Pekanishisheni Imyaka Ikana Limo Iya Cine Cine!
UKUTEKA kwa Myaka Ikana Limo Ukwa kwa Kristu kukaletela abantunse amapaalo ayengi nga nshi. Ilyo Yesu akalatungulula mu kutemwa, abantunse bakafuma ku mikalile ya bulanda ku kuba abapwililika. Tontonkanyeni ukuti na imwe bamundapa. Mukaba no bumi busuma! Elenganyeni lyonse ilyo mwashibuka ulucelo mukalaumfwa bwino ukucila ifyo mwaleumfwa ilyo mushilasendama. Abaume, abanakashi, na bana banono abengi balafulukisha ukwisasangwako kuli iyo nshita ya nsansa. Imitima yabo yaba fye uko kwine kabili balapepelapo. Balishininkisha pa numa ya kusambilila Baibolo ukuti bakapaalwa muli iyi nshila.
Nangu cibe fyo, ilyo Yesu Kristu ashilatendeka Ukuteka Kwakwe Ukwa Myaka Ikana Limo, akafumya pe sonde bonse abakaanya ukuteka kwakwe. Akacite ci pa bulwi Baibolo ita ati Armagedone. (Ukusokolola 16:16) Abena Kristu ba cine pano isonde tabakalweko muli ubu bulwi. Bukaba bulwi bwa kwa Lesa. Kabili tabwakabele ku ncende imo fye. Baibolo itila bukaba fye mpanga yonse pano isonde. Abalwani ba kuteka kwa kwa Kristu bakepaiwa. Takuli nangu umo uukapusuka!—Yeremia 25:33.
E lyo nomba Yesu akalukila kuli Satana Kaseebanya ne fibanda fyakwe. Moneni icikacitika, nga fintu kalemba we buuku lya Ukusokolola amwene: “Namwene malaika [Yesu Kristu] aleika mu muulu, ali no lufungulo lwa cilindi ca ku Mbo no munyololo ukalamba mu minwe yakwe. Wene aikete icing’wena, icisoka cikote (e Kaseebanya kabili Satana), no kucikaka imyaka ikana limo.” (Ukusokolola 20:1, 2) Mu kuya kwa nshita, Satana ne fibanda fyakwe bakonaulwa kuli pe na pe.—Mateo 25:41.
“Ibumba likalamba ilishingapendwa ku muntu nangu umo,” likapusuka Armagedone. (Ukusokolola 7:9) Kristu ali no kutungulula aba bantu ku kuyanwa pa “tumfukumfuku twa menshi ya mweo,” filya kacema akunkumba impaanga shakwe ku menshi pa kuti shifwa ku cilaka. (Ukusokolola 7:17) Apo nomba Satana ne fibanda fyakwe tabakabeko ku kupofwisha abantu lwa ku mupashi, abakapusuka Armagedone bakalaafwiwa panono panono ukutalukako ku lubembu ukufikila bakapwililike!
Ilyo Kristu akalateka mu kutemwa, imikalile ikawaminako. Yehova Lesa, ukupitila muli Yesu Kristu, akafumyapo ifilenga ukukalipwa no bulanda fyonse. “Akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka.” (Ukusokolola 21:4) Kasesema Esaya wena asondwelela ukuti: “E lyo yakashibulwa amenso ya mpofu, na matwi ya bankomamatwi yakakomonwa; e lyo uwalemana amolu akacilauka nge nsebula, no lulimi lwa kwa cibulu lukaula.” (Esaya 35:5, 6) Kabili abafwa, “abakalamba na banono,” bakaba no mweo kabili no kusubila ukwikala kuli pe na pe!—Ukusokolola 20:12.
Pali ino ine nshita, “ibumba likalamba” ilikapusuka Armagedone lilelonganikwa. Baleipekanya ukwisasangwako ku Kuteka kwa Myaka Ikana Limo Ukwa kwa Kristu. Nangu cingati tabaishiba ilyo uko kuteka kukatendeka, balishininkisha ukuti ilyo inshita Lesa umwine apima ikafika, ukuteka kukatendeka. Kuti na imwe mwaisasangwako, lelo mufwile ukuipekanya. Tatuleti mufwile ukushitisha ifipe no kuya ku ncende imo, iyo lelo mufwile ukwishiba mu kulungika Yehova Lesa ne mifwaile yakwe ukupitila mu kusambilila Baibolo. Inte sha kwa Yehova bakatemwa ukumulanga apa fye ifyo mwinganonkelamo no lupwa lwenu mu kusambilila Baibolo. Abalembele uno magazini kuti batemwa ukumutumina ifyebo na fimbi.
[Akabokoshi pe bula 7]
Bushe Imyaka Ikana Limo—Paliba Ifyo Imininako Nelyo Iyo?
Apantu ifingi mwi buuku lya Ukusokolola fyalembwa mu cimpashanya, cili fye bwino ukwipusha ukuti, Bushe Ukuteka kwa Myaka Ikana Limo Ukwa kwa Kristu kulemininako fimo nelyo iyo?
Cimoneka sana ukuti icapilibulwa myaka fye iyi ine twaishiba 1,000. Moneni ici: Umutumwa Paulo atila Ukuteka kwa kwa Kristu Ukwa Myaka Ikana Limo, umo abantu bakapingulwa, kukaba mu bushiku bumo. (Imilimo 17:31; Ukusokolola 20:4) Umutumwa Petro alembele ukuti ubushiku bumo (amaawala 24) kuli Yehova bwaba nge myaka ikana limo. (2 Petro 3:8) Kanshi ici e cileshinina ukuti ubu “bushiku” bwa bupingushi bukalepa imyaka ya cine cine 1,000.