Mulandu Nshi uwa Kulundulwila Ubusuma?

NOMBA line, umwaume wa mushinku wa pa kati, umwina Japan uwe shina lya Kunihito akuukile ku United States.a llyo afikile, papitile fye imilungu inono kwacitike cimo icapene conaule umulimo wakwe. Kunihito alondolola ati: “llyo umukalamba wa ncito anjipwishe nga kuti nabomba umulimo umo, nalishibe ukuti kuti nabomba. Lelo, apo ukufuma ku bwaice, naishibe ukuti ubufuuke busuma, nayaswike ukuti: ‘Nshishibe nga kuti nabomba, lelo nalaesha na maka yandi yonse.’ Ku mukalamba wa ncito umwina Amerika, ico caumfwikile kwati nshaishiba uyo mulimo kabili nshaicetekele. Ilyo naishibe ico, nakutulwike ukuti mfwile ukwalula imilandile yandi.”

Maria uwikala mu New York City, aali umusambi, uwatemenwe ukwafwa abasambi banankwe. Juan ali musambi uwalelomba Maria ukumwafwilishako limo limo. Lelo, Juan aali ne cintemwa kuli Maria kabili aleesha ukuilanga ukuti aliba bwino sana. Nangu line Maria alefwaisha ukutwalilila uwa musangwela, alinashiwe ku kulembeleka kwa kwa Juan kabili acitile nankwe ubulalelale.

Tacayanguka ukuba abasuma muli cino calo ca ntambi shapusanapusana ne mibele yabipa. E co, mulandu nshi tufwile ukulundulwila ubusuma? Pantu imibele isuma ilateemuna Lesa, kabili fwe bengi tulafwaya ukucita icingasekesha Lesa.

Icebo ca kwa Lesa, Baibolo, citukonkomesha ukulundulula ubusuma. Ku ca kumwenako, umutumwa Paulo alemba ati: “Nga kwabe ca busuma, nga kwabe ca kutasha, tontonkanyeni ifi fintu.” (Abena Filipi 4:8) Kabili umutumwa Petro atukoselesha ukubombesha pa ‘kulundako bulumba ku citetekelo cesu.’ (2 Petro 1:5) Bushe ubusuma cinshi? Bushe kuti bwafundwa mu kalasi? Kuti twabulundulula shani?

[Futunoti]