Ifyo Tusambilila Kuli Yesu

Pe Subilo Lya Bafwa

Yesu abuushishe abantu batatu, ne ci cishibilo ca kuti abafwa bakabuuka. (Luka 7:11-17; 8:49-56; Yohane 11:1-45) Pa kuti tumfwikishe isubilo lya bafwa, intanshi tufwile twishibe icilenga imfwa iine ne fyo yatendeke.

Mulandu Nshi Tulwalila no Kufwa?

Ilyo Yesu aelele abantu imembu, balyundepwe. Ku ca kumwenako, ilyo baletele uwa bulebe kuli Yesu, Yesu atile: “‘Icayangukapo ukulanda cinshi, ukutila, Imembu shobe shaelelwa, nelyo ukutila, Ima no kwenda? Lelo pa kuti mwishibe ukuti Umwana wa muntu alikwata amaka pano isonde aya kwelela imembu—’ aebele uwa bulebe ati: ‘Ima, senda umusengele obe, no kuya ku mobe.’” (Mateo 9:2-6) Kanshi ulubembu e lwalenga tulelwala no kulafwa. Ulubembu twapyana lwafumine ku muntu wa kubalilapo, Adamu.—Luka 3:38; Abena Roma 5:12.

Mulandu Nshi Yesu Afwilile?

Yesu tabembwikepo. Kanshi ena talingile kufwa. Filya Yesu atufwilile, alitulubwile ku membu shesu. Atile umulopa wakwe ‘wasuumine pa mulandu wa bengi pa kuti bakabelelwe uluse pa membu.’—Mateo 26:28.

Yesu na kabili atile: “Umwana wa muntu taishile ukuti balemubombela, lelo aishile mu kubombela abantu no kupeela umweo wakwe icilubula pa kuti alubule abengi.” (Mateo 20:28) Yesu atile apeele “icilubula” pantu imfwa yakwe yalilubwile abantu ku mfwa. Yesu na kabili atile: “Ico naishila ni pa kuti impaanga shibe no bumi kabili shikwatishe ubumi.” (Yohane 10:10) Pa kuti twishibe bwino isubilo lyabako ku bafwa, tufwile ukwishiba ifyo abafwa bene baaba.

Cinshi Cicitika Umuntu nga Afwa?

Ilyo Lasaro cibusa wakwe afwile, Yesu alilondolwele bwino icicitika umuntu nga afwa. Aebele abasambi bakwe ukuti: “‘Lasaro umunensu nalaala utulo, lelo ndeya [ku Betani] mu kumubuusha.’ . . . Bena baleti alelanda pa kulaala fye utulo. Na o Yesu e pa kubeba fye icishinka ati: ‘Lasaro nafwa.’” Kanshi Yesu alilondolwele fye bwino ukuti abafwa balaala fye utulo, tabaishiba nangu cimo.—Yohane 11:1-14.

Ilyo Yesu abuushishe Lasaro, ninshi palipitile ne nshiku shine ukutula apo uyu cibusa wakwe afwilile. Lelo muli Baibolo tamwalembwamo ukuti Lasaro alilandile ifyalecitika ilyo afwile. Ilyo Lasaro afwile taishibe nangu cimo.—Lukala Milandu 9:5, 10; Yohane 11:17-44.

Bushe Kwaliba Isubilo ku Bafwa?

Abafwa bakaba aba mweo na kabili no kusubila ukwikala umuyayaya. Yesu atile: “Inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe [ilya kwa Yesu] no kufumamo.”—Yohane 5:28, 29.

Ili subilo lya kubuuka cishibilo ca kutemwa kwa kwa Lesa. Yesu atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”—Yohane 3:16; Ukusokolola 21:4, 5.

Nga mulefwaya ukwishibilapo na fimbi, belengeni icipandwa 6 mu citabo ca kuti, Bushe Cinshi Baibolo Isambilisha?a

[Futunoti]