Bushe Kampingu Wenu Alisambilishiwa Bwino?

MUFWILE mwalyebapo umuntu ati, “Ifyo mwanjeba kwena fyaumfwika bwino, nomba umutima umbi ulekaana.” Uyo wine “mutima,” e kampingu, amaka yenu aya lwa nkati aya kulekanya ubusuma no bubi, ayalenga ukuti umuntu aipeele umulandu nelyo atile tali na mulandu. Kanshi, kampingu muntu wa mu kati, uo tufyalwa na o.

Nangu line abantunse balitaluka kuli Lesa, balikwata amaka ya kulekanya icalungama ku calubana. Pantu umuntu abumbilwe mu cipasho ca kwa Lesa, kanshi alikwatako amaka ya kulanga imibele ya kwa Lesa iya mano no bulungami. (Ukutendeka 1:26, 27) Pali uyu mulandu, umutumwa Paulo uwapuutilwemo no mupashi wa kwa Lesa alembele ukuti: “Lyonse ilyo abena fyalo abashakwata amafunde bacita ku cifyalilwa ifya mu mafunde, aba bantu, nangu tabakwata amafunde, baba e mafunde abene. Aba bene e balango kuti ifyaba mu mafunde fyalembwa mu mitima yabo, ilyo kampingu wabo aleshimika ubunte pamo na bo, kabili mu matontonkanyo yabo abene, balepeelwa umulandu nelyo fye ukulungamikwa.”a—Abena Roma 2:14, 15.

Aya maka ya kucita icisuma, ayo umuntu afyalwa na yo ukufuma fye ku muntu wa kubalilapo Adamu, yaba nge “funde,” nelyo ica kulanga umuntu ifya kucita, kabili abantu bonse pano calo balikwata aya maka. Aya maka yalalenga tuleiceeceeta no kuishiba fwe bene nampo nga tulecita icisuma atemwa tulelufyanya. (Abena Roma 9:1) Adamu na Efa balishibe ukuti nabalufyanya lilya line fye bapulile mwi funde lya kwa Lesa, kabili balifiseme. (Ukutendeka 3:7, 8) Na cimbi icilanga ifyo kampingu abomba ni cilya cacitile Imfumu Davidi ilyo yailwike ukuti naibembukila Yehova pa kupenda abantu. Baibolo itila, “umutima wa kwa Davidi walikuntile.”—2 Samwele 24:1-10.

Ukutontonkanyapo no kwishiba ukuti ico umuntu acitile nacilubana, kuti kwalenga acita icisuma, e kutila kuti calenga alapila no mutima onse kuli Lesa. Davidi alembele ukuti: “Ilyo natalele, yalifumwike amafupa yandi mu kukuuta kwandi akasuba konse; Namulengele ukwishibo lubembu lwandi, na mampuulu yandi nshafimbilepo; natile, Ndetumbulo bupulumushi bwandi kuli Yehova, e lyo imwe mwalekelele amampuulu ya lubembu lwandi.” (Amalumbo 32:3, 5) E ico kanshi, kampingu uubomba bwino kuti alenga uubembwike abwelela kuli Lesa, kampingu kuti alenga umuntu ukwiluka ukuti alekabila ukubelelwa uluse kuli Lesa no kukonka amafunde Yakwe.—Amalumbo 51:1-4, 9, 13-15.

Na kabili, kampingu alasoka nelyo ukucinkula umuntu nga teshibe bwino bwino ifya kucita pa cintu cimo. Amaka ya kampingu yafwile e yalengele Yosefe ukwiluka ukuti cibi ukucita ubucende, kabili lubembu kuli Lesa. Ilyo inshita ya kwa Lesa iya kupeela amafunde ku bena Israele yafikile, ifunde lya kuti wilacita bucende, lyaishileba pa Mafunde Kumi ayo Lesa abapeele. (Ukutendeka 39:1-9; Ukufuma 20:14) Kanshi, kuti catuwamina sana nga ca kutila kampingu wesu asambilishiwa ukutwafwa ukucita icisuma, ukucila ukuti lyonse aletupeela fye imilandu. Bushe kampingu wenu alamwafwa ukucita icisuma?

Ifyo Twingasambilisha Kampingu Wesu Ukucite Cisuma

Nangu ca kutila tufyalwa na kampingu, icabipako ca kuti kampingu tufyalwa na o taba uwafikapo iyo. Ca cine ukuti umuntunse aali uwapwililika pa kutendeka, lelo ino nshita, “bonse balibembuka kabili balapelebela ku bukata bwa kwa Lesa.” (Abena Roma 3:23) Kampingu wesu taba uwafikapo pa mulandu wa kuti tuli babembu. E ico, alatusuminisha ukucita ne fyo Lesa ashafwaile pa kutendeka ukuti e fyo kampingu afwile ukutusuminisha ukucita. (Abena Roma 7:18-23) Na kabili, kwaliba na fimbi ifingonaula kampingu wesu. Ifyo twakulile nelyo intambi sha ku mwesu, ifyo tusambilila uko tupepa ne ficitika sana uko twikala, fyonse ifi kuti fyalenga kampingu wesu ukonaika. Ukwabula no kutwishika, kampingu wesu nga alesuminisha imisango yabipa iya muli cino calo, ninshi tali uwafikapo iyo.

