“Mulelola”—Inshita ya Bupingushi Naifika!
Ifyebo fili muli cino cipande fifumine muli broshuwa atila Mulelola! uwafumine pa kulongana kwa citungu ukwaliko mwi sonde lyonse mu 2004 ukufika mu 2005.
“Mulelola, pantu tamwaishiba ubushiku ubo Shikulwinwe akesa.”—MATEO 24:42.
1, 2. Bushe Yesu apashenye ukwisa kwakwe kuli cinshi?
KUTI mwacita shani nga mwaishiba ukuti ku ncende mwikalila nakwisa umupuupu uuleingilila abantu mu mayanda? Pa kuti mucingilile ifipe fyenu na ba mu ng’anda yenu, kuti mwaipekanya, kuti mwaba abalola. Pantu namwishiba ukuti umupuupu takamutumine kalata wa kumwishibisha ubushiku akamwingilila. Lelo akesa mu bumfisolo, lilya line mushile-enekela.
2 Imiku iingi mu filangililo fyakwe, Yesu alilandilepo pa fyo umupuupu acita. (Luka 10:30; Yohane 10:10) Ilyo alelanda pa fikacitika mu nshiku sha ku mpela ishili no kulanga abantu ukuti nomba line alapingula abantu, Yesu asokele ukuti: “E ico mulelola, pantu tamwaishiba ubushiku ubo Shikulwinwe akesa. Lelo ishibeni ici, ukuti, mwine ng’anda eshiba ubulinde umupuupu aleishilamo, nga ali uwalola kabili nga talekele ing’anda yakwe ukwingililwa.” (Mateo 24:42, 43) E ico Yesu apashenye ukwisa kwakwe kuli filya umupuupu esa, ukwabula ukwenekela.
3, 4. (a) Bushe uumfwila ukusoka kwa kwa Yesu ukwa kuti aleisa afwile ukucita cinshi? (b) Mepusho nshi twingepusha?
3 Filya Yesu apashenye ukwisa kwakwe ku mupuupu calilingile sana, pantu takwaba nangu umo uwaishiba ubushiku Yesu akesa. Muli uku kwine kusesema, ukwalelanda pa nshiku sha ku mpela, Yesu alilandilepo kale ukuti: “Ulwa bushiku bulya ne nshita takuli uwaishiba, nangu ni bamalaika ba mu muulu nangu Mwana, kano fye Tata.” (Mateo 24:36) E ico kanshi, Yesu akonkomeshe abo alesambilisha ukuti: “Mube abaiteyanya.” (Mateo 24:44) Abomfwila ukusoka kwa kwa Yesu bafwile ukuiteyanya, ubushiku ubuli bonse ubo Yesu akesa ku kubomba umulimo Yehova amupeela uwa kupingula abantu, afwile ukubasanga ne mibele isuma.
4 Kuli amepusho yacindama ayo twingepusha: Bushe Yesu alesoka fye aba pano calo abashipepa, nelyo bushe na Abena Kristu ba cine na bo bene alibasokele ukuti bafwile ‘ukulola’? Mulandu nshi cipamfiishe ukuti ‘tulelola’ shino nshiku, kabili kuti twacita shani pa kuti tulelola?
Bushe Alesoka Bani?
