Icisambilisho Ico Abengi Basumina

“Ilingi naleloota umulilo wa pe! Naleloota balempoosa mu mulilo kabili pa kubuuka nalepunda. Ici calengele ukuti nde-esha sana ukukanalabembuka.”—Ifi e fyasosele ba Arline.

BUSHE mwasumina ukuti umulilo wa pe cifulo uko ababembu baya mu kupya? Abantu abengi e fyo basumina. Cimo icilanga ukuti abantu abengi balatiina umulilo wa pe, fintu uwasambilila umo uwa pa University of St. Andrews mu Scotland asangile. Asangile ukuti bashimapepo abena Scotland bamo basumine ukuti abaitalusha kuli Lesa bakacula “na matontonkanyo umuyayaya mu mulilo wa pe.” Bambi basumine ukuti ababa mu mulilo wa pe balapya.

Mu fyalo ifingi, abantu abengi nga nshi balisumina ukutila kwaliba umulilo wa pe. Ilyo bafwailishe mu United States, mu 2007, basangile ukuti abantu abengi nga nshi abo baipwishe batile balisumina ukutila kwaliba umulilo wa pe. Nangu fye ni mu fyalo umo abantu bashabika sana amano ku fya kwa Lesa, mwaliba abantu abasumina ukuti kwaliba umulilo wa pe. Ilyo bafwailishe mu Canada mu 2004, basangile ukutila mupepi na hafu wa bantu kulya balisumina ukutila kwaliba umulilo wa pe. Kabili mu Great Britain kwaliba abantu bamo abashitwishika nangu panono ukuti umulilo wa pe e ko waba.

Ifyo Bashimapepo Basambilisha

Bashimapepo abengi balileka ukusambilisha ukuti abantu balaya mu kupya mu mulilo wa pe. Lelo balasumina ifyalondololwa mu Akatabo ka Mafundisho ya ba Katolika, akalembelwe mu 1994. Aka katabo katila: “Ukukandwa kukalamba ukwaba mu mulilo wa pe, kupaatulwa kuli Lesa umuyayaya.”

Lelo, abantu abengi na nomba balisumina ukuti mu mulilo wa pe e mo abantu baculila na matontonkanyo nangu ukupya. Abasambilisha ifi batila bafumya ici cisambilisho muli Baibolo. Albert Mohler, umukalamba wa kabungwe ka Southern Baptist Theological Seminary, atile: “Ici cisambilisho cafuma mu Malembo.”

Bushe Ifyo Mwasumina Fyalicindama?

Nga ca kuti umulilo wa pe cifulo uko abantu bapiila, mufwile uku-utiina. Lelo, ici cisambilisho nga ca bufi, ninshi bashimapepo abacisambilisha balafulunganya abasuminamo no kubalenga ukucula na matontonkanyo. Kabili balaseebanya na Lesa.

Bushe cinshi Icebo ca kwa Lesa, Baibolo, cilanda pali ili lyashi? Ifipande fyalakonkapo fyalabomfya amaBaibolo yapilibulwa na baKatolika e lyo na ba Bible Society pa kwasuka amepusho aya yatatu: (1) Cinshi cicitika ku muntu nga afwa? (2) Cinshi Yesu asambilishe pa mulilo wa pe? (3) Bushe ukusambilila icine pa mulilo wa pe kuti kwamwafwa shani?