Ukupwisha Ubwafya bwa Muncishanya

Kabumba nomba line ali no kuletako umulinganya uo abantunse bafwaisha. Lelo pali ino nshita kuti twacitapo fimo ku kupwishako ubwafya bwa muncishanya ubwatutebelela pamo ne ndupwa shesu. Nga fintu Nelson Mandela, uwali kale kateka wa South Africa, alandile ati, “ifipusanya umuntu umo ku munankwe te fintu twapeelwa, lelo mibomfeshe ya fintu twakwata.”

ILYASHI lya kale lilangilila ukuti aya mashiwi yakwe ya cine. Abaume na banakashi abengi abapeelwe ifinono lintu bafyelwe lelo ababomfeshe bwino ifyo bakwete, balibombele bwino ukucila abanabo abapeelwe ifingi. Lelo bambi abafyelwe na mashuko ayengi balyonawile ifyo bakwete kabili balifililwe ukubomfya bwino amaka yabo.

Bomfyeni Bwino Ifyo Mwakwata!

Inte sha kwa Yehova shifwaisha ukwafwa abantu ukwishiba imifwaile ya kwa Lesa ukupitila mu kusambilila Baibolo. Nangu cibe fyo, balishibo kuti abantu bafwile ukwishibo kubelenga no kulemba pa kuti bamwenemo sana mu fyebo fya mu Baibolo. Pali uyo mulandu, Inte sha kwa Yehova shalisambilisha abengi ukubelenga no kulemba, ukusanshako abantu 23,000 (mu myaka ya pa kati iya ba 1990) mu calo cimo ku West Afrika. Pa lwa mulimo wa bwikashi uwacindama uubombwa ne Nte sha kwa Yehova, San Francisco Examiner yatile: “Kuti mwabamona nga abekashi mwingapashanya. Lyonse balalipila imisonko, balateensha abalwele, balatukuta ukupwisha ubwafya bwa kukanaishiba ukubelenga no kulemba.”

Na kabili, ukupitila muli kosi uulundulula ukulanda kwa pa cintubwingi, Inte sha kwa Yehova shalisambilisha imintapendwa ya bantu ukuba bakalanda bafikapo, abengalanda mu kulongoloka pa cintubwingi. Bamo pali iyi mintapendwa ya bantu tabalelanda bwino. Ku ca kumwenako umwaume umo uwa ku South Afrika alembo kuti: “Ukubulubusa kwandi kwalicililemo ica kuti natendeke ukulaumfwa insoni, ilingi line bambi e balenandilako. . . . Lintu nalembeshe mu Isukulu lya Butumikishi bwa Teokrasi no kupeelwa ilyashi lya kubelenga Baibolo kwi bumba linono . . . , nalibulubushile icibi ica kuti nalifililwe ukupwisha ilyashi mu nshita napeelwe. Pa numa ya kulongana [kafundisha] mu cikuuku alimpandileko amano yasuma. Atubulwile ukuti ndebelenga mu kupongomoka nga ndi neka. E fyo natendeke ukucita, cila bushiku nalebelenga Baibolo na magazini wa Ulupungu lwa kwa Kalinda mu kupongomoka.” Uyu mwaume alilundulwike ica kuti pali nomba alalanda amalyashi ya cintubwingi ku mabumba ayakalamba nga nshi.

Ukuipakisha Umulinganya pa Kati ka Bamunyina

Inte sha kwa Yehova shalipusana mu masomo, mu fyo shisakamanwa nga shalwala, mu fya bunonshi, na mu fya bwikashi. Uku kupusana kulangilila fye imibele iishapwililika iya cino calo umo bekala. Lelo nga twabalinganya ku mabumba yambi aya mipepele, bena balifumyapo impatila ya mushobo, ubwikashi, no bunonshi pa kati ka bo.

