Pingulenipo Ukubombela Yehova Ilyo Mucili Abaice
“Ikalilila muli ifyo wasambilile kabili ifyo wanashiwenashiwe ukusumina.”—2 TIM. 3:14.
1. Bushe Yehova amona shani umulimo baNte bacaice babomba?
YEHOVA alicindika sana umulimo wa mushilo abacaice babomba ica kuti apuutilemo kemba wa malumbo ukusobela ukuti: “Abantu bobe bakaipeela kuli iwe no kwanga mu kasuba ka bulamba bobe; mu fisamo fya mushilo, ukufuma mwi fumo lya macaca, ngo mume, abalumendo bobe bakesa kuli iwe.” (Amalu. 110:3) Ca cine, Yehova amona abacaice abaipeelesha ukumubombela ukuti balicindama sana.
2. Muno nshiku, finshi abacaice babakoselesha ukucita pa kuti bakekale bwino ku ntanshi?
2 Mwe bacaice ababa mu cilonganino ca Bena Kristu, bushe mwaliipeela kuli Yehova? Limo abacaice abengi cilabafya ukupingulapo ukubombela Lesa wa cine. Bashimakwebo, bakafundisha, e lyo limo limo na balupwa ne fibusa babakoselesha ukucita ifingalenga ukuti bakabe ne fyuma. Ilingi line abacaice nga bapingulapo ukubombela Yehova, abantu ba mu calo balabapumya. Nomba mufwile ukwishiba ukuti icacindama sana ico mufwile ukucita kubombela Lesa. (Amalu. 27:4) Kanshi tontonkanyeni pali aya mepusho yatatu ayaleti: Mulandu nshi mulingile ukulabombela Lesa? Kuti mwatwalilila shani ukulacita ifintu ukulingana no kuipeela kwenu kuli Lesa te mulandu ne fyo bambi bengasosa nelyo ukucita? Milimo nshi iyacindama iyo mwingaba ne shuko lya kubombako mu kuteyanya kwa kwa Lesa?
Ukubombela Yehova E Cacindama Sana ico Mufwile Ukucita
3. Bushe ifyo Yehova abumba fifwile ukutulenga ukucita cinshi?
3 Mulandu nshi mulingile ukulabombela Lesa wa cine kabili uwa mweo? Pa Ukusokolola 4:11 palanda umulandu uukalamba uo tulingile ukubombela Yehova, patila: “Mwaliwamina, mwe Yehova, mwe Lesa wesu, ukupokelela ubukata no mucinshi na maka, pantu mwabumbile ifintu fyonse, kabili ni pa mulandu wa kufwaya kwenu fyabeleleko no kubumbwa.” Yehova e wabumba ifintu fyonse. Pe sonde paliba ifintu ifisuma nga nshi! Yehova e wabumba ifimuti, amaluba, inama, babemba, impili, ne fipooma. Amalumbo 104:24 yatila: “Pano isonde paisulapo ifibumbwa [fya kwa Lesa].” Ala mwandini tulatasha Yehova pantu alitupanga ne mibili kabili alitupeela na mano pa kuti tuleipakisha ukwikala mwi sonde no kuipakisha ukutamba ifisuma ifyabamo! Ukutasha pa fisuma ifyo Lesa abumba kufwile ukutulenga ukulamubombela!
4, 5. Finshi Yehova Lesa acitile ifyalengele Yoshua apalame kuli ena?
4 Umulandu umbi tulingile ukulabombela Yehova tuusanga mu mashiwi Yoshua, intungulushi ya bena Israele asosele. Ilyo ali mupepi no kufwa, Yoshua aebele abena Israele ukuti: “Mwaishiba mu mitima yenu yonse na mu myeo yenu yonse ukuti takwashala nangu cimo ca mu fintu fyonse fisuma ifyo Yehova Lesa wenu asosele ulwa imwe; fyonse fyalimoneke kuli imwe, takwashala cintu nangu cimo.” Cinshi calengele Yoshua ukulanda aya mashiwi?—Yosh. 23:14.
