Fundeni Abana Benu

Icalengele Abantu Ukutemwa Dorka

IFWE bonse tulafwaya abantu ukututemwa. Bushe na iwe e fyo ufwaya?—a Baibolo yalishimika ilyashi pali Dorka, abantu abengi balimutemenwe sana. Uko aleikala, abengi balelanda iciGriki. E calengele ukuti balemwita ishina lya ciGriki ilya kuti Dorka.

Dorka aleikala mu musumba wa Yopa mupepi na Bemba Mukalamba. Ku Yerusalemu kwali fye amakilomita 56 ukufuma ku Yopa. Dorka aali pa basambi ba kubalilapo aba kwa Yesu.

Bushe ulemona shani, cinshi calengele ukuti Dorka abantu bamutemwe?— Baibolo yalanda ukuti alecita ifintu ifisuma ifingi kabili alepeela abantu ifya bupe ifisuma. Cimoneka kwati alepangila bamukamfwilwa ifya kufwala. Kabili aleshimikila abantu abengi pali Lesa wa cine, Yehova, nga filya Yesu alecita.

Nawishiba icabipa icacitikile Dorka?— Alilwele sana no kufwa afwa. Abanankwe bonse baali no bulanda. E calengele ukuti batume abantu aba kuya uko Petro aleikala ukwali amakilomita 16. Aba bantu bailemwita abati angufyanye ukuya ku ng’anda ya kwa Dorka. Ilyo Petro afikile, aingile mu muputule wa pa muulu umwali icitumbi. Banamayo bonse ninshi balelila, balamulanga ne fya kufwala ifyo Dorka ababiliile.

Awe Petro aeba bonse abali mu muputule ukuti bafumine pa nse. Kwena Petro na batumwa banankwe balecita ifipesha amano, nomba tabatalile ababuushapo umuntu uwafwa. Nomba bushe Petro acitile shani?—

Petro alifukeme mupepi ne citumbi, alapepa kuli Yehova. Ilyo apwishishe ukupepa aebele Dorka ukuti abuuke. Awe na Dorka abuuka! Petro e pa kumwikata na ku kuboko amwimya no kumwimya. E lyo aita bamukamfwilwa na baliko bonse ukuti bese bamumone. Bushe nawishiba ifyo bonse baumfwile ilyo abuukile?—

Ale nomba katulande pa fyo twingasambilila kuli ili lyashi ilya kwa Dorka ilya kubuuka ku bafwa. Icintu cimo ico twingasambililako ca kuti nga ulafwilisha abantu, abantu kuti bakutemwa sana. Cimbi icikalamba ico twingasambililako ca kuti Lesa akakwibukisha kabili kuti akutemwa sana pa fisuma ifyo ulecita. Takalabe ifisuma ifyo ucitila abantu bambi. Kabili ku ntanshi akakupeela umweo wa muyayaya mu calo cipya, e lyo bonse abakabamo bakaba ne nsansa.

Belenga mu Baibolo yobe

Imilimo 9:36-43

Ukusokolola 21:3-5

[Futunoti]