Cimfyeni Ifimucilikila Ukulunduluka!
TUTILE motoka wenu ali mu giya, na injini ilelila, lelo ilekana ukuya ku ntanshi. Bushe ifwile fye? Awe, ni co fye ku ntanshi ye taela kuli icilibwe. Icilekabilwa kucifumyako fye pa kutila motoka yende.
E fyo caba na kuli bamo abalesambilila Baibolo ne Nte sha kwa Yehova, nabo balikwata ifibacilikila ukulunduluka lwa ku mupashi. Ku ca kumwenako, Yesu asokele ukuti ifintu pamo ngo “kusakamana kwa pano isonde no longolo lwa fyuma” kuti “fyatushe cebo” ca cine no kucilikila ukulunduluka.—Mateo 13:22.
Bambi, imibele ya cifumanda nelyo amabunake yabo filabacilikila ukulunduluka. Umwaume umwina Japan uo beta ati Yutaka alitemenwe ubukombe bwaba muli Baibolo, lelo ali no bwafya bwabipisha ubwa kuteya icangalo ca cela mushuke. Ilingi line aleesha ukucimfya ici cimusango cabipa lelo alefilwa. Ukukunkuma ukuteya ici cangalo kwa mulengele ukonaula indalama ishingi nga nshi, ukumupoka amayanda yatatu, ukukanacindikwa ku lupwa lwakwe, kabili no mwine wine alisalwike. Bushe pali icali no kumwafwa pa kuti afumyepo icalemucilikila no kuba Umwina Kristu?
Kabili tontonkanyeni na pa mwanakashi beta Keiko. Pa kwafwiwa na Baibolo, alekele imibele yonse iyabipa pamo ngo kupepo tulubi, bucisenene, no kusobela ifya ku ntanshi. Nalyo line, Keiko asumina ukuti: “Icikalamba icalencilikila ni fwaka. Nalyeseshe pa miku iingi ukuleka ukupeepa lelo nalefilwa.”
Napamo na imwe mwalikwata icimucilikila ukulunduluka icimoneka kwati te kuti cifumishiwepo. Te mulandu ne fyo ico cintu caba, ishibeni ukutila kuti mwacimfya nga Lesa amwafwa.
Ibukisheni ifyo Yesu afundile abasambi bakwe ilyo bafililwe ukufumya iciwa mu mwaume walwele ubwa kufunta. Ilyo Yesu afumishe iciwa ico bene bafililwe ukufumya, aebele abasambi bakwe ati: “Amukwate citetekelo ngo luseke lwa lubanga, nga mwingasosa ku lupili ulo, amuti, Fuma pano uye kulya, na lo kuti lwafumapo; kabili tacingamwansha icintu nangu cimo.” (Mateo 17:14-20; Marko 9:17-29) Ca cine, ubwafya ubulemoneka kwati lupili lukalamba kuli ifwe bunono sana kuli Kabumba wesu uwakwatisha amaka.—Ukutendeka 18:14; Marko 10:27.
Ifya Kwishiba Ificilikila Ukulunduluka
Ilyo tamulacimfya ifimucilikila, mufwile ukufishiba. Kuti mwafishiba shani? Inshita shimo uwa mu cilonganino, pamo nga eluda nelyo uumusambilisha Baibolo, kuti amwebako fimo fimo. Ukucila ukukana ukupanda amano kwa musango yo, mufwile ukuicefya, ‘ukumfwa ukusalapula no kuba aba mano.’ (Amapinda 8:33) Nshita shimbi, mwe bene kuti mwaishiba ubunake bwenu ilyo mulesambilila Baibolo. Ca cine, Icebo ca kwa Lesa ca “mweo, kabili caliluma.” (AbaHebere 4:12) Ukulabelenga Baibolo ne mpapulo shilanda pali Baibolo kuti kwasokolola amatontonkanyo yenu ayabelama, ifyo muyumfwa, na mapange yenu. Kulamwafwa ukuibebeta ukulingana ne fipope fyalungama ifya kwa Yehova. Kulasokolola no kumulenga ukwishiba ifingamucilikila ukulunduluka lwa ku mupashi.—Yakobo 1:23-25.
