Pashanyeni Yesu—Mulepepa Lesa Ukulingana ne fyo Umwine Afwaya
Lesa aleta aba “mu nko shonse ne mitundu na bantu na bantu ne ndimi” ukuti balemupepa. (Ukus. 7:9, 10; 15:3, 4) Abasumina ukumupepa ‘balamona ubusuma bwa kwa Yehova.’ (Amalu. 27:4; 90:17) Nge fyo kemba wa malumbo alecita, nabo balasansula amashiwi yabo ilyo balelumbanya Lesa abati: “Shi iseni tupepe no kukontama; natufukame pa ntanshi ya kwa Yehova Uwatupangile.”—Amalu. 95:6.
Ukupepa Uko Yehova Atemenwe Sana
Apo Yesu Mwana uwafyalwa eka uwa kwa Lesa, alikwete inshita iikalamba iya kwishiba ifishinte fya kwa Wishi, amafunde yakwe, ne fyo atontonkanya. Kanshi Yesu kuti alanga bambi bwino bwino ifyo bafwile ukulapepa Yehova. Atile: “Nine nshila ne cine no mweo. Takuli uwisa kuli Tata kano aishila muli ine.”—Yoh. 1:14; 14:6.
Yesu ali uwaicefya sana kabili alenakila Wishi. Atile: “Nshicita kantu nangu kamo neka; lelo filya fine Tata ansambilishe, e fyo na ine nanda.” Asosele no kuti: “Lyonse ncita ifya kumusekesha.” (Yoh. 8:28, 29) Bushe Yesu alesekesha shani Wishi?
Ku ca kumwenako, Yesu ali-ipeele sana kuli Wishi, e lyo uku kwine ukuipeelesha kuli Lesa, e kupepa. Yesu alangile ukuti alitemenwe Wishi pa kuba ne cumfwila kuli ena, e kutila alecita ukufwaya Kwakwe na lintu ifintu fya-afishe sana. (Fil. 2:7, 8) Cimo icacindama ico Yesu alecita ilyo alepepa Lesa, kulabomba lyonse umulimo wa kulenga abantu ukuba abasambi ica kuti abasambi bakwe na bantu bambi balemwita ukuti Kasambilisha. (Mat. 22:23, 24; Yoh. 3:2) Na kabili Yesu alebombesha pa kuti afwilishe bambi. Ukuipeelesha kwalengele ukuti elakwata inshita ya kucita ifyo umwine atemenwe, na lyo line, aleba ne nsansa ukulabombela bambi. (Mat. 14:13, 14; 20:28) Nangu ca kuti alikwete ifya kucita ifingi, lyonse alepaatulako inshita ya kupepa kuli Wishi wa ku muulu. (Luka 6:12) Ukwabula no kutwishika Lesa alicindamike sana ukupepa kwa kwa Yesu!
Ukwesha na Maka Ukusekesha Lesa
Yehova alimwene imicitile ya Mwana wakwe kabili alisekelemo. (Mat. 17:5) Satana Kaseebanya na o alimwene ukuti Yesu ali ne cishinka kuli Lesa. Ici calengele ukuti Satana apimpile Yesu. Mulandu nshi amupimpilile? Pantu pali ilya nshita ninshi takulaba umuntu uwali ne cumfwila capwililika kuli Lesa, uwalepepa Lesa nga filya fine Umwine afwaya ukumupepa. E ico, Satana Kaseebanya alefwaya ukulesha Yesu ukulapepa Lesa ukulingana ne fyo Lesa umwine afwaya.—Ukus. 4:11.
Satana alitunkile Yesu pa kuti engamupumbula. Amutwele “pa lupili ulutali sana, no kumulanga amabufumu yonse aya pano calo no bucindami bwa yako.” Lyena atile: “Fyonse ifi ndekupeela nga wafukama no kumpepa.” Bushe Yesu acitile shani? Atile: “Fuma apa, we Satana! Pantu calilembwa ukuti, ‘Yehova Lesa obe e o ulepepa, kabili eka fye e o ulebombela.’” (Mat. 4:8-10) Yesu alishibe ukuti nangu cingati Satana alilaile ukumupeela ifintu ifingi, ukumufukamina kwali no kuba kupepa akalubi. E ico Yesu talefwaya ukupepa uuli onse kano fye Yehova.
Pali ino nshita, limbi Satana te kuti atulaye amabufumu yonse aya pano calo no bucindami bwa yako pa kuti tulemupepa. Nangu cibe fyo, alesha na maka ukupumbula Abena Kristu ba cishinka pa kuti belapepa Lesa ukulingana ne fyo umwine afwaya. Satana Kaseebanya afwaya ukuti tulepepa abantu bambi nelyo ifintu fimbi.—2 Kor. 4:4.