5 Lintu Yoshua alekula mu Egupti, afwile alishibe ubulayo Yehova alaile abena Israele ubwa kubapeela icalo. (Ukute. 12:7; 50:24, 25; Ukufu. 3:8) E lyo, Yoshua alimweneko uko Yehova atendeke ukufikilisha bulya bulayo lintu aletele Ifinkunka 10 pa bena Egupti no kupatikisha Farao umumankonso ukuleka abena Israele bafume mu Egupti. Yoshua ali pa bantu Lesa apuswishe pali Bemba Wakashika, kabili alimwene uko Farao no mulalo wakwe bafwilile pali bemba. Ilyo balepita “mu matololo yakalamba kabili aya kutiinya” ayaba mu Ciswebebe ca Sinai umo bapoosele imyaka iingi, Yoshua alimwene uko Yehova alebapeela fyonse ifyo balekabila. Takwali nangu umo uwafwile ku nsala nelyo ku cilaka. (Amala. 8:3-5, 14-16; Yosh. 24:5-7) Ilyo inshita yafikile iya kuti abena Israele bacimfye ifyalo fya maka ifyali mu Kanaani no kupoka Icalo ca Bulayo, Yoshua alimwene ifyo Lesa uo balepepa abafwile ukucimfya abena Kanaani.—Yosh. 10:14, 42.
6. Cinshi cingalenga ukuti mulefwaisha ukulabombela Lesa?
6 Yoshua alishibe ukuti Yehova alifikilishe ifyo alaile. E co, asosele ukuti: “Lelo ine na ba mu ng’anda yandi, tulebombela Yehova.” (Yosh. 24:15) Nga imwe? Ilyo mwatontonkanya pa malayo Lesa wa cine afikilisha na yo ali no kufikilisha ku ntanshi, bushe mulafwaisha ukulabombela Yehova nga filya Yoshua acitile?
7. Mulandu nshi ulubatisho lwacindamina?
7 Ukutontonkanya pa fyo Yehova abumba na pa malayo ayasuma ayo akafikilishia ku ntanshi, kufwile ukulenga mwaipeela kuli Yehova no kubatishiwa pa kuti na bambi baishiba ukuti mwaliipeela. Ulubatisho lwalicindama ku bantu bonse abafwaya ukubombela Lesa. Yesu uo tupashanya alibatishiwe. Ilyo ali fye mupepi no kutendeka umulimo wakwe uwa buMesia, aile kuli Yohane Kabatisha ukuti abatishiwe. Mulandu nshi Yesu abatishiwilwe? Pa numa, aishilelanda ukuti: “Nafuma ku muulu te ku kucita ukufwaya kwandi, kano ukufwaya kwa wantumine.” (Yoh. 6:38) Yesu alibatishiwe pa kulanga ukuti inshita ya kutendeka ukucita ukufwaya kwa kwa Wishi yalifikile.—Mat. 3:13-17.
8. Mulandu nshi Timote apingwililepo ukulabombela Lesa, kabili cinshi ico na imwe mulingile ukucita?
8 Tontonkanyeni na pa fyacitile Umwina Kristu wacaice Timote. Timote apingwilepo ukulabombela Yehova Lesa kabili Yehova amupeele imilimo iingi mu cilonganino ca Bena Kristu. Mulandu nshi Timote asalilepo ukulabombela Lesa wa cine? Baibolo itila ‘balimusambilishe kabili balimunashishe ukusumina’ ukuti ifyo asambilile fya cine. (2 Tim. 3:14) Na imwe nga mwalisambilila Baibolo kabili balimwafwa ukusumina ukuti ifyo isambilisha fya cine, ninshi na imwe mwaba nga Timote. Nomba mulingile ukupingulapo ifyo mufwile ukucita. Mulandu nshi te kuti mwebele abafyashi benu ifyo mulefwaya ukucita? Abafyashi benu na baeluda bakamwafwa ukwishiba ifyo Amalembo yalanda ifyo umuntu afwile ukucita pa kuti alinge ukubatishiwa.—Belengeni Imilimo 8:12.
