Palameni Kuli Lesa
Aleshiba Ifyo Tucula
“UKUBA ne cililishi kumfwa sana ububi abantu nga balecula no kubomfwila uluse.” Yehova Lesa e waba sana ne cililishi. Aleshiba bwino bwino ifyo abantu bakwe bacula kabili alomfwa ububi. Twaishiba shani? Ifyo Yesu alelanda no kucita ilyo ali pano isonde fyalangilile ukuti Yehova na o wa cililishi. (Yohane 5:19) Tontonkanyeni pa cacitike icalembwa pali Yohane 11:33-35.
Ilyo Lasaro cibusa wa kwa Yesu afwile, Yesu aliile ku mushi Lasaro aleikala. Inkashi sha kwa Lasaro, Maria na Marita, bafwile baali no bulanda sana ilyo ndume yabo afwile. Yesu alitemenwe sana ulu lupwa. (Yohane 11:5) Nomba cinshi ali no kucitapo? Icalembwa citila: “Ilyo Yesu amumwene [Maria] alelila na baYuda abaishile nankwe balelila, ashinshimukile mu mutima, no kwikatwa ubulanda; kabili atile: ‘Mwamubika kwi?’ Batile kuli wene: ‘Mwe Shikulu, iseni mumone.’ Yesu alilile ifilamba.” (Yohane 11:33-35) Cinshi Yesu aliliile? Ni co Lasaro cibusa wakwe alifwile, lelo nangu Yesu alilile, aali no kumubusha. (Yohane 11:41-44) Bushe kwali na cimbi icalengele Yesu omfwe sana ubulanda?
Tontonkanyeni na kabili pa mashiwi tulandilepo pa mubalo. Ilyo Yesu amwene Maria na bo ali nabo balelosha, na o ‘alishinshimukiile’ no “kwikatwa ubulanda.” Mu lulimi balembeelemo Baibolo, aya mashiwi yalanga ukuti alilungulwike sana.a Yesu alyumfwile sana ubulanda pa fyacitike, e calengele no kuti alukushe ne filamba. Nge fyo twamona, Yesu aleumfwa sana ububi nga amona abantu balecula. Bushe mwalitala amulukushapo ifilamba pa mulandu wa kuti umuntu uo mwatemwa aleloosha?—Abena Roma 12:15.
Icililishi Yesu akwete cilenga twaishiba ifyo Yehova, Wishi aaba. Ibukisheni ukuti imibele ya kwa Yesu e ilya ine na Wishi akwata, e co asosele no kuti: “Uwamona ine, amona na Tata.” (Yohane 14:9) Kanshi nga twabelenga ukuti “Yesu alilile ifilamba,” tuleshiba ukuti na Yehova alomfwa ububi nga bakapepa bakwe balecula. Na bakalemba ba Baibolo bambi balilandapo pali ici cishinka. (Esaya 63:9; Sekaria 2:8) Ala mwandini Yehova ni Lesa wa nkumbu!
Umuntu wa cililishi alatemwikwa. Nga twafuupulwa nelyo ukusakamikwa, tuya ku muntu wingomfwa ubucushi bwesu kabili uwaba ne cililishi. Yehova ena alicila na pa bantunse, ni Lesa wa cikuuku uumfwa sana ububi nga tulecula kabili aleshiba ne ciletucusha. Kanshi tufwile ukupalama sana kuli ena!—Amalumbo 56:8.
[Futunoti]
a Ishiwi lya ciGriki ilyapilibulwa ati “alilile ifilamba” ilingi line lipilibula “ukushinshimukila,” lelo ishiwi baabomfya pa kulondolola ukulila kwa kwa Maria na bantu aali na bo lyena lipilibula “umusowa ukalamba.”