Kanshi, Umwina Kristu, afwile ayafwiwa ne cintu cimo ica maka sana, icilanga umuntu bwino bwino ifya kucita icalungana, e kutila Icebo ca kwa Lesa, Baibolo. Baibolo kuti yasambilisha bwino kampingu wesu pa kuti alepingula bwino ifintu no kucita ifilungeme. (2 Timote 3:16) Ilyo kampingu wesu asambilishiwa bwino ukulingana na mafunde ya kwa Lesa, kuti aba uwafikapo ukutusoka ku fyabipa, kuti aletwafwa ‘ukulekanya icalungama ne cabipa.’ (AbaHebere 5:14) Kampingu wesu nga tasambilishiwe amafunde ya kwa Lesa, te kuti atusoke nangu natupaasuka mu nshila isuma. Baibolo itila: “Kuli inshila iyawama ku cinso ca muntu, lelo ku mpela ya iko ni nshila sha mfwa.”—Amapinda 16:25; 17:20.

Muli fimo, Icebo ca kwa Lesa calilanda bwino bwino ifyo tufwile ukucita, kabili cisuma sana ukukonka ifyo fine. Lelo, kwaliba ifintu fimo ifyo Baibolo tayatweba mu kulungatika ukuti tufwile ukucite fi. Ifili nga incito twingabomba, imiti twingabomfya, ifyangalo, ifya kufwala no kuipempenkanya, ne milandu imbi. Calyafya ukwishiba bwino bwino ica kucita muli ifi fintu. Kanshi tufwile ukuba no mutima wapala uwa kwa Davidi uwapepele ukuti: “Inshila shenu munenge ukushishiba, mwe Yehova; no mwa kuya mwenu munsambilishe. Munyenseshe mu cishinka cenu, no kunsambilisha; pantu ni mwe Lesa ipusukilo lyandi.” (Amalumbo 25:4, 5) Nga twaumfwikisha imibele ya kwa Lesa ne fyo amona ifintu, ninshi twakulatontonkanyapo bwino pa co tulefwaya ukucita, na lintu twapingula fimo, tatwakashale tulecula na kampingu.

Kanshi nga tatwishibe bwino bwino ifya kucita pa cintu cimo, tufwile intanshi twatontonkanya pa fishinte fya mafunde ya mu Baibolo ifikumine uyo mulandu. Limbi uyo mulandu kuti wakuma kuli ifi: ukucindika bumutwe (Abena Kolose 3:18, 20); ukuba abafumacumi muli fyonse (AbaHebere 13:18); ukupata ububi (Amalumbo 97:10); ukukonkelela umutende (Abena Roma 14:19); ukucindika bakateka (Mateo 22:21; Abena Roma 13:1-7); ukupepa fye Lesa epela (Mateo 4:10); ukukanaipoosa mu fya pano calo (Yohane 17:14); ukutaluka ku kwampana na bantu babipa (1 Abena Korinti 15:33); ukulinga pa kusala ifya kufwala ne fyo tuipempenkanya (1 Timote 2:9, 10); nelyo ukukanapunwisha bambi (Abena Filipi 1:10). Ukwishiba icishinte ce funde lya mu Baibolo icikumine uyo mulandu kuti kwalenga kampingu wesu ukubomba bwino no kutwafwa ukucita icisuma.

Umfwileni Kampingu Wenu

Pa kuti kampingu wesu aletwafwa, tufwile ukumumfwila. Kampingu wesu uwasambilishiwa na Baibolo akatwafwa fye ukucita icisuma nga tuleumfwila ifyo aletweba. Kuti twapashanya kampingu kuli filya umuntu omfwa umubili ububi. Pa kutendeka fye, umubili kuti wakaba, atendeka no kumfwa ububi. Cinshi cingacitika nga asuula ifyo fishibilo, kabili tele ku cipatala? Kuti asuka alwalisha nelyo ukuteekwa na mu cipatala. E fyaba na kampingu wa muntu, nelyo umutima. Alatweba ukuti ico tulefwaya ukucita taciweme. Nga twatontonkanya pa co tulefwaya ukucita no kucilinganya na mafunde ya mu Baibolo ayo twaishiba, kampingu alatweba ukuti fyapusana, nga filya umuntu abalilapo ukumfwa umubili ububi ilyo talalwalisha. Ukumfwila ifyo kampingu atusoka kukatwafwa ukukanacita icabipa kabili kukatwafwa no kukanaonaula kampingu wesu.