9. Bushe bambi nalimo kuti baumfwa shani nga mwabatishiwa?
9 Umwina Kristu afwile ukubatishiwa pa kuti atendeke ukulabomba bwino umulimo wa kwa Lesa. Nga mwabatishiwa cikaba kwati mwatendeka ukubutuka ulubilo kabili icilambu mukapokelela mweo wa muyayaya e lyo pali ino nshita mukalaba ne nsansa ilyo mulecita ukufwaya kwa kwa Lesa. (Heb. 12:2, 3) Na kabili, balupwa lwenu abatendeka kale ukubutuka ulu lubilo bakaba ne nsansa ukubikako fye ne fibusa fyenu ifya mu cilonganino. Ne cacindama sana ca kuti, mukalenga Yehova ukusekelela. (Belengeni Amapinda 23:15.) Kwena, bambi te kuti beshibe bwino bwino ico mwapingwilapo ukulabombela Yehova, kabili kuti balemona kwati ico mwapingulapo ukucita nacilubana. Limbi kuti batendeka fye no kumukaanya. Na lyo line, kuti mwacimfya aya mafya.
Ifyo Mwingacita nga Bamo Batwishika Ifyo Mwapingulapo Ukucita Nelyo Batendeka Ukumukaanya
10, 11. (a) Finshi nakalimo abantu bengalamwipusha nga mwapingulapo ukulabombela Lesa? (b) Finshi mwingasambilila ku fyo Yesu aleyasuka abantu abaleipusha amepusho pa kupepa kwa cine?
10 Nga mwapingulapo ukubombela Yehova, abo musambilila nabo, abena mupalamano, na balupwa limbi kuti bapeshiwa amano. Kuti baipusha umulandu mwasalilapo ukubombela Lesa kabili kuti bafwaya no kwishiba ifyo mwasuminamo. Bushe kuti mwabasuka shani? Kwena, mufwile ukwishiba bwino ifyo muletontonkanya ne fyo muleyumfwa pa kuti mwingalondolola umulandu mwapingwilapo ukulabombela Lesa. Kabili, ilyo mulebalondolwela ifyo mwasuminamo, mufwile ukupashanya Yesu.
11 Ilyo bashimapepo abaYuda baile kuli Yesu no kumwipusha ifyo cikaba mu kubuuka kwa bafwa, ayambwile ilembo ilyo bashaletontonkanyanapo. (Ukufu. 3:6; Mat. 22:23, 31-33) Na lintu kalemba umo aipwishe Yesu ukuti amwebe ifunde ilikalamba, Yesu ayambwile amalembo ya mu Baibolo ayayaswike bwino icipusho. Ulya mwaume alitashishe sana Yesu pantu alimwaswike bwino. (Lebi 19:18; Amala. 6:5; Marko 12:28-34) Imilandile ya kwa Yesu ne fyo alebomfya bwino Amalembo fyalengele ‘amalekano pe bumba pa mulandu wakwe,’ kabili abalwani bakwe balifililwe ukumwikatamo. (Yoh. 7:32-46) Ilyo muleasuka abalemwipusha ifyo mwasuminamo, mulebomfya Baibolo kabili muleasuka no “mutima uwafuuka na katiina.” (1 Pet. 3:15) Nga tamwishibe icasuko, bebeni ukuti tamwishibe kabili balondolweleni ukuti mwalaya mu kufwailisha pa kuti mukesebasuka. Lyena, fwayeni ifyebo pali ilyo lyashi muli Watch Tower Publications Index nelyo Watchtower Library iya pali CD-ROM nga e mo yaba mu lulimi ulo mwaishiba ukubelenga. Nga mwapekanya bwino, ‘mukeshiba ifyo mufwile ukwasuka.’—Kol. 4:6.
12. Mulandu nshi mushilingile ukufuupuka nga balemucusha?
12 Nga mwapingulapo ukulabombela Yehova, tabakalemwipusha fye ifipusho pa fyo mupingwilepo ukucita na pa fyo mwasuminamo, lelo fingi ifyo mukalapitamo. Na kuba, umulwani wa kwa Lesa, Satana Kaseebanya, e uteka cino calo. (Belengeni 1 Yohane 5:19.) Te bantu bonse bakamutemwa pa mulandu wa kuti mulebombela Lesa, limo bakalamucusha pa mulandu wa kuba Abena Kristu. Bamo kuti ‘bamusaalula,’ kabili limbi kuti balemusaalula fye umo shacela. (1 Pet. 4:4) Lelo muleibukisha ukuti te imwe mweka mulepita muli ifi. Na Yesu Kristu wine balimucushishe pa mulandu wa kucita ukufwaya kwa kwa Lesa. Umutumwa Petro na o balimucushishe, kabili alembele ukuti: “Mwe batemwikwa, mwipapa umulilo uulepya [ukucula] muli imwe, icilecitika ku kumwesha, kwati cintu iceni icamuponena. Lelo, mulesekelela apo muli abakumako mu fya kucula fya kwa Kristu.”—1 Pet. 4:12, 13.