5. Twaishiba shani ukuti Yesu alesoka Abena Kristu ba cine ilyo atile, “mulelola”?
5 Ca cine ukuti ku ba pano calo abashipepa, ubushiku bwa kwa Shikulu bukesa ngo mupuupu, pantu tababikako amano ilyo balesokwa ukuti ubushiku bwa boni nabupalama. (2 Petro 3:3-7) Nomba, nga ku Bena Kristu ba cine cikaba shani? Umutumwa Paulo alembele ku basumina banankwe ukuti: “Mwe bene mwalishiba bwino ukuti ubushiku bwa kwa Yehova bukesa ngo mupuupu ubushiku.” (1 Abena Tesalonika 5:2) Tatutwishika nangu panono ukuti “ubushiku bwa kwa Yehova bukesa.” Lelo bushe ico calola mu kuti ninshi tatufwile ukulola? Moneni ukuti ni ku basambi bakwe Yesu alandile amashiwi ya kuti: “Pa nshita mushenekele, e po Umwana wa muntu akesa.” (Mateo 24:44) Kale, ilyo talalanda aya mashiwi, lilya alesambilisha abasambi bakwe ukulafwaya Ubufumu, Yesu abasokele ukuti: “Mube abaiteyanya, pantu pa nshita mushileenekela, e po Umwana wa muntu akeshila.” (Luka 12:31, 40) Kanshi, cailanga fye apabuuta tuutu ukuti ilyo Yesu alandile amashiwi ya kusoka aya kuti, “mulelola,” alelanda ku basambi bakwe.
6. Cinshi tufwile ukubela ‘abalola’?
6 Mulandu nshi tufwile ukubela ‘abalola’ kabili “abaiteyanya”? Yesu atile: “Abaume babili bakaba mwi bala: umo akasendwa e lyo umbi akashiwa; pa banakashi babili abalepela ku mpelo: umo akasendwa e lyo umbi akashiwa.” (Mateo 24:40, 41) Abakasangwa balelola, ‘bakasendwa,’ nelyo ukupusushiwa, ilyo aba mu calo abashipepa bakonaulwa. Bambi bena, ‘bakashiwa,’ e kutila bakonaulwa pa mulandu wa kuti bena babikile amano ku fyo abene balefwaya mu mikalile yabo. Pali abo, kuti paba na bamo abali kale bakapepa lelo abashakatwalilile ukulalola.
7. Bushe ukukanaishiba ubushiku impela ikesa kulenga ukuti tucite cinshi?
7 Ukukanaishiba ubushiku ilyo buno bwikashi bukonaulwa kulalenga twaishibikwa ukuti icilenga tulebombela Lesa mulandu wa kuti twalimutemwa. Cinshi twalandile fyo? Mulandu wa kuti ifwe kuti twamona kwati impela yakokola sana ukwisa. Ca bulanda ukuti Abena Kristu bamo abali abacincila kale kabili abalemona kwati impela ifwile ukwisa bwangu bwangu, balileka ukubombela Yehova. Nalyo line, twaipeela kuli Yehova umupwilapo, twali-ipeela ukuti tukalamubombela. Abaishiba Yehova balishiba ukuti nga twafundumana ukubombela Yehova ilyo twamona ukuti inshita naipwa, te kuti tumutemune nangu panono. Ena amona mu mutima.—1 Samwele 16:7.
8. Bushe ukutemwa Yehova kutulenga shani ukutwalilila abalola?
8 Pa mulandu wa kuti twalitemwa Yehova icine cine, tulabekelwa nga nshi mu kucita ukufwaya kwakwe. (Amalumbo 40:8; Mateo 26:39) Na kabili, tufwaya ukubombela Yehova umuyayaya. Ukulolela ukucila ifyo twale-enekela takulenga twamona kwati isubilo lyesu ilyaumo mutengo ilya kubombela Yehova umuyayaya ninshi talyacindama sana. Ne cacindama sana, tulatwalilila ukulola pantu twalishiba ukuti ukufikilishiwa kwa kufwaya kwa kwa Yehova konse ilyo ubushiku bwakwe bukafika, kwalicindama nga nshi. Ubufumacumi bwesu ubwa kufwaya ukuteemuna Lesa butulenga ukumfwila ukufunda kwa mu Cebo cakwe no kucindamika nga nshi ifya Bufumu mu mikalile yesu. (Mateo 6:33; 1 Yohane 5:3) Lekeni tulande pa fyo ukuba abalola kufwile ukutulenga ukumona imicitile yesu iya fintu cila bushiku.
Bushe Imikalile Yenu Ilemutwala kwi?
