Palameni Kuli Lesa
“Yehova E Mucemi Wandi”
LOLESHENI pa cikope cili pali lino ibula. Mufwile mwamona ukuti akana ka mpaanga akali pa cifuba ca kwa kacema kali akacingililwa. Mu Amalumbo 23, Baibolo yabomfya icilangililo ca kwa kacema ne mpaanga ku kulangilila ifyo Yehova asakamana abamupepa. Afwaya tuleumfwa abacingililwa nga filya fyumfwa abantu bakwe abamucetekela abengalanda nga filya fyalandile Davidi ukuti: “Yehova e mucemi wandi.”a—Icikomo 1.
Uwalembele Amalumbo 23 ni Davidi. Ilyo Davidi ali umwaice, ali ni kacema. Alishibe ifyo impaanga shikabila ne milimo ya kwa kacema. Davidi, uo Lesa alesakamana ilyo ali umwaice alembele ulwimbo ulo beta ukuti “ulwimbo ulwa bucetekelo.” Ishina lya kwa Lesa, ilya kuti Yehova, lilasangwa mu cikomo ca kubalilapo na mu ca kulekelesha ica Amalumbo 23. (Ifikomo 1, 6) Amashiwi yaba mu fikomo 2 ukufika ku 5 yalondolola inshila shitatu isho Yehova asakamaninamo abantu bakwe nga filya kacema asakamana impaanga shakwe.—Amalumbo 100:3.
Yehova alatungulula impaanga shakwe. Ilingi line impaanga shilaluba nga tashikwete kacema. E fyo na ifwe twaba, tulakabila uwa kututungulula. (Yeremia 10:23) Davidi alondolwele ukuti Yehova alatungulula abantu bakwe ku “mulemfwe” na ku “fifulo fya kutuushako ukwaba amenshi.” Abatungulula “mu tushila twa bulungami.” (Ifikomo 2, 3) Aya amashiwi yatusambilisha ukutila kuti twacetekela Lesa. Nga tulekonka ubutungulushi bwakwe ubwaba mu Baibolo, tukaba ne nsansa kabili tukacingililwa.
Yehova alacingilila impaanga shakwe. Impaanga nga tashikwete kacema, shilaba no mwenso kabili te kuti shi-icingilile. Yehova eba ababomfi bakwe ukuti tabafwile ukutiina, nangu fye ni lintu ‘bale-enda mu mupokapoka umwafiita fititi,’ e kutila, ilyo balepita mu mafya ayabipisha. (Icikomo 4) Yehova alabalinda, lyonse fye ali-ipekanya ukubafwa. Alapeela abamupepa amano na maka pa kuti bashipikishe amesho.—Abena Filipi 4:13; Yakobo 1:2-5.
Yehova alaliisha impaanga shakwe. Impaanga shishintilila pali kacema ukushifwaila ifya kulya. Tulakabila ifya kwa Lesa, kabili ni Lesa fye e wingatusambilisha pali ena. (Mateo 5:3) Icawama ca kuti Yehova ni Kapekape, alapekanishisha ababomfi bakwe itebulo lya fya kulya ifingi. (Icikomo 5) Muli Baibolo e lyo na mu fitabo filanda pa fya mu Baibolo, pamo nga ino magazini mulebelenga, e mo mwingasambilila ico twabela pano calo ne fyo Lesa afwaya kuli ifwe.
Davidi aleumfwa ukuti alicingililwe, alishibe ukuti nga atwalilila ukupalama kuli Kacema wakwe uwa ku muulu, Yehova ali no kulamusakamana “inshiku sha mweo [wakwe] shonse.” (Icikomo 6) Bushe na imwe mulafwaya ukucingililwa muli uyu musango? Nge fyo mufwaya, sambilileni ifyo mwingacita pa kuti mupalame kuli Yehova. Nga mwacite fi, mukalaumfwa abacingililwa ukuba mu maboko ya kwa Kacema Mukalamba, uutungulula, ukucingilila no kuliisha abatwalilila ukuba aba cishinka kuli ena.—Esaya 40:11.
Amalembo ya kubelenga mu May:
[Futunoti]
a Ababelenga Baibolo abengi babelesha amashiwi ya kuti “SHIKULU e Mucemi wandi.” Nga mulefwaya ukwishiba umulandu mu maBaibolo yamo mushabela ishina lya kwa Lesa ilya kuti Yehova, belengeni icitabo citila Bushe Cinshi Baibolo Isambilisha? pa mabula 195 ukufika ku 197. Abalemba ici citabo ni Nte sha kwa Yehova.