Imisangulo Iiteemuna Lesa

IFINTU tafili bwino mu Yuda. Namfumu Atalia napoka ubufumu bwa mu Yuda mu bucenjeshi kabili naipaya na ba mu lupwa lwa ku bufumu bonse. Apo ena amona kwati tapali uwa mu lupwa lwa ku bufumu uushele no mweo, aibika na pa cipuna ca bufumu. Umwanakashi umbi, Yehosheba, muka shimapepo mukalamba, uwatemenwe sana Yehova na Mafunde yakwe, mu kushipa afishile Yehoashi, umwana munono uwa mu lupwa lwa ku bufumu. Yehosheba no mwina mwakwe, Shimapepo Mukalamba Yehoyada, bafishile Yehoashi mu ng’anda yabo iya pe tempele pa myaka 6. Yehoashi e wali no kuba imfumu ya Yuda ku ntanshi—2 Ishamfumu 11:1-3.

Ilyo Yehoashi aali ne myaka 7, Shimapepo Mukalamba Yehoyada ninshi naipekanya ukucitapo cimo pa kuti afumye imfumu yanakashi Atalia pa cipuna ca bufumu ico yapokele mu bucenjeshi. Asokolwele umulumendo Yehoashi umo bamufishile no kumubika pa bufumu, pantu e walingile ukubapo. Lilya line, Imfumu yanakashi iibifi Atalia baisendele mu lubansa lwe tempele ku balinshi ba ku cipango no kuipaya. Awe na bantu bonse balitemenwe no kusekelela icibi. Kuli filya bacitile, Yehoyada na Yehosheba balyafwilisheko sana ukubwesha ukupepa kwa cine mu calo ca Yuda. Nomba icacindeme sana ca kuti, balyafwilisheko ukuti ubufumu butwalilile ku ba mu lupwa lwa bufumu ulwa kwa Davidi, umwali no kufyalilwa Mesia ku ntanshi.—2 Ishamfumu 11:4-21.

Imfumu ipya iyabikilwe pa cipuna ca bufumu na yo yacitile fimo ifyacindama sana ifyateemwine Lesa. Ing’anda ya kwa Yehova yali fye cimbi cimbi kabili yalefwaikwa ukuwamya. Mu bufumu bwa kwa Atalia uwalefwaya ukuteka eka ubufumu bwa Yuda bonse, itempele lyalilekeleshiwe kabili ifipe fya mwi tempele ifingi fyalisendelwe. E ico kanshi, Yehoashi abikile amano ku kuwamya itempele no kubweseshamo ifyo abantu basendele. Ukwabula no kupoosa inshita, aebele abantu ukuti batendeke ukusangula indalama shalekabilwa pa kuti bawamye ing’anda ya kwa Yehova. Atile: “Isha silfere shonse isha mushilo ishiletwa mu ng’anda ya kwa Yehova, isha silfere ishalingilwo muntu no muntu, ne sha silfere shonse filya caima mu mutima wa muntu no muntu ukuti sha kuleta mu ng’anda ya kwa Yehova, bashimapepo baleshipoka kuli bene, umuntu onse ku o beshibene nankwe, no kukoshe ng’anda apalepuka, konse ukusangwo kulepuka.”—2 Ishamfumu 12:4, 5.

