Umufyashi wa Citetekelo Alikoseleshe Sana Abana Bakwe
“Nga mwabelenga ino kalata, ninshi mwishibe ukuti ifintu tafyaendele bwino ku opareshoni kabili nshili na imwe nomba.”
AYA E mashiwi ya kubalilapo ayali muli kalata iyo Carmen umufyashi umwanakashi umwina Kristu alembele ku bana bakwe abakashana batatu, uwa myaka 25, uwa myaka 19, no wa myaka 16. Icacitike ca kuti ifintu tafyaendele bwino ku opareshoni, kabili cali ca bulanda ukuti ba Carmen balifwile.
Ala calibipile sana pantu ba Carmen bashiile abana babo abakashana batatu mu filamba. Na lyo line, ubulanda bwa aba bana ukwabula no kutwishika bwalicepeleko pa mulandu wa citetekelo cakosa ico banyinabo bakwete mu fyo Yehova alaya ku ntanshi. Banyinabo baletontonkanya sana pa fisuma ifikaba ku ntanshi kabili kuti mwamona ukutila ico twalanda ca cine nga mwaumfwa amashiwi balembele muli kalata yabo iisuma nga nshi. Moneni ifyo balembeele abana babo batatu abanakashi.
“Ica kubalilapo fye, ala bana bandi nalimutemwa no mutima wandi onse. . . . Mwandini muli bana abasuma sana, kabili ndomfwa ne cilumba pali imwe.
“Nalefwaya sana ukuba pamo na imwe ukufika na mu calo cipya ico Lesa atulaya . . . , nomba apo te fyo cili, nimulombelako kuli Lesa ukuti akamwafwe ukutwalilila aba cishinka kuli wena nge fyo mwaba iyi myaka yonse iyo nali na imwe. Mwalishipikisha amacushi ayengi pamo na ine, kabili Yehova taatulekelesha. . . . Kanshi bana bandi, mwikaleka ukucetekela amafunde ayo Lesa atupeela mu kuteyanya kwakwe, kabili mukatwalilile ukubomba na bamunyinefwe bonse mu cilonganino kumo na baeluda. Muleibikilishako sana ku mulimo wa kushimikila kabili muletemwa bamunyinefwe bonse.
“Ala tapakokole no kukokola tuli no kumonana na kabili. . . . Pali fyonse ifyo nalelufyanya, ala mwe bana ndetila munjeleleko. Ndelomba no bwelelo pali fyonse ifyalecitika ilyo nalefilwa ukumfwa ifyo mulefwaya na pa fyo limo nalefilwa ukumweba ukuti nalimutemwa sana. . . . Nalishiba ukuti imwe bonse batatu, cila muntu alikwata ifyo akabila. Yehova alishiba ifyo bonse mukabila ukucila ne fyo mwaishiba mwe bene. Akalamupeela fyonse ifyo mukabila kabili akamulambula pali fyonse ifyo mwashipikisha pa kumubombela.
“Te kwesha ukulaba ku buyo bwenu ubwa kuba no bumi mu calo cipya kabili twalilileni ukuibikilishako pa kuti mukabemo. Ala Yehova alemupaala no kumukosha ukuti mukatwalilile aba cishinka ukufika na ku mpela. . . . Mwilila bana bandi, bana bandi muli basuma. Ala nalimutemwa sana!”
Icabipa kuti cacitika inshita fye iili yonse, ku muntu fye onse. Imfumu Solomone yalembele ukuti: “Inshita ne ca mankumanya fiponena kuli bonse bene.” (Lukala Milandu 9:11) Nomba abacetekela Lesa icine cine balanda nga filya umutumwa Paulo alandile ukuti: “Ninshininkisha ukuti nangu ni mfwa nangu bumi . . . nangu ububumbo bumbi tafyakabe na maka ya kutupaatulako ku kutemwa kwa kwa Lesa ukwaba muli Kristu Yesu Shikulwifwe.”—Abena Roma 8:38, 39; AbaHebere 6:10.