Cinshi cingacitika nga twasuula ifyo kampingu aletusoka? Panono panono kampingu wesu kuti asuka aonaika. Lyonse fye ukusuula ifyo kampingu aletusoka no kukosapo fye ukuti ifyo tulefwaya ukucita fili bwino, kuti kwaonaula kampingu wesu. Kuti twapashanya kampingu waonaika ku cibala cishala ilyo baoca inkanda ya nama ku cela cilya batila icishutikilo. Inkanda ilya bocele, e kutila iyashutikwa ku cishutikilo, ilakosa ica kuti inama ilaleka no kumfwa ubukali pali cilya cibala. (1 Timote 4:2) Kampingu wa musango yo alaleka ukumfwa ububi nangu umuntu acite ulubembu, kabili alaleka no kusoka umuntu ukuti tafwile ukubwekeshapo ulubembu. Kampingu uo twingatila uwashutikwa alasuula amafunde ya mu Baibolo ayatweba icalungama ne calubana, kanshi uyo kampingu ninshi naonaika. Ninshi umuntu akowela, ‘akunkuma icine cine,’ kabili apaatuka na kuli Lesa. (Abena Efese 4:17-19; Tito 1:15) Kanshi nga tulesuula kampingu, kuti twailetelela icine cine!

“Kwateni Kampingu Musuma”

Tufwile ukuibikilishako pa kuti tutwalilile na kampingu musuma. Umutumwa Paulo atile: “Ndaibikilishako lyonse ukuba uwaibukila ku kukanacita icabipa kuli Lesa na ku bantu.” (Imilimo 24:16) Mu Bwina Kristu bwakwe, Paulo aleiceeceeta lyonse no kuwamya imicitile yakwe pa kuti tacitile icabipa kuli Lesa. Alishibe ukuti pa kulekelesha ni Lesa e ukapingula imicitile ya muntu, nampo nga isuma atemwa iyo. (Abena Roma 14:10-12; 1 Abena Korinti 4:4) Paulo atile: “Ifintu fyonse fyaba ubwamba kabili fyaba pa mbilibili ku menso ya uyo tukalubululako.”—AbaHebere 4:13.

Paulo alandile no kuti talefwaya ukucita icabipa ku bantu. Cimo ico twingalandapo ni cilya afundile Abena Kristu ba ku Korinti pa mulandu wa “kulya ifyatuulilwa utulubi.” Alandile pa kutila limbi umuntu umo kuti atemwa ukucita icintu cimo icishabindwa na mu Cebo ca kwa Lesa, lelo cisuma ukulangulukilako bakampingu wa bambi. Ukufilwa ukulangulukilako bambi kuti kwaonaula bukapepa bwa ‘bamunyinefwe abo Kristu afwilile.’ Kuti kwaonaula na bucibusa bwesu bwine na Lesa.—1 Abena Korinti 8:4, 11-13; 10:23, 24.

E ico kanshi, twalilileni ukusambilisha kampingu wenu no kumusunga uwasanguluka. Ilyo mulepingula ifya kucita pa cintu cimo, pepeni kuli Lesa ukuti amwafwe. (Yakobo 1:5) Belengeni Icebo ca kwa Lesa no kutontonkanya sana pa fishinte fya mafunde yabamo, kabili citeni ifyo mwasanga ukuti e fyo Lesa alandapo. (Amapinda 2:3-5) Nga kuli umulandu uukalamba uwa kuti tamwishibe bwino bwino ifya kucita, ipusheniko Abena Kristu bakosoka. Bepusheni ukuti bamwafweko ukumona nga ca cine namutontonkanya bwino bwino pa fishinte fya mafunde ya mu Baibolo ifikumine uyo mulandu. (Amapinda 12:15; Abena Roma 14:1; Abena Galatia 6:5) Tontonkanyenipo no kumona nga ca kutila ilyo mukacita ico cintu tamwakashale mulecula na kampingu. Na kabili, tontonkanyeni na pa fyo cikakuma bambi, ne cacindamisha, tontonkanyeni pa fyo cikakuma bucibusa bwenu na Yehova.—1 Timote 1:5, 18, 19.

Kampingu, bupe ubusuma nga nshi ukufuma kuli Shifwe wa ku muulu uwatutemwa, Yehova Lesa. Nga twabomfya ubu bupe ukulingana ne fyo Lesa afwaya, tukapalama sana kuli Kabumba wesu. Ilyo tuleibikilishako ‘ukukwata kampingu musuma’ muli fyonse ifyo tucita, tuli no kulanga sana ukuti ca cine twabumbilwe mu cipasho ca kwa Lesa.—1 Petro 3:16; Abena Kolose 3:10.

[Futunoti]

[Ifikope pe bula 13]

Bushe kampingu wenu asambilishiwa ukumwafwa ukucita icisuma, ukucila ukuti lyonse alemupeela fye imilandu?

[Icikope pe bula 14]

Nga twaumfwikisha ifishinte fya mu Baibolo no kufikonka, kampingu wesu akasambilishiwa bwino

[Ifikope pe bula 15]

Mwisuula ifyo kampingu wenu alemusoka