Balicite ci ukupitila mu kufika apo bengapesha mu kucita fintu basambilila muli Baibolo. Balapokelela no mutima onse ifishinte fya mu Baibolo pamo nga: “Yehova tamona ifyo umuntunse amona; pantu umuntunse amona pa menso, lelo Yehova amona mu mutima.” (1 Samwele 16:7) “Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.” (Imilimo 10:34, 35) “Mwiba ababwesesho muntu nelyo umo ububi pa bubi; mube abatontonkanishisha kabela ifiweme, pa menso ya bantu bonse; nga cingacitwa; mube aba mutende ku bantu bonse nga caba mu maka yenu.”—Abena Roma 12:17, 18; moneni na kabili 1 Timote 6:17-19; Yakobo 2:5, 9.

Ukupitila mu kumfwila ifi fishinte fya mu Baibolo ifilundulula ukwikatana, Inte sha kwa Yehova tashitekelesha umuncishanya uuli onse uwa mushobo, ubwikashi, nelyo ubunonshi pa kati ka shiko. Ku ca kumwenako, tababomfya iyi milandu pa kupingulapo uufwile ukupeelwa amashuko ya mulimo mu cilonganino ca Bwina Kristu. Imilimo, pamo ngo kusambilisha na bukangalila, ipeelwa fye ku bantu abafikapo lwa ku mupashi.—1 Timote 3:1-13; Tito 1:5-9.

Bamo abacula ku muncishanya wa cino calo, mwandi balapembesulwa pa mulandu wa kuti bamonwa kuli bambi nga bamunyina ne nkashi abalingana ku cinso ca kwa Kabumba! Martina kuti asuminishako ici cishinka. Lintu wishi alekeleshe ulupwa lwakwe, nyina umupiina e wamukushishe. Ilingi line balemukankamba, tali uwaicetekela sana, kabili calemwafyo kumfwana na bambi. Aishilekwata imibele ya kukanayangwako. Nangu cibe fyo, alyalwike lintu atendeke ukusambilila Baibolo no kusanguka Inte ya kwa Yehova. Atila: “Ncili ndalwisha amatontonkanyo yabipa, lelo pali nomba nalishiba ifya kwikala no bu bwafya. Nomba naliicetekela, kabili ndalanda mu kucetekela. Icine calinenga ukubo wayangwako. Nomba nalishibo kuti Yehova alintemwa no kuti ubumi bwalicindama.”

Pamo nge bumba lya pa kati ka nko ilya Bena Kristu, Inte sha kwa Yehova mu fyalo ukucila pali 230 shilaipakishako umulinganya uwaibela muli cino calo ca ndakai. Bushe kuti kwabako ibumba limbi ilya mipepele ilingalanda cimo cine no kupayanya ubushinino?

Kwena, Inte sha kwa Yehova shalisumino kuti apantu icilenga umuncishanya wa bantunse mibele iishapwililika, tashingaupwisha nga fintu bambi bafilwa pa numa ya kweshako pa myaka iingi. Lelo, shilasekelela ukuti shalishinshibika umuncishanya pa kati ka shiko. Kabili pa kutetekela sana ubulayo bwa kwa Lesa, balolela ukwisa kwa calo cipya ica bulungami umushakabe umuncishanya kuli pe na pe.

Ca cine, abantunse bonse aba cumfwila nomba line bali no kupeelwa ‘ukucindama ne nsambu’ ifyo Kabumba wabo pa kutendeka afwaile baleipakisha. Mwandi ili litontonkanyo lisuma! Kabili pali uno muku likafikilishiwa!

[Icikope pe bula 7]

Inte sha kwa Yehova shilatukuta ukupwisha ubwafya bwa kukanaishiba ukubelenga no kulemba ukupitila mu kusambilisha imintapendwa ya bantu ukubelenga no kulemba

[Icikope pe bula 8]

Icine ca Baibolo cilaafwa ukupwisha impatila ya mushobo, ubwikashi no bunonshi