Kuti Mwaba ne Nsansa Nangu Ifintu Fyamubipila

NANI ifintu fishabipilapo? Nangu fye ni Yehova Lesa, Shifwe wa ku muulu, na o wine kwaliba ifintu fimo ifyalengele aumfwa ububi inshita imo. Mumone cimo icacitike. Alilubwile abena Israele ukufuma mu busha mu Egupti no kubapaala nga nshi. Lelo Baibolo itila: “Babwekeshepo kabili ukwesha Lesa, Uwa mushilo wa kwa Israele balimushikitishe.” (Amalumbo 78:41) Na lyo line, Yehova na nomba ni “Lesa wa nsansa.”—1 Timote 1:11.

Kwena fingi ficitika ifilenga fwe bantu ukumfwa ububi. Lelo cinshi cingatwafwa ukuba ne nsansa nangu ca kutila kwacitika ifyalenga twaumfwa ububi? Cinshi twingasambilila ku fyo Yehova Lesa acitile ilyo kwacitike ifyalengele aumfwa ububi?

Ifilenga fwe Bantu Ukumfwa Ububi

Icebo ca kwa Lesa citila: “Inshita ne ca mankumanya” filatuponena bonse. (Lukala Milandu 9:11) Mu kupumikisha fye, ifipondo, ubusanso, nangu ukulwala kuti fyalenga ifintu ukutubipila sana. Baibolo isosa no kuti: “Icacetekelwa icashimba cilwaliko mutima.” (Amapinda 13:12) Nga tuleenekela cimo icisuma, tulomfwa bwino sana, nomba nga cakokola, tulomfwa ububi. Umfweni ifyo cali kuli ba Duncan.a Aba ba Duncan balitemenwe sana umulimo wa bumishonari, nomba lintu babombele imyaka iingi, kwali ifyacitike ifyalengele ukuti bena na bena mwabo baleke bumishonari no kubwelela ku calo ku mwabo. Ba Duncan batile: “Uyu e muku wa kubalilapo naumfwilepo kwati tapali icacindama ico nkacita. Namwene ukutila fyonse e po fyapwila. Takwali na cimbi icacindeme kuli ine.” Limo palakokola pa kuti umuntu aleke ukumfwa ububi icabipa nga cacitika. E fyo cali kuli ba Claire, abatile: “Ifumo lyandi lyaonaike ninshi lili imyeshi 7. Napakokola apo cacitikile, lelo na nomba nga namona kalume alelanda ilyashi pa cisebele, ntontonkanya ati, ‘Umwana wandi na o nga e po apelele palya.’”

E fyo cikalipa na lintu umuntu acita ifyo tushileenekela, pamo nga ukupwisha bunkobekela nelyo icupo, nangu umwana apondoka, nelyo umunensu tali na cishinka nangu limbi tatasha. Apo twaba na bantu bashapwililika kabili tuli mu nshita yayafya, fingi fingacitika ifingalenga twaumfwa ububi.

Ukufilwa ukucita ifintu fimo na ko kulalenga twaumfwa ububi. Kuti twamona kwati tatwacindama nga twapona amashindano, twafilwa ukusange ncito, nelyo umuntu tutemenwe sana tatubikileko mano. Na kabili, kuti twaumfwa ububi nga ca kutila uo twatemwa aleka ukupepa Yehova. Ba Mary batile: “Umwana wandi umukashana alemoneka kwati akaba Umwina Kristu wakosa. Nalemona ati apo ndacita ifisuma, akalampashanya. Lelo ilyo alekele ukupepa Yehova Lesa, aleka no kukonka ifyo twalemufunda, namwene kwati nshamufundile bwino. Nangu ca kutila kwaliba ifingi ifyo nacita ifyaenda fye bwino, nalemona kwati tapali icisuma ico nacita pa calo. Nali no bulanda.”

Kuti twashipikisha shani nga ca kuti ifya musango yu fyacitika? Pa kuti twasuke ici cipusho, natulande pa fyo Yehova acitile ilyo kwacitike ifyalengele aumfwa ububi.

Bikeni Amano ku Fingamuletela Insansa

Yehova Lesa wa citemwiko apeele Adamu na Efa fyonse ifyo balekabila, na lyo line, balimupondokele. (Ukutendeka, ifipandwa 2 na 3) Umwana wabo Kaini na o aishileba no mutima wabipa. Taumfwile ifyo Yehova amusokele kabili aipeye munyina. (Ukutendeka 4:1-8) Kuti mwatila Yehova aumfwile shani ilyo ifi fyonse fyacitike?

