Palameni Kuli Lesa
“Ine Ne Yehova Lesa Wenu Ndi wa Mushilo”
“WA MUSHILO, wa mushilo, wa mushilo Yehova Lesa.” (Ukusokolola 4:8) Aya mashiwi ya mu Baibolo yalanga ukuti Yehova wa mushilo, e kuti alisanguluka kabili wa busaka nga nshi. Muli Lesa tamwaba ulubembu nangu panono; ulubembu te kuti lumukoweshe nakalya. Bushe ici cilepilibula ukuti abantu bena abashapwililika te kuti bapalame kuli uyu Lesa wa mushilo nga nshi? Awe, te fyo cilepilibula! Natulande pa mashiwi ayatulenga ukuba ne subilo lya kuti kuti twapalama kuli Lesa ayalembwa mu Ubwina Lebi icipandwa 19.
Yehova aebele Mose ati: “Sosa ku lukuta lonse ulwa bana ba kwa Israele.” Amashiwi akonkeshepo ale-eba uluko lonse ulwa bena Israele. Cinshi Mose aali no kubeba? Lesa nomba atile: “Ubebe auti, ‘Muleba aba mushilo, pantu ine ne Yehova Lesa wenu ndi wa mushilo’” (Icikomo 2) Umwina Israele umo umo aalekabila ukuba uwa mushilo. Ishiwi lya kuti “muleba” lilelanga ukuti balebeba ifya kucita, tabalebalomba iyo. Bushe Lesa abebele ukucita ico bashingakumanisha?
Moneni ukuti Yehova pa kulanda ukuti wa mushilo te mu kuti aalefwaya abena Israele ukuba aba mushilo nga ena, lelo alebeba fye umulandu bafwile ukubela aba mushilo. Mu nshila imbi, Yehova taebele bakapepa bakwe abashapwililika ukuba aba mushilo filya fine ena aba. Te kuti bacite ico nangu panono. Yehova, “Uwa Mushilo Nga Nshi,” alicila bonse kuli bumushilo. (Amapinda 30:3) Lelo, apo Yehova wa mushilo, enekela bakapepa bakwe na bo ukuba aba mushilo, e kutila ukwesha ukuba aba mushilo nangu ca kuti tabapwililika. Kuti baba shani aba mushilo?
Pa numa ya kweba abena Israele ukuti bafwile ukuba aba mushilo, Yehova ukupitila muli Mose abebele abena Israele ififwaikwa pa kuba aba mushilo mu mikalile yabo yonse. Umwina Israele onse aalekabila ukukonka ififwaikwa pamo nge fi: ukucindika abafyashi na bakalamba (ifikomo 3 na 32); ukulangulukilako bankomamatwi, impofu, na balecula bambi (ifikomo 9, 10 na 14); ukuba abafumacumi ilyo balebomba na bambi (ifikomo 11-13, 15, 35 na 36); no kutemwa umwina Israele munabo nge fyo baitemenwe abene. (Icikomo 18) Umwina Israele onse nga akonka ifi ififwaikwa, aali no kuba ‘uwa mushilo kuli Lesa wakwe.’—Impendwa 15:40.
Amashiwi ayo Yehova Lesa aebele abantu bakwe ukuti baleba aba mushilo yalatwafwa ukwishiba bwino ifyo atontonkanya e lyo ne mibombele yakwe. Cimo ico tusambililako ca kuti, pa kuti tube ifibusa na ena, tufwile ukwesha sana ukukonka ifyo atweba pa kuba aba mushilo. (1 Petro 1:15, 16) Nga twakonka ifyo atweba, ifintu kuti fyatuwamina nga nshi mu mikalile yesu.—Esaya 48:17.
E lyo kabili amashiwi ya kuti muleba aba mushilo yalanga ukuti Yehova alicetekela abamupepa. Yehova tenekela ifwe ukucita icintu ico tushingakumanisha ukucita. (Amalumbo 103:13, 14) Alishiba ukuti fwe bantunse abapangilwe mu cipasho cakwe, twalikwata amaka ya kuba aba mushilo, nangu ca kuti te kuti tufikepo sana sana muli bumushilo bwesu. (Ukutendeka 1:26) Bushe ici tacilemulenga ukufwaisha ukwishibilapo na fimbi pa fyo mwingapalama kuli uyu Lesa wa mushilo, Yehova?
[Icikope pe bula 9]
Na ifwe bene kuti twaba aba mushilo