9. Mulandu nshi cipamfiishe ukuti abantu pano calo beshibe umulolele ifilecitika shino nshiku?
9 Abengi shino nshiku balemona ukuti kuli ubwafya bwalekanalekana pano calo kabili ifintu fya kutiinya filecitika fye cila bushiku. Na bo bene limo balamona ukuti imikalile yabo taili bwino. Lelo bushe, balishiba bwino bwino umwalola ifi fyonse ifilecitika mu calo? Bushe baliluka ukuti tuli ku “mpela ya bwikashi?” (Mateo 24:3) Bushe balishiba ukuti ukufula kwa bukaitemwe, ulukaakala no kukanapepa, cishibilo ca kuti tuli mu “nshiku sha kulekelesha”? (2 Timote 3:1-5) Ili line, bafwile ukwishiba umulolele ifi fyonse no kutontonkanyapo bwino pa fyo bafwile ukucita mu mikalile yabo.
10. Cinshi tufwile ukucita pa kushininkisha ukuti tulelola?
10 Nga ifwe imikalile yesu yaba shani? Cila bushiku kulacitika ifyo tufwile ukutontonkanyapo pa kuti twishibe ifya kucita, fimo fikuma incito tubomba, fimbi na fyo fikuma ubutuntulu bwesu ubwa bumi, abena mwesu na bana, nelyo ukupepa kwesu. Twalishiba ifyo Baibolo ilanda kabili tufwaisha ukukonka ifyo fine. E ico, tufwile ukuipusha atuti: ‘Bushe amasakamika ya buno bwikashi yalilenga ukupepa kwandi ukubwelela pa nshi? Bushe nintendeka ukukonkelesha icalo na mano ya ciko mu micitile yandi iya fintu?’ (Luka 21:34-36; Abena Kolose 2:8) Tufwile ukulanga ukuti twalitetekela Yehova umutima wesu onse kabili tatushintilila pa mano yesu fwe bene. (Amapinda 3:5) Nga twacite fyo, ninshi ‘tukekatisha ubumi bwine bwine,’ ubumi bwa muyayaya mu calo cipya ica kwa Lesa.—1 Timote 6:12, 19.
11-13. Finshi twingasambililako ku fyacitike (a) mu nshiku sha kwa Noa? (b) mu nshiku sha kwa Lote?
11 Muli Baibolo mwaba ifingi ifyacitike kale ifya kutusoka ukuti na ifwe tutwalilile ukulalola. Tontonkanyeni pa fyo cali mu nshiku sha kwa Noa. Lesa aebele Noa ukusoka abantu ninshi kucili inshita sana. Lelo abantu bonse tababikileko na mano, ni Noa fye na ba mu ng’anda yakwe epela, e babikile amano ku fyo basokelwe. (2 Petro 2:5) Pali uyu mulandu, Yesu atile: “Filya fine inshiku sha kwa Noa shali, e fyo no kubapo kwa Mwana wa muntu kukaba. Pantu filya bali mu nshiku shilya ilyo ilyeshi lishilaisa, balelya no kunwa, baleupa no kuupwa, mpaka no bushiku ubo Noa aingile mu cibwato; kabili tabaishibe nakalya mpaka ilyeshi lyaishile no kubasenda bonse, e fyo no kubapo kwa Mwana wa muntu kukaba.” (Mateo 24:37-39) Cinshi twingasambililako kuli balya bantu? Takuli nangu umo pali ifwe uufwile ukusuminisha ifya pano calo ukumupumbula ku kupepa. Nangu fye fintu ifyo abantu bonse bafwile ukucita mu mikalile, tafifwile ukulenga twafilwa ukucindamika sana ifya ku mupashi, ifyo Lesa atweba ukuti e fyo tufwile ukucindamika. Nga tulepumbulwa kuli ifi, ninshi tufwile ukutontonkanyapo sana pa fyo tulecita mu mikalile yesu.—Abena Roma 14:17.
