Fundeni Abana Benu

Umulandu Davidi Ashaletiinina

BUSHE limo ulatiina?—a Limo limo fwe bengi tulatiina. Nga ca kuti uletiina, cinshi wingacita?— Kuti waya ku bakalamba abakwata amaka ukukucila. Nalimo kuti waya kuli bawiso nelyo banoko ukuti bakwaafwe. Kuti twasambilila ifingi kuli Davidi pa ko twingaya nga tulefwaya ubwafwilisho. Aimbile kuli Lesa ati: “Nkamutetekela. . . . Natetekela muli Lesa; nshakatiine.”—Amalumbo 56:3, 4.

Bushe uleti ni nani Davidi asambilileko ukukanatiina? Bushe ni ku bafyashi bakwe?— Afwile e ko asambilile. Wishi, Yese, ali muntu wa cishinka kabili icikolwe ca kwa Yesu Kristu, “Cilolo wa mutende” uwa kwa Lesa uwalaiwe. (Esaya 9:6; 11:1-3, 10) Wishi wa kwa Yese ali ni Obedi, shikulu wa kwa Davidi. Paliba ibuuku limo mu Baibolo ilyo bainika ishina lya kwa nyina wa kwa Obedi. Bushe walimwishiba?— Ni Ruti, umwanakashi wa cishinka uwali umukashi wa kwa Boasi.—Ruti 4:21, 22.

Kwena, Ruti na Boasi bafwile kale sana ninshi Davidi talafyalwa. Nalimo walishiba ishina lya kwa nyina wa kwa Boasi, nakulu Davidi. Aleikala mu Yeriko kabili alipuswishe inengu sha bena Israele. Ilyo ifibumba fya Yeriko fyawile, alicingililwe pamo no lupwa lwakwe pa kubika umwando wakashika pe windo lya ng’anda yakwe. Bushe ni nani ishina lyakwe?— Ni Rahabu, uwaishileba kapepa wa kwa Yehova, kabili fwe Bena Kristu twakoseleshiwa ukulamupashanya pa fyo ashipile.—Yoshua 2:1-21; 6:22-25; AbaHebere 11:30, 31.

Kuti twashininkisha ukuti bawishi ba kwa Davidi na banyina balimusambilishe pali aba bonse ababomfi ba cishinka aba kwa Yehova pantu abafyashi baebelwe ukulasambilisha abana babo ifya musango yu. (Amalango 6:4-9) Inshita yalifikile ilyo kasesema wa kwa Lesa Samwele bamwebele ukusala Davidi, umwana mwaume wa kwa Yese umwaice sana, pa kuti ku ntanshi e o akabe imfumu ya bena Israele.—1 Samwele 16:4-13.

Bushiku bumo, Yese atumine Davidi ukutwalila abakalamba bakwe batatu ifya kulya, abaile mu kulwisha abalwani ba kwa Lesa, abaPelishiti. Ilyo Davidi afikile, abutukile uko balelwila no kumfwa uko Galyati ipaka aletumfya “abashilika ba kwa Lesa wa mweo.” Bonse baletiina ukuyalwa na Galyati. Imfumu Shauli yalyumfwile ukuti Davidi ali-ipeelesha ukuyalwa, e ico yalimwitile. Ilyo Shauli amwene Davidi, amwebele ati: “Uli mwaice.”

Davidi aebele Shauli ukuti alipeye inkalamo na bere ilyo fyafwaile ukulya impaanga sha lupwa lwakwe. Davidi atile Galyati ‘ali no kuba nga cimo pali ifi.’ Shauli amwebele ati: “Kabiye, kabili Yehova abe nobe.” Davidi afwaile amabwe ayatelela yasano, ayabikile mu kacola ka kwa kacema, asendele ne cisukushilo cakwe, no kuya mu kulwa na lilya ipaka. Ilyo Galyati amwene ukuti kalumendo kaleisa, atile: “Fika kuli ine, kabili ndepeela umubili obe ku fyuni.” Davidi ayaswike ati: “Ndeisa kuli iwe mwi shina lya kwa Yehova,” e lyo apundile ati: “Ndekuuma.”

Awe Davidi abutukile kuli Galyati, abuulile ilibwe mu kacola kakwe, alibikile mu cisukushilo, no kulasa pa mpumi ya kwa Galyati. Ilyo abaPelishiti bamwene ukuti ili ipaka lyafwa, balitiinine no kufulumuka. Abena Israele balibakonkele ulubilo no kubacimfya. Belengeleni pamo no lupwa lwenu ili ilyashi lyonse pali 1 Samwele 17:12-54.

Mu bwaice, kuti nalimo inshita shimo watiina ukukonka amashiwi ya kwa Lesa. Yeremia ali mwaice kabili aletiina pa kubala, lelo Lesa amwebele ati: ‘Witiina pantu ndi na iwe.’ Yeremia alishipile no kushimikila nge fyo Lesa amwebele ukucita. Na iwe nga wacetekela Yehova, nga filya Davidi na Yeremia bacitile, kuti wasambilila ukukanatiina.—Yeremia 1:6-8.

[Futunoti]

Amepusho:

○ Ilyo Galyati atumfishe abashilika ba kwa Lesa, cinshi Davidi acitile?

○ Bushe Davidi acimfishe shani Galyati?

○ Bushe ifwe lelo kuti twasambilila shani ukukanatiina?