Abantu Baletwishika Ukubuushiwa kwa kwa Yesu

Shikofu mukalamba uwa ku Canterbury, uwa mu Calici lya England atile: “Ilintu mu kushininkisha kuti twalanda ukuti Yesu eko aali . . . , te kuti tusose mu kushininkisha ukuti Lesa alimubuushishe ku bafwa.”

UMUTUMWA wa Bwina Kristu Paulo tatwishike ukubuushiwa kwa kwa Yesu. Mu cipandwa 15 ica muli kalata wakwe uwa kubalilapo uwapuutwamo ku Bena Kristu banankwe aba mu Korinti wa pa kale, Paulo alembele ukuti: “Pantu ica ntanshi nashiilile imwe ni co na ine napokelele, ica kuti Kristu afwilile imembu shesu umwabela amalembo; kabili ukuti alishiikilwe; kabili ukuti abuushiwe pa bushiku ubwalenga shitatu umwalola amalembo.”—1 Abena Korinti 15:3, 4.

Icitetekelo mu kubuuka kwa kwa Yesu Kristu e cacincishe abasambi bakwe ukushimikila ilandwe ku “cibumbwa conse ca mwi samba lya muulu” ku baGriki na bena Roma. (Abena Kolose 1:23) Na kuba, ukubuushiwa kwa kwa Yesu e pashimpwa icitetekelo ca Bwina Kristu.

Nangu fye ni ku kutendeka abantu baletwishika ukubuushiwa kwa kwa Yesu. Ku baYuda abengi, cali miponto ilyo abakonshi ba kwa Yesu basosele ukuti Yesu uwapoopelwe pa cimuti ali ni Mesia. Kabili ku baGriki abengi abasambilile, abasumine muli bumunshifwa bwa mweo, itontonkanyo lya kubuushiwa kwakwe lyali ilyakuselausha.—Imilimo 17:32-34.

Abatwishika Aba Muno Nshiku

Mu myaka ya nomba line, bamo abasoma abaitunga ukuba Abena Kristu balyananya ifitabo ne fipande ifya kusuusha ukubuushiwa kwa kwa Yesu ukuti lushimi fye kabili balimya ifikansa pali ici cisambilisho. Mu kufwailisha pali “Yesu wa mu lyashi lya kale,” abalekanalekana abasoma balapaasha ukuti ilandwe ilya nshinshi yabulwamo umuntu no kumoneka kwa kwa Yesu ku bantu pa numa ya kubuushiwa kwakwe fya kwelenganya fye, ifyo batontonkenyepo pa numa ya mfwa yakwe mu kwafwilisha ukusosa ukuti ali mu maka ku muulu.

Moneni imimwene ya mwina German wasoma Gerd Lüdemann, profesa uwa Icipingo Cipya kabili kalemba wa citabo icitila What Really Happened to Jesus—A Historical Approach to the Resurrection. Apaashishe ukuti ukubuushiwa kwa kwa Yesu “cisambilisho icishabamo kantu” icifwile ukukaanwa na onse uwasumina muli “sayansi wa ici calo.”

Profesa Lüdemann akosele fye ndi pa kusosa ukuti Kristu uwabuushiwe uwamoneke ku mutumwa Petro ali cimonwa pantu Petro ali no bulanda ubukalamba kabili aleumfwa uwa mulandu pa kukaana Yesu. Kabili ukulingana na Lüdemann, ukumonekela kwa kwa Yesu pa nshita imo ku basumina bacilile pali 500 kwali ni pa mulandu wa kuti aba “bantu bali sana ne nsansa.” (1 Abena Korinti 15:5, 6) Mu kwipifya, abengi abasoma balasuusha ifyalembwa fya Baibolo pa lwa kubuuka kwa kwa Yesu ukusosa ukuti fya kwelenganya fye ifyo fyakoseshe abasambi lwa ku mupashi no kubalenga ukupimpa muli bumishonari.

Kwena, abengi tabafwaya ukukansana mu fya kusambilila. Lelo, ifwe bonse tulingile ukwangwako kuli ili lyashi lya kubuushiwa kwa kwa Yesu. Mulandu nshi? Pantu nga Yesu tabuushiwe, ubuKristu ninshi bwashimpwa pa bufi. Kumfwa, nga ca kuti Yesu alibuushiwe, ninshi ubuKristu bwashimpwa pa cine. E ico, te filandwa fye pa lwa kwa Kristu ifyashininkishiwa lelo na malayo yakwe. Mu kulundapo, nga kwaliba ukubuushiwa, imfwa te kuti ibe kacimfya mukalamba lelo mulwani uli no kucimfiwa.—1 Abena Korinti 15:55.

[Abatusuminishe Ukubomfya Icikope pe bula 3]

Ukufuma mu Self-Pronouncing Edition of the Holy Bible, iyakwata ubupilibulo bwa King James no bupilibulo bwa Revised