12 Tontonkanyeni na pa mibele ya bantu mu nshiku sha kwa Lote. Umusumba wa Sodomu, umwaleikala Lote na ba mu ng’anda yakwe, wali musumba wa cuma, lelo abantu bali fye cimbi cimbi. Yehova atumine bamalaika ku konaula ulya musumba. Bacincishe Lote na ba mu ng’anda yakwe ukufulumuka mu Sodomu no kukanalolesha ku numa. Ilyo bamalaika babacincishe ukuti bafume mu musumba, Lote no lupwa lwakwe balifuminemo. Lelo muka Lote ena, cimoneka kwati atwalilile ukulanguluka ifyashele mu ng’anda yakwe ku Sodomu. Taumfwilile ifyalandile bamalaika, aloleshe ku numa, kabili alifwililepo pa co acitile. (Ukutendeka 19:15-26) Ilyo alelanda pa fyali no kucitika ku ntanshi, Yesu atusokele ukuti: “Ibukisheni muka Lote.” Bushe tulebukisha icacitikile muka Lote?—Luka 17:32.
13 Abaumfwile ilyo Lesa abasokele, balipuswike. Noa na ba mu ng’anda yakwe, na Lote na bana bakwe abanakashi, balipuswike. (2 Petro 2:9) Ilyo tuletontonkanya pa fyacitike kuli balya bantu, cilatusansamusha sana ukwishiba ukuti abatemwa ubulungami balipusushiwe shilya nshiku. Ico cilalenga na ifwe twaba ne subilo lya cine cine ilya kuti kanshi tukapusuka no kumonako ukufikilishiwa kwa bulayo bwa kwa Lesa ubwa kuleta ‘imyulu ipya ne sonde lipya, umukekala ubulungami.’—2 Petro 3:13.
‘Inshita ya Bupingushi Naifika’!
14, 15. (a) Finshi ficitika mu ‘nshita’ ya bupingushi? (b) Bushe ‘ukutiina Lesa no kumucindika,’ kucita cinshi?
14 Ilyo tuletwalilila abalola, finshi tule-enekela ku ntanshi? Ibuuku lya Ukusokolola lyalitantika ifintu fimo ifikakonkana ukucitika ilyo ukufwaya kwa kwa Lesa kukafikilishiwa. Ukumfwila ukusoka kwa muli ili buuku kwalicindama sana pa kuti tutwalilile abaiteyanya. Muli ili buuku, mwaba ifimonwa ifilanga bwino sana ifikacitika “mu bushiku bwa kwa Shikulu,” kabili bulya bushiku bwatendeke ilyo Kristu atekelwe pa cipuna ca bufumu ica ku muulu mu 1914. (Ukusokolola 1:10) Ibuuku lya Ukusokolola litweba na pali malaika ‘uwakwete imbila nsuma ya muyayaya iya kubila ku baikala pe sonde.’ Asosele ne shiwi likalamba ati: “Tiineni Lesa no kumucindika, pantu yaisa inshita ya bupingushi bwakwe.” (Ukusokolola 14:6, 7) Iyo ‘nshita’ ya bupingushi, ni nshita iinono fye; mwaba ukubila ubupingushi bwa kwa Lesa, e lyo no kwisa kwa bushiku bwine ubwa kupingula abantu ukwalandwapo muli kulya kusesema. Iyo nshita, e ino ine tulimo.