Ku ca kumwenako, tutile umusambi wa Baibolo alapoose nshita pa fya bucisenene. Napamo te kuti amonemo ububi mu kucite fyo, ukupelulula ukuti na kuba tapali nangu cimo icalubana ico alecita. Ilyo alesambilila, asanga amashiwi yaba pali Yakobo 1:14, 15 ayatila: “Umuntu onse atunkwa pa kulembulwa no kubelelekwa ku lunkumbwa lwakwe lwine; e lyo ulunkumbwa ilyo lwaimita lufyalo lubembu, no lubembu ilyo lwakula lufyale mfwa.” Nomba e lyo amona ububi ubwingaba mu kutwalilila muli iyi nshila nga alefwaya ukulunduluka! Kuti afumyapo shani ici icilemucilikila?—Marko 7:21-23.
Ukucimfya Ificilikila
Napamo pa kwafwiwa no Mwina Kristu wakosoka, umusambi kuti asapika na fimbi mu Cebo ca kwa Lesa, ukubomfya Icisontelelo ca Mitwe ya Malyashi ya Ulupungu lwa kwa Kalinda icisangwa muli lumo na lumo ulwa Ulupungu lwa kwa Kalinda ulwa December 15. Ku ca kumwenako umutwe utila “Ubumi ne Mibele ya Bwina Kristu,” ulangilila kabelenga ifipande ifingi ifyasabankanishiwa ifilanda pa fya kucimfya ifya kwelenganya fyabipa. Ifi fipande fikomaila pa malembo ya mu Baibolo aya kwafwilisha, pamo nga Abena Filipi 4:8, apatila: “Ica kulekelesha, mwe ba bwananyina, tontonkanyeni fyonse ifya cine, fyonse ifya mucinshi, fyonse ifya bulungami, fyonse ifya musangwela, fyonse ifyayemba, fyonse ifya mutembo, nga kwabe ca busuma, nga kwabe ca kutasha, tontonkanyeni ifi fintu.” Ca cine, amatontonkanyo ya bucisenene yafwile ukupyanwapo na matontonkanyo ya musangwela, aya kukuulilila!
Ilyo umusambi alesapika, ali no kusanga ifishinte fya mu Baibolo fimbi ifikamwafwa ukukanakosha ubwafya bwakwe. Ku ca kumwenako, Amapinda 6:27 na Mateo 5:28 yasoka ukukanalisha umuntontonkanya ne fintu ifibimbula insuuna ya bulalelale. Kemba wa malumbo apepele ati: “Aluleni amenso yandi yeba mu kulolesha fya fye.” (Amalumbo 119:37) Kwena, ukubelenga fye aya malembo ya mu Baibolo te kuti kutwafwe. Umwaume wa mano atile: “Umutima wa mulungami welenganye ca kwasuka.” (Amapinda 15:28) Umusambi nga aleetetula pa fyo Lesa atweba no kwishiba ico atwebele fyo, kuti aishiba bwino ukutila inshila sha kwa Yehova shisuma kabili shalikondenkana.
Ica kulekelesha ca kuti uulelwisha ukucimfya ifilemucilikila ukulunduluka afwile ukulomba ubwafwilisho kuli Yehova. Na kuba, Lesa alishiba bwino ifyo twapangwa, ukuti tatwapwililika, ukuti twapangwa ku lukungu. (Amalumbo 103:14) Amapepo ya mukosha aya kulomba ubwafwilisho kuli Lesa, ukubikapo no kubombesha kwa kukanaitumpa mu fya kwelenganya fya bucisenene, kukasuka akutulenga ukukwata icintu icisuma, e kutila kampingu wasanguluka uushicushiwa.—AbaHebere 9:14.