Cinshi calengele Lesa atwalilile uwa nsansa ilyo ifi fyacitike? Pantu alitwalilile ukucita ifingalenga ukufwaya kwakwe kukafikilishiwe ukwa kuti abantu bapwililika bakekale pano calo ponse. (Yohane 5:17) Pa kuti ifyo afwaya fikacitike, atumine umwana uwa kwisalubula abantu kabili alibikileko no Bufumu. (Mateo 6:9, 10; Abena Roma 5:18, 19) Yehova Lesa abikile amano ku fingamuletela insansa, taikalile fye ukumfwa ububi pa fyacitike.

Icebo ca kwa Lesa citukoselesha ukulatontonkanya sana pa fingatuletela insansa, te kulatontonkanya fye pa fyo twalefwaya ifishacitike. Na kuba citila: “Ica kulekelesha, mwe bamunyinane, tontonkanyeni fyonse ifya cine, fyonse ifya mushiye, fyonse ifyalungama, fyonse ifya musangwela, fyonse ifyatemwikwa, fyonse ifyawama, conse ica busuma icabako na conse ica kutasha icabako, twalilileni ukutontonkanya pali fi fintu.”—Abena Filipi 4:8.

Ifyo Tufwile Ukucita nga Fimo Fyatubipila

Kuti kwaba ifingatucitikila ifingaalula imikalile yesu. Nalimo incito kuti yapwa ukwabula ukwenekela, umwina mwesu kuti afwa mu kupumikisha, nelyo kuti twaleka ukubomba imilimo imo mu cilonganino. Limbi kuti twatendeka ukulwalilila, ing’anda kuti yaonaika, nelyo kuti twaleka ukumfwana na cibusa wesu. Kuti twacita shani ilyo ifya musango yu fyacitika?

Bamo batila cilaafwa ukwishiba ifyacindama sana ifyo balingile ukulacita. Ba Duncan, balya tulandilepo kale batile: “Ilyo ine na bena mwandi twaishibe ukuti twalaleka bumishonari, ala tacaweme. Lelo mu kuya kwa nshita, twasalilepo ifintu fibili ifyacindeme sana ifyo twali no kulacita, ukusunga bamayo no kulabomba umulimo wa nshita yonse uwa kushimikila abantu, kamo fye nga cayafya sana. Nga pali fimbi ifyo tulefwaya ukucita, tulabala twamona nga te kuti fipumfyanye iyi milimo yesu iyacindama. Kanshi tacafya sana ukwishiba ifyo twalacita.”

Ifintu fimo nga tafyendele bwino, fwe bengi tulacilamo ukumfwa ububi. Limo tumona kwati tapali ifyo twacita nga ca kutila umwana twafunda bwino apondoka, nangu bamo bakaana ukutwingisha incito pantu amasambililo yesu tayafikile apo balefwaya, nelyo nga ca kuti ku calo twaya mu kushimikila, abantu tabalesumina Icebo ca kwa Lesa. Nalyo line, nga filya ukulufyanya kwa bantu pa kutendeka kushalangile ukuti Lesa alifililwe ifyo alefwaya ukucita, ifyo tulefwaya ukucita nga tafyendele bwino pa kubala, te kutila ninshi calaala capwa tapali ifyo twingacita pa calo.—Amalango 32:4, 5.

Umuntu twatemwa nga acita icishiweme, ilingi line fwe bantu tulafulwa sana, lelo Yehova ena tacite fyo. Ilyo Imfumu Davidi yacitile ubucende na Batisheba e lyo no kwipaisha Uria muka Bati-sheba, Yehova taumfwile bwino, lelo alimwene ukuti Davidi alilapiile no mutima onse kabili amusuminishe ukutwalilila ukumubombela. Imfumu Yehoshafati iyali ne cishinka kuli Yehova yalilufyenye pa kuumana akapi na balwani ba kwa Lesa. Kasesema wa kwa Yehova aebele iyi mfumu ati: “Ni muli ici ubukali bwaishila pali iwe ukufuma kuli Yehova. Lelo ifintu fisuma fyasangwa muli iwe.” (2 Imilandu 19:2, 3) Yehova alimwene ukuti filya Yehoshafati alufyenye fye umuku umo te kutila ninshi calaala capwa apondoka. Na ifwe bene kuti twatwalilila ukulaumfwana na cibusa wesu nga tatuletila mubi sana umutima pantu fye atulufyanya. Limbi kuti uutulufyenye alikwata imibele imbi iisuma.—Abena Kolose 3:13.