15 Nomba, pali ino nshita, ilyo inshita ya bupingushi tailapwa, Baibolo yatukonkomesha aiti: “Tiineni Lesa no kumucindika.” Bushe ico calola mwi? Akatiina ka kuli Lesa kafwile ukutulenga ukutaluka ku bubi. (Amapinda 8:13) Nga tulacindika Lesa, mucinshi mucinshi, tukomfwila ifyo atweba. Tatwakabe abapamfiwa sana ne milimo imbi ica kuti twafilwa ukubelenga Icebo cakwe Baibolo lyonse. Tatwakamone kwati ifunde lyakwe ilya kuti tulesangwa ku kulongana kwa Bwina Kristu talyacindama sana. (AbaHebere 10:24, 25) Tukamona ukuti umulimo twapeelwa uwa kubila imbila nsuma ya Bufumu bwa kwa Lesa ubukatekwa na Mesia, walicindama nga nshi kabili tukaibikilishako ukubomba uyu mulimo. Lyonse fye tukacetekela Yehova no mutima onse. (Amalumbo 62:8) Apo twalishiba ukuti Yehova e Mulopwe, tulamucindika pa kumunakila nga Kateka mu mikalile yesu. Bushe muli ifi fyonse mulatiina Lesa no kumucindika?
16. Cinshi twingasosela ukuti ukusesema kwaba pa Ukusokolola 14:8 ukwa kupingula Babiloni Mukalamba, kwalifikilishiwa kale?
16 Ukusokolola icipandwa 14 kutulondolwela na fimbi ifikacitika mu nshita ya bupingushi. Babiloni Mukalamba e walumbulwa intanshi. Babiloni Mukalamba, e kupepa kwa bufi konse ukwabako mwi sonde lyonse. Baibolo itila: “Na malaika umbi, uwalenga babili, akonkelepo, ati: ‘Nawa! Babiloni Mukalamba nawa!’” (Ukusokolola 14:8) Ifyo fine e fyo caba, mu kumona kwa kwa Lesa, Babiloni Mukalamba aliwa kale. Mu 1919 ababomfi ba kwa Yehova abasubwa no mupashi balilubwike ku busha bwa masambilisho ne ntambi ifya muli Babiloni Mukalamba, ifyateka abantu abengi ubusha mu fyalo fyalekanalekana pa myake iingi. (Ukusokolola 17:1, 15) Nomba baipeeleshe ku kulundulula ukupepa kwa cine. Ukutula lilya, kwaliba ukubombesha umulimo wa kushimikila abantu imbila nsuma ya Bufumu bwa kwa Lesa mwi sonde lyonse.—Mateo 24:14.
17. Cinshi tufwile ukucita pa kuti tutile twalifuma muli Babiloni Mukalamba?
17 Kwaliba na fimbi mu bupingushi bwa kwa Lesa pali Babiloni Mukalamba. Nomba line, akonaulwa umupwilapo. (Ukusokolola 18:21) E mulandu wine kanshi Baibolo isokela abantu konse konse ukuti: “Fumenimo muli [Babiloni Mukalamba], . . . nga tamulefwaya ukukumako ku membu shakwe.” (Ukusokola 18:4, 5) Kuti twafumamo shani muli Babiloni Mukalamba? Ca cine ukuti tufwile ukufuma mu kupepa kwa bufi, lelo kuli na fimbi ifyo tufwile ukucita. Mu kusefya ukwingi ukwalumbuka mu calo na mu ntambi ishingi, mwaliba imisango yafuma ku Babele. Na kabili, filya abantu shino nshiku bamona kwati ubulalelale tabwabipa, na filya batamba amafilimu yalanga ifya fibanda, ukubikapo ne misango imbi iyashala, fyonse ifi fyafuma ku Babele wa pa kale. Pa kutwalilila abalola, calicindama ukuti mu fyo tucita na mu fyo umutima wesu ufwaya, tufwile ukulanga ukuti muli fyonse, twalifuma muli Babiloni Mukalamba.