Abantu mu kuitemenwa balisangwile indalama. Nomba, bashimapepo tababikileko amano ku mulimo bapeelwe uwa kuwamya itempele. Kanshi, imfumu iine yamwene ukutila kuti cawama yabomba ulya mulimo kabili yaebele abantu ukuti imisangulo yonse ilebikwa mu cipao cimo icaibela. Imfumu yasontele Yehoyada ukusunga indalama, kabili ilyashi litila: “Yehoyada shimapepo abuulile icipao, atulile icipunda mu nkupiko ya ciko, no kuciteka lubali ku ciipailo, ulwa ku kulyo ku muntu pa kwingila mu ng’anda ya kwa Yehova; na bashimapepo abalinda pa bwingililo babikilemo isha silfere shonse ishaleletwa mu ng’anda ya kwa Yehova. Nomba, baleti bamono kuti isha silfere shafula mu cipao, e lyo kalemba wa mfumu anina na shimapepo mukalamba, no kukaka muli batumba no kupenda isha silfere ishasangilwe mu ng’anda ya kwa Yehova. Kabili bapeele isha silfere ishalingwa mu minwe ya balecito mulimo, abaleangalile ng’anda ya kwa Yehova, e bashifumishe ku kulambula bakabasa ba miti na bakakuula, abacite ng’anda ya kwa Yehova, na bakakuula ba fibumba, na bakabasa ba mabwe, kabili ku kushitamo ifimuti na mabwe ayabaswa ku kukosha apalepuke ng’anda ya kwa Yehova, kabili kuli conse ica kubombele ng’anda ku kuikosha.”—2 Ishamfumu 12:9-12.

Abantu basangwile no mutima onse ifyalefwaikwa. Bawemye ing’anda ya kwa Yehova pa kuti balemupepela mu ng’anda ya mucinshi na kabili. Kanshi, imisangulo yonse iyaletelwe yabombele umulimo uo yalingile ukubomba. Imfumu Yehoashi yalishininkishe ukuti indalama shabomfiwa bwino!

Muno nshiku, ukuteyanya kwa kwa Yehova kushininkisha ukuti indalama shonse ishisangulwa shabomfiwa bwino ukulundulula ukupepa kwa kwa Yehova. Abena Kristu ba cine na bo balasangula no mutima onse nga filya fine abena Israele basangwile. Nakalimo na imwe mwalisangwileko indalama shimo isha kulundulula umulimo wa Bufumu mu kati ka mwaka wa mulimo uwapwile. Lekeni kanshi tulande pali fimo fimo ifyo imisangulo yenu yabombele.

Ukulundulula Amasambililo ya Baibolo

Yesu Kristu atumine abakonshi bakwe ukubomba umulimo wa ‘kulenga aba nko shonse ukuba abasambi.’ (Mateo 28:19) Inte sha kwa Yehova balacita filya fine Yesu abatumine, kabili balabombesha ukushimikila abantu ifya mu Baibolo no kubasambilisha mu fyalo 235. Balalemba impapulo shilanda pa fya mu Baibolo mu ndimi 413 no kushitwala ku bantu balekanalekana.

Inshita e cacindama sana ico Umwina Kristu akabila pa kuti afwe abantu abengi ukusambilila pali Lesa na pa fyo akacitila abantu. Inte sha kwa Yehova balabomfya sana inshita yabo na maka ukwafwa abantu banabo ukusambilila ifya mu Baibolo. Na kabili, balasangwilako sana ne ndalama, kabili fyonse ifyo basangula, fyalyafwilishako ukuti ishina lya kwa Yehova lishibikwe mu calo conse, no kuti abantu mu calo conse beshibe ifyo Lesa akabacitila. Shi Yehova natwalilile ukupaala bonse abalebombesha muli uyu musango pa kuti abantu na bambi basambilile ifingi pali wena. (Amapinda 19:17) Abantu ba mitima ya musango yo, ababika amano ku bantu banabo balateemuna Yehova!—AbaHebere 13:15, 16.

UKUPULINTA

Ishi e mpapulo sha kusambililamo ne sha kupeela abantu ishapulintilwe mwi sonde lyonse:

• Ifitabo: 47,490,247

• Ututabo: 6,834,740

• Amabroshuwa: 167,854,462

• Amakalenda: 5,405,955

• Bamagazini: 1,179,266,348

• Amatrakiti: 440,995,740

• Amavidio: 3,168,611

Bapulintila ku Afrika, ku North Amerika, ku Central Amerika, ku South Amerika, ku Asia, ku Bulaya, na ku fishi fya ku Pacific, mu fyalo 19 fyonse pamo.

“Nine Katelyn May. Ndi ne myaka 8. Natuma K130,000. Ndefwaya ukuti muibomfye kuli bamashini ba kupulintila. Napwa nine nkashi munono, Katelyn.”