Mwinenuka
Ilyo mulelwisha ubwafya bwa musango onse, ishibeni ukuti limo limo kuti mwacita na kabili ico cine mulefwaya ukucimfya. Ilyo ico cacitika, ca cifyalilwa fye ukukalifiwa no kufuupulwa. Lelo, ibukisheni amashiwi yaba pa Abena Galatia 6:9 ayatila: “Twinenuka mu kucite cawama; pantu ku nshita iiyene tukalobolola, nga tatutompweke.” Ababomfi ba kwa Lesa abaipeeleshe pamo nga Davidi na Petro bacitile ifilubo fya kulenge nsoni. Lelo tabanenwike. Baliicefeshe no kumfwila ukufunda, balyalwike, no kuishininkisha abene ukuba ababomfi bene bene aba kwa Lesa. (Amapinda 24:16) Nelyo Davidi acitile ifilubo, Yehova amwitile ati “umuntu uwaba ngo mutima wandi, uukacita fyonse ifyo mfwaya.” (Imilimo 13:22) Petro na o wine alipuupuutwike ilyo alufyenye no kuba ngo luceshi mu cilonganino ca Bena Kristu.
Abengi lelo nabo balitunguluka mu kucimfya ifibacilikila. Yutaka, uo tulandilepo pa kubala, asumine ukulasambilila Baibolo. Ashimika ati: “Ukwafwa kwa kwa Yehova ne paalo lyakwe pali conse ico nalecita kwanjafwile ukucimfya ubwafya bwa kuteya amangalo ya cela mushuke. Ndi ne nsansa ishingi pa kuimwena bucine bwa mashiwi ya kwa Yesu—aya kuti nga uli ne citetekelo, kuti wasesha nangu fye fintu fyaba nge ‘mpili’.” Mu kuya kwa nshita, Yutaka abele umubomfi utumikila mu cilonganino.
Nga Keiko, uwakunkwime kuli fwaka, bushe cinshi cacitike kuli wene? Nkashi yesu uwalesambilila Baibolo na o amwebele ukubelenga ifipande fyalekanalekana muli Loneni! ifilanda pa kukunkuma kuli fwaka. Keiko akambatike na mashiwi yaba pali 2 Abena Korinti 7:1 muli motoka wakwe nge ca kumucinkulako cila bushiku ukuba uwasanguluka lyonse kuli Yehova. Nalyo line, alifililwe ukuleka. Keiko e bukisha ati: “Nalifulilwe icibi pa fyo nalecita. E co natendeke ukuipusha ico nalefwaisha—bushe nalefwaya ukubombela Yehova nelyo Satana?” Ilyo apingwilepo ukuti ni Yehova alefwaya ukubombela, apepele no mukoosha ukulomba ubwafwilisho. Aibukisha ati: “Icampapwishe ca kuti, nalilekele ukupepa ukwabula no kucula sana. Ntila fye, cinshi ico nshacitile ifi bwangu?”
Na imwe bene kuti mwacimfya fimo ifimucilikila ukulunduluka. Ilyo mwayalula amatontonkanyo yenu umupwilapo, ifyo mufwaya, amashiwi yenu, ne fyo mucita ukulingana ne fipope fyaba muli Baibolo, e lyo mukayumfwa sana abacindama kabili abaicetekela. Bamunyinenwe ne nkashi shenu isha ku mupashi, e lyo na balupwa lwenu, bakayumfwa bwino no kukoseleshiwa ilyo babishanya na imwe. Icacilapo ukucindama ca kuti mukakosha bucibusa bwenu na Yehova Lesa. Alaile ati ‘akafumya ica kuipununako mu nshila ya bantu bakwe’ ilyo balebutuka ukutekwa na Satana. (Esaya 57:14) Kabili kuti mwacetekela ukuti nga mwaibikilishako ukufumya no kucimfya ifimucilikila ukulunduluka kwa ku mupashi, Yehova akamupaala icine cine.
[Icikope pe bula 28]
Yesu alaile ati nga tuli ne citetekelo, kuti twacimfya ificilikila ukulunduluka ifyaba nge mpili
[Icikope pe bula 30]
Ukubelenga Baibolo kulatukosha ilyo tulebombesha ukucimfya ifilubo fya ku mupashi