18. Ku mulandu wa fyalondololwa pa Ukusokolola 14:9, 10, cinshi Abena Kristu abalola bashifwaya kucita nangu panono?
18 Pa Ukusokolola 14:9, 10, palanda na cimbi icikacitika mu ‘nshita ya bupingushi.’ Malaika umbi atila: “Ngo muntu apepa iciswango ne cipasho ca ciko, no kupokelela icishibilo pa mpumi yakwe nelyo pa cisansa cakwe, akanwako ne cipyu ca kwa Lesa.” Mulandu nshi? Pantu “iciswango ne cipasho ca ciko” fimininako ubuteko bwa bantunse, ubushacindika ukuteka kwa kwa Yehova. Abena Kristu abalola tabafwaya kupalana na ba mu buteko bwa bantunse nelyo ukupokelela icishibilo ca kuti baba muli ubu buteko. Balakaana mu mutima, na muli fyonse ifyo bacita. Tabacita nangu cimo icingalenga bamoneka kwati bacetekela ubuteko ubushasumina ukuti Yehova e kateka wapulamo kabili e Lesa wa cine. Abena Kristu balishiba ukuti Ubufumu bwa kwa Lesa bwalitendeka kale ukuteka ku muulu, no kuti bukafumyapo ukuteka konse ukwa bantunse, kabili bwena e bukabako umuyayaya.—Daniele 2:44.
Mwilaba Ukuti Tuli mu Nshita ya ku Mpela!
19, 20. (a) Ilyo tuleingila sana mu kati ka nshiku sha kulekelesha, cinshi Satana akafwaisha ukutucita? (b) Nga ifwe tukapampamina pa kucita cinshi?
19 Ilyo tuleya ku mpela sana iya nshiku sha kulekelesha, ubwafya bwalekanalekana ne fya kwesha fyakulaya filefula fye. Ilyo tucili mu bwikashi bwa nomba kabili tucili abashapwililika, kuti twalwala, kuti twacula pa mulandu wa kukota, kuti twafwilwa abantu besu, nelyo abanensu kuti batucita ifyo tatwale-enekela. Na kabili, kuti tuleshimikila Icebo ca kwa Lesa ku bashilefwaya no kumfwa nelyo kuti twacula kuli fimbi fye. Mwilaba ukuti Satana afwaya ukuti ubwafya bwalekanalekana, bwaba e pa kwingilila kuli ena ukuti alenge tutompoke ukubombela Yehova. Afwaya ukuti tuleke ukushimikila abantu imbila nsuma, kabili afwaya twaleka no kukonka amafunde ya kwa Lesa. (Abena Efese 6:11-13) Ino e nshita tushifwile kulaba nangu panono ukuti tuli mu nshiku sha ku mpela!
20 Yesu alishibe ukuti muli shino nshiku tukalacula ku fintu ifingi nga nshi ifingatulenga ukutompoka, e mulandu atufundile ukuti: “Mulelola, pantu tamwaishiba ubushiku ubo Shikulwinwe akesa.” (Mateo 24:42) E ico kanshi, twiesha no kulaba ukuti shino ni nshiku sha ku mpela. Natuibake sana ku micenjelo yonse iya kwa Satana iya kufwaya ukuti alenge tutendeke ukushipula nelyo ukutufumya mu cine. Natupampamine fye pa kutwalilila ukuba abacincila mu mulimo wa kushimikila abantu imbila nsuma ya Bufumu bwa kwa Lesa. Na cine, natuleibukisha lyonse ukuti tuli mu nshiku sha ku mpela no kumfwila ukusoka kwa kwa Yesu ukwa kuti: “Mulelola.” Nga twacite fyo, tukacindika Yehova kabili tukaba ne subilo lya kuipakisha amapaalo yakwe aya muyayaya.
Kuti Mwayasuka Shani?
• Twaishiba shani ukuti Yesu alesoka Abena Kristu ba cine ilyo atile “mulelola”?
• Finshi fyacitike kale ifyalembwa mu Baibolo ifitusoka ukuti tufwile ‘ukulalola’?
• Bushe ubushiku bwa bupingushi, bushiku nshi, kabili finshi twaebwa ukucita ilyo tabulapwa?
[Icikope pe bula 23]
Yesu apashenye ukwisa kwakwe kuli filya umupuupu esa
[Icikope pe bula 24]
Babiloni Mukalamba akonaulwa nomba line
[Ifikope pe bula 25]
Natupampamine pa kushimikila abantu imbila nsuma mu kucincila