“Pa ng’anda pa mwesu twalikele pa nshi no kulanshanya pali bamashini ba kupulintila abo twaumfwile ukuti balishitilwe nomba line. Abana besu, uuli ne myaka 11 na umbi uuli ne myaka 9, batile balabulapo indalama pali shilya basunga pa kuti na bo basangwileko. Mukwai indalama shabo twatumina pamo ne shesu.”

AMAKUULE

Aya e makuule yamo yamo aya kulundulula umulimo wa Nte sha kwa Yehova ayaliko:

• Amayanda ya Bufumu mu fyalo ifipiina: 2,180

• Amayanda ya Kulonganinamo Ukulongana Kukalamba: 15

• Amaofesi ya Misambo: 10

Bakabomba ba kuitemenwa abaya ku fyalo fimbi: 2,342

“Uno mulungu twalonganine umuku wa kubalilapo mu Ng’anda ya Bufumu iipya kuno ku mwesu. Ala tuli ne nsansa nga nshi pa kukuula ing’anda iisuma iya kulumbanishishamo Yehova Lesa Shifwe. Tuletasha Yehova pamo na imwe pa kutusakamana pantu kuli Amayanda ya Bufumu ayengi ayakuulilwe. Ala Ing’anda yesu iya Bufumu e cikuulwa cacindama sana kuli ino ncende.”—E fyalembele aba ku Chile.

“Bamunyinefwe na bankashi baletasha sana pa fyo ukuteyanya kwa kwa Yehova kuletwafwa. Na nomba, tucili tulalanda pa fisuma ifyacitike ilyo aba bamunyina ba kutwafwa ukukuula Ing’anda ya Bufumu baishile kuno ku mwesu.”—E fyalembele aba ku Moldova.

“Nomba line, twakumenye imyaka 35 mu cupo. Twaletontonkanya pa fya bupe ifyo twingashitilana, lelo twatile natubweseshe fimo kuli Yehova na ku kuteyanya kwakwe, pantu akubulaba Yehova no kuteyanya kwakwe nga tatwaikala imyaka yonse iyi mu cupo. Tulefwaya ukuti ishi ndalama twatuma shikabombe ukukuula Ing’anda ya Bufumu iya mu calo icipiina.”

“Nomba line nalipeelwe ifipe fya bupyani, nomba ifintu ‘ifyo mfwaya,’ finono, kabili ‘ifyo nkabila,’ fyena finono sana. Kanshi ndefwaya ukuti ishi ndalama natuma shikafwilisheko ukukuula Amayanda ya Bufumu ayalekabilwa nga nshi mu fyalo ifingi.”

UKUKUMBUSUKA

Muli shino nshiku sha kulekelesha, amasanso yalacitika mu kupumikisha. Inte sha kwa Yehova abengi balapeelako imisangulo na imbi pa kuti bafwilisheko aba bwananyina ababa ku ncende ukucitike ubusanso. Muleibukisha ukutila, ukupeela imisangulo ya kukumbusuka, kwaba pa mulimo wa mwi sonde lyonse. Muli ifi fyalo e mo Inte sha kwa Yehova bayafwilishe abaponenwe na masanso:

• Afrika

• Ku Asia

• Ku ncende ya Caribbean

• Ku fishi fya Pacific

“Ine na bena mwandi tuletasha sana pa fyo mwatutumiine ifya kukumbusuka ilyo kwapitile inkuuka kuno ku mwesu. Pa mulandu wa kuti mwalitwafwile, twalibikile umutenge uupya pa ng’anda yesu. Mwandini tuletasha nga nshi pa kutwafwa bwangu bwangu.”

“Nine Connor, ndi ne myaka 11. Ilyo namwene ubusanso bwacitike ku fyalo fya ku Asia, nalefwaya ukuti njafweko abalecula. Ndesuubila iyi ndalama ikafwako bamunyinane ne nkashi.”

