Ulupungu lwa kwa Kalinda Ulwa Kusambililamo

INO magazine mulebelenga, e Ulupungu lwa kwa Kalinda ulwa kusambililamo ulwa kubalilapo. Tulefwaya ukumulondolwela fimo fimo ifya kulaba muli ino magazini.

Abo bakulalembela Ulupungu lwa kwa Kalinda ulwa kusambililamo ni Nte sha kwa Yehova na basambilila Baibolo ababikako sana amano kuli bucibusa bwabo na Yehova. Ulwa kusambililamo lwakulafuma fye umuku umo mu mweshi kabili lwakulakwata ifipande fya kusambililamo fine nelyo fisano. Inshiku twakulasambilila ifi fipande shakulaba pa nkupo ya magazini. Ulwa kusambililamo nalupusanako panono no Ulupungu lwa kwa Kalinda ulwa bantu bonse pantu lwena talwakulakwata ifikope fyalekanalekana pa nkupo. No mulandu cibelele ifi wa kuti lwena tatwakulalushalika mu mulimo wa kushimikila.

Pe bula 2 ilya ino magazini, mwakulasangapo ifyebo ifilelanda pa fyakulaba mu cipande ca kusambililamo cimo cimo nelyo mu fipande fya kusambililamo ifikonkene ifilelanda pa lyashi limo line. Pali ili bula pakulaba ne fipande fimbi ifishili fya kusambililamo. Kangalila wa Ulupungu lwa kwa Kalinda akulanonkelamo sana muli ifi fyebo pantu fyakulamwafwa ukupekanya bwino ifipande pa kuti icilonganino cikanonkelemo sana.

Mukamona ukuti ifipande fya kusambililamo tafyakulalepa nge fyo fyalelepa kale. Ici cakulalenga ukuti tulekwata inshita iikalamba iya kulanshanya pa malembo yapulilemo ilyo tulesambilila Ulupungu lwa kwa Kalinda. Kanshi tulemukoselesha sana ukulabelenga amalembo yonse fye ayashambwilwe. Muli amalembo yamo ayashambwilwe ayo batwebele ukuti “belengeni.” Aya malembo tukalayabelenga no kulandapo ilyo tulesambilila Ulupungu lwa kwa Kalinda. E lyo amalembo yambi na yo kuti twayabelenga nga kuli inshita. Mu fipande fimo, mwakulaba amalembo ayo bakulatweba ukuti “linganyeniko.” Apo ayo malembo tayakulalanda mu kulungatika pa fishinka fili mu maparagrafu, tatwakaleyabelenga ilyo tulesambilila Ulupungu lwa kwa Kalinda pa kulongana. Na lyo line, yalakwata ifyebo na fimbi ifingamwafwa ukwishiba bwino bwino ilyashi lilelandwapo, nelyo limbi kuti yakwata ifishinka ifilingeneko ne fili mu maparagrafu. Tulemukoselesha ukulayabelenga ilyo mulepekanya Ulupungu lwa kwa Kalinda. Nalimo kuti mwalanda pali aya malembo ilyo muleyasukapo.

Lipoti ya mwaka iya mulimo tayakulaba mu Ulupungu lwa kwa Kalinda. Ukutula mu 2008, lipoti ya mwaka yakulaba mu ca mu kati ica Ubutumikishi Bwesu Ubwa Bufumu na muli Yearbook. Lelo, nge fyo tulandilepo pa kutampa, mu lwa kusambililamo mwakulaba ne fipande fimbi ifishili fya kusambililamo. Nangu cingati ifingi pali ifi fipande tatwakalefisambilila pa kulongana, tulemukoselesha ukulafibelenga. Namo mwine mwaba ifyebo ifitusambilisha pali Yehova ifyo “umusha wa cishinka kabili uwashilimuka” apekanya.—Mat. 24:45-47.

Bamagazini ba Ulupungu lwa kwa Kalinda ulwa kusambililamo no lwa bantu bonse tabapusene. Bonse babili bakwata ishina limo line ilya kuti Ulupungu lwa kwa Kalinda Ulusabankanya Ubufumu bwa kwa Yehova, kabili bonse babili balikwata paragrafu pe bula 2 iilondolola umulandu aba bamagazini babalembela. Aba bamagazini babili bakulaba muli baundi volyumu imo. Na kabili ifyebo fyaba muli aba bamagazini babili fyakulaba mu cipande citila “Bushe Muleibukisha?” icakulaba mu lwa kusambililamo.

Ukutula mu 1879, Ulupungu lwa kwa Kalinda lulasabankanya icine pa Bufumu bwa kwa Lesa, ukubikako fye na mu nshita ya mafya, mu nshita ya nkondo, na mu nshita ya kupakaswa. Tulepepa ukuti Yehova atwalilile ukulapaala umulimo wesu pa kuti na lintu Ulupungu lwa kwa Kalinda lwaba mu misango ibili, luletwalilila ukusabankanya icine pa Bufumu bwa kwa Lesa. Tulepepa no kuti Yehova alepaala na imwe bene mwe balebelenga no kubomfya bwino Ulupungu lwa kwa Kalinda ulwa kusambililamo.