13. Mulandu nshi Abena Kristu balingile ukulasekelela ilyo balebacusha pa mulandu wa kubombela Lesa?
13 Mufwile ukusekelela nga balemukaanya nelyo ukumucusha pa mulandu wa kuba Abena Kristu. Mulandu nshi mulingile ukulasekelela? Pantu aba mu calo nga bamutemwa ninshi cilelanga ukuti mulecita ifyo Satana afwaya, te fyo Lesa afwaya nakalya. Yesu atusokele ukuti: “Kalanda kuli imwe, nga bantu bonse balemulandila ifisuma, pantu ifi fine e fyo ne fikolwe fyabo fyalecita kuli bakasesema wa bufi.” (Luka 6:26) Nga balemucusha ninshi cilelanga ukuti Satana na bantu bakwe nabamupata pantu mulebombela Yehova. (Belengeni Mateo 5:11, 12.) Na kuba, mufwile ukulasekelela nga ‘balemupontela pe shina lya kwa Kristu.’—1 Pet. 4:14.
14. Bushe umuntu kuti anonkelamo shani nga atwalilila ukuba uwa cishinka kuli Yehova na lintu balemucusha?
14 Kwaliba ifintu fine ifyo mwingamwenamo nga mwatwalilila ukuba ne cishinka kuli Yehova na lintu balemucusha. Mulacitila ubunte pali Lesa no Mwana wakwe. Nga muleshipikisha ilyo balemucusha, mulakosha icitetekelo ca Bena Kristu banenu. E lyo abantu bamo abashaishiba Yehova abengamonako uko muleshipikisha nalimo kuti bafwaya ukwishiba Lesa wa cine. (Belengeni Abena Filipi 1:12-14.) Na kabili mukatemwa sana Yehova ilyo mukalamona ifyo akalamukosha pa kuti mwingashipikisha amesho.
“Umwinshi Uukalamba” Nawisuka
15. ‘Mwinshi nshi uukalamba’ uwaiswike kuli Paulo?
15 Ilyo umutumwa Paulo alelanda pa mulimo ali no kubomba mu Efese, atile: “Kuli ine nakwisukilo mwinshi uukalamba.” (1 Kor. 16:8, 9) Ico Paulo alelandapo lishuko lya kubombesha mu mulimo wa kushimikila imbila nsuma no kupanga abasambi muli ulya musumba. Ilyo Paulo ashimikile imbila nsuma mu Efese, alyafwile abengi ukusambilila pali Yehova no kutampa ukulapepa Lesa wa cine.
16. Bushe Abena Kristu basubwa abashalapo baingile shani pa “ciibi icacenama” mu 1919?
16 Mu 1919 Imfumu Yesu Kristu yaiswile “iciibi” no kucisha “icacenama” pa kuti Abena Kristu basubwa abashala pe sonde bengengila. (Ukus. 3:8) Abena Kristu basubwa baingile pali ulya mwinshi no kutendeka ukushimikila imbila nsuma no kusambilisha icine kabili balicincile ukucila ifyo bali kale. Finshi fyafumamo mu mulimo babomba? Ino nshita imbila nsuma yalishimikilwa mu calo conse, kabili abantu mupepi na 7 milioni balikwata isubilo lya kwisaikala mu calo cipya ica kwa Lesa ku ciyayaya.
17. Kuti mwaingila shani pa “mwinshi uukalamba uwa kubombeshamo”?
17 “Umwinshi uukalamba uwa kubombeshamo” ucili uwaisuka ku babomfi ba kwa Yehova bonse. Abengila pali uyu mwinshi balaba ne nsansa ilyo babombesha mu mulimo wa kushimikila imbila nsuma. Mwe Bena Kristu bacaice, bushe mwalicindamika sana ili shuko ilisuma nga nshi ilya kwafwa bambi “ukutetekele mbila nsuma”? (Marko 1:14, 15) Bushe mwalitala amutontonkanya pa kubombako bupainiya bwa nshita yonse nelyo ubwa kwafwilisha? Mwe bengi nalimo kuti mwakwata ishuko lya kubombako umulimo wa kukuula Amayanda ya Bufumu, umulimo wa pa Bethel, nelyo bumishonari. Apo inshita ya kuti Yehova onaule cino calo ca kwa Satana naipalama, inshita ya kuti mubombeko uyu mulimo ileyailecepelako fye cila bushiku. Bushe te kuti mwingile pali uyu “mwinshi uukalamba” nomba ilyo kucili inshita?