ABABA MU MULIMO WAIBELA UWA NSHITA YONSE

Kwaba Abena Kristu abengi ababa mu mulimo wa nshita yonse abashimikila imbila nsuma na baba pa Bethel. Bamo ababa muli uyu mulimo bafwilishiwa ne misangulo ya kuitemenwa, kabili bamo ni aba:

• Bamishonari: 2,635

• Bakangalila Benda: 5,325

• Aba pa Bethel: 20,092

“Apo ndi mwaice kabili te kuti nje mu kubombela pa Bethel pali ino nshita [e fyalembele kalume wa myaka 5], natuma uyu musangulo kuli bamunyinane abo natemwa. Nga nakula, na ine nkesa mu kubombela pa Bethel kabili ndefwaya ukwisa mu kubombesha sana.”

[Akabokoshi pe bula 28-30]

Ifyo Bamo Basangwilako

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama isho babika mu tubokoshi twa misangulo utwalembwapo ati “Imisangulo ya Mulimo wa Mwi Sonde Lyonse—Mateo 24:14.”

Cila mweshi, ifilonganino filatuma ishi ndalama ku maofesi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Bible and Tract Society of Pennsylvania, Akabokoshi 33459, Lusaka 10101. Amacheke yafwile ukulembwapo ukuti abafwile ukupoka indalama ni ba “Watch Tower.” Ifibeekobeeko nelyo ifikwatwa fimbi ifya mutengo na fyo fine kuti fyasangulwa. Kalata umwipi uulelondololo kuti ubu bupe bwa kulungatika, alingile ukutumwa pamo ne yi misangulo.

UKUPEKANYA UKUPEELA MU KUITEMENWA

Ukulunda pa kupeela indalama sha kulungatika, kwalibako inshila na shimbi isha kupeelelamo ku kwafwilisha umulimo wa Bufumu mwi sonde lyonse. Pali isho nshila paba:

Inshuwalansi: Umuntu kuti alembesha ba Watch Tower ukuti e bakapoka indalama sha cipangano ca inshuwalansi nelyo isha penshoni.

Indalama sha ku banki: Umuntu kuti alemba icipangano ca kuti indalama sha ku banki, ifipepala ifilanga ukuti umuntu alibikishako indalama ku banki nelyo indalama sha penshoni, fyaseekeshiwa kuli ba Watch Tower Society. Nangu kuti alembesha ukuti ba Watch Tower Society e bakapoka indalama ilyo umwine akafwa. Ico kuti cacitwa ukulingana na mafunde ye banki abikishako indalama.

Nsonsela: Bamo abakwata indalama ishingi mu twampani kuti batila nsosela wabo aleya ku Watch Tower ngo bupe bwa kulungatika. E lyo bambi na bo, kuti baumana akapi no kubika pamo indalama shabo no kushitwala ku banki, lyena batila nsonsela wabo aleya ku Watch Tower.

Impanga ne Fikuulwa: Impanga ne fikuulwa ifingashitishiwa kuti fyasangulwa ngo bupe bwa kulungatika nelyo, nga ni ng’anda, ukulemba fye icipangano ca kuti ba Watch Tower Society e bakaba abene ba ng’anda ilyo umwine akafwa. Ipusheni ku maofesi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo Sosaite impanga ne fikuulwa.

Ifya Cishale no Kuseekesha: Umuntu kuti alemba no kusuminishanya na ba Watch Tower Society ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli ba Watch Tower Society. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nga fintu amashiwi ya kuti “ukupekanya ukupeela mu kuitemenwa” yalangilila, uulesangula ukubomfya ishi nshila twalandapo alekabila ukupekanishisha kabela.

Nga mulefwaya ukupeela mu kuitemenwa, mulingile ukwipusha iofesi lya Nte sha kwa Yehova ukupitila mu kulemba nelyo ukutuma lamya ukubomfya akeyala kali pe samba.

Treasurer’s Office

Watch Tower Bible and Tract

Society of Pennsylvania Box 33459, Lusaka 10101

Lamya: (01) 272062

[Abatusuminishe Ukubomfya Icikope pe bula 27]

Faithful video: Stalin: U.S. Army photo