Ababelenga Ino Magazini Bepusha Ukuti

Bushe Isonde Likapusuka?

Planeti yesu iye sonde tayakonaulwe na kayofi akali konse. Mulandu nshi twalandile fyo? Pantu Lesa alilaya ukuti isonde ‘talyakatelentenshiwe umuyayaya umuyayaya.’ (Amalumbo 104:5) Baibolo itila: “Inkulo imo ileya ne nkulo imbi ileisa, lelo icalo caiminina umuyayaya.”—Lukala Milandu 1:4.

Amashiwi ya mu ciHebere ca kubalilapo yabili ayaba pa Amalumbo 104:5, e kutila ʽoh·lamʹ na ʽadh yalanga ukuti isonde talyakonaulwe. Ishiwi lya kuti ʽoh·lamʹ lyalola mu kuti “ukwabula impela,” e lyo ishiwi lya kuti ʽadh lyalola mu kuti “iciyayaya.” Ishiwi lya kuti ʽOh·lamʹ kuti lyapilibulwa ukuti “imyaka iingi” nelyo “pe na pe.” Mu citabo ca kwa Harkavy ica kuti Students’ Hebrew and Chaldee Dictionary, ishiwi lya kuti ʽadh lipilibula ukuti “iciyayaya. ukwabula impela, pe na pe.” Aya mashiwi ya ciHebere yabili yalekosha icishinka ca kuti isonde talyakonaulwe, likatwalilila ku ciyayaya. Nomba natumone imilandu na imbi itatu mu Baibolo iilangilila ukuti isonde talyakonaulwe.

Umulandu wa kubalilapo wa kuti Lesa apangile isonde ilisuma nga nshi apa kwikala abantunse, lyali no kuba paradaise iisuma icalo fye conse, talipangile ukuti likabe iciswebebe. Esaya 45:18 ilanda pali Yehova ukuti “ni Kalenga wa myulu, wene ni Lesa uwabumbile icalo no kucicita, wene e wacipampamike, tacilengele cimfulumfulu, acibumbile ku kwikalwamo.”

Umulandu walenga bubili, Lesa alilaya ukuti abantu abakapingulapo ukulamumfwila bakekala pali lino isonde ku ciyayaya mu mutende. Mika 4:4 yalaya ukuti: “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya; pantu akanwa ka kwa Yehova nakasosa.” Kanshi, ukulingana no kufwaya kwa kwa Lesa, isonde lilingile ukutwalilila ukwikalwamo na bantu, pantu nga te ifyo ninshi amalayo ya kwa Lesa tayakafikilishiwe.—Amalumbo 119:90; Esaya 55:11; 1 Yohane 2:17.

Umulandu walenga butatu wa kuti Lesa apeela umuntu umulimo wa kusunga isonde. Icebo ca kwa Lesa citila: “Imyulu myulu ya kwa Yehova; ne calo apeela ku bana ba bantu.” (Amalumbo 115:16) Bushe mufyashi wa musango nshi uwatemwa umwana, uwa kuti nga apeela umwana wakwe ica bupe icisuma e lyo pa numa abwela amupoka no kuconaula aconaula? Kwena umufyashi te kuti acite icintu ca musango yu! Nangu fye ni Yehova te kuti acite ica musango yu kwi sonde na ku bantu, pantu “Lesa kutemwa.”—1 Yohane 4:8.

Yesu Kristu alangilile ifyo icebo ca kwa Wishi caba, atile: “Icebo cenu e cine.” (Yohane 17:17) Kabili Lesa, uushingabepa, alaya ukuti: “Abalungama bakapyaninine calo, no kwikalamo inshiku pe.”—Amalumbo 37:29; Tito 1:2.

[Abatusuminishe Ukubomfya Icikope pe bula 31]

Globe: Based on NASA photo