ishina lyobe lyakumanina na madola 200. Intanshi, alatontomesha pali kandulo uuleaka. Lyene, alamona icimonwa muli co malaika obe amweba ifya kukweba. Uyu umwanakashi alalenga icikope ca fintu malaika obe amoneka. Kabili ici e nsonsela apeela.

Kuli bamo, kuti capala ukulingana no lushimi pa lwa kwa King Louis IX umwina France. Atunganishiwe ukushita amasako yaumisha umutengo ayo cashimikwe ukuti yaponene kuli Mikaele, Malaika mukalamba. Ilintu abengi kuti batwishika ilyo lyashi, te kuti batwishike nelyo panono ukutunga kwa mwanakashi umwina Canada.

Ukucincimushiwa na Bamalaika

Mu myaka ya nomba line kwalibako ukwangwako ukwingi muli bamalaika. Ukupitila muli ba televishoni, mu mafilimu, mu fitabo, bamagazini, na mu nyunshipepala, twalyebwa pa lwa bamalaika abasansamusha abalwalishe, na bafwililwe, ukupanda amano, no kupususha bantu ku mfwa. Mu United States, mupepi na bantu amamilioni 20 batamba pa televishoni filimu ya cila mulungu iilangisha bamalaika baleafwa abantu. Ituuka lya fitabo limo lyatantika ukucila pa fitabo 400 ifilanda pali bamalaika.

Icitabo ca nomba line cilondolola ifyo bamalaika abalinda bapususha abashilika mu nkondo. Ifikambatikwa kuli bamotoka filembwapo ukuti banamutekenya bacingililwa na bamalaika abalinda. Utubungwe ne fisaka fyalituninkisha ukusambilila pa lwa bamalaika kabili cashimikwa ifyo utu tubungwe tulafwilisha abantu ukulanshanya na bene.

Eileen Freeman alilemba ifitabo fitatu ifilanda pa lwa bamalaika kabili asabankanya ulupapulo lulanda fye pali bamalaika. Atila: “Impendwa ya bamalaika abalinda aba pe Sonde yalingana fye ne ya ba mu muulu. Incito ya umo na umo te kupeela fye ilumbo kuli Lesa mu myulu lelo kusakamana abantunse mu cine cine ne fya mweo fimbi pe Sonde. Malaika uulinda alapeelwa umulimo wa kutusakamana lintu twaimitwa kabili alatulinda lintu tulekula mu mala, lintu twafyalwa, lintu tuli abomi pano isonde, ukufikila atutungulula ukufuma pano calo no kwingila mu bukata bwa ku muulu.’’ Uku e kulondolola imimwene yaseeka pa lwa bamalaika abalinda.

Muli shino nshiku shayafya, cilakoselesha ukucetekelo kuti umo umo alikwata malaika uumulinda no kumucingilila. Cinshi cintu Icebo ca kwa Lesa, Baibolo cisosa pali ici? Bushe tulingile ukwesha ukulanda na bamalaika? Bushe balyangwako pa lwa mibele ne mipepele yesu? Cinshi bengatwafwilisha? Ifi fipusho fili no kwasukwa mu cipande cikonkelepo.