Bushe Lesa Alansakamana?
Abengi basuka ati:
◼ “Lesa alicindama sana uwa kuti aletontonkanya pa mafya yandi.”
◼ “Ine mona kwati tansakamana.”
Cinshi Yesu asambilishe?
◼ “Bushe inseba shisano tabashita mu tundalama tubili utunono sana? Na lyo line Lesa talabapo nangu lumo. Lelo ne mishishi ya ku mitwe yenu yalipendwa yonse. Mwilatiina; mwalicindama ukucila inseba ishingi.” (Luka 12:6, 7) Yesu asambilishe ukuti Lesa alatusakamana.
◼ “Mwilasakamikwa amuti, ‘Tulelya nshi?’ nelyo, ‘Tulenwa nshi?’ nelyo, ‘Tulefwala nshi?’ Pantu fyonse ifi e fyo abena fyalo bafwaisha. Pantu Shinwe wa mu muulu alishiba ukuti mulakabila ifi fyonse.” (Mateo 6:31, 32) Yesu alishibe kuti Lesa alishiba ifyo bonse tukabila.
BAIBOLO ilatulondolwela bwino bwino ukutila Lesa alatusakamana. (Amalumbo 55:22; 1 Petro 5:7) Nomba nga ca kuti Lesa alatusakamana, cinshi tuculila ifi? Nga ca kuti Lesa alitutemwa kabili wa maka yonse, cinshi ashapwishisha ukucula?
Icasuko, cakuma icishinka cimo ico abantu abengi bashaishiba, ne ci cishinka ca kuti Satana Kaseebanya e uteka cino calo. Ilyo ale-esha Yesu, Satana amulangile amabufumu yonse aya mu calo, no kutila: “Ndekupeela amaka pa mabufumu yonse aya no bucindami bwa yako, pantu balimpeela, na ine mpeelako uo ntemenwe.”—Luka 4:5-7.
Nani uwapeele Satana amaka ya kuteka icalo? Ilyo abafyashi besu aba kubalilapo, Adamu na Efa, baumfwilile Satana no kukanaumfwila Lesa, basalile Satana ukuba kateka wabo. Ukutula apo bapondokela, Yehova Lesa alitekanya no kusuminisha inshita ukupitapo pa kuti tumone ukuti Satana alifilwa ukuteka. Yehova tapatikisha abantu ukumubombela, lelo alitusuminisha ukubwelela kuli ena.—Abena Rom 5:10.
Pa mulandu wa kutila Lesa alatusakamana, alipekanya ukuti Yesu akatulubule ku kuteka kwa kwa Satana. Nomba line fye, Yesu akonaula “uwakwata amaka ya kulenga imfwa, e kutila, Satana Kaseebanya.” (AbaHebere 2:14) Nga acita ifi, akonaula “imilimo ya kwa Satana Kaseebanya.”—1 Yohane 3:8.
Isonde likaba Paradaise na kabili. Pali iyo nshita, Lesa “akafuuta ifilamba fyonse ku menso [ya bantu], ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi [fikaya].”—Ukusokolola 21:4, 5.a
[Futunoti]
a Nga mulefwaya ukwishibilapo na fimbi pa mulandu Lesa asuminishisha ukucula, belengeni icipandwa 11 mu citabo icitila, Bushe Cinshi Baibolo Isambilisha? icalembwa ne Nte sha kwa Yehova.
[Amashiwi pe bula 8]
Isonde likaba Paradaise na kabili