Kristu Yesu ali ne cishinka kuli Lesa mpaka fye ne mfwa. Ilyo Yesu afwile ne cishinka kuli Lesa, alicindike Yehova ifyo umuntu uuli onse ashatalile amucindika. Fwe Bena Kristu ba cine twesha na maka ukuba ne cishinka kuli Lesa nga filya Yesu ali lintu tubika amano ku kupepa Kabumba ukucila ku fintu fimbi. Na kabushe, icacindama nga nshi kuli ifwe kuba ifibusa fya kwa Lesa.
Amapaalo Tukwata nga Tulepepa Lesa Ukulingana ne fyo Umwine Afwaya
Tulanonkelamo nga nshi nga tuletungilila “imipepele iyasanguluka kabili iishakowela” mu menso ya kwa Lesa. (Yako. 1:27) Ku ca kumwenako, pali ino nshita abantu abengi nga nshi ‘bali-itemwa, balitemwa indalama, ba mataki,’ kabili ‘tabatemwa ubusuma.’ (2 Tim. 3:1-5) Lelo, fwe ba mu ng’anda ya kwa Lesa twalikwata ishuko lya kula-ampana pamo na bantu abasuma kabili abasanguluka abesha na maka ukulaumfwila amafunde ya kwa Lesa ayalanda pa fyo tufwile ukulamupepa. Bushe ico tacilenga ukuti tuleba ne nsansa?
Ukukanaikowesha ku fintu ifya muli cino calo na ko kulalenga twaba ne nsansa pantu tulakwata kampingu iyasanguluka. Kuti twatwalilila ukuba na kampingu yasanguluka nga ca kuti tulekonka ifishinte fya kwa Lesa e lyo no kulaumfwila amafunde ya kwa Kaisare ayashipinkana na mafunde ya kwa Lesa.—Marko 12:17; Imil. 5:27-29.
Ukulapepa Lesa no mweo wesu onse kulaleta ubusuma na bumbi. Nga twabika amano ku kucita ukufwaya kwa kwa Lesa ukucila ku fyo tufwaya fwe bene, tulaba ne nsansa nga nshi. Mu nshita ya kusosa atuti: ‘Natulye no kunwa, pantu mailo tukafwa,’ ifwe twakwata isubilo lya kwikala ku ciyayaya muli paradaise pano calo.—1 Kor. 15:32.
Ibuuku lya Ukusokolola litila ku ntanshi abantu abo Yehova amona ukuti balungami ‘bakafuma mu bucushi bukalamba.’ Lyatila: “Uwaikala pa cipuna ca bufumu akafungulwila itenti lyakwe pali bena.” (Ukus. 7:13-15) Uwaikala pa cipuna ni Yehova Lesa, Uwa bukata nga nshi pano calo na mu muulu. Elenganyeni ifyo mukaba ne nsansa ilyo akamupokelela mwi tenti lyakwe, lintu akalamusakamana no kumucingilila pa kuti icabipa icili conse cikamuponena! Na kuba, na pali ino ine nshita Yehova alatusakamana kabili alatucingilila muli fimo fimo.
Na kabili, Baibolo isosa ukuti bonse abapepa Lesa ukulingana ne fyo afwaya balatungululwa “ku tumfukumfuku twa menshi ya mweo.” Utumfukumfuku twa menshi twimininako fyonse ifyo Yehova apekanya ifikalenga ukuti tukabe no mweo wa muyayaya. Na kabushe, ukupitila mu cilubula ca kwa Kristu, “Lesa akafuuta ifilamba fyonse ku menso yabo.” (Ukus. 7:17) Abantu bakabafwilisha ukuba abapwililika, kabili ici cikalenga bonse abakwata isubilo lya kwikala pano calo ku ciyayaya ukusekelela nga nshi. Na pali ino ine nshita, bakapepa ba kwa Lesa aba nsansa balasekelela nga nshi ilyo batasha Yehova ukufuma pa nshi ya mitima yabo no kumupepela capamo na ba mu muulu abemba abati: “Ikalamba kabili yalipesha amano imilimo yenu, mwe Yehova Lesa, Uwa Maka Yonse. Yalilungama kabili ya cine imibele yenu, mwe Mfumu ya muyayaya. Nani uushakamutiine, mwe Yehova, no kucindika ishina lyenu, apo ni mwe fye mweka mwe ba cishinka? Ne nko shonse shikesa no kupepa ku cinso cenu, pantu nafimoneka ifipope fyenu ifyalungama.”—Ukus. 15:3, 4.
[Icikope pe bula 27]
Finshi Satana atupeela pa kuti tuleke ukupepa Lesa?