Tufwile ukwishiba ukuti, ifingalenga twaumfwa ububi fyena fikalacitika, lelo te kutila ninshi ifintu tafyakatale afiwama. Kuti twaba no bulanda sana nga twacita ulubembu. Lelo ubulanda bwesu kuti bwapwa nga twawamya imibele yesu no kutwalilila ukupepa Yehova. Ilyo Imfumu Davidi yaumfwile sana ubulanda pa cilubo yacitile, yalembele ukuti: “Yalifumwike amafupa yandi mu kukuuta kwandi akasuba konse; . . . Namulengele ukwishibo lubembu lwandi [mwe Yehova] . . . , imwe mwalekelele amampuulu ya lubembu lwandi.” (Amalumbo 32:3-5) Nga twabembukila Lesa, tufwile ukumulomba ukuti atubelele uluse kabili tulingile ukwalula imibele yesu no kupampamina pa kulakonka ifyo Lesa atufunda.—1 Yohane 2:1, 2.

Mulecita Ifingamwafwa Ukukosa Ilyo Ifyabipa Tafilacitika

Ukulanda fye icishinka, ifwe bonse kasuba kamo ifyabipa fikatucitikila. Finshi tufwile ukulacita pa kuti tukakose ilyo fikacitika? Ba Bruno Bena Kristu abakalamba abo ifyabipa fyacitikile, ifyayalwile ubumi bwabo. Umfweni ifyo basosele ifingatwafwa, batile: “Icangafwile sana ukushipikisha ni co nshalekele ukucita ifyo nalecita na kale pa kukosha bucibusa bwandi na Lesa. Ilyo ifyabipa fyacitike ninshi nalishiba kale umulandu Lesa alekela cino calo cabipa ukubapo mpaka ino nshita. Apa ninshi nalikosha bucibusa bwandi na Yehova pa myaka iingi. Caliweme ukuti fyaishilecitika ninshi nine kapepa wakosa. Ukwishiba ukutila Lesa tandekeleshe mu kucula kwandi kwalesansamusha.”

Ilyo tuletontonkanya pa fya ku ntanshi, twilalaba ukuti: Bambi kuti batulufyanya e lyo na fwe bene kuti twacita icingatuletela ubulanda, lelo Lesa ena takabale acita icikatubipila. Na kuba, Lesa atile ishina lyakwe ilya kuti Yehova lyalola mu kutila “Naba uuntu Naba.” (Ukufuma 3:14) Ishina lyakwe lilalenga twacetekela ukuti alikwata amaka ya kucita fyonse ifyo alaya. Alilaya ukutila akabomfya Ubufumu bwakwe pa kuti ukufwaya kwakwe kukacitike “pano isonde nga mu muulu.” E mulandu wine umutumwa Paulo alembeele ukuti: “Ninshininkisha ukuti nangu ni mfwa nangu bumi nangu ni bamalaika nangu mabuteko, . . . nangu ububumbo bumbi tafyakabe na maka ya kutupaatulako ku kutemwa kwa kwa Lesa ukwaba muli Kristu Yesu.”—Mateo 6:10; Abena Roma 8:38, 39.

Twalicetekela sana Lesa kabili twalishiba no kuti ku ntanshi akafikilisha ubulayo bwakwe ubo alandile kuli kasesema Esaya ilyo atile: “Moneni ndelenge myulu ipya, ne calo cipya! Ifya ntanshi tafyakebukishiwe, tafyakabukuluke mu mutima.” (Esaya 65:17) Ala iyo nshita nga yafika cikawama pantu tatwakaleibukisha ifyabipa fyonse ifyatucitikile!

[Futunoti]

[Amashiwi pe bula 13]

Ifintu nga tafyendele bwino pa kubala, te kutila ninshi calaala capwa tafyakawame

[Amashiwi pe bula 14]

Icebo ca kwa Lesa citukoselesha ukulatontonkanya pa fingatuletela insansa, te pa fyo twalefwaya ifishacitike

[Ifikope pe bula 15]

Lesa aliba ne nsansa nangu ca kutila abantu balalufyanya pantu alishiba ukutila ifyo afwaya fikacitika

[Icikope pe bula 16]

Ukubika sana amano ku kukosha bucibusa bwesu na Lesa kukatwafwa ukushipikisha ilyo fimo fyatubipila