“Sondeni no Kumono Kuti Aliwama Yehova”
18, 19. (a) Cinshi calengele ukuti Davidi atemwe sana ukubombela Yehova? (b) Cinshi cilanga ukuti Davidi tatalile alanguluka ukuti alebombela Yehova?
18 Kemba wa malumbo uwapuutilwemo no mupashi wa mushilo akoseleshe abantu ‘ukusonda no kumono kuti Yehova aliwama.’ (Amalu. 34:8) Ilyo Davidi ali umwaice ali ni kacema, kabili imiku iingi Yehova alimupuswishe ku nama mbi. Na lintu alwile na Galyati, Lesa alimupuswishe. Na kabili Lesa alemupususha ilyo alepita mu mafya yalekanalekana. (1 Sam. 17:32-51; Amalu. 18, utulembo twa pa muulu) Pa mulandu wa luse Lesa amulangile, Davidi alembele ukuti: “Mwe Yehova Lesa wandi, ifipesha amano ifyo mwacitile fingi, na matontonkanyo yenu ayalola kuli ifwe; takuli uwingapashaniwa kuli imwe!”—Amalu. 40:5.
19 Davidi alitemenwe sana Yehova kabili alefwaya ukulamulumbanya no mutima wakwe onse. (Belengeni Amalumbo 40:8-10.) Ilyo akulile, Davidi tatalile alanguluka ukuti apoosele imyaka yonse iya mweo wakwe ukulabombela Lesa wa cine. Alitemenwe sana ukucita ukufwaya kwa kwa Lesa, kabili takwali cimbi icalemuletela insansa ngo kucita ukufwaya kwa kwa Lesa. Ilyo akotele, Davidi atile: “Ica kulolelako candi ni mwe, mwe Shikulu Yehova, ni mwe ca kutetekelako candi ukufuma ku bwaice bwandi. Na kabili ukufika ku bukote ne mfwi, mwe Lesa, mwindekelesha.” (Amalu. 71:5, 18) Davidi alitetekele sana Yehova kabili bucibusa bwakwe na Lesa bwalikosele nangu ca kutila amaka yena yaleya yalepwa.
20. Mulandu nshi ukubombela Lesa kwabela e cacindamisha ico umuntu engacita mu bumi?
20 Yoshua, Davidi, na Timote balibombele Yehova kabili ifyo bacitile filanga ukuti ukubombela Yehova e cacindamisha ico umuntu afwile ukucita mu bumi. Ukukonkelela incito sha muli cino calo te kuti kulingane na mapaalo ayo mukakwata nga ‘mulebombela Yehova ne mitima yenu yonse ne myeo yenu yonse.’ (Yosh. 22:5) Nga ca kutila tamulaipeela kuli Yehova, yipusheni amuti, ‘Cinshi cilendesha ukuba Inte ya kwa Yehova?’ Nga ca kutila mwalibatishiwa kale, bushe te kuti mutemwe ukuba ne nsansa sana? Nga kuti mwatemwa, tendekeni ukubombesha mu mulimo wa kwa Lesa, kabili mukatwalilile ukulunduluka. Icipande cikonkelepo cikamwafwa ukwishiba ifyo mwingacita pa kuti mulelunduluka mu mulimo wa kwa Lesa ilyo mulepashanya umutumwa Paulo.
Kuti Mwayasuka Shani?
• Milandu nshi ibili ifyo tulingile ukulabombela Lesa?
• Cinshi calengele Timote ukupingulapo ukubombela Lesa?
• Mulandu nshi mulingile ukulashipikisha ilyo balemucusha pa mulandu wa kuba Abena Kristu?
• Milimo nshi iyo mwingakwata ishuko lya kubombako?
[Icikope pe bula 18]
Ukubombela Yehova e cacindamisha ico umuntu engacita mu bumi
[Icikope pe bula 19]
Bushe kuti mwalondolola nga ca kuti bamo bamwipusha ifyo mwasuminamo?