Bushe Muleikala Umwabela Ukuipeela Kwenu?

“Conse ico mulecita, bombeni no mutima onse, nga kuli Shikulu, te ku bantu iyo.”—ABENA KOLOSE 3:23.

1. Ku calo ishiwi lya kuti “ukuipeela” lipilibula nshi?

BUSHE aba mangalo besa mu kwishibisha shani amangalo yabo? Mu bwangalo bwa tennis, umupila wa ku makasa, basketball, baseball, ukubutuka, ubwangalo bwa golf (akamombo), nelyo ubwangalo bumbi, abaishibisha ayo mangalo bacila bonse ukupitila mu kuipeela icine cine. Ica ntanshi kuipekanya lwa ku mubili na lwa ku muntontonkanya. Ici cumfwana no bulondoloshi bumo ubwe shiwi lya “kuipeela,” ubwa kuti “kulambatila no mweo onse ku cintu cimo nelyo incitilo.”

2. Mu Baibolo “ukuipeela” e cinshi? Londololeni.

² Lelo, mu Baibolo “ukuipeela” e cinshi? Ishiwi lya “kuipeela” lyafuma kuli verbu wa ciHebere uutila “ukupaatulwa; ukupaatwilwa; ukuleka ukucita icintu cimo.”a Muli Israele wa pa kale, Aarone Shimapepo Mukalamba abikilwe “icilongwe ca mushilo” pa citebo cakwe, icali kapapatu kalebengeshima aka golde walopolwa akalembelwepo amashiwi ya ciHebere aya kuti “Bumushilo bwa kwa Yehova.” Ico calecinkulako shimapepo mukalamba ukuti ali no kutaluka kuli conse icingapeelula umwashila “pantu icishibilo ca kuipeela, amafuta ya kusuba aya kwa Lesa wakwe yali pali wene.”—Ukufuma 29:6; 39:30, NW; Ubwina Lebi 21:12.

3. Ukuipeela kufwile ukukuma shani imyendele yesu?

³ Muli fi fyebo kuti twamona ukuti ukuipeela cintu icacindama. Kwalola mu kuishibisha ukuti umuntu mubomfi wa kwa Lesa, kabili kupinda umusangwela. E co, kuti twaumfwikisha ico mutumwa Petro asosele ifyo Yehova alandile ukuti: “Beni aba mushilo; pa kuti ine ndi wa mushilo.” (1 Petro 1:15, 16) Pa kuba Abena Kristu baipeela, twalikwata umulimo ukalamba uwa kwikalila umwabela ukuipeela kwesu, ukuba aba busumino ukufika na ku mpela. Lelo finshi fyaba mu kuipeela kwa Mwina Kristu?—Ubwina Lebi 19:2; Mateo 24:13.

4. Tufika shani pa kuipeela, kabili ukuipeela kuti kwapashanishiwa kuli cinshi?

⁴ Ilyo twaishibe Yehova Lesa ne fyo afwaya na Yesu Kristu no mulimo akwata mu fyo afwaya, twapingwilepo ukubombela Lesa no mutima wesu onse, amano yesu yonse, umweo wesu onse, na maka yesu yonse. (Marko 8:34; 12:30; Yohane 17:3) Ico pambi kuti camonwa no kuti mulapo wa muntu, ukuipeela onse kuli Lesa. Tatwaipeela pa mulandu wa kukuntukilwa. Twalitontonkenyepo sana no kupepelapo. E co, te kuipeela kwa pa kashita fye. Te kuti tube ngo muntu uwatendeka ukulime bala no kulekela pa kati pantu incito yakosa nelyo pantu inshita ya kulobolola yamoneka kwati ili ukutali sana nelyo ilemoneka kwati tayakese no kwisa. Moneni ifya kumwenako fya bamo ‘abaikata kuli plao’ wa milimo ya bulesa mu nshita shayafya.—Luka 9:62; Abena Roma 12:1, 2.

Tabalekele Kwikala Umwabelele Ukuipeela Kwabo

5. Yeremia ali shani ca kumwenako cishaiwamina ica mubomfi waipeela kuli Lesa?

⁵ Ubutumikishi bwa kwa Yeremia ubwa kusesema mu Yerusalemu bwacilile pa myaka 40 (647-607 B.C.E.), kabili tabwali mulimo wayanguka. Alishibe bwino umo apelebele. (Yeremia 1:2-6) Cila bushiku alekabila ukushipa no kushipikisha pa kushimikila abaYuda bankosa mitwe. (Yeremia 18:18; 38:4-6) Lelo, Yeremia acetekele Yehova Lesa, uwamukoseshe ica kuti ali mubomfi wa kwa Lesa uwaipeela cine cine.—Yeremia 1:18, 19.

6. Ca kumwenako nshi umutumwa Yohane atwimikile?

⁶ Ni shani ulwa mutumwa wa busumino Yohane, uo batamfishe mu bukote ku cishi cishawama kwikalamo ica Patmo pa mulandu “wa cebo ca kwa Lesa no bunte bwa kwa Yesu”? (Ukusokolola 1:9) Alishipikishe kabili aikele umwabelele ukuipeela kwakwe pamo ngo Mwina Kristu nalimo imyaka 60. Ali acili umumi na pa numa Yerusalemu abe naonaulwa ku milalo ya bena Roma. Alikwete ishuko lya kulemba Ilandwe, bakalata batatu abapuutwamo, ne buuku lya Ukusokolola, umo amwenene libela inkondo ya Armagedone. Bushe alilekele ukwikala umwabelele ukuipeela kwakwe ilyo aishibe ukuti Armagedone tayali no kwisa ilyo ali umumi? Bushe alilekele ukwangwako? Iyo, Yohane atwalilile uwa busumino ukufikila imfwa yakwe, ukwishiba ukuti nangu ca kuti ‘inshita yalingwa yali mupepi,’ ifimonwa fyakwe fyali no kufishiwapo ku ntanshi.—Ukusokolola 1:3; Daniele 12:4.

Ifya Kumwenako fya Nomba Ifya Kuipeela

7. Munyina umo ali shani ca kumwenako cisuma ica kuipeela kwa Bwina Kristu?

⁷ Mu nshita shesu, iminshipendwa ya Bena Kristu ba busumino baikalile umwabela ukuipeela kwabo kabili bali abapimpa te mulandu no kukanamonako Armagedone. Uwa musango yo umo ali ni Ernest E. Beavor uwa ku England. Ali Inte mu 1939 pa kutendeka kwa Nkondo ya Calo iya Cibili, kabili ashiile ubukwebo bwalelunduluka ubwa kukopa ifikope fya basabankanya amalyashi pa kuti atendeke ubutumikishi bwa nshita yonse. Pa mulandu wa kuti taipoosele mu milandu ya calo pa kuba Umwina Kristu, akakilwe imyaka ibili. Ulupwa lwakwe lwalimutungilile, kabili mu 1950 abana bakwe batatu basangilwe kwi Sukulu lya Baibolo Ilya Gileadi Ilya Watchtower ilikansha bamishonari, mu New York. Munyina Beavor ali uwapimpa mu mulimo wa kushimikila ica kuti ifibusa fyalemwita ati Armagedone Ernie. Aikele umwabelele ukuipeela kwakwe, no kufika fye na ku mfwa yakwe mu 1986, alebilisha ukupalama kwa nkondo ya kwa Lesa iya Armagedone. Tamwene ukuti ukuipeela kwakwe kwali fye cipangano ca pa kashita na Lesa!b—1 Abena Korinti 15:58.

8, 9. (a) Ca kumwenako nshi abalumendo abengi mu Spain baimike mu buteko bwa kwa Franco? (b) Fipusho nshi fili ifyalinga?

⁸ Ica kumwenako na cimbi ica batwalilile abapimpa ni cilya ica ku Spain. Mu buteko bwa kwa Franco (1939-75), iminshipendwa ya baNte bacaice tabali mu milandu ya calo pa mulandu wa kuba Abena Kristu. Abengi baikele mu fifungo fya bashilika imyaka 10 no kucilapo. Nte umo, Jesús Martín, ena imyaka yonse pamo iyo akakilwe yacilile pali 22. Apuminwe icabipisha ilyo ali mu cifungo ca bashilika mu calo cabela ku Kapinda ka Kuso aka Afrika. Ici tacali icayanguka, lelo tanashisheko kuipeela kwakwe.

⁹ Ilingi, aba balumendo tabaleishiba nga ca kuti bakakakulwa, pantu libili libili balepingulwa ukukakwa. Lelo, babakilile bumpomfu bwabo no kutwalilila ukupimpila ubutumikishi ilyo bali mu cifungo. Kuli pele pele ilyo ifintu fyatendeke ukuwama mu 1973, baNte aba abengi, abali mu myaka ya kutendeka iya ba 30, balikakwilwe kabili batendeke ubutumikishi bwa nshita yonse apo pene fye, bambi bali bapainiya baibela na bakangalila benda. Baikele umwabelele ukuipeela kwabo mu cifungo, kabili abengi balitwalilila ukucite co ukutula apo bakakwililwe.c Ni shani ulwa ifwe lelo? Bushe tuleikala umwabela ukuipeela kwesu nga aba aba bucishinka?—AbaHebere 10:32-34; 13:3.

Ifyo Tufwile Ukumona Ukuipeela Kwesu

10. (a) Tufwile ukumona shani ukuipeela kwesu? (b) Yehova amona shani ukuipeela kwesu kuli wene?

¹⁰ Tumona shani ukuipeela kwesu kuli Lesa ku kucita ukufwaya kwakwe? Bushe e ca ntanshi mu bumi bwesu? Te mulandu ne mibele tulimo, nampo tuli baice nelyo abakalamba, nampo twaba mu cupo nelyo tuli bashimbe, nampo tuli batuntulu nelyo tulalwala, tufwile ukutukuta ukulaikala umwabela ukuipeela kwesu, ukulingana ne mibele tulimo. Imibele umuntu umo alimo kuti yamusuminisha ukubomba ubutumikishi bwa nshita yonse pamo nga mu mulimo wa bupainiya, mu mulimo wa kuitemenwa pe ofeshi linono ilya Watch Tower Society, mu mulimo wa bumishonari, nelyo mu mulimo wa kwenda. Lubali lumbi, abafyashi bamo pambi kuti bakwata ifya kucita ifingi, ukusakamana ulupwa lwa ku mubili na lwa ku mupashi. Bushe amaawala yabo ayanono ayo babomba mu butumikishi cila mweshi yalicepa kuli Yehova ukulingana na maawala ayo umubomfi wa nshita yonse abomba? Iyo, Lesa tenekela ifwe ukumupeela ifyo tushikwete. Umutumwa Paulo asosele ici cishinte ce funde ukuti: “Pantu ukupimpa nga kwabako, kwasekelelwa umo umuntu akwatila, te umo ashakwatila.”—2 Abena Korinti 8:12.

11. Ipusukilo lyesu lyashintilila pali cinshi?

¹¹ Ipusukilo lyesu talyashintilila pa fyo twingacita, lelo lyashintilila pa cikuuku ca kwa Yehova muli Yesu Kristu, Shikulwifwe. Paulo alondolwele bwino ukuti: “Bonse nababembuka, kabili bapelebela ku bukata bwa kwa Lesa. Balungamikilwa ku kusenamina kwakwe fye ku cilubula ca muli Yesu Kristu.” Lelo, imilimo yesu ishininkisha ukuti twalitetekela mu malayo ya kwa Lesa.—Abena Roma 3:23, 24; Yakobo 2:17, 18, 24.

12. Mulandu nshi tushifwile ukulalinganya?

¹² Tatufwile ukulalinganya kuli bambi amaawala tubomba mu mulimo wa kwa Lesa, impapulo tushalika, nelyo impendwa ya masambililo ya Baibolo tutungulula. (Abena Galatia 6:3, 4) Nangu tupwishishishe fimo mu butumikishi bwa Bwina Kristu, ifwe bonse tufwile ukwibukisha amashiwi ya kuicefya aya kwa Yesu aya kuti: “Ni fyo fine na imwe, ilyo mwacita fyonse ifyo mwaebwa, mutile, Tuli finangwa fya basha; ico tufwile ukucita, ni co cine twacita.” (Luka 17:10) Miku inga twingasosa icine cine ukuti twacita ‘fyonse ifyo twaebwa’? Kanshi kuti twaipusha atuti, Bushe umulimo wesu kuli Lesa ufwile ukuba shani?—2 Abena Korinti 10:17, 18.

Ukubomfya Bwino Ubushiku Bumo Bumo

13. Mimwene nshi tufwile ukukwata ilyo tuleikalila ku kuipeela kwesu?

¹³ Pa numa ya kufunda abakashi, abalume, abana, abafyashi, na basha, Paulo alemba ukuti: “Conse ico mulecita, bombeni no mutima onse, nga kuli Shikulu, te ku bantu iyo; mube abaishibo kuti ni kuli Shikulu mukapokelele cilambu ca bupyani: mubombela Shikulu Kristu.” (Abena Kolose 3:23, 24) Tatulebombela abantu mu fyo tulepwishishisha mu mulimo wa kwa Yehova. Tuleesha ukubombela Lesa ukupitila mu kukonka ica kumwenako ca kwa Yesu Kristu. Abombele ubutumikishi bwakwe ubwa pa nshita inono mu kampampa.—1 Petro 2:21.

14. Cinshi Petro asokele pa lwa nshiku sha kulekelesha?

¹⁴ Umutumwa Petro na o alebomba mu kampampa. Muli kalata wakwe uwa cibili, asokele ukuti mu nshiku sha kulekelesha mukaba bakapumya—abasangu na batwishika—abo ukulingana ne fyo bafwaya, bakepusha pa lwa kubapo kwa kwa Kristu. Lelo Petro atile: “Shikulu talafyalafya ku kufishe co alaile, filya bamo batungo kulafyalafya; lelo atekanya kuli imwe pa kukanafwayo muntu ukonaika, lelo onse ukulola ku kulapila. Awe Ubushiku bwa kwa Shikulu bukesa ngo mupupu.” Nangu cikabe shani ubushiku bwa kwa Yehova bukesa. E co, tufwile ukwangwa cila bushiku ku fyo icitetekelo cesu mu bulayo bwa kwa Lesa cakosa no kushininkishiwa.—2 Petro 3:3, 4, 9, 10.

15. Tufwile ukumona shani ubushiku bumo bumo mu bumi bwesu?

¹⁵ Pa kwikala umwabela ukuipeela kwesu, tufwile ukubomfya ubushiku bumo bumo ku kulumbanya Yehova. Pa mpela ya bushiku bumo bumo, bushe kuti twatontonkanya pa fyo ubushiku bwaciba no kumona ifyo twacibombako mu kushisha ishina lya kwa Lesa no kubilisha kwa mbila nsuma iya Bufumu? Napamo caciba ni mu myendele yesu iyasanguluka, ifyebo fisuma twacilanda, nelyo ukwangwako no kutemwa ku lupwa lwesu nelyo ifibusa. Bushe twacibomfya amashuko twacikwata aya kwebako bambi isubilo lyesu ilya Bwina Kristu? Bushe twacafwa umuntu ukwetetula pa malayo ya kwa Lesa? Natulelonganika ifyacindama ifya ku mupashi cila bushiku, kwati kulundulula akaunti musuma uwe banki lya ku mupashi.—Mateo 6:20; 1 Petro 2:12; 3:15; Yakobo 3:13.

Mulemona Bwino Ifintu

16. Ni mu nshila nshi Satana esha ukunashisha ukuipeela kwesu kuli Lesa?

¹⁶ Tuleikala mu nshita ishileafishako ku Bena Kristu. Satana na babomfi bakwe besha ukutulenga ukukanalamona bwino ubupusano bwaba pa cisuma ne cabipa, icasanguluka ne cishasanguluka, imibele isuma ne mibele yabipa, ifya buntu ne fishili fya buntu. (Abena Roma 1:24-28; 16:17-19) Alenga caba icayanguka sana ukukowesha imitima yesu ne mintontonkanya ku fyo tusalapo ukutamba pa televishoni nelyo pa Intaneti. Kuti twafilwa ukulamona bwino lwa ku mupashi ica kuti twafilwa no kwiluka imicenjelo yakwe. Ukupingula kwesu ukwa kwikala umwabela ukuipeela kwesu kuti kwanashiwa kabili te kuti twikatishe “plao” yesu nga twanashako ifya ku mupashi fintu twacindamika.—Luka 9:62; Abena Filipi 4:8.

17. Ukufunda kwa kwa Paulo kuti kwatwafwa shani ukubakilila bucibusa bwesu na Lesa?

¹⁷ E co, amashiwi ya kwa Paulo ku cilonganino ca mu Tesalonika nayalinga sana. Yatila: “Uku e kufwaya kwa kwa Lesa, ukushishiwa kwenu, ukuti mutalukeko ku bulalelale: ukuti onse uwa muli imwe eshibe ukukwato mukashi wakwe wine mu mushilo kabili mu mucinshi; te mu mufimbila wa lunkumbwa, nga Bena fyalo abashaishiba Lesa.” (1 Abena Tesalonika 4:3-5) Bucisenene bwalenga bamo ukutamfiwa mu cilonganino ca Bwina Kristu, abantu abashapoosele mano ku kuipeela kwabo kuli Lesa. Balekele bucibusa bwabo na Lesa ukunaka, ica kuti balekele ukumucindamika. Lelo, Paulo atile: “Lesa tatwitile ku kuba mu kukowela, lelo mu mushilo; e ico uusuula, tasuula muntu, lelo asuula Lesa uwapeele Umupashi wakwe wa mushilo kuli imwe.”—1 Abena Tesalonika 4:7, 8.

Cinshi Mwapampaminapo?

18. Cinshi tufwile ukupampaminapo?

¹⁸ Nga ca kuti twalimona ubucindami bwa kuipeela kwesu kuli Yehova Lesa, cinshi tufwile ukupampaminapo? Tufwile ukupampamina pa kukwata kampingu wasanguluka mu myendele yesu na mu butumikishi. Petro akonkomeshe ukuti: “Mube abakwata kampingu musuma, ukuti, muli ico bamupontela no kumubepesha, baseebane abatuke mibele yenu isuma iya muli Kristu.” (1 Petro 3:16) Pambi kuti twacula nelyo ukupakaswa pa mulandu wa myendele yesu iya Bwina Kristu, nomba e fyo cali na kuli Kristu pa mulandu wa citetekelo cakwe na bucishinka kuli Lesa. Petro atile: “E ico, apo Yesu atuculiile mu mubili, ipangasheni ipange ili ilya kuti uwaculile mu mubili naleko kubembuka.”—1 Petro 4:1.

19. Cinshi tulefwaya abantu balesosa pali ifwe?

¹⁹ Cine cine, ukupampamina kwesu ukwa kwikala umwabela ukuipeela kwesu kukatucingilila ku fiteyo fya calo ca kwa Satana icalwala lwa ku mupashi, mu mibele, na lwa ku mubili. Lelo icacilapo ca kuti tukashininkisha ukuti Lesa alitusenamina, icintu icacindama ukucila conse ico Satana ne fibombelo fyakwe bengatutambika. E co, twileka abantu basose ukuti twalileka ukutemwa twakwete ilyo twaishibe fye icine. Lelo, basose ulwa ifwe nga filya casoselwe ku cilonganino ca ku Tuatira ica mu mwanda wa myaka uwa kubalilapo ukuti: “Naishibe milimo yobe, no kutemwa kobe ne citetekelo cobe no kupyunga kobe no kushipikisha kobe; naishibe milimo yobe ya kupelelekesha yafulo kucile ya kutendeka.” (Ukusokolola 2:4, 18, 19) Twiba abacifulefule ku kuipeela kwesu, lelo tube ‘ababilima ku mitima,’ ukutwalilila no kupimpa ukufika na ku mpela—kabili impela ili mupepi.—Abena Roma 12:11; Ukusokolola 3:15, 16.

[Amafutunoti]

Bushe Muleibukisha?

• Ukuipeela kusanshamo finshi?

• Fya kumwenako nshi ifya kale ne fya nomba ifya babomfi baipeela kuli Lesa ifili ifyalinga ukupashanya?

• Tufwile ukumona shani umulimo wesu kuli Lesa?

• Cinshi tufwile ukupampaminapo pa lwa kuipeela kwesu kuli Lesa?

[Icikope pe bula 15]

Yeremia ali uwa busumino nangu acushiwe shani

[Icikope pe bula 16]

Ernest Beavor aimikile abana bakwe ica kumwenako pa kuba Umwina Kristu wapimpa

[Icikope pe bula 17]

Iminshipendwa ya baNte bacaice mu fifungo fya mu Spain babakilile bumpomfu bwabo

[Ifikope pe bula 18]

Natulelundako icintu icacindama lwa ku mupashi